Nkonko ya babadi

Muntu yeye mudishipe, bidi mua kuikala bimpe bua musadidi muena Kristo kuenzaye muyuki kumpala kua kumujikabu anyi?

Bidi mua kufikila musadidi yonso muena Kristo bua kumvua kuondo kende ka muoyo katoke ku mêsu kua Nzambi kamusaka bua kuangata dipangadika dia kuenza muyuki kumpala kua kujika muntu kampanda udi mumueneke ne: mmudishipe. Padiye wangata dipangadika edi, udi ne bua kutangila nkonko idi ilonda eyi: Mmunyi mudi Yehowa umona didishipa? Muntu eu mmudishipe tshia bushuwa anyi? Uvuaku ne disama dia mpala peshi dibungama dikole didi dimufikishe ku didishipa anyi? Mmushindu kayi utu bantu ba muaba uvuaye au bamona didishipa dia muntu?

Bu mutudi bena Kristo, tudi ne bua kumanya mushindu udi Yehowa umona didishipa dia muntu. Yehowa utu wangata muoyo wa muntu bu tshintu tshia mushinga mukole ne tshia tshijila. (Genese 9:5; Musambu 36:9) Kudishipa nkubi ku mêsu kua Nzambi. (Ekesode 20:13; 1 Yone 3:15) Bualu ebu budi bupangisha musadidi muena Kristo bua kuenza muyuki kumpala kua kujika muntu udi mudishipe anyi?

Angata tshilejilu tshia Shaula Mukalenge wa Isalele. Pakamonaye ne: kavua mua kushala ne muoyo mu mvita yende ya ndekelu yakaluanganaye ne bena Peleshete, pamutu pa kulekela bua baluishi bende kumuenzelabu bibi, ‘Shaula wakatula muele wende wa mvita, wakadituaku.’ Pakalua bena Peleshete kusangana tshitalu tshiende, bakatshikudika ku tshimanu tshia lumbu lua musoko wa Bete-shana. Pakamanya bantu ba mu Yabesha-gilada bualu buvua bena Peleshete benze, bakatulula tshitalu e kutshioshabu. Pashishe kuangatabu mifuba yende buobu kuyijika. Bakajila too ne biakudia matuku muanda-mutekete, bu muvua tshilele tshivua natshi bena Isalele pavuabu benza madilu. (1 Samuele 31:4, 8-13; Genese 50:10) Pakumvua Davidi (muela manyi wa Yehowa) lumu lua tshivua bena Yabesha-gilada benze etshi, wakamba ne: ‘Nuenu nusankishibue kudi Yehowa, bualu bua nuenu nuakaleja mukalenge wenu Shaula [luse lujalame], nuakamujika. Yehowa anuleje luse lujalame ne bulelela.’ (2 Samuele 2:5, 6) Mukanda wa Nzambi kawena utuleja ne: bavua bapishe bena mu Yabesha-gilada bua dienzela diabu dia Mukalenge Shaula tshitudi mua kuangata bu malu avuabu benza mu tshilele tshiabu kumpala kua kujika bafue nansha. Kadi fuanyikija bualu ebu ne tshilejilu tshia bantu bavuabu babenge bua kujika bua bienzedi biabu bibi. (Yelemiya 25:32, 33) Musadidi muena Kristo udi mua kukonkonona muanda eu wa malu a Shaula padiye wangata dipangadika dia kuenza peshi kubenga kuenza muyuki wa kumpala kua kujika muntu udi mudishipe.

Musadidi muena Kristo eu udi mua kukonkonona kabidi tshipatshila tshitutu tuenzela muyuki kumpala kua kujika muntu. Bantemu ba Yehowa mbashilangane ne bantu badi balongesha ne: anyima katu ufua, bualu bobu kabatu bajikangana ne ditabuja dia dishima dia se: mufue udi uya muaba mukuabu to. Muyuki eu kawena ne diambuluisha kudi muntu udi mufue to, kadi kipatshila kawu nka kusamba badi bafuishe ne kumvuija badi balue ku madilu mushindu udi bafue. (Muambi 9:5, 10; 2 Kolinto 1:3-5) Bualu bukuabu bua mushinga butudi tuenzela muyuki eu mbua kuambuluisha bantu badi balue ku madilu bua kuelabu meji bua mushindu udi muoyo wetu muikale wa matuku mabala ku minu. (Muambi 7:2) Malu aa neakumbane bu bobu mua kuenza muyuki kumpala kua kujika muntu udi mudishipe anyi?

Bulelela, bamue badi mua kuela meji ne: muntu eu uvua mudishibeye ku bukole, yeye mumanye bimpe se: uvua wenza mpekatu ku mêsu kua Yehowa. Kadi bitu bipepele misangu yonso bua kujadika bualu ebu anyi? Kabienaku mua kuikala bimufikile bua kuenza bualu ebu mu mpukapuka kayi mubuelele meji bimpe anyi? Bamue bantu batu bamba kudishipa batu balua kushintulula lungenyi luabu ne babenga bua kudienzela bibi. Muntu ukadi mufue kêna mua kunyingalala bua bualu budiye muenze to.

Bualu bukuabu bua mushinga ke bua masama a mpala ne dibungama dikole bitu bisaka bantu bavule ku didishibeya. Bantu aba ke batudi mua kubikila menemene ne: bafue lufu lua didishipa. Bilondeshile amue  makonkonona adibu benze, bantu 90 pa lukama ba ku badi badishipa batu anu ne disama kampanda dia mutu, dibungama, peshi bavua ne tshilele tshia kunua diamba anyi bintu bikuabu bidi bikuata. Yehowa neabuikidile bantu badi badishipe bikale ne ntatu ya malu a mushindu’eu mu lungenyi anyi? Katuena ne bukokeshi bua kujadika bikala muntu udi mudishipe muenze mpekatu udi Yehowa kayi mua kumubuikidila to. Musadidi muena Kristo udi pamuapa mua kukonkonona bua kumanya malu ne masama avua nawu eu udi mufue padiye ujinga kuangata dipangadika dia kuenza anyi kubenga kuenza muyuki kumpala kua kujikabu mufue eu.

Bualu bukuabu bua kukonkonona mbuebu: Mmunyi mudi bantu ba muaba unudi au bamona didishipa ne lufu lua muntu eu? Muanda eu udi ne mushinga wa bungi kudi bakulu, bualu badi baditatshisha bua lumu lua tshisumbu tshia Bantemu ba Yehowa tshia muaba udibu. Bilondeshile mushindu utu bantu ba muaba au bangata didishipa dia muntu ne nangananga mushindu udibu bangata didishipa dia muntu udi panshi eu, bakulu badi mua kusungula bua kubenga kuenza muyuki eu patoke peshi mu Nzubu wa Bukalenge.

Kadi, bikalabu balombe musadidi muena Kristo bua kuenza muyuki eu mulongolola kudi bantu bakuabu, udi pamuapa mua kuangata dipangadika diende yeye nkayende dia kuwenza. Biangataye dipangadika edi, udi ne bua kuikala ne budimu bua kubenga kuamba kujadika muikala muntu eu mua kubika anyi kubenga kubika ku lufu. Ditekemena dionso dia kubika ku lufu matuku atshilualua didi anu mu bianza bia Yehowa, kakuena muntu udi ne bukokeshi bua kuamba ne: mufue eu neabike peshi kakubika to. Muanetu wenza muyuki eu udi mua kutamba kuimanyina pa malu malelela adi Bible wamba pa bidi bitangila lufu ne kukolesha badi bafuishe.