Manya mua kuenza malu ne meji padi nsombelu ishintuluka

Bakulu banayi ba mu ditunga dia Pays-Bas: Pum, Jan, Dries, ne Otto, mbafuanangane mu mishindu ya bungi. Bonso banayi mbasele ne badi ne bana. Pashishe, kukadi bidimu ndambu, buonso buabu bavua benza midimu ya bianza ivua ibangata mêba mapite bungi ne bavua basombele mu nzubu mimpe menemene. Kadi, buonso buabu bakalekela midimu ya bianza ivuabu benza kutuadijabu kufila dîba diabu ne makanda abu onso bua kutungunuja midimu ya Bukalenge. Ntshinyi tshivua tshibambuluishe bua kushintulula nsombelu nunku? Bonso banayi bakababidila ne meji dishintuluka dia nsombelu.

NSOMBELU wa muntu ne muntu udi mua kushintuluka mu mushindu kampanda anyi kansanga. Nsombelu mipiamipia bu mudi kubuela mu dibaka, kupeta bana, anyi kuambuluisha baledi bakulakaje, itu ivudija majitu. Kadi kudi nsombelu mikuabu idi itupesha dîba dia bungi bua kuvudija mudimu wetu wa buena Kristo. (Matayo 9:37, 38) Tshilejilu, bana betu balela badi mua kumbuka kumbelu padibu bakola, anyi tuetu tudi mua kupeta pansio ku mudimu.

Pabi, nansha mudi nsombelu wetu mua kushintuluka patudi tuetu bine basue anyi katuyi basue, bena Kristo bakuabu mbafike ku dishintulula nsombelu wabu bua kupeta mushindu wa kuvudija mudimu wabu wa kuyisha lumu luimpe. Ke tshivua Pum, Jan, Dries, ne Otto benze menemene. Mushindu kayi?

Padi bana bumuka kumbelu

Pum uvua wenza mudimu wa bu-kontable mu kumpanyi mukuabu wa manga. Yeye ne mukajende Anny bavua ne tshibidilu tshia kuangata bumpanda-njila buambuluishi pamue ne bana babu ba bakaji babidi. Pum ne Anny bavua kabidi balongolola bua kupitshisha kapepa ne bantu bakuabu bavua mu mudimu wa bumpanda-njila. Badi bamba ne: “Dipetangana dia nunku divua dituepula ku bilumbu bivua disomba ne bantu bakuabu mua kukebesha.” Bu muvua tshilejilu tshia baledi babu tshibalenge ku muoyo, bana ba bakaji bonso babidi bakalua bampanda-njila ba pa tshibidilu pakajikijabu tulasa tuabu tua bikadilu.

Pakumuka bana kumbelu, Pum ne Anny bakamona ne: dishintuluka dia nsombelu edi divua dibapeshe dîba dia bungi ne mfranga ivua mua kubambuluisha bua kuendakana mu miaba milenga anyi bua kuditua mu mishindu kansanga ya didiolola. Kadi, mulume eu ne mukajende bakapangadija bua kubabidila dishintuluka dia nsombelu edi bua kuvudija mudimu wabu wa bena Kristo. Nunku Pum wakalomba mfumuende wa mudimu bua kuikalaye kayi wenza mudimu dituku dimue ku lumingu. Pashishe, Pum wakalongolola malu bua kutuadija mudimu pa dîba dia 7 wa dinda ne kujikija pa dîba 2 wa dilolo. Bushuwa, kukepesha mudimu kuvua kumvuija kupeta difutu dikese. Nansha nanku, malu akenda bimpe, bualu mu 1991 Pum wakalamata mukajende mu mudimu wa bupanda-njila bua pa tshibidilu.

Pashishe, bakalomba Pum bua kulua tshindondi tshia mutangidi wa Nzubu wa Mpuilu wa Bantemu ba Yehowa. Dilomba edi divua diumvuija ne: mulume eu ne mukajende bavua ne bua  kushiya nzubu uvuabu basombele bidimu 30 bijima ne kuya mu nzubu mushadile uvua mu lupangu lua Nzubu wa Mpuilu. Bakaya kubuelamu. Bivuaku bibakolele anyi? Anny udi wandamuna ne: dîba dionso divua nzubu wende umusamina muoyo, uvua udiebeja ne: ‘Nkadi mukaji wa Lota anyi?’ Wakabenga ‘kutangila ku nyima.’​—Genese 19:26; Luka 17:32.

Pum ne Anny badi bamona ne: dipangadika diabu ndibatuadile mabenesha mavule. Munkatshi mua mabenesha aa mudi malu aa: badi ne disanka dia kuenza mudimu wabu ku Nzubu wa Mpuilu, badi balongolola mpungilu ya distrike, ne bapetangana ne batangidi ba bijengu (batangidi bena ngendu) batu balua kuenza miyuki ku Nzubu wa Mpuilu au. Imue misangu batu bakumbula bisumbu bia bungi patu Pum upingana batangidi ba bijengu mu mudimu.

Ntshinyi tshiakambuluisha mulume eu ne mukajende bua kualabaja mudimu wabu ne disanka? Pum udi wamba ne: “Padi nsombelu webe ushintuluka bikole, udi ne bua kudilongolola bua kubabidila mu mushindu muimpe nsombelu mupiamupia.”

Mua kuvuija nsombelu wetu mukumbanyine

Jan ne mukajende Woth badi ne bana basatu. Anu bu Pum ne dîku diende, Jan wakenza pende mudimu ne nsombelu wende ne meji pakashintulukaye. Jan uvua wenza mudimu uvua ne difutu dimpe ku banke kampanda munkatshi mua bidimu bia bungi ne dîku diende divua ne nsombelu muimpe wa bena kantu ku bianza. Kadi wakumvua dijinga dikole dia kualabaja mudimu wende wa buena Kristo. Udi umvuija ne: “Mu nsombelu wanyi dianyisha dianyi dia bulelela diakavula, ne dinanga dianyi dia Yehowa diakakola.” Ke bualu kayi mu 1986, Jan wakashintulula nsombelu wende. Udi wamba ne: “Ngakababidila dîba divuabu benze mashintuluka kampanda ku mudimu bua kubangisha kuenza mudimu mêba makese. Bena mudimu nanyi bakakema e kumpeshabu dîna dia Diwodo bualu mvua ngenza mudimu anu mu dinsdag [Dibidi], woensdag [Disatu], ne mu donderdag [Dinayi]. Difutu dianyi diakapueka ne bia pa lukama 40. Ngakapanyisha nzubu wetu ne kusumba buatu buikale ne nzubu bua kuikala kuya miaba ivuabu dijinga dikole ne bamanyishi ba Bukalenge. Pashishe ngakenza mudimu bilenga ne pansio umvua muangate kumpala kua dîba; difutu dianyi diakapueka kabidi ne bia pa lukama 20, kadi mu 1993, ngakalua mpanda-njila wa pa tshibidilu.”

Lelu’eu, Jan udi mu Komite wa Diumvuangana ne Mpitadi ne utu pa tshibidilu wenza mudimu wa mutangidi wa mpungilu. Nansha mudi mubidi wa Woth mushale wa tusamasama, utu wangata  bumpanda-njila buambuluishi ku misangu. Bana babu bonso basatu bakadi ku abu mabaka, ne buobu ne bena dibaka nabu badi bamanyishi ba tshisumi ba Bukalenge.

Mmunyi muvua Jan ne Woth benze bua kuibidilangana ne nsombelu mushadile ku uvuabu nende eu? Jan udi wandamuna ne: “Patuvua ne biuma bia bungi tuvua tudienzeja bua kubenga kulamata bikole ku bintu bia ku mubidi. Mu matuku etu aa bidi mua kuikala bikole bua kuanji kuindila kakese bua kulua kupeta tshintu, kadi mabenesha a mu nyuma ne masanka a mudimu atudi bapete adi atumbusha lutatu elu mu lungenyi.”

Anu bu Jan ne Woth, Dries ne mukajende Jenny bakapangadija pabu bua kulama nsombelu wabu mukumbanyine bua kumona mua kupitshisha mêba a bungi mu midimu ya Bukalenge. Dries ne Jenny bakenza mudimu wa bumpanda-njila too ne tshikondo tshiakapetabu muana. Nunku, bua kukumbaja majinga a dîku diende, Dries wakenza mudimu wa buludiki mu kumpanyi kampanda. Bamfumu bende ba mudimu bakanyisha mudimu wende ne bakasua kumubandisha muanzu. Kadi, Dries wakabenga dimubandisha dia muanzu bualu bu yeye muitabe, bivua mua kumulomba bua kuenza anu mêba makese mu midimu ya Buena-Kristo.

Kukolesha bana ne kulama mamuende wa Jenny uvua usama biakalomba dîba dia bungi ne bukole buvule kudi mulume eu ne mukajende. Nansha nanku, bakatungunuka ne kuikala ne lungenyi lua bumpanda-njila. Ntshinyi tshiakabambuluisha bua kulama lungenyi elu? Jenny udi umvuija ne: “Tuvua tusomba ne bampanda-njila kuetu, tubikila bakuabu bua kudia nabu ne tuakidila batangidi ba bijengu kumbelu kuetu.” Dries udi wamba kabidi ne: “Tuakalama nsombelu mukumbanyine ne tuvua tuepuka dibuelabuela dia mabanza a tshianana. Tuakapangadija bua kubenga kudikebela malu manene anyi kusumba nzubu, bua ne: mu matuku avua ne bua kulua katulu kushala balamate ku bintu bia buena abi to.”

Dipangadika dia Dries ne Jenny bua kulongolola nsombelu uvua mua kubapesha dîba dia bungi bua malu a Bukalenge diakapatula bipeta bimpe. Bana babu bonso babidi badi bakulu mu bisumbu biabu, ne umue udi mpanda-njila pamue ne mukajende. Dries ne Jenny badi benza mudimu wa bumpanda-njila bua pa buabu, ne matuku adi mashale aa Dries ne Jenny bakatuadija mudimu wa tshijengu. Mpindieu badi benza mudimu wa budisuila ku Betele, ne Dries udi mu Komite wa Filiale.

Pansio wa kumpala kua dîba

Anu bu Dries ne Jenny, Otto ne mukajende Judy bavua bampanda-njila kumpala kua kulelabu bana babu ba bakaji babidi. Tshikondo tshivua Judy ne difu dia muanende wa kumpala, Otto wakapeta mudimu wa bulongeshi.

Pavua bana babu benda bakola, Otto ne Judy bavua bakidila bampanda-njila kumbelu kuabu bua bana babu ba bakaji bamone disanka dia  bena Kristo badi benza mudimu wa ku dîba ne ku dîba. Pakapita matuku, muanabu wa kumpala wakangata mudimu wa bumpanda-njila. Pashishe wakabuela mu Kalasa ka Gilada, ne mpindieu yeye ne bayende badi benza mudimu wa bu-misionere mu dimue ditunga dia mu Afrike. Muanabu wa ndekelu wakabanga bumpanda-njila mu 1987, ne Judy wakamutua mu nyima.

Pavua dishintuluka dia malu diambuluishe Otto bua kuikalaye ulongesha anu mêba makese mu kalasa, uvua wenza mudimu wa bumpanda-njila mu mêba avuaye kayi ku mudimu au. Ndekelu wa bionso wakalekela mudimu wa bulongeshi. Lelu’eu udi Otto mutangidi muena ngendu, udi ukuata mudimu ne mamanya ende a bulongeshi bua kukolesha bisumbu mu nyuma.

Mmubelu kayi udi Otto ufila kudi bantu badi bangata pansio kumpala kua dîba? “Paudi wangata pansio, kupangadiji bua kuanji kuikisha tshidimu tshijima to. ‘Kuikisha’ ki mbualu bukole budi bukengela kulonga to. Padi matuku makese apita, neupue muoyo bua kuenza bumpanda-njila. Pamutu pa nanku, bangisha kuenza midimu ya buena-Kristo diakamue.”

Enza mudimu muimpe ne dimanya diebe

Eyowa, bana betu bu mudi Pum, Jan, Dries, ne Otto kabatshiena ne bukole ne makanda avuabu nawu patshivuabu bansonga to. Kadi badi ne lungenyi, dimanya dia ku malu avuabu bamone ne meji bia bungi. (Nsumuinu 20:29) Mbamanye tshidi kuikala batatu kumvuija, ne mu dienza mudimu ne bakaji babu, mbamanye ndambu tshidi kuikala mamu. Pamue ne bakaji babu, bavua bapite ne ntatu ya mu mêku abu bimpe ne batekele bana babu bipatshila bia mu nyuma. Otto udi wamba ne: “Bu mumvua mukoleshe bana, pandi mfila mibelu bu mutangidi wa tshijengu mu malu a mêku, ndi nyifila bimpe.” Bia muomumue, bua dimanya divua nadi Dries bu muvuaye tatu wa dîku, udi wambuluisha bikole mpindieu mu mudimu udiye nawu mu dîku dia Betele mudi muikale bansonga ba bungi.

Bulelela, dimanya dine dia bana betu aba nkayabu didi dibambuluisha bua kutabalela majinga a mishindu yonso adi mu bisumbu. Mu kuamba kuimpe, malu adibu bamone ke biabu bia mudimu bidibu nabi, ne nenku badi bakuata mudimu ne bukole buabu mu mushindu mutambe buimpe. (Muambi 10:10) Bushuwa, mu lupolo lumue lua dîba, badi mua kuenza mudimu wa bungi kupita badi ne makanda a mubidi kadi kabayi bamonemone malu.

Bana betu aba pamue ne bakaji babu badi tshilejilu tshimpe bua bansonga badi munkatshi mua basadidi ba Yehowa. Bansonga badi bamona ne: balume ne bakaji ba nunku mbapete ntatu ya bungi ne mabenesha bidibu bafunde mu mikanda yetu ya bena Kristo. Bidi bikankamija bua kumona balume ne bakaji badi baleja lungenyi bu lua Kaleba uvua mulombe mudimu mukole nansha mukavuaye mununu.​—Yoshua 14:10-12.

Idikija ditabuja diabu

Udiku mua kuidikija ditabuja ne bienzedi bia balume ne bakaji batudi batele mu tshiena-bualu etshi anyi? Vuluka ne: bakenza bua bulelela kuluabu nsombelu wabu wa matuku onso. Bakakolesha dijinga dia kuenza mudimu wa ku dîba ne ku dîba munda mua bana babu. Jan udi wamba ne: bakenza nunku “pa kuikala tshilejilu mu dinanga dia Yehowa ne bulongolodi buende, pa kulongolola bua kusomba ne bantu ba bikadilu bimpe ne kulongesha bana bua kudiambuila majitu abu.” Bavua benza mudimu ne banaya kabidi pamue mu dîku. Pum udi wamba ne: “Mu bikondo bia dikisha, dîku dijima divua ne tshibidilu tshia kuya kuyisha mu dinda ne kujikija lutetuku mu mapingaja.”

Bena Kristo aba bavua badilongolole kabidi bua kuenza mudimu bilenga pavua nsombelu wabu ne bua kushintuluka. Bakadifundila bipatshila ne bakangata mapangadika avua mambuluishe bua bipatshila biabu kukumbana ne lukasa. Bakakeba mushindu wa kuenza mudimu wa bianza mukese ne bavua badilongolole bua kuikalabu basanka anu ne tukese tuvuabu bapeta. (Filipoi 1:10) Bakaji bakakuatshisha babayabu bikole menemene. Buonso buabu bavua ne dijinga dikole dia kubuelela ku mushiku wa ‘tshibi tshinene tshia mudimu mukole,’ nunku ke padibu bapete mabenesha mavule a kudi Yehowa.​—1 Kolinto 16:9; Nsumuinu 10:22.

Udi musue pebe kuvudija mudimu webe anyi? Pikalabi nanku, kuenza mudimu ne meji padi nsombelu ishintuluka kudi mua kukuambuluisha bua kuenza nanku.

[Tshimfuanyi mu dibeji 20]

Pum ne Anny badi batangila Nzubu wa Mpuilu

[Tshimfuanyi mu dibeji 20]

Jan ne Woth benda bayisha

[Tshimfuanyi mu dibeji 21]

Dries ne Jenny benza mudimu ku Betele

[Tshimfuanyi mu dibeji 21]

Otto ne Judy badilongolola bua kukumbula tshisumbu tshikuabu