“Bamanyishi ba Bukalenge ba tshisumi” badi badisangisha ne disanka

DINYANGUKA dia malu a mu nsombelu, a mpetu, ne a tshididi, didi dinyukula bantu bikole pa buloba. Pabi munkatshi mua ndululu yonso eyi, Bantemu ba Yehowa bavua badisangishe mu ditalala mu matuku asatu bua Mpungilu ya Distrike ya “Bamanyishi ba Bukalenge ba tshisumi.” Kubangila mu ngondo muitanu 2002, masangisha manene aa akenzeka pa buloba bujima.

Mpungilu eyi ivua bikondo bia disanka dia bungi. Tukonkononayi mu tshikoso muvua programe eu muibaki muashila pa Bible.

Dituku dia kumpala diakashindamena pa tshisumi tshia Yezu

Tshiena-bualu tshia dituku dia kumpala tshivua tshiamba ne: “Tuidikijayi tshisumi tshia Mukalenge wetu Yezu.” (Yone 2:17) Mu muyuki wa “Tusankayi bua mutudi badisangishe bu bamanyishi ba Bukalenge” bakalomba bateleji bonso bua kuikalabu ne disanka ditu dimueneka mu mpungilu ya bantu ba Nzambi. (Dutelonome 16:15) Panyima pa muyiki eu bakela bamanyishi ba lumu luimpe ba tshisumi nkonko.

Muyuki uvua wamba ne: “Disanka diebe dikale mu Yehowa,” wakumvuija Musambu 37:1-11 mvese ku mvese. Bavua batubele bua kubenga ‘kunyingalala’ bua tshitudi mua kumona bu diya kumpala dia bantu babi. Nansha mudi bantu babi mua kutushiminyina malu, kadi mu tshikondo tshiakanyine Yehowa nealue kutokesha malu bua kumanya badi bamusadila ne lulamatu. Muyuki wa: “Tuikalayi bena dianyisha,” wakaleja mushindu wa kuleja dianyisha kudi Nzambi. Bena Kristo bonso badi ne bua kupesha Yehowa ‘mulambu wa kumutumbisha nawu.’ (Ebelu 13:15) Bushuwa bungi bua mêba atudi tupitshisha mu mudimu wa Yehowa budi bulondeshila dianyisha ditudi nadi ne mudi nsombelu wetu.

Muyuki wa nshindamenu uvua ne tshiena-bualu tshia se: “Bamanyishi ba Bukalenge basaka kudi tshisumi tshivule.” Wakangata Yezu Kristo bu tshilejilu tshitambe buimpe tshia tshisumi buetu tuetu. Panyima pa dibanjija dia Bukalenge bua mu diulu mu tshidimu tshia 1914, bena Kristo balelela bavua ne bua kumanyisha lumu elu ne tshisumi. Ngamba-malu wakakula bua mpungilu wa mu 1922 ku Cedar Point, mu Ohio (États-Unis) ne kutuvuluijaye lubila luvuabu bele lua ne: “Manyishayi Mukalenge ne Bukalenge buende!” Bulelela, tshisumi tshia basadidi ba Nzambi ba lulamatu tshiakabasaka bua kumanyisha bisamba bionso bulelela bua Bukalenge.

Muyuki wa: “Tuikalayi ne dikima bualu tudi bamanye ne: Yehowa udi netu,” uvuabu benze dituku dia kumpala mu mapingaja, wakaleja ne: Satana mmutambe kutua nangananga bantu ba Nzambi mutu. Kadi, nansha mudi buluishi buikaleku, patudi tuela meji a bilejilu bia bungi bia ditabuja bidi mu Bible ne bia lelu, tudi tupeta dikima dia kutantamena mateta kakuyi ditshina.​—Yeshaya 41:10.

Pashishe kuakalua muyiki wa bitupa bisatu uvua ne tshiena-bualu tshia ne: “Mulayi wa Mika udi utukolesha bua kuenda mu dîna dia Yehowa.” Ngamba-malu wa kumpala wakafuanyikija dinyanguka dia malu a mu nsombelu, butontolodi buvua mu ntendelelu, ne dikeba dia bintu bia ku mubidi bia mu matuku a Mika ne malu adi enzeka mu tshikondo tshietu etshi. Wakamba ne: “Bua kuikala ne ditekemena dishindame bua matuku atshilualua, mbimpe tuetu kudienzeja bua kuikala ne mutshima wa  butumike ne kuenza bua ngikadilu wetu ikale wa tshijila ne nsombelu wetu ikale pende muwule tente ne bienzedi bidi bileja dilamata dietu kudi Nzambi, katuyi tupua muoyo bua se: dituku dia Yehowa nedilue to.”​—2 Petelo 3:11, 12.

Ngamba-malu muibidi wa muyuki wa bitupa bisatu eu wakaleja muvua Mika mupishe bamfumu ba tshitendelelu tshia bena Yuda. Bavua bakengesha bapele, bantu bavua kabayi ne wa kubakuila. Kadi Mika wakamanyisha kabidi ditshimuna dia ntendelelu mulelela. (Mika 4:1-5) Ne bukole bua nyuma muimpe wa Yehowa, tudi badisuike bua kumanyisha mukenji udi ukolesha ku muoyo wa ditekemena eu. Kadi netuenze tshinyi bikala masama kampanda anyi malu makuabu atupangisha mua kuenza nanku? Ngamba-malu muisatu wakamba ne: “Malu adi Yehowa utulomba ki mmatupite tshipimu to, tudi mua kuakumbaja.” Wakakonkonona malu mashilangane adi mu Mika 6:8 utudi tubala ne: ‘Yehowa udi utekemena malu kayi kuudi? Anu bua wewe kuenza malu makane, kunanga kuleja bakuabu luse, ne kuenda ne Nzambi webe ne mutshima mupuekele.’

Bu mudi dinyanguka dia malu a mu nsombelu mua kunyanga lungenyi lua bena Kristo, tuetu bonso tuakateleja muyuki uvua ne tshiena-bualu tshia se: “Kuba mutshima webe bua udilame bimpe.” Tshilejilu, didilama dietu nedituambuluishe bua kuikala ne disanka mu dibaka. Tuetu bena Kristo katuena nansha ne bua kuela meji a kuenda tshiendenda to.​—1 Kolinto 6:18.

Muyuki wa: “Tudimukilayi mashimi,” uvua muleje ne: meji etu adi amueneka patudi tuangata dikonyangaja malu, malu adi ndambu bulelela ndambu dishima, ne mashimi bidi batontolodi bamuangalaja bu mulungu. (Kolosai 2:8) Bia muomumue, katuena mua kudidinga tuetu nkayetu ne: tudi mua kusankisha majinga etu mabi kakuyi njiwu to.

Muyuki wa ndekelu wa dituku dia kumpala uvua ne tshiena-bualu tshia ne: “Tendelela Nzambi umuepele mulelela.” Bu mudi nsombelu wa pa buloba wenda ukola anu kukola, bidi bitukankamija bikole pa kumanya ne: mu katupa kîpi emu Yehowa neavuije bukua-panu buonso bupiabupia! Mbanganyi bikala mua kusombamu? Anu aba badi batendelela Yehowa. Bua kutuambuluisha tuetu ne  bana batudi tulela ne balongi betu ba Bible bua kukumbaja tshipatshila etshi, ngamba-malu wakamanyisha dipatuka dia mukanda mupiamupia wa kulonga wa Tutendelelayi Nzambi umuepele mulelela. Ndisankapu kayi dituvua nadi patuvua bapete mukanda eu!

Dituku dibidi diakatusaka bua kuikala ne tshisumi bua malu mimpe

Tshiena-bualu tshia dituku dibidi dia mpungilu tshivua se: “Ikalayi ne tshisumi bua malu adi mimpe.” (1 Petelo 3:13) Ngamba-malu wa kumpala wakakonkonona mvese wa mu Bible wa dituku adi. Wakaleja ne: dikonkonona dia pa tshibidilu dia mu buondoke dia mvese wa dituku dionso didi divudija tshisumi tshietu.

Muyuki wa bitupa bisatu wa: “Bamanyishi ba Bukalenge badi batumbisha mudimu wabu,” wakalonda pashishe. Tshitupa tshia kumpala tshiakaleja mudibi bikengela kulongesha Dîyi dia Nzambi bimpe. (2 Timote 2:15) Patudi tukuata mudimu bimpe ne Bible, bidi biambuluisha bua kulejaye ‘bukole’ buende mu nsombelu ya bantu. (Ebelu 4:12) Tudi ne bua kukoka ntema ya bantu ku Bible ne kuelangana nabu meji pa bidiye wamba bua babitabe. Tshitupa tshibidi tshia muyuki wa bitupa bisatu tshiakatubela bua kupinganyina bantu misangu ne misangu bikalabu basankidila bulelela. (1 Kolinto 3:6) Didilongolola ne dikima bidi ne mushinga bua kupinganyina bantu badi basankidila bulelela katuyi tujingakana. Tshitupa tshisatu tshiakatubela bua kuangata muntu yonso utudi tupetangana nende bu muyidi wa matuku adi kumpala ne tshiakaleja ne: kutuadija kulonga ne muntu anu musangu wa kumpala unudi nupetangana nende kudi mua kufikisha ku disanka dia kuambuluisha bantu bashilangane bua kuluabu bayidi.

Muyuki wakalonda pashishe uvua ne tshiena-bualu tshia se: “Bua tshinyi tudi ne bua ‘kusambila dîba dionso’?”  Bible udi ubela bena Kristo bua batangile anu kudi Nzambi bua kupeta bulombodi mu malu onso a mu nsombelu wabu. Bidi bikengela kulongolola dîba dia kuikala kusambila pa nkayetu. Tudi kabidi ne bua kunanukila mu disambila, bualu Yehowa udi mua kuanji kutulekela tusambila anu kusambila kumpala kua tuetu kumona diandamuna diende.​—Yakobo 4:8.

Muyuki wa se: “Kuyikidilangana malu a mu nyuma kudi kutukolesha,” wakatubela bua kuenza mudimu ne tshipedi tshietu tshia diakula bua tupete diambuluisha tuetu ne bakuabu. (Filipoi 4:8) Bidi bikengela mulume ne mukajende ne bana babu bikale bayukila malu a mu nyuma dituku dionso. Bua nunku, mêku adi mua kukeba mushindu wa kuikalaku kudia kaba kamue nansha musangu umue ku dituku bua kumona mua kuyikilaku malu adi akolesha mu nyuma.

Programe wa mu dinda wakajika ne muyuki uvua ukankamija wa ne: “Mushindu udi didilambula ne batismo bifikisha ku lupandu.” Balumbidi ba batismo bakavua bapete dimanya, baleje ditabuja, banyingalale bua mibi yabu, bashintulule nsombelu wabu mubi ne baditshipe kudi Nzambi. Ngamba-malu wakamba ne: kunyima kua ditambula diabu, bavua ne bua kutungunuka ne kukola mu nyuma ne kulama tshisumi tshiabu ne bikadilu bilenga.​—Filipoi 2:15, 16.

Mu mapingaja, bakakula bua malu manene abidi mu muyuki wa: “Ikala ne bupuekele ne ulame dîsu diebe dimpe.” Kuikala ne bupuekele kudi kumvuija kuitaba mikalu itudi nayi anyi malu atudi katuyi mua kukokesha ne muaba utudi nawu kumpala kua Nzambi. Bupuekele budi butuambuluisha bua kulama dîsu dietu ‘dimpe,’ ditangija ku Bukalenge bua Nzambi, ki mpa bintu to. Patudi tuenza nunku, katuena ne bua kushala tuditatshisha ne meji to, bualu Yehowa neatupeshe bitudi nabi dijinga.​—Matayo 6:22-24, 33, 34.

Ngamba-malu uvua mulonde wakaleja tshidi ne bua kutusaka bua ‘kueyemena Yehowa ne muoyo mujima mu bikondo bia makenga.’ Mmushindu kayi utudi mua kutshimuna malu bu mudi buteketa kampanda bua mu nyuma, ne ntatu ya mfranga anyi ya masama? Tulombayi Yehowa bua kupeta meji ne tulombe diambuluisha kudi bakuabu. Pamutu pa kukuatshika buôwa anyi kuteketa mu maboko, tudi ne bua kukolesha dieyemena dietu kudi Nzambi pa kubala Dîyi diende.​—Lomo 8:35-39.

Muyuki wa ndekelu wa bitupa bisatu wa mu mpungilu uvua ne tshiena bualu tshia se: “Mushinga wa ditabuja dietu badi bauteta kudi mateta kabukabu.” Tshitupa tshia kumpala tshiakatuvuluija ne: bena Kristo balelela bonso batu batuilangana ne buluishi. Bualu ebu budi bu dilongesha kudi bantu bakuabu, budi bukolesha ditabuja dietu ne butupetesha mushindu wa kuleja lulamatu luetu kudi Nzambi. Nansha mutudi katuyi tuteka mioyo yetu mu njiwu ya tshianana, katuena ne bua kukeba mishindu idi ibengangana ne mêyi a mu Bible bua kuepuka buluishi to.​—1 Petelo 3:16.

 Ngamba-malu muibidi mu muyuki wa bitupa bisatu wakela nkonko bua tshilumbu tshia kubenga kubuelakana mu malu a tshididi. Bena Kristo ba kumpala kabavua bakandiki ba mvita bua kubueja ditalala to, kadi bavua bamanye ne: lulamatu luabu lunene bavua ne bua kululeja anu Yehowa. Muomumue lelu’eu, Bantemu ba Yehowa mbalamate bikole ku dîyi dia se: ‘Kanuena ba pa buloba.’ (Yone 15:19) Bu mudi mateta adi mua kutubuejakaja mu malu a tshididi mua kujuka lukasa, badi mu mêku badi ne bua kulongolola dîba dia kuikalabu bakonkonona mibelu ya mu Bible pa bualu ebu. Anu muvua tshitupa tshisatu tshia muyuki wa bitupa bisatu eu tshileje, tshipatshila tshia Satana katshiena anu tshia kutushipa to, kadi ntshia kutusaka bua tujimije lulamatu luetu. Patudi tutantamena ne lulamatu luonso dituseka, mateta a kuenda masandi, tunyinganyinga ne masama, tudi tuambika Yehowa lumu.

Dibikila dia musangelu dia ‘kusemena pabuipi ne Yehowa’ ke divua tshiena-bualu tshia muyuki wa ndekelu wa dituku. Kujingulula ngikadilu inayi ya nshindamenu ya Yehowa kudi kutukoka kudiye. Udi ukuata mudimu ne bukole buende kabuyi mikalu bua kukuba bantu bende, nangananga mu nyuma. Buakane buende ki mbua tshikisu, kadi budi bumusaka bua kupesha muntu yonso udi wenza malu makane muoyo wa kashidi. Meji a Nzambi adi amueneka patoke mu mushindu uvuaye muangate bantu bapange bupuangane bua kufunda Bible. Ngikadilu udi utamba kukoka bantu kudiye ndinanga diende divua dimusake bua kulongolola lupandu lua bantu ku butuangaji bua Yezu Kristo. (Yone 3:16) Ngamba-malu wakajikija pa kumanyisha dipatuka dia mukanda mupiamupia udi ukankamija bikole wa Approchez-vous de Jéhovah (Semenayi pabuipi ne Yehowa).

Dituku disatu diakatusaka bua kuikala ne tshisumi bua midimu mimpe

Tshiena-bualu tshia dituku disatu dia mpungilu tshivua se: “Bantu badi ne tshisumi tshia kuenza midimu mimpe.” (Tito 2:14) Dinda diakabangisha bimpe ne dikonkonona dia mu dîku dia mvese wa dituku. Pashishe kuakalonda muyuki uvua  ne tshiena-bualu tshia ne: “Udi mueyemene Yehowa anyi?” Bisamba mbiteke dieyemena diabi muaba mubi padibi bieyemena meji abi nkayabi ne bukole buabi. Kadi mbishilangane ne Basadidi ba Yehowa badi buobu bamueyemena ne dikima dionso ne disanka nansha mudiku makenga.​—Musambu 46:1-3, 7-11.

Mu muyiki uvua ne tshiena-bualu tshia se: “Bansonga: Longololayi tshinuenza mu bulongolodi bua Yehowa matuku atshilualua,” muvua lukonko elu: Mmunyi mudi nsonga mua kupeta nsombelu mutambe buimpe? Bualu ebu kabuena mua kukumbana mu dikeba dia mfranga, anyi dia bintu ne dia lumu to. Mufuki wetu udi ubela bansonga ne dinanga dionso bua kumuvulukabu patshidibu bansonga. Ngamba-malu wakela makonka kudi bamue badi badifile bikole mu mudimu wa Bena Kristo mu bunsonga buabu, tuetu kumvua muvua disanka diabu. Ndisankapu bungi kayi dituvua nadi dia kupeta trakte mupiamupia wa Bansonga, ntshinyi tshinuenza ne muoyo wenu? mulongolola bua kuambuluisha Bantemu bansonga bua kujadika bishimikidi bidi mua kubambuluisha mu bulongolodi bua Yehowa bua kupetabu muoyo wa kashidi mu matuku atshilualua!

Pashishe drama wakanayabu wa malu a mu Bible wa: “Tushalayi ne lulamatu nansha mu bikondo bikole,” uvua mukoke ntema bikole. Uvua ulonda mu tshikoso muvua mudimu wa matuku bungiwu wakenza Yelemiya kumbukila ku bunsonga buende too ne ku dibutuka dia Yelushalema, dibutuka divuaye mumanyishe ne tshisumi. Yelemiya wakadiumvua kayi mukumbanyine mudimu au to, kadi wakaukumbaja nansha muvuaku buluishi, ne Yehowa wakamusungila.​—Yelemiya 1:8, 18, 19.

Muyuki uvua ne tshiena-bualu tshia ne: “Ikalayi ne dikima dia kumanyisha Dîyi dia Nzambi bu Yelemiya,” wakalondela drama. Bamanyishi ba bukalenge ba matuku etu aa ke badibu bamuenene bua kushiminyina malu ne bua kusaka bantu bua kubakinabu. (Musambu 109:1-3) Kadi anu bu Yelemiya, tudi mua kutshimuna diteketa mu maboko pa kunanga Dîyi dia Yehowa. Tudi kabidi bajadike ne: aba badi batuluisha kabakutshimuna to!

Bushuwa, muyuki wa patoke uvua bantu bonso bindile wakafika pa dîba diakanyine ne tshiena-bualu ne: “Malu a pa buloba ebu adi enda ashintuluka.” Tshikondo tshietu etshi ntshiuwule ne mashintuluka adi akuatshisha buôwa. Bible ukavua mudianjile kumanyisha ne: nsombelu wa nunku, popamue ne lubila lua “ditalala ne [bukubi],” bivua mua kufikisha ku dituku didi dikuatshisha buôwa dia Nzambi dia dilumbuluisha. (1 Tesalonike 5:3) Dituku adi nedilue ne mashintuluka malenga a dikema, mbuena kuamba ne: ndekelu wa mvita, wa dibunda bibawu, wa tshikisu ne masama kabidi. Nunku, pamutu pa kueyemena ndongoluelu eu wa malu, ke dîba dia kukeba ditshina dia Nzambi ne kulama bienzedi bia tshijila.

Bakenza tshikepeshilu tshia dilonga dia Tshibumba tshia Nsentedi dia ku lumingu kumpala kua kuenzabu muyuki wa ndekelu mu mpungilu eu, uvua ne tshiena-bualu tshia se: “Bamanyishi ba Bukalenge ba tshisumi, midimu yenu mimpe ivulangane.” Ngamba-malu wakaleja mushindu uvua programe eu mutukoleshe mu nyuma ne mutukankamije bua kueyemena Yehowa. Bua kujikija, bakatubela bua kuikala bakezuke, bena dinanga ne bamanyishi ba tshisumi ba Bukalenge bua Nzambi.​—1 Petelo 2:12.

Ne lungenyi bu lua basadidi ba Yehowa ba mu matuku a Nehemiya, tuvua bushuwa bapingane kumbelu tusanka bua mabenesha a mu nyuma atuvua bapete mu Mpungilu wa Distrike wa “Bamanyishi ba Bukalenge ba tshisumi.” (Nehemiya 8:12) Mpungilu eu wa mushinga mukole ki mmunuvudijileku disanka tente ne munuangatshishe dipangadika dia kutungunuka ne kuikala bamanyishi ba Bukalenge ba tshisumi anyi?

[Kazubu/​Tshimfuanyi mu dibeji 23]

Mukanda mupiamupia wa kulonga nawu Bible!

Ku ndekelu kua dituku dia kumpala dia mpungilu, dipatuka dia mukanda mupiamupia wa Tutendelelayi Nzambi umuepele mulelela diakasankisha bantu bavua babuele mu mpungilu eu. Mukanda eu mmulongolola bua kulonga nawu ne bantu bakadi bajikije kulonga mukanda wa Dimanya didi difikisha ku muoyo wa kashidi, ne kakuyi mpata, neukoleshe ditabuja dia aba badi “badiakaje bimpe bua muoyo wa kashidi.”​—Bienzedi 13:48, NW.

[Mêyi a dianyisha]

Tshimfuanyi pa tshizubu tshia mukanda: foto wa U.S. Navy

[Kazubu/​Bimfuanyi mu dibeji 24]

Diambuluisha bua kusemena pabuipi ne Nzambi

Ngamba-malu wa ndekelu wa dituku dibidi dia mpungilu wakamanyisha dipatuka dia mukanda mupiamupia wa Approchez-vous de Jéhovah. Mukanda eu udi ne bitupa binene binayi, tshitupa ne tshitupa tshidi tshiakula bua ngikadilu umue wa ku ngikadilu ya nshindamenu ya Yehowa: bukole, buakane, meji, ne dinanga. Tshitupa tshionso tshia mukanda eu tshidi ne nshapita umue udi uleja mushindu uvua Yezu Kristo muleje patoke ngikadilu ya Nzambi ayi. Tshipatshila tshia kumpala tshia mukanda eu ntshia kutuambuluisha tuetu ne balongi betu ba Bible bua kuikala ne malanda makole ne Yehowa Nzambi.

[Kazubu/​Bimfuanyi mu dibeji 26]

Diambuluisha dia mu nyuma bua bansonga

Dituku disatu dia mpungilu bakamanyisha dipatuka dia trakte wa pa buende udi ne tshiena-bualu tshia se: Bansonga, ntshinyi tshinuenza ne muoyo wenu? Trakte eu mmulongolola bua kuambuluisha bansonga Bantemu bua kuangatabu mapangadika mimpe bua nsombelu wabu wa matuku atshilualua. Udi ufila mibelu ya mu Bible bua kukuatshila Yehowa mudimu kashidi ne tshiendelele.