Bamanyishi ba Bukalenge badi balonda

Badi bumvua mukenji wa Bukalenge mu Brésil

BUA kumona mua kumanyisha bampudi-matshi lumu luimpe lua Bukalenge, Bantemu ba Yehowa ba bungi ba mu ditunga dia Brésil mbadienzeje bua kulonga muakulu wa tumama wa mu Brésil nansha mudiwu mukole. Didibamba diabu edi didi dipatula bipeta bilenga, anu mudi malu adi alonda aa aleja.

Eva * (mamu mukuabu mpudi-matshi wa mu tshimenga tshia São Paulo) wakabanga kulonga muakulu wa tumama kunyima kua yeye (ne bana bende basatu) mumane kuikala mubanjija kua muntu mulume mukuabu uvua pende kamama. Pavuabu mu tshisalu, Eva ne nsongalume uvua mumubanjije eu bakasambakena ne Bantemu tumama bikale tshisumbu ne Bantemu aba kubalomba bua balue mu bisangilu ku Nzubu wa Bukalenge. Buobu kuitaba bela meji ne: bivua bua kusomba anu tshianana.

Bu muvua Eva kayi mutambe kumanya muakulu wa tumama, wakumvua anu malu makese patupu ku bionso bivuabu bambe mu bisangilu. Pashishe, Ntemu mukuabu ne mukajende bakamubikila kuabu bua kunuabu pamue tuayi tutalale. Bakamuleja bimfuanyi bia mu broshire wa Ikalayi ne muoyo wa kashidi ne disanka pa buloba! bua kumumvuija dilaya dia Nzambi dia mparadizu wikala pa buloba mu matuku atshilualua. Eva wakanyisha bikole malu akalongaye ne wakabanga kubuela mu bisangilu pa tshibidilu.

Matuku makese pashishe, Eva wakalekelangana ne nsongalume uvua mumubanjije au bua kumona mua kutumikila mikenji ya mu Bible. Nansha muvua bena mu dîku diende babenge ne muoyo mujima, wakatungunuka ne kukola mu nyuma ne wakatambula mu 1995. Ngondo isambombo pashishe, Eva wakalua mpanda-njila, mmumue ne: mumanyishi wa lumu luimpe wa ku dîba ne ku dîba. Ukadi muambuluishe bantu bakuabu banayi bampudi-matshi bafike too ne ku didilambula.

Tshilejilu tshikuabu: Carlos uvua mulela mpudi-matshi. Kubangila anu ku buana uvua muditue mu dinua dia diamba, mu tshiendenda ne mu buivi. Pakambabu kumuenzela bibi kudi bena mu dingumba dia ba-bandi bakuabu nunku, wakanyemena mu São Paulo ne kusombaye muomu matuku ne João. João uvua pende mpudi-matshi bu Carlos, ne uvua ne nsombelu wa buenzavi.

Bidimu bikese pashishe, Carlos wakalonga mukenji wa bukalenge wakamusaka bua kulongolola nsombelu wende ne kufundisha dibaka diende ku mikanda ya mbulamatadi. Yeye mumane kukumbaja malu malomba a mu Bible, Carlos wakatambula bua kuleja didilambula diende kudi Yehowa. Pinapu João ukavua pende mumvue lumu luimpe ne yeye pende mushintulule nsombelu wende bikole, Carlos kayi mumanye to. Pakumvua João ne: Yehowa katu wanyisha ditendelela dia mpingu, wakimansha tupingu tuende tuonso. Panyima pa yeye mumane kulekela nsombelu wende wa kale, João wakatambula pende.

Carlos ne João bavua ne disanka dipite bunene pakapetanganabu ku Nzubu wa Bukalenge ne kumonabu muvua yonso wa kudibu mushintuluke bikole! Mpindieu bonso babidi mbatatu ba nzubu ba kueyemena ne mbamanyishi ba Bukalenge ba tshisumi.

Mu Brésil mudi mpindieu bisumbu 30 bia muakulu wa tumama ne tusumbu tukese 154, bikale ne bamanyishi bapite pa 2 500, ne bampudi-matshi bafike ku 1 500. Mu Mpungilu wa Distrike wa mu 2001 wa “Balongeshi ba Dîyi dia Nzambi” uvua muenzeke mu Brésil bua bampudi-matshi, bantu bapite pa 3 000 bakabuelamu ne 36 bakatambula. Bu mudi Yehowa wambuluisha, tudi tutekemena bua se: bampudi-matshi bakuabu ba bungi nebitabe mukenji wa Bukalenge.

[Mêyi adi kuinshi]