Tshiyole tshia nzala tshikadi pa kujika!

BUMUE udi mua kudiebeja ne: ‘Ntshiyole tshia nzala ya mushindu kayi eyi?’ Nnzala ya biakudia bia mu nyuma! Muprofete wa kale (muena Ebelu) wakamba bua tshiyole etshi ne: ‘Mukalenge Yehowa udi wamba ne: Monayi, mu matuku alualua, nentume tshiyole pa buloba, tshidi katshiyi bu tshiyole tshia biakudia, ne nyota idi kayiyi bu nyota ya mâyi, kadi tshiyole tshia kumvua mêyi a Yehowa.’ (Amosa 8:11) Bua kujikija tshiyole tshia nzala ya mu nyuma etshi, bantu 48 ba mu kalasa ka 112 ka Tshilongelu tshia Bible tshia Gilada tshia Société Watchtower tshidi mu Patterson (mu New York) badi baya miaba 19 mu kontina anyi bitupa binene 5 bia buloba ne bidiila.

Kabena baya ne minyinyi ne midioko bietu bia bushuwa ebi to, badi baya ne dimanya, malu mamonamona ne dilongesha. Mbalonge Bible bikole mu ngondo itanu bua kukolesha ditabuja diabu bua kuenza mudimu wa bu-misionere mu matunga menyi. Mu dia matuku 9 a ngondo muisatu mu 2002, bantu 5 554 bavua balue mu tshisangilu tshia difila dia mapoloma bakateleja programe ne disanka.

Stephen Lett (muena mu Kasumbu Kaludiki ka Bantemu ba Yehowa) wakunzulula tshialu ne disanka dionso. Wakajingila bantu bavua bafumine mu matunga makuabu difika dilenga dia pa buadi. Pashishe yeye kubanga kuleja mudi mêyi a Yezu a ne: “Nuenu nudi butoke bua bena panu” akumbanyina mudimu uvua muindile ba-misionere abu. (Matayo 5:14, MMM) Wakumvuija ne: ‘Mu mudimu wenu “nenutokeshe” nseke mivule ya midimu milenga ya Yehowa, bua kufikisha bena mutshima umue ku dimona bulenga bua Yehowa ne malu adiye mulongolole.’ Muanetu Lett wakakankamija ba-misionere aba bua kuenza mudimu ne butoke bua Dîyi dia Nzambi bua kuela malongesha a dishima patoke, bua kuleja bantu badi bakeba bulelela dikasa dia kulonda.

Ngikadilu mulenga udi ne mushinga mukole

Lett ujikija, Baltasar Perla (muena ku komite wa filiale wa États-Unis) wakangata e kuenza umue wa ku miyuki ya kuambuluisha nayi balongi bua kuenza mudimu wa bu-misionere bimpe. Muyiki wende uvua ne tshiena-bualu ne: “Wikale ne bukole ne mutshima wa dikima, wenze bualu ebu.” (1 Kulondolola 28:20) Bakapesha mukalenge Solomo wa mu Isalele wa kale mudimu mukole wa kuenza, uvuaye kayi muanji kuenza to: kuibaka ntempelo mu Yelushalema. Solomo wakaditua mu diwenza, wakajikija ntempelo ne diambuluisha dia Nzambi. Muanetu Perla wakapatuilaku balongi dilongesha edi: ‘Nudi bapete mudimu mupiamupia: wa bu-misionere, mbimpe kuikala ne bukole ne dikima.’ Balongi bakumvua bimpe pakabalejaye ne: Yehowa kakubalekela biashalabu pabuipi nende. Muanetu Perla wakasaka bateleji pakakomeshaye muyuki ne bualu buvuaye mudimuenena. Wakamba ne: ‘Mu bu-misionere nudi mua  kukumbaja malu mimpe a bungi. Ba-misionere ke batu babueje bulelela mu dîku dietu.’

Samuel Herd (mukuabu muena mu Kasumbu Kaludiki) wakenza muyuki uvua ne tshiena-bualu etshi ne: “Eyemena Yehowa bua malu kuendawu bimpe.” Balongi badi babuela mu mudimu wa bu-misionere; kadi bua kuwenza bimpe bitu bikengela nangananga kuikala ne malanda mimpe ne Yehowa. Muanetu Herd wakabadimuisha ne: ‘Nudi balonge malu a Bible a bungi mu Gilada. Nudi baalonge ne disanka dionso. Kadi mpindieu, bua nuenu kuenza bimpe, nudi ne bua kupatula malu onso anudi balonge aa.’ (Bienzedi 20:35) Ba-misionere nebapete mpunga mivule ya ‘kudipongolola’ bua bakuabu.​—Filipoi 2:17.

Mmibelu kayi ya ndekelu yakapesha balongeshi balongi? Mark Noumair uvua ne tshiena-bualu tshiashila pa Luta 3:18, tshia ne: “Anji somba too ne pawamona nshikidilu wa bualu.” Muyiki ewu uvua musombele pa tshilejilu tshia Naomi ne Luta. Muanetu Noumair wakakankamija balongi bua kueyemena malu malongolola kudi bulongolodi bua Nzambi bua pa buloba ne bua kunemeka aba badibu bapeshe bukokeshi mu buine bulongolodi ebu. Wakalenga balongi ku muoyo pakambaye ne: ‘Nekuikale dimue dîba dinuapanga bua kumvua dipangadika  kampanda didibu banuangatshile anyi numvua bibi bualu nudi numona ne: bavua mua kuikala benze malu munga mushindu. Tshinuenza ntshinyi? Nenujukile kuulu bua kudiangatshila malu mu bianza peshi “nenuanji kusomba,” nueyemena bulombodi bua Yehowa bamanye ne: ku ndekelu kua bionso neenze bua tshipeta tshimpe kupatukatshi?’ (Lomo 8:28) Bua mudimu wabu mu matunga menyi kuendawu bilenga, wakabela ba-misionere aba bua ‘kuteka lungenyi luabu luonso pa mua kuendesha malu a Bukalenge bimpe ne kumona mudi bulongolodi bua Yehowa buenda buya pamutu pa kuateka pa bumuntu bua bantu.’

Wallace Liverance (misionere wa kale kadi udi ulongesha mu Gilada mpindieu) wakenza muyiki wa nkomenu mu tshitupa tshia kumpala tshia miyuki. Mutu wende wa bualu uvua ne: “Shalayi batabale, shalayi mu mudimu wa Nzambi.” Wakaleja muvua muprofete Danyele mufike ku dijingulula ne: dipatuka dia bena Isalele mu bupika dikavua pabuipi pakamonaye Babulona ukuluka ne pakabalaye malu avua Yelemiya mudianjila kumanyisha. (Yelemiya 25:11; Danyele 9:2) Danyele uvua mumanye tshikondo ne dîba bia Nzambi. Ke tshiakamuambuluisha bua kushala muindile dikumbana dia dilongolola dia Nzambi. Uvua mushilangane ne bena Isalele ba mu tshikondo tshia Hagai bavua bamba ne: ‘Tshikondo ki ntshianji kulua.’ (Hagai 1:2) Bakapua muoyo bikondo biabu abi e kudituabu mu dikeba bubanji ne dienza abu malu, kulekelabu mudimu uvuabu babapatuile mu Babulona: wa kuibakulula ntempelo. Muanetu Liverance wakoya ngombo ne mêyi aa: “Nanku shalayi batabale, nuikale balame ku muoyo dîba dionso dilongolola dia Yehowa.”

Pashishe, mulongeshi wa Gilada Lawrence Bowen wakalombola tshitupa tshivua ne mutu wa bualu ewu: “Yehowa udi ubenesha badi bakuata mudimu ne Dîyi dia muoyo.” (Ebelu 4:12) Tshitupa etshi tshivua tshitangila malu mamona kudi balongi; bavua baleja mudi Yehowa ubenesha badi bakuata mudimu ne Bible bua kuyisha ne kulongesha. Muanetu Bowen wakamba ne: Yezu uvua mushile basadidi ba Nzambi bonso tshilejilu tshilenga. Kusakidilaye ne: ‘Yezu uvua muambe bulelela pakambaye ne: malu avuaye ulongesha kaavua ende to, avua Dîyi dia Nzambi.’ Bantu ba muoyo umue bakajingulula bulelela ne bakabulonda. (Yone 7:16, 17) Ke tshitu tshienzeka kabidi lelu.

Dilongesha dia Gilada didi diambuluisha muntu bua mudimu muimpe wonso

Kunyima, Richard Abrahamson ne Patrick LaFranca (bakadi banenge mu dîku dia Betele bikole) bakela balongi basambombo ba kale ba Gilada nkonko. (Balongi aba badi mu midimu ya ku dîba ne ku dîba ya pa buayi mishilangane.) Balongi ba kalasa ka 112 bakakola ku muoyo pakumvuabu ne: nansha mu mudimu kayi uvuabu benza bidimu bia bungi panyima, bantu basambombo aba bavua batungunuke ne kulonda malongesha abu a mu Gilada pa bidi bitangila dilonga dia Bible, dikebulula malu ne disomba ne bantu.

Theodore Jaracz (muena mu Kasumbu Kaludiki) ke wakela muyuki munene wa mu programe. Uvua ne mutu wa bualu ne: “Tshitu tshienzeka patudi tutantamena lukinu lua Satana.” Mu ngondo itanu, balongi bavua muaba uvua dinanga ne malu a Nzambi matula mapuwe. Kadi anu bu muvuabu babambile mu tulasa tuabu, bantu netu pa buloba apa mbatukine. Badi bakengesha basadidi ba Yehowa pa buloba bujima. (Matayo 24:9) Muanetu Jaracz wakenza mudimu ne miyuki mivule ya mu Bible e kuamba ne: ‘Tuetu ke badi Diabolo utua munu. Nanku tudi ne bua kukolesha malanda etu ne Yehowa ne kudikankamija bua kutantamena mateta.’ (Yobo 1:8; Danyele 6:4; Yone 15:20; Buakabuluibua 12:12, 17) Muanetu Jaracz wakakoma ne: nansha mudi bantu batungunuke ne kukina basadidi ba Nzambi, bilondeshile Yeshaya 54:17 ‘tshia mvita tshionso tshidibu batutudila katshiakutuenzela bualu to. Yehowa neatusungile mu tshiende tshikondo ne mu wende mushindu.’

Kakuyi mpata, bena kalasa ka Gilada ka 112 bavua ‘balongolola tshishiki’ bua kujikija tshiyole tshia nzala tshia biakudia bia mu nyuma mu miaba ivuabu baya kuenzela mudimu. (2 Timote 3:16, 17) Tudi bindile ne muoyo kuulu kuulu bua kupeta ngumu ya mushindu wambilabu bantu mukenji mu matunga au.

[Kazubu mu dibeji 23]

MALU ADI ATANGILA BALONGI

Bungi bua matunga adibu bafumine: 6

Bungi bua matunga adibu babatume: 19

Bungi bua balongi: 48

Muayene wa bidimu: 33,2

Muayene wa bidimu bienza mu bulelela: 15,7

Muayene wa bidimu mu mudimu wa ku dîba ne ku dîba: 12,2

[Tshimfuanyi mu dibeji 24]

Kalasa ka 112 ka Gilada, Tshilongelu tshia Bible tshia Watchtower

Mu liste udi kuinshi eku mbabale milongo batuadijile kumpala baya batangile panyima; mbafunde mêna babangile ku dia bakaji batangile ku dia balume mu mulongo wonso.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.