Nkonko ya babadi

Mbimpe kuamba ne: luse lua Yehowa ludi lutekesha buakane buende anyi?

Nansha mutu bantu bamba nunku, mbimpe kuepuka ngakuilu eu bualu udi umueneka usua kumvuija ne: luse lua Yehowa ludi lutekesha anyi lukanda buakane buende, bienze anu bu se: luse luende ndupite ngikadilu mushile wa buakane. Ki mbimpe kuamba nunku to.

Muaku wa tshiena-Ebelu udibu bakudimuine ne: “buakane” udi kabidi mua kumvuija “dilumbuluisha.” Ntshia bushuwa bua se: buakane bua Yehowa budi mua kumvuija kupesha muntu dinyoka didiye muakanyine, kadi budi kabidi mua kumvuija kufila lupandu kudi bantu badi baluakanyine. (Genese 18:20-32; Yeshaya 56:1; Malaki 4:2) Ke bualu kayi katuena mua kuangata buakane bua Yehowa bu ngikadilu mushile udi ukengela kutekesha nansha.

Muaku wa tshiena-Ebelu udibu bakudimune ne: “luse” udi mua kumvuija didikanda bua kufila dinyoka. Udi mua kumvuija kabidi dilejila muoyo wa luse mu bualu kampanda, kuambuluisha muntu udi mu dikenga.​—Dutelonome 10:18; Luka 10:29-37.

Yehowa udi Nzambi wa buakane ne wa luse. (Ekesode 34:6, 7; Dutelonome 32:4; Musambu 145:9) Buakane bua Yehowa ne luse luende mbipuangane bionso, ne bidi biumvuangana bimpe menemene. (Musambu 116:5; Hoshea 2:19) Ngikadilu yonso ibidi eyi idi ikumbanangana ne ikumbajangana bimpe menemene. Nunku tuetu basue kuamba ne: luse lua Yehowa ludi lutekesha buakane buende, nanku bidi bikengela tuetu kuamba kabidi ne: buakane buende budi butekesha luse luende.

Yeshaya wakamanyisha ne: ‘Yehowa udi windila bua kunuleja dinanga diende; ne bua muanda eu neadibishe bua kuleja luse; bualu bua Yehowa udi Nzambi udi ulumbulula biakane.’ (Yeshaya 30:18) Muaba eu Yeshaya udi uleja ne: buakane bua Yehowa budi bumusaka bua kuenzela bantu malu ne luse, kadi kabiena biumvuija ne: luse luende ludi lutekesha anyi lukanda buakane buende to. Yehowa udi uleja luse bualu udi muakane ne bualu udi kabidi ne dinanga.

Bushuwa, Yakobo wakafunda ne: “Luse ludi lutamba [anyi lutshimuna] dilumbulula kutumba.” (Yakobo 2:13b) Nunku, muaba eu Yakobo kêna wakula bua Yehowa to, kadi udi wakula bua bena Kristo badi baleja luse, tshilejilu, kudi bakengi ne bapele. (Yakobo 1:27; 2:1-9) Padibu balua ne bena luse ba nunku ku tshilumbuluidi, Yehowa udi uvuluka ngikadilu wabu ne udi ubabuikidila bubi buabu ku diambuluisha dia mulambu wa Muanende. Mushindu’eu ke udi ngikadilu wabu wa luse utshimuna dipisha dionso divuabu mua kubapisha nadi.​—Nsumuinu 14:21; Matayo 5:7; 6:12; 7:2.

Nunku ki mbimpe bua kuamba ne: luse lua Yehowa ludi lutekesha dilumbuluisha diende bienze bu se: buakane buende badi ne bua kubutekesha kudi luse nansha. Kudi Yehowa ngikadilu ibidi eyi idi ikumbanangana bimpe menemene. Idi ikumbajangana ne badi bayikumbaja kudi ngikadilu mikuabu ya Yehowa bu mudi dinanga ne meji.