‘Semenayi pabuipi ne Nzambi ne yeye neasemene pabuipi nenu’

Kumpala ne panyima: Nsombelu mubi wa kale ne muimpe mu matuku adi kumpala

MUPOSTOLO Paulo wakaleja ne: mukenji wa Nzambi udi ne bukole budi bulenga mutshima pakambaye ne: ‘Dîyi dia Nzambi didi ne muoyo ne bukole, didi dipita muele wonso musakisha nseke ibidi kutua, didi dijingulula lukasa meji ne malu adi mutshima musue kuenza.’ (Ebelu 4:12) Bukole budi nabu mukenji wa Nzambi bua kulenga mutshima buakamueneka nangananga mu bidimu lukama bia kumpala. Nansha muvua nsombelu wa tshikondo atshi kayi muimpe, aba bakalua bena Kristo bakavuala bumuntu bupiabupia.​—Lomo 1:28, 29; Kolosai 3:8-10.

Bukole bua dîyi dia Nzambi budi bushintulula bantu mushindu udi Bible uleja budi kabidi bumueneka lelu. Tshilejilu, tangila bualu buvua buenzekele Richard, muntu munene mule. Bu muvuaye ufika munda lukasa, uvua uluangana mvita nansha bua tumalu tukese. Richard uvua muntu wa tshikisu. Wakabuela too ne mu kasumbu ka dinaya dia mbata anyi bokse. Wakapiluka bikole, kuluaye tshilobo mu dinaya adi mu provense wa Westphalie, mu ditunga dia Allemagne. Richard uvua kabidi kanuayi wa dikema, uvua uluangana mvita misangu ya bungi. Dimue dituku diakaluanganaye mvita, muntu umue wakafua, buobu kuela Richard mu buloko.

Kadi nsombelu uvua mushindu kayi ku nzubu kua Richard? Richard udi wamba ne: “Kumpala kua meme ne Heike kulonga Bible, muntu yonso wa kutudi uvua wenza tshivuaye musue. Heike uvua usomba mêba a bungi ne balunda bende eku meme muditue mu manaya anyi, nangananga a mbata, a diendela pa mavuala a mâyi ne ditua mintunki mu mâyi.”

Pakabanga Richard ne Heike kulonga Bible ne Bantemu ba Yehowa, uvua umona bimukolele be bua kushintuluka ne kubanga kutumikila mêyi malenga adi mu Dîyi dia Nzambi. Kadi pakamanya Richard Nzambi bimpe, wakapeta dijinga dikole dia kumusankisha. Richard wakajingulula ne: Nzambi kêna wanyisha bantu badi banange tshikisu anyi badi banaya manaya a tshikisu. Richard wakalonga ne: ‘Mutshima [wa Yehowa] udi ne muntu udi musue malu a [tshikisu] lukuna.’​—Musambu 11:5.

Kabidi, ditekemena dia kuikala ne muoyo wa tshiendelele mu mparadizu pa buloba diakasankisha Richard ne Heike bikole. Bakajinga kubuela mu mparadizu au pamue! (Yeshaya 65:21-23) Mêyi adi alonda aa akalenga mutshima wa Richard bikole: ‘Semenayi pabuipi ne Nzambi ne yeye neasemene pabuipi nenu.’ (Yakobo 4:8) Wakamona mushinga wa kutumikila mubelu eu mufundisha ku nyuma wa Nzambi: ‘Kuikadi ne muena [tshikisu] mukau, kulondi bualu nansha bumue budiye wenza. Bualu bua Yehowa udi ukina muntu udi ne tshishiku, kadi bunyana buende budi kudi badi ne mitshima miakane.’​—Nsumuinu 3:31, 32.

Nansha muvuaye ne dijinga dikole dia kushintulula nsombelu wende, Richard wakajingulula ne: kavua mua kumushintulula ku bukole buende yeye nkayende to. Wakalua kumona mushinga wa kulomba Nzambi bua amuambuluishe. Nunku wakatumikila mêyi a Yezu akambilaye bapostolo Bende ne: “Sambilayi, bua kanuponyi mu ditetshibua. Muoyo mmusue kuenza, kadi mubidi tshiawu mbutekete.”​—Matayo 26:41, MMM.

Kunyima kua yeye mumane kulonga mushindu udi Nzambi wangata tshikisu, diluishangana mvita ne tshiji, Richard wakatuishibua ne: dinaya dia bokse ndibi. Ku diambuluisha dia Yehowa ne dikankamija dia bantu bavua balonge nende Bible, Richard wakalekela malu a tshikisu. Wakalekela dinaya dia mbata  ne diluangana mvita, kupangadijaye bua kulengeja nsombelu wa mu dîku diende. Richard udi wamba ne: “Dilonga bulelela bua mu Bible ndingambuluishe bua kuanji kuikala kuimana ne kuela meji kumpala kua meme kuenza bualu kampanda.” Mpindieu udi mutangidi wa lutulu mu tshimue tshia ku bisumbu bia Bantemu ba Yehowa. Udi wamba kabidi ne: “Dîyi dia dinanga ne dia kanemu didi mpindieu dindombola mu malanda anyi ne mukajanyi ne bana banyi. Ke bualu kayi bena mu dîku dianyi mbasombe mu buobumue.”

Bamue bantu badi bamanye Bantemu ba Yehowa bibi batu misangu mikuabu bamba ne: Bantemu batu bashipa mabaka a bantu. Kadi tshilejilu tshia buena tshia Richard etshi tshidi tshileja ne: bantu aba kabatu bamba bulelela to. Bushuwa, bulelela bua mu Bible budi mua kulengeja nsombelu wa mu dîku ne kupetesha aba bavua ne nsombelu mubi kumpala, nsombelu mulenga ne diakalenga mu matuku atshidi alua kumpala.​—Yelemiya 29:11.

[Lungenyi lunene lua mu dibeji 9]

“Ditekemena dia mparadizu wa pa buloba diakansaka bua kushintuluka”

[Kazubu mu dibeji 9]

Mêyi a mu Bible adi ashintulula nsombelu wa bantu

Bible udi mua kuikala ne bukole bua bungi mu nsombelu wa bantu. Tangila amue mêyi a mu Bible adi mambuluishe bantu ba tshikisu bua kushintuluka:

‘Udi kayi ukuata tshiji lubilu udi upita muena bukitu buimpe, udi ukokesha muoyo wende udi upita munyengi wa musoko kutumba.’ (Nsumuinu 16:32) Tshiji katshiyi ne mushindu wa kutshikanda ntshimanyinu tshia butekete, ki ntshia bukole to.

“Muntu wa lungenyi nansha yeye mufike munda, udi amu ulama lutulu.” (Nsumuinu 19:11, MMV) Meji ne ngumvuilu wa bualu bidi biambuluisha muntu bua kubenga kumona malu pamutu pamutu bua kukeba tshimvundu, ne kudi mua kukanda muntu bua kufika tshiji lukasa.

‘Kuena mua kudia bulunda ne muntu muena tshiji. Kuendi ne muntu udi ufika munda lukasa. (Nsumuinu 22:24, 25, Mukanda wa Mvidi Mukulu [Mishonyi, MMV]) Bena Kristo badi benza bimpe padibu bepuka kuenda ne bantu badi basue kuenza malu ne tshiji tshikole.