“Udi muambilamu, kuikala ne muoyo mbualu buimpe be!”

UDIKU musue kumanya diumvuija dilelela dia muoyo anyi? Magdalena, Ntemu wa Yehowa wa bidimu dikumi ne muanda-mukulu udi musombele mu tshimenga tshia Szczecin, mu ditunga dia Pologne, wakambuluisha Katarzyna mulongi nende wa mu tulasa tubandile bua kumanya diumvuija edi. Katarzyna uvua wamba muvuaye kayi witaba ne: Nzambi udiku. Kadi pavua Magdalena muyukile nende malu a mu Bible, wakaleja dijinga dilelela dia kumanya bivule.

Nansha muvua Katarzyna muanyishe malu a mu Bible avua Magdalena muyikile nende, kavua mua kuitaba ne muoyo mujima to. Pavuaye uyikila ne Magdalena bua balunda balelela, umue musangu Katarzyna wakamba ne: “Udi ne Bible; udi mumanye mêyi a kulonda ne muaba wa kupeta balunda. Kadi netuambe tshinyi bua aba badi kabayi mua kuitaba mêyi aa mpindieu?”

Dishintuluka dinene diakenzeka pakaya Katarzyna mu Londres, mu ditunga dia Angleterre. Wakaya kuendakana ku biro bia filiale wa Bantemu ba Yehowa, ne malu malenga akamuenzelabu kuoku akamulenga ku muoyo bikole. Malu makese bu mudi kumunzuluila tshiibi ne kumuteleja pavuaye wakula akamusankisha bikole.

Pakabangisha tshidimu tshipiatshipia tshia tulasa mu Kabitende 2001, Katarzyna wakitaba bua bikale bamulongesha Bible. Udi wenda ukolesha dianyisha diende bua mêyi a mu Bible ne ukadi mutuadije kuatumikila mu nsombelu wende wa matuku onso. Matuku adi panshi aa, wakambila Magdalena ne: “Ndi mumvua anu bu ne: ndi mutuadije nsombelu mupiamupia.” Wakamutumina kabidi mukenji ku telefone wa ku bianza ne: “Tuasakidila wa bungi bua dilonga dietu dia lelu! Udi muambilamu, kuikala ne muoyo mbualu buimpe be! Mbualu bulenga menemene bua kumanya muntu utudi ne bua kuela tuasakidila bua muanda eu.”