Didilongela didi ditulongolola bua kuikala balongeshi

‘[Welangane meji pa] malu aa, udifile ne mutshima webe wonso kudiwu, bua kudiunda kuebe kumueneke kudi bonso. Wikale mudimuke ku malu ebe ne ku diyisha diebe.’​—1 TIMOTE 4:15, 16.

1. Ntshinyi tshidi tshilelela pa bidi bitangila dîba ne didilongela?

 BIBLE udi wamba mu Muambi 3:1 ne: “Tshintu tshionso tshidi ne tshikondo tshiatshi.” Bidi nanku nansha bua didilongela. Bantu ba bungi batu ne lutatu bua kuelangana meji pa malu a mu nyuma pa dîba peshi muaba udi kauyi muakanyine. Tshilejilu, panyima pa dituku dia mudimu mukole ne pa didia biakudia bimpe, udiku mua kumvua muoyo wa kulonga, nangananga paudi mudiolole mu nkuasa webe wa bulalu kumpala kua televizion anyi? Imue misangu kuakumvua muoyo wa kulonga to. Kadi tshia kuenza ntshinyi? Mbimueneke patoke ne: tudi ne bua kusungula dîba ne muaba wa kulongela ne kipatshila ka kupetela masanka a bungi ku didienzeja dietu.

2. Ndîba kayi ditu diakanyine misangu ya bungi bua kudilongela?

² Ba bungi badi bamona ne: dîba didi dikumbane bua kulongabu mmu dinda patshidibu ne lungenyi lutalale. Bakuabu batu bindila dikisha dia mu midi bua kulonga mu minite mikese. Mona mudi bilejilu bidi bilonda ebi bileja mushinga udi nawu dîba bua malu a mushinga a mu nyuma adi akengela kuenza. Davidi Mukalenge wa kale wa Isalele wakafunda ne: ‘Ungumvuije luse  luebe lujalame ne dinda dionso, bua ndi ngeyemena kuudi. Ummanyishe njila undi ne bualu bua kuendela, bualu bua ndi mbisha muoyo wanyi kuudi.’ (Musambu 143:8) Muprofete Yeshaya wakaleja dianyisha dia muomumue pakambaye ne: ‘Mukalenge Yehowa wakumpa ludimi lua badi bayila bua meme kumanya mua kukuatshisha muntu mupungile ne dîyi. Ku dinda ku dinda udi [untabeja], udi utelejija ditshi dianyi bua kumvua bianyi bu mudi bayidi bumvua.’ Bualu bua mushinga mukole mbua se: bidi bikengela kulonga ne kuyukilangana ne Yehowa patudi ne lungenyi lupole, ee dîba dionso dia mu dituku didi lungenyi luetu mua kuikala nanku.​—Yeshaya 50:4; Musambu 5:3; 88:13.

3. Nsombelu kayi idi miakanyine dilonga didi dipatula bipeta bilenga?

³ Bualu bukuabu budi mua kulengeja dilonga nkubenga kusombela mu nkuasa munefuke peshi wa bulalu. Eu ki mmushindu wa kushala ne lungenyi lukazamuke to. Patudi tulonga, mbimpe lungenyi luetu luikale luenza mudimu, kadi ditamba kuikala basombe bimpe nanku badilekelele didi mua kupatula bipeta bibi. Bua kulonga ne kuelangana meji bimpe, bidi bikengela kabidi kuikala kule ne mitoyi ne malu anyi bintu bidi bikebesha ditanaji. Kulonga ne radio, televizion mutemesha peshi ne bana bakeba kukoka ntema yebe kakuena kupatula bipeta bimpe to. Pavua Yezu ujinga kuelangana meji, uvua uya muaba uvua kauyi mitoyi. Wakaleja kabidi ne: bidi ne mushinga bua kuya muaba wa pa nkayebe bua kusambila.​—Matayo 6:6; 14:13; Mâko 6:30-32.

Didilongela didi dituambuluisha bua kuandamuna nkonko ya bantu

4, 5. Mmu mishindu kayi mudi broshire wa Utulomba muikale wambuluisha mu dienza dia mudimu?

⁴ Didilongela didi dituala disanka patudi tuenza mudimu ne mikanda ne bintu bikuabu kabukabu bia kulonga nabi Bible bua kumvua tshiena-bualu kampanda mu buondoke buatshi, nangananga patudi tuenza nunku bua kuandamuna lukonko ludi muntu kampanda mutuele ne muoyo mujima. (1 Timote 1:4; 2 Timote 2:23) Ku ntuadijilu, bapiabapia ba bungi batu balonga broshire wa Ntshinyi tshidi Nzambi utulomba?, * udiku mpindieu mu miakulu 261. Mmukanda mupepele kadi muikale mujalame, wonso mujima mmushindamene pa Bible. Udi wambuluisha badi baubala bua kumvua ne lukasa tshidi Nzambi ulomba bua ntendelelu mulelela. Kadi, bunene bua broshire eu kabuena bukumbana bua kufunda malu a bungi bua kumona mua kubuela mu buondoke bua tshiena-bualu tshionso to. Bikala mulongi webe  wa Bible ujula nkonko ya mushinga pa biena-bualu bikuabu bia mu Bible binudi nukonkonona, mmunyi muudi mua kupeta malu makuabu a mu Bible amuambuluisha bua kuandamuna nkonko ayi?

⁵ Bua aba badi ne tshintu bu mudi Watchtower Library CD-ROM mu muakulu wabu, mbipepele bua kupeta mumvuija a mu mikanda ya bungi mu ordinatere. Kadi netuambe tshinyi bua aba badi kabayi ne bintu ebi? Tukonkononayi biena-bualu bibidi bidi mu broshire wa Utulomba bua kumona mushindu utudi mua kuvudija ngumvuilu wetu ne kumanya mua kuandamuna mu bule ne butshiama, nangananga padi muntu ujula nkonko bu eyi: Nzambi nnganyi ne Yezu uvua bishi?​—Ekesode 5:2; Luka 9:18-20; 1 Petelo 3:15.

Nzambi nnganyi?

6, 7. (a) Lukonko kayi ludi lujuka pa bidi bitangila Nzambi? (b) Ntshilema kayi tshinene tshivua mulombodi kampanda wa tshitendelelu muenze mu muyuki wende?

⁶ Dilongesha dibidi dia broshire wa Utulomba didi diandamuna lukonko lua mushinga elu: Nzambi nnganyi? Edi ndilongesha dinene bualu muntu kêna mua kutendelela Nzambi mulelela bikalaye kayi mumumanye peshi pamuapa welakana bua dikalaku Diende to. (Lomo 1:19, 20; Ebelu 11:6) Pabi pa buloba bujima bantu mbalamate malongesha nkama ne nkama pa tshilumbu tshia kumanya ne: Nzambi nnganyi. (1 Kolinto 8:4-6) Malongesha a bitendelelu bionso adi ne diandamuna dishilangane pa bumuntu bua Nzambi. Bitendelelu bia bungi bia mu Bukua-buena-Kristo bitu biangata Nzambi ne: udi Busatu Bunsantu. Mulombodi munene kampanda wa tshitendelelu wa mu ditunga dia États-Unis wakenza muyuki uvua ne tshiena-bualu ne: “Udi mumanye Nzambi anyi?” kadi kakatela dîna dia Nzambi musangu nansha umue mu muyuki wende to, nansha muvuaye mutele mvese ya bungi ya mu Mifundu ya tshiena Ebelu. Bushuwa, wakabala Bible uvua ne muaku udi mua kuangata mumvuija a bungi ne kauyi muikale dîna wa “Mukalenge” pamutu pa Yehowa anyi Yahweh.

⁷ Mulombodi wa tshitendelelu au uvua ne bualu bua mushinga buvuaye kayi mumanye pakabalaye Yelemiya 31:33, 34: “‘Muntu nansha umue kakulongesha kabidi muinende, ne muntu yonso nansha muanabu, wamba ne: “Umanye Mukalenge,” [mu tshiena Ebelu, “Umanye Yehowa”] bualu buonso nebammanye Meme, kumbukila kudi mutambe bupuekele too ne ku munene wabu,’ ke mudi Mukalenge [tshiena Ebelu, Yehowa] wamba.” Mu Bible wakabalaye kamuvua dîna disunguluke dia Nzambi dia Yehowa to.​—Musambu 103:1, 2.

8. Ntshinyi tshidi tshileja mushinga wa kuenza mudimu ne dîna dia Nzambi?

⁸ Musambu wa 8:9 udi uleja tshidi kuenza mudimu ne dîna dia Yehowa kuikadile ne mushinga wa bungi: ‘Yehowa, Mukalenge wetu, ke mudi dîna diebe ne butumbi pa buloba buonso nunku!’ Fuanyikija mêyi aa ne: “Mfumu, Mukalenge wetu dina diebe bunenedio pa buloba bujima!” (Musambu 6:10, Mukenji Mulenga) Kadi anu mutuvua bamone mu tshiena-bualu tshishale, tudi mua kupeta “dimanya dia malu a Nzambi” tuetu balekele Dîyi diende ditutokeshila malu mu nyuma. Kadi mmukanda wa kulonga nawu Bible kayi udi mua kuandamuna bimpe menemene nkonko yetu pa mushinga udi nawu dîna dia Nzambi?​—Nsumuinu 2:1-6.

9. (a) Mmukanda kayi udi mua kutuambuluisha bua kumvuija mushinga wa dienza mudimu ne dîna dia Nzambi? (b) Mmunyi mudi Bible ya bungi mipangile kuleja dîna dia Nzambi kanemu?

⁹ Tudi mua kutangila mu broshire wa Le nom divin qui demeure à jamais (Dîna dia Nzambi didi dishala tshiendelele), uvuabu bakudimune mu miakulu 69. * Tshitupa tshidi ne tshiena-bualu ne: “Le nom divin​—sa signification et sa prononciation” (dibeji 6-11) tshidi tshileja patoke ne: Tetragrame wa mu tshiena Ebelu (“maleta anayi” mu tshiena-Gelika) udi misangu mitue ku 7 000 mu mifundu ya kale ya tshiena-Ebelu. Kadi balombodi ba bitendelelu ne bakudimunyi ba Buena-Yuda ne ba mu Bukua-buena-Kristo mbadiumbushe ku bukole mu Bible ya bungi idibu bakudimune. * Mmunyi mudibu mua kuamba mudibu bamanye Nzambi ne kuikala ne malanda mimpe nende padibu  babenga kumubikila mu dîna diende? Dîna diende dilelela didi diambuluisha bua kumanya disua diende ne kumanya mudiye. Bualu bukuabu: mmushinga kayi udi nawu tshitupa tshia disambila dia tshilejilu dia Yezu tshia se: “Tatu wetu udi mu diulu, banemeke dina diebe” bikalabu kabayi nansha benza mudimu ne dîna dia Nzambi to?​—Matayo 6:9; Yone 5:43; 17:6.

Yezu Kristo nnganyi?

10. Mmu mishindu kayi mutudi mua kupeta diumvuija dia muoyo wa Yezu ne mudimu wende mu kabujima?

¹⁰ Dilongesha disatu dia mu broshire wa Utulomba didi ne tshiena-bualu ne: “Yezu Kristo nnganyi?” Mu bikoso bisambombo tshianana, didi diakula bua Yezu mu tshikoso, kuvuaye mufume ne kavuidila kende pa buloba. Kadi wewe musue kumanya muyuki mujima wa muoyo wende, kakuena muyuki mutambe buimpe (pa kumusha Evanjeliyo) bu udi mu mukanda wa Muntu mutamba bunene wa katshia ne katshia, udi mu miakulu 111. * Mu mukanda eu mudi muyuki mujima mulondangane wa muoyo wa Yezu ne malongesha ende, muangatshila mu Evanjeliyo inayi. Nshapita yawu 133 idi yakula bua malu a mu nsombelu wa Yezu ne mudimu wende. Bua kumanya mushindu mukuabu wa muyuki wa Yezu bala mukanda wa Étude perspicace, volime 2, mu tshiena-bualu tshia “Jésus Christ.”

11. (a) Ntshinyi tshidi tshisunguluja Bantemu ba Yehowa pa ditabuja diabu dia Yezu? (b) Ngimue mvese kayi idi ibenga patoke dilongesha dia Busatu Bunsantu, ne mbroshire kayi udi wambuluisha bikole pa bualu ebu?

¹¹ Mu Bukua-buena-Kristo dikokangana pa bidi bitangila Yezu ndishindamene pa tshilumbu tshia kumanya ni udi “muana wa Nzambi” anyi “Nzambi Muana,” mbuena kuamba ne: dikokangana pa tshidi mukanda kampanda ubikila ne: “bualu bunene busokoka bua ditabuja dia bena Kristo,” Busatu Bunsantu. (Le Catéchisme de l’Église Catholique) Bashilangane ne bitendelelu bia mu Bukua-buena-Kristo, Bantemu ba Yehowa badi bitaba ne: Yezu uvua mufukibue kudi Nzambi kadi kêna Nzambi to. Bualu ebu mbukonkonona bimpe mu broshire wa Tudi ne bua kuitabuja Busatu Bunsanto anyi?, * uvuabu bakudimune mu miakulu 95. Munkatshi mua mvese ya bungi idimu idi mibengangane ne dilongesha dia Busatu Bunsantu mudi: Mâko 13:32 ne 1 Kolinto 15:24, 28.

12. Ndukonko kayi lukuabu ludi ne mushinga kutudi?

¹² Malu atudi bakonkonone aa pa bidi bitangila Nzambi ne Yezu Kristo adi ambuluisha bua kuleja mishindu itudi mua kudilongela ne kipatshila ka kuambuluisha badi kabayi ne bulelela bua mu Bible bua kupetabu dimanya dilelela. (Yone 17:3) Kadi netuambe tshinyi bua aba bakadi badisange ne tshisumbu tshia bena Kristo bidimu bia bungi? Bua matuku a bungi akadibu benze ne dimanya dia Bible, batshidiku anu bakengela kudimuka bua kudilongela Dîyi dia Yehowa anyi?

Bua tshinyi ‘kudimuka’?

13. Mmuenenu kayi mubi udi bakuabu mua kuikala nende pa didilongela?

¹³ Bamue bakadi benza bidimu bia bungi mu tshisumbu badi mua kupona mu tshilele tshibi tshia kuikala kueyemena anu dimanya dia Bible divuabu bapete mu bidimu biabu bikese bia ntuadijilu pakaluabu Bantemu ba Yehowa. Mbipepele bua kudiambila ne: “Tshiena dijinga ne kulonga bia bungi bu bapiabapia to. Anji tangila bungi bua misangu ne bidimu bindi mubale Bible ne mikanda ya kumulonga nayi.” Ebi bidi mua kufuanangana ne kuamba ne: “Tshiena kabidi nkengela kutabalela ndilu wanyi mpindieu to bualu mona bungi bua biakudia binkadi mudie.” Tudi bamanye bimpe ne: mubidi wetu udi ulomba diudisha biakudia bimpe dituku dionso, bilamba bilenga bua kuwulama ne makanda a mubidi ne bukole. Kabiena bitambe kuikalaku nanku bua tuetu kulama makanda anyi bukole buetu bua mu nyuma anyi?​—Ebelu 5:12-14.

14. Bua tshinyi bidi bikengela kuikala badimuke misangu yonso?

¹⁴ Ke bualu kayi tuetu bonso, nansha bikale tukadi balonge Bible katshia ku kale anyi to, tudi ne bua kulonda mubelu wa Paulo wakapeshaye Timote, (ukavua mu tshikondo atshi muntu mukole mu nyuma, mutangidi uvua ne majitu a bungi) ne: ‘Wikale mudimuke ku malu ebe ne ku diyisha diebe. Unanukile kushala mu malu â; bua pawenza nunku, neudisungile wewe ne bobo kabidi badi bumvua meyi ebe.’ (1 Timote 4:15, 16) Bua tshinyi tudi ne bua kulonda mubelu wa Paulo? Vuluka ne: Paulo wakamba kabidi ne: tudi  tuluangana ne “mateyi a Diabolo” ayi madimu ende ne “bisumbu bia nyuma mibi bidi mu miaba ya mu diulu.” Pashishe wakadimuija ne: Diabolo udi “ukeba bantu ba kudieye,” ne se: “bantu” badiye ukeba bua kudia aba badi mua kuikala wewe anyi meme. Didieyemena ne dishala bu kudi kakuyi njiwu didi mua kuikala muaba udiye ukeba pa kutubuelela.​—Efeso 6:11, 12; 1 Petelo 5:8.

15. Mbia mvita bia mu nyuma kayi bitudi nabi, ne mmunyi mutudi mua kubilama?

¹⁵ Nunku, mbia kudikuba nabi kayi bitudi nabi? Mupostolo Paulo udi utuvuluija ne: ‘Bua muanda eu angatayi bintu bionso bia mvita bia Nzambi, bua nuenu numanye mua kudimanyika bimpe palua dituku dibi, ne panuajikija kuenza malu onso, nudi mua kuimana.’ (Efeso 6:13) Bulenga bua bia mvita ebi bia mu nyuma kabuena anu bua mushindu udibi to, kadi kabidi bua dibilama bimpe pa tshibidilu. Ke bualu kayi dimanya dipiadipia dia Dîyi dia Nzambi didi ne bua kuikala munkatshi mua bia mvita ebi bia Nzambi. Bualu ebu budi buleja mushinga wa kuikala ne ngumvuilu mupiamupia wa bulelela bu mudibu buleja kudi Yehowa mu Dîyi diende ne ku butuangaji bua kasumbu ka mupika wa lulamatu ne wa budimu. Didilongela dia pa tshibidilu dia Bible ne mikanda ya kumulonga nayi didi ne mushinga bua kulama bia mvita bietu.​—Matayo 24:45-47, NW; Efeso 6:14, 15.

16. Ntshinyi tshitudi mua kuenza bua kuikala bajadika ne: “ngabu [wetu] munene wa ditabuja” udi muimpe?

¹⁶ Paulo udi uleja ne: ‘ngabu [munene] wa ditabuja ntshintu tshinene tshia bia mvita bietu, utudi mua kutshingulula nende ne kujima miketa idi ne kapia ya Satana ya mabanda a dishima ne malongesha a batontolodi. (Efeso 6:16) Ke bualu kayi bidi bikengela bua tuetu kuteta bukole bua ngabu wetu wa ditabuja ne kukeba bua kumanya tshitudi tuenza bua kumulama bimpe ne kumukolesha. Tshilejilu udi mua kudiebeja ne: ‘Mmunyi muntu ndungolola dilonga dia Bible dia ku lumingu ku diambuluisha dia Tshibumba tshia Nsentedi? Ntu ndonga bimpe menemene bua kumona mua ‘kuenzejangana ku dinanga ne ku bienzedi bimpe’ pa kufila mandamuna a meji mu bisangilu anyi? Ntu mbulula Bible ne mbala mvese idibu bafile kabayi batele mêyi ayi mu bikoso anyi? Ntuku nkankamija bakuetu ne mandamuna ne midimu bintu ngenza mu bisangilu anyi?’ Biakudia bietu bia mu nyuma mbikole ne bidi bikengela kubipuekesha bimpe mu mala bua biobi kutuambuluisha.​—Ebelu 5:14; 10:24.

17. (a) Ndulengu kayi ludi Satana wenza nalu mudimu bua kukeba bua kunyanga makanda etu a mu nyuma? (b) Mbuanga kayi budi mua kutekesha lulengu lua Satana?

¹⁷ Satana mmumanye bimpe butekete bua mubidi wa bantu bapange bupuangane ne mateyi ende kaena amueneka ku mêsu to. Umue wa ku mishindu yende udiye umuangalaja nawu malu ende mabi nkuenza bua bindindimbi bia malu a bundu masandi bikale bibodiodioke ku televizion, ku Internet, ku video ne mu mikanda. Bamue bena Kristo mbalekele mulungu eu unyanga bia mvita biabu bikadi bitekete ne mbibafikishe ku dijimija majitu mu tshisumbu peshi ku bipeta bikuabu bibi. (Efeso 4:17-19) Mbuanga kayi budi mua kutekesha lulengu lua Satana elu? Katuena ne bua kulengulula didilongela dietu dia Bible dia pa tshibidilu, bisangilu bietu bia bena Kristo ne bia mvita bietu bionso bia kudi Nzambi to. Bionso ebi bidi bitupesha bukole bua kusunguluja tshimpe ne tshibi ne kukina malu adi Nzambi mukine.​—Musambu 97:10; Lomo 12:9.

18. Mmunyi mudi “muele wa nyuma” mua kutuambuluisha mu mvita yetu ya mu nyuma?

¹⁸ Tuetu bikale ne tshilele tshia kudilongela pa tshibidilu, netuikale ne bia mvita bikole bitudi tupeta ku diambuluisha dia dimanya dietu dilelela dia Dîyi dia Nzambi, ne netumanye kabidi mua kuluangana ku diambuluisha dia ‘muele wa nyuma udi dîyi dia Nzambi.’ Dîyi dia Nzambi ‘didi  dipita muele wonso musakisha nseke ibidi kutua, didi ditubula too ne ku dipandulula dia muoyo ne nyuma, ne dia manungu ne buongo bua mifuba, didi dijingulula lukasa meji ne malu adi mutshima musue kuenza.’ (Efeso 6:17; Ebelu 4:12) Tuetu tukuate mudimu bimpe ne “muele” eu, patudi tupeta mateta netumone mua kujingulula patoke tshidi mua kutuenzela bibi, anyi mene tshidi mua kutukoka, ne kutshimona bu buteyi bua lufu bua kudi mubi. Tshibutshilu tshietu tshia dimanya dia Bible ne ngumvuilu wadi nebituambuluishe bua kuepuka tshidi tshibi ne kuenza tshidi tshimpe. Nunku wewe ne meme tudi ne bua kudiebeja ne: ‘Muele wanyi wa mvita mmutue anyi mmutshipale? Ndiku ne lutatu lua kuvuluka mvese ya mu Bible idi mua kukolesha bia mvita bianyi anyi? Tuikalayi ne bibidilu bimpe bia kudilongela Bible, ne tukandemene Diabolo.​—Efeso 4:22-24.

19. Mmabenesha kayi atudi mua kupeta bituaditua mu didilongela pa nkayetu?

¹⁹ Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi; bua muntu wa Nzambi ikale mukumbajibue, mulongolola tshishiki bua midimu yonso mimpe.’ Bitualonda mêyi ende akambilaye Timote, netukoleshe bukole buetu bua mu nyuma ne tudi mua kupatula bipeta bimpe mu mudimu wetu. Bakulu ne basadidi ba midimu badi bakole mu nyuma badi mua kuikala diambuluisha dinene kudi tshisumbu ne tuetu bonso tudi mua kushala ne ditabuja dikole.​—2 Timote 3:16, 17; Matayo 7:24-27.

[Mêyi adi kuinshi]

Udi muvuluke anyi?

• Nsombelu ya mushindu kayi idi yambuluisha bua kupatula bipeta bimpe mu didilongela?

• Ntshilema kayi tshidi nkudimuinu ya Bible ya bungi yenza pa bidi bitangila dîna dia Nzambi?

• Mmvese kayi ya mu Bible iwudi mua kuenza nayi mudimu bua kubenga dilongesha dia Busatu Bunsantu?

• Ntshinyi tshitudi ne bua kuenza bua kudikuba ku mateyi a Satana, nansha tuetu bikale bena Kristo balelela kukadi bidimu bia bungi?

[Nkonko ya dilonga]

[Bimfuanyi mu dibeji 19]

Bua kupatula bipeta bimpe mu didilongela, udi ne bua kuikala muaba mupole udi kauyi ditanaji

[Bimfuanyi mu dibeji 23]

“Muele” webe mmutue anyi mmutshipale?