Udi ne bua kuikala muena kalengu anyi?

BANTU bavule badi pamu’apa mua kuela meji ne: mbimpe padibu bangata muntu bu muena kalengu, kayi utshiuka malu, mutalale, kayi ne bualu budiye ubenga. Kadi, kudi diumvuija dikuabu dia kalengu. Bible udi wamba ne: ‘Kalengu ka bapote nekababutule.’ (Nsumuinu 1:32) Mêyi aa adi umvuija tshinyi?

Mu Bible mikuabu mbakudimune muaku wa mu tshiena-Ebelu tshia ku ntuadijilu ne miaku eyi: “dibenga kutshiuka malu.” (The New English Bible) Mu ngumvuilu eu, kalengu kadi kapetangana ne lulengu ne dibenga kutshiuka malu, ne ke bualu kayi kalengu ka nunku kadi kumvuangana kabidi ne bupote anyi dipanga dia lungenyi.

Mu bidimu lukama bia kumpala, bena Kristo ba mu tshisumbu tshia Laodikiya bavua balengulula bilema bivuabu nabi mu nyuma anyi kabavua babimona bu bualu to. Bavua baditambisha bua muvuabu kabayi ‘bakengela tshintu.’ Yezu Kristo wakabalulamija, kubambilaye bua kupetululabu lukunukunu luabu lua bena Kristo.​—Buakabuluibua 3:14-19.

Nansha bantu ba mu matuku a Noa bavua pabu ne kalengu. Bavua badifile anu mu dikeba bintu bia mu nsombelu; bavua “badia, banua, baselangana, baselesha bana babo ba bakaji, . . . kabavua bamanye bualu too ne pakalua mvula kubabutula bonso.” Ke Yezu kuamba kabidi ne: “Ke muafika Muana wa muntu nanku.”​—Matayo 24:37-39, MMM.

Milayi ya mu Bible ikadi mikumbane idi ileja ne: tudi mu tshikondo tshia “[dikalaku dia] Muana wa muntu,” udi muikale Yezu Kristo. Nunku tuepukayi kalengu anyi dilengulula malu ne diditambisha.​—Luka 21:29-36.