Busambi bua badi bakenga

MUNKATSHI mua nkama ya bidimu, lukonko lua kumanya tshidi Nzambi mulekele makenga ndutatshishe bena nkindi ne bena teoloji ba bungi. Bamue mbambe ne: bu mudi Nzambi muikale wa-bukole-buonso, nanku yeye ke udi ukebesha makenga onso aa. Mufundi wa mukanda kampanda wa malu mafuikakaja (Les Homélies clémentines) wa mu lukama lua bidimu luibidi wakamba ne: Nzambi udi ukokesha buloba ne bianza bionso bibidi. Ne “tshianza tshiende tshia bakaji,” mmumue ne: Diabolo, udi ukebela bantu makenga ne ntatu. Ne “tshianza tshiende tshia balume,” mmumue ne: Yezu, udi ubapandisha ne ubabenesha.

Bakuabu, mbibakolele bua kuitaba ne: Nzambi udi mua kulekela makenga nansha mudiye kayi uakebesha, nanku mbasungule bua kubenga kuitaba ne: makenga adiku. Mary Baker Eddy wakafunda ne: “Malu mabi mmianda mifuikakaja, ne kaena ne nshindamenu wawu mulelela to. Bu bantu buobu bangata mpekatu, disama ne lufu bu bintu bidi kabiyiku, bivua mua kujimina.”​—Science et Santé avec la clef des Écritures.

Mianda mikuate buôwa idi mienzeke mu bantu (nangananga kubangila ku mvita ya kumpala ya buloba bujima too ne mu matuku etu aa) mmifikishe bantu ba bungi ku diamba se: Nzambi mmupangile bua kujikija makenga a bantu. David Wolf Silverman, mukebuludi wa malu a mu Bible muena Yuda, wakafunda ne: “Ndi ngela meji ne: dishipa dia bena Yuda diakumbusha lungenyi luonso lua se: ngikadilu wa bukole buonso mmukumbanyine Nzambi.” Udi wamba kabidi ne: “Bikala Nzambi umvuika mu mushindu kampanda, nanku buimpe buende budi ne bua kupetangana ne malu mabi adiku, ne bualu ebu mbulelela anu Yeye kayi muikale wa-bukole-buonso.”

Kadi, malu adi bantu bamba bua ne: mu mushindu kampanda peshi kansanga, Nzambi ke udi mukebeshe makenga, kabidi ne: kêna mua kuajikija, anyi ne: makenga mbualu bufuikakaja budi anu mu lungenyi luetu patupu, kaena atamba kusamba bantu badi bakenga nansha. Ne tshia kumanya ntshia se: malu aa kaena apetangana nansha kakese ne ngikadilu ya Nzambi muakane, wa ngulu yonso ne muena dinanga udibu baleje mu Bible to. (Yobo 34:10, 12; Yelemiya 32:17; 1 Yone 4:8) Kadi Bible udi wamba tshinyi bua tshidi Nzambi mulekele makenga?

Mmunyi muakatuadija makenga?

Nzambi kavua mufuke bantu bua bakenge to. Kadi, wakapesha mulume ne mukaji ba kumpala, Adama ne Eva, lungenyi ne mibidi mipuangane, wakabalongoluela budimi bulenga bua kuikalabu muaba wa buobu kusombela, ne wakabapesha mudimu muimpe wa nsongo. (Genese 1:27, 28, 31; 2:8) Nanku bua kuikalabu ne disanka dia kashidi bavua ne bua kuitaba bumfumu bua Nzambi ne bukenji buende bua kubasunguila tshivua tshimpe ne tshivua tshibi. Bukenji bua Nzambi abu buvua buleja kudi mutshi uvuabu babikila ne: “mutshi wa lungenyi lua kujingulula malu mimpe ne malu mabi.” (Genese 2:17) Adama ne Eva bavua mua kuleja ne: bavua bakokela Nzambi bu buobu batumikile mukenji wende wa kubenga kudia mamuma a mutshi au. *

Bia dibungama, Adama ne Eva bakabenga kutumikila Nzambi. Tshifukibua tshia mu nyuma tshitombokele Nzambi, tshiakaluabu kubikila ne: Satana Diabolo, tshiakitabijija Eva ne: uvua mua kupeta diakalenga bu yeye mubenge  kutumikila Nzambi. Bushuwa, bivua bienze bu se: Nzambi uvua mumupale tshintu tshivuaye ukengela bikole: budikadidi, bukenji bua kudisunguila tshivua tshimpe ne tshivua tshibi. Satana wakamba ne: bu Eva mudie tshimuma tshia ku mutshi au, ‘mêsu ende avua ne bua kubululuka ne uvua ne bua kuikala bu Nzambi, mumanye malu mimpe ne malu mabi.’ (Genese 3:1-6; Buakabuluibua 12:9) Bu muvuabu bamulobeshe ne lungenyi lua budikadidi, Eva wakadia tshimuma tshikandika ne katupa kakese Adama kulua kudia pende.

Anu dituku dine adi, Adama ne Eva bakatuadija kumona bipeta bibi bia buntomboji buabu. Bu muakabengabu bukokeshi bua Nzambi, kabavua mua kupeta masanka ne mabenesha bivuabu mua kupeta bu buobu bakokele Nzambi nansha. Nzambi wakabipata mu Mparadizu ne wakambila Adama ne: ‘Buloba buakedibua mulawu bualu buebe; wewe neudie bidia biabu ne kanyinganyinga matuku ebe onso; neudie bidia ne luanga pa mpala pebe too ne pawapingana mu buloba kabidi.’ (Genese 3:17, 19) Adama ne Eva bakabangisha kusama, kukenga, kukulakaja ne kufua. Makenga akabuela mu bantu.​—Genese 5:29.

Dikosa dia tshilumbu

Muntu mukuabu udi mua kuebeja ne: ‘Nzambi kavuaku mua kulengulula tshianana mpekatu wa Adama ne Eva anyi?’ Tòo, bualu abi bivua mua kunyangisha kabidi kanemu kadibu ne bua kuleja bumfumu buende, pamu’apa bivua mua kujudija buntomboji bukuabu ne kukebesha manga makenga mapite bunene. (Muambi 8:11) Kabidi, dilengulula bupidia bua nunku divua mua kumueneka anu bu se: Nzambi uvua pende munkatshi mua bakebeshi ba malu mabi aa. Kadi Mose, umue wa ku bafundi ba Bible, udi utuvuluija ne: ‘Midimu [ya Nzambi] yonso idi miakane, bualu bua njila yende yonso idi milulame: Nzambi wa kalolo udi kayi ne bubi, udi ne malu makane a bushuwa.’ (Dutelonome 32:4) Bua kukumbananganaye ne tshidi bumuntu buende, Nzambi wakalekela Adama ne Eva bamona mabika ne mala bua bupidia buabu abu.

Bua tshinyi Nzambi kakabutula diakamue mulume ne mukaji ba kumpala pamue ne Satana, muntu udi kayi umueneka uvua mubasake ku buntomboji? Uvua ne bukole bua kubabutula nanku. Apu Adama ne Eva kabavua mua kuikala balele bana bavua ne bua kupiana makenga ne lufu nansha. Kadi, dileja bukole bua Nzambi mu mushindu’eu kadivua mua kuikala dijadike bua se: bukokeshi bua Nzambi ku mutu kua bifukibua biende bia lungenyi ke buvua buakane nansha. Kabidi, bu Adama ne Eva bafue kabayi ne bana, abi bivua mua kumvuija ne: disua dia Nzambi dia se: buloba buwule tente ne ndelanganyi yabu mipuangane kadivua mua kukumbana to. (Genese 1:28) Bualu bukuabu budi se: ‘Nzambi kêna bu muntu. Biambaye dîyi, [udi] udishikija, biambaye bualu, [udi] ubuenza.’​—Nomba 23:19.

Mu meji ende mapuangane, Yehowa Nzambi wakapangadika bua kuanji kulekela buntomboji butungunuka bua tshikondo tshîpi. Nanku bantomboji bavua mua kupeta dîba dia bungi dia kudimuena bipeta bibi bia kushala badikadile kabayi ku bukokeshi bua Nzambi. Mianda ivua mua kuenzeka mu bantu ivua ne bua kuleja patoke ne: bantu badi bakengela bulombodi bua Nzambi, ne ivua ne bua kuleja kabidi ne: bumfumu bua Nzambi mbuimpe kupita bua bantu anyi bua Satana kule ne kule. Kabidi, Nzambi wakangata mapangadika bua dilongolola diende dia ku ntuadijilu kadifu to. Wakalaya ne: “dimiinu,” anyi “ndelanganyi,” uvua ne bua kulua ne ‘kuboza Satana mutu,’ ne uvua ne bua kumbusha bua kashidi buntomboji buende buonso ne ntatu idibu bukebeshe.​—Genese 3:15, Mukanda wa Mvidi Mukulu, [Katolike, MMM].

Yezu Kristo ke uvua Dimiinu dilaya adi. Tudi tubala mu 1 Yone 3:8 ne: “Muana wa Nzambi wakamueneshibua bua kubutuleye midimu ya Diabolo.” Wakabutula midimu eyi pakafilaye muoyo wende mupuangane wa bumuntu ne kufutaye mushinga wa tshia-bupikudi bua kupikula bana  ba Adama ku mpekatu ne lufu bivuabu bapiane. (Yone 1:29; 1 Timote 2:5, 6) Mbalaye aba badi bitabuja tshia bushuwa mulambu wa Yezu disulakana dia kashidi ku makenga abu onso. (Yone 3:16; Buakabuluibua 7:17) Ndîba kayi dienzeka bualu ebu?

Ndekelu wa makenga

Dibenga bumfumu bua Nzambi ndikebeshe makenga kaayi kuamba. Nunku mbimpe mudi Nzambi mulongolole bua kuenza mudimu ne bumfumu buende mu mushindu wa pa buawu bua kujikija makenga a bantu ne kukumbaja disua diende dia ku ntuadijilu pa buloba. Yezu wakakula bua dilongolola dia Nzambi edi pakalongeshaye bayidi bende bua kusambila ne: ‘Tatu wetu udi mu diulu, bukalenge buebe bulue. Benze pa buloba muudi musue bu mudibu benza mu diulu.’​—Matayo 6:9, 10.

Tshikondo tshidi Nzambi mulekele bantu bua banji kudikokesha nkayabu tshikadi pa kujika. Wakajadika Bukalenge buende mu diulu mu 1914 ne kutekaye Yezu Kristo bu Mukalenge wabu bua kukumbaja mulayi wa mu Bible. * Mu mutantshi mukese emu, nebutshibule mbulamatadi yonso ya bantu bitupa bitupa, ne nebuyibutule.​—Danyele 2:44.

Mu mudimu wende wa bidimu bikese patupu pa buloba, Yezu wakaleja ka-diosha ka mabenesha ikala dijadikulula dia bumfumu bua Nzambi mua kutuadila bantu. Evanjeliyo idi ileja patoke bimpe menemene ne: Yezu wakaleja bapele ne bantu bavuabu bakengesha luse. Wakuondopa babedi, kudishaye bavua ne nzala ne kubisha bafue. Nansha makole a bintu bifuka akatumikila dîyi diende. (Matayo 11:5; Mâko 4:37-39; Luka 9:11-16) Elabi meji bua malu ikala Yezu mua kuenza pikalaye mua kusankisha bukua-bantu buonso ne mulambu wakafilaye! Bible udi ulaya ne: ku diambuluisha dia bukokeshi bua Kristo, Nzambi ‘neakupule tshinsonji tshionso ku mêsu kua [bantu]; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi.’​—Buakabuluibua 21:4.

Busambi bua badi bakenga

Bidi bitukolesha ku muoyo bua kumanya ne: Yehowa Nzambi wetu wa dinanga ne wa-bukole-buonso udi utulama, ne mu katupa kîpi emu neasambe bukua-bantu! Pa tshibidilu, muntu udi usama bikole utu witaba ne lukasa luondapu luikala mua kumuambuluisha nansha biobi bimusama bikole. Bia muomumue, tuetu bamanye ne: mushindu udi Nzambi wenza malu neutupeteshe mabenesha a kashidi, dimanya adi didi mua kutukuatshisha nansha tuetu bapete ntatu ya tshitupa tshîpi ya mushindu kayi.

Ricardo, utudi batele mu tshiena-bualu tshia kumpala, mmulonge mua kupeta busambi mu milayi ya mu Bible. Udi uvuluka wamba ne: “Kunyima kua lufu lua mukajanyi, ngakumvua dijinga dikole dia kuditola pa nkayanyi, kadi ngakalua kumona ne: bualu ebu kabuvua mua kupingaja mukajanyi ku muoyo nansha, ne buvua anu mua kuvudija tunyinganyinga tuanyi.” Pamutu pa nanku, Ricardo wakatungunuka anu ne tshibidilu tshiende tshia kubuela mu bisangilu ne kuyisha bantu bakuabu mukenji wa mu Bible. Ricardo udi wamba ne: “Pangakamona mushindu uvua Yehowa unkuatshisha ne dinanga ne muvuaye wandamuna masambila anyi nansha mu malu avua amueneka makese, ngakasemena pabuipi nende bikole. Dijingulula dia dinanga dia Nzambi  edi ke diakangambuluisha bua kutantamena bualu buvua buikale lutatu lutambe bunene lumvua tshiyi muanji kupeta katshia bandela.” Udi wamba ne: “Ntshitshidi njinga mukajanyi bikole, kadi mpindieu ndi ngitaba ne dishindika dionso ne: kakuena tshintu tshidi Yehowa ulekela tshienzeka tshidi mua kutuenzela bualu bubi budi bushala kashidi.”

Anu bu Ricardo ne bantu bakuabu miliyo mivule, udiku muindile ne muoyo mujima tshikondo tshikala makenga a bantu adiku lelu ‘kaayi mua kuvulukibua, ne kaayi mua kubuela [mu lungenyi]’ anyi? (Yeshaya 65:17) Bushuwa udi mua kupeta mabenesha a Bukalenge bua Nzambi wewe mulonde mubelu wa mu Bible wa se: ‘Keba Yehowa paudi mumanye mua kumusangana; umubikile patshidiye pabuipi.’​—Yeshaya 55:6.

Bua wewe kumona mua kutumikila mubelu eu, vuija dibala ne dilonga dia Dîyi dia Nzambi bualu bua kumpala mu nsombelu webe. Keba bua kumanya Nzambi ne eu uvuaye mutume, Yezu Kristo. Enza muebe muonso bua kutumikila mikenji ya Nzambi ne uleje ne: udi musue kukokela bumfumu buende. Wewe muenze malu aa neupete disanka dinene mpindieu nansha wewe mua kupeta mateta a mushindu kayi. Ne mu matuku atshilualua, neupete muoyo mu buloba budi kabuyi ne makenga.​—Yone 17:3.

[Mêyi adi kuinshi]

[Kazubu mu mabeji 6, 7]

MMUNYI MUTUDI MUA KUTANTAMENA MAKENGA?

“Mupuilayi [Nzambi] ntatu yenu yonso.” (1 Petelo 5:7, MMM) Patudi tukenga anyi tumona muntu kampanda utudi banange ukenga, pa tshibidilu tutu tumvua bibi, tupeta tshiji ne tudimona bu bantu bimansha. Kadi nansha nanku, ikala mushindike se: Yehowa mmumanye mutudi tumvua. (Ekesode 3:7; Yeshaya 63:9) Anu bu bena lulamatu ba kale, tudi mua kumunzuluila mutshima wetu ne kumuleja tunyinganyinga tutudi natu ne malu onso adi matutonde. (Ekesode 5:22; Yobo 10:1-3; Yelemiya 14:19; Habakuka 1:13) Pamu’apa kakumbusha ntatu yetu mu tshishima, kadi mu diandamuna masambila etu menza ne muoyo mujima, udi mua kutupesha meji ne bukole bua kuyitantamena.​—Yakobo 1:5, 6.

“Kanukemi bua diteta dikole didi dinukuata. Ki mbualu bupiabupia budi kabuyi buanji kuenzeka.” (1 Petelo 4:12, Mukanda wa Mvidi Mukulu, [Mishonyi, MMV]) Muaba eu mupostolo Petelo udi wakula bua dikengeshibua, kadi mêyi ende aa adi akumbanyina kabidi bimpe dikenga kayi dionso didi muena Kristo mua kuikala utantamena. Bantu badi bakenga bua dipangila dia bintu bia didikuatshisha nabi, bua masama ne bua difua dia bananga babu. Bible udi wamba ne: kudi ‘bikondo bidi malu atulukila’ muntu yonso. (Muambi 9:11) Malu aa adi mu bantu lelu. Dimanya bualu ebu nedituambuluishe bua kutantamena makenga ne ntatu padibi bitukuata. (1 Petelo 5:9) Kuvuluka dishindika dia se: ‘mêsu a Yehowa adi kudi bakane, ne matshi ende adi buashi ku kudila kuabu’ nekutambe kutusamba.​—Musambu 34:15; Nsumuinu 15:3; 1 Petelo 3:12.

“Nusanke mu ditekemena.” (Lomo 12:12) Pamutu pa kuela meji dîba dionso bua disanka dituvua nadi kumpala, tudi mua kuelangana meji pa dilaya dia Nzambi dia kujikija makenga onso. (Muambi 7:10) Ditekemena edi dishindame nshinshinshi neditukube anu mudi tshifulu tshikuba mutu wa muntu. Ditekemena didi dikepesha bukole bua ntatu ya mu nsombelu ne kabidi didi dituambuluisha bua kushala anu bajadike ne: ntatu eyi kayena mua kunyanga lungenyi luetu ne makanda etu a mu nyuma to.​—1 Tesalonike 5:8.

[Tshimfuanyi mu dibeji 5]

Adama ne Eva bakabenga bumfumu bua Nzambi

[Tshimfuanyi mu dibeji 7]

Nzambi mmulaye buloba kabuyi ne makenga