Malu a mu nsombelu

Masanka kaayi kuelekeja!

MALONDA KUDI REGINALD WALLWORK

“Kakuena tshintu pa buloba apa tshitudi mua kuelekeja ne masanka atuvua bapete mu mudimu wa ku dîba ne ku dîba wa bu-misionere utuvua benzele Yehowa!” Ngakangula ka-mukanda aka kafunda lukasa lukasa mu bintu bia mukajanyi matuku makese panyima pa lufu luende mu ngondo muitanu mu 1994.

PANDI ngela meji bua miaku ya Irene, ndi mvuluka bidimu 37 bia disanka bituvua ba-misionere mu ditunga dia Pérou. Tuvua banangangane bikole anu mutubi bikengela bua mulume ne mukaji bena Kristo katshia tuaselangana mu ngondo wa 12 mu tshidimu tshia 1942, ne eu ke muaba muimpe wa meme kutuadijila muyuki wanyi.

Irene uvua mukolele mu dîku dia Bantemu ba Yehowa mu tshimenga tshia Liverpool, mu ditunga dia Angleterre. Bavua bana ba bakaji basatu kuabu ne tatuabu wakafua mu Mvita ya Kumpala ya Buloba bujima. Bakalua kusela kabidi mamuende kudi Winton Fraser, ne buobu kulela muana wa balume diende Sidney. Kumpala kua Mvita Mibidi ya Buloba bujima, dîku diabu diakamuangala ditangile mu tshimenga tshia Bangor, ku Nord kua ditunga dia Pays de Galles. Mu tshimenga etshi ke muvua Irene mutambuile mu 1939. Sidney wakatambula tshidimu tshimue kumpala kua Irene, nenku yeye ne Irene bavua benza mudimu wa bumpanda-njila (bambi ba lumu luimpe ba ku dîba ne ku dîba) pamue ku muelelu wa ku Nord kua Pays de Galles, kumbukila mu Bangor too mu Caernarvon, kabidi ne mu tshidila tshia Anglesey.

Tshikondo atshi, mvua mu Tshisumbu tshia Runcorn tshivua mutantshi wa kilometre mitue ku 20 ku Sud-Est kua Liverpool mumvua tshitudi tubikila lelu ne: mukulu mutangidi. Irene wakalua kundi mu mpuilu kampanda wa tshijengu bua kulomba teritware uvuaye mua kuyisha matuku avuaye ne bua kushala kua yayende Vera, uvuabu basele mu Runcorn.  Tuakashemeja bulunda ne Irene mu bingu ibidi ivuaye mushale netu, ne pashishe mvua nya kumutangila misangu mivule mu Bangor. Ndisanka kayipu dimvua nadi dimue dituku ku ndekelu kua lumingu pakitaba Irene dîyi dimvua mumuele bua kumusela!

Pangakapingana kumbelu mu dia lumingu, ngakabangisha kulongolola diakamue malu a dibaka dietu, kadi mu dibidi ngakapeta mukenji wa kudi Irene. Uvua wamba ne: “Mfuila luse bualu mukenji eu neukubungamije. Ndi nshipa malu a dibaka dietu au. Ndi nkutumina mukanda bua kukumvuija.” Bualu abu buakansamisha mutu bikole. Ntshilumbu kayi tshivua tshienzeke?

Mukanda wa Irene wakafika dituku diakalonda. Wakangambila ne: uvua uya ku Horsforth mu Yorkshire bua kuenza bumpanda-njila ne Hilda Padgett. * Wakangumvuija ne: ngondo 12 kumpala ukavua muitabe bua kuya muaba uvuabu bakeba bikole bambi ba lumu luimpe bu buobu bamulombe bua kuya. Wakafunda ne: “Bualu ebu buvua kundi bu diditshipa kudi Yehowa, ne ndi ngumvua nanku bualu mvua mumulaye kumpala kua tuetu kupetangana nebe, ne ndi ne bua kukumbaja tshimvua mulaya etshi.” Nansha mumvua mubungame, lulamatu luende luakankemesha bikole ne ngakamutumina mukenji ne: “Ndaku. Nenkuindile.”

Pavuaye mu Yorkshire, bakafundila Irene tshibawu tshia buloko bua ngondo isatu bualu uvua mubenge kubuelakana mu malu a Mvita bua kuondo kenda ka muoyo. Kadi ngondo 18 pashishe, mu ngondo wa 12 mu tshidimu tshia 1942, tuakaselangana.

Matuku anyi a ku buana

Mu 1919 Mamu wakasumba mikanda ivua ne tshiena bualu tshia ne: Étude des Écritures. * Nansha muvuaye katshia kayi muanji kubalaku mukanda bilondeshile bivua tatu wamba tshikondo atshi, Mamu uvua mudisuike bua kulonga mikanda eyi ne ntema yonso pamue ne Bible wende. Wakenza nanku ne wakatambula mu 1920.

Tatu kavua muntu wa malu makole to ne kavua ukandika Mamu bua kuenza tshivuaye musue bu mudi kutukolesha tuetu bana buonso banayi (bayaya babidi: Gwen ne Ivy; tutu Alec; ne meme) mu njila wa bulelela. Stanley Rogers ne Bantemu bakuabu ba lulamatu ba mu Liverpool bavua benza ngendu bua kuenza miyuki ya malu a mu Bible mu Runcorn, muvuabu bafumine ku dienza tshisumbu tshipiatshipia. Dîku dietu diakadiunda mu nyuma pamue ne tshisumbu tshietu atshi.

Yaya Gwen uvua ulonga bua kupeta konfirmasiyo mu Ekeleziya wa mu Angleterre kadi wakalekela diakamue malu au pakabangaye kulonga Bible pamue ne Mamu. Pakalua mpasata bua kumona tshitshivuaye katshiyi ubuelela mu kalasa kende, bakamuela nkonko iloka bu mvula ivuaye kayi mudilongolole bua kuandamuna to. Yaya Gwen wakamukonka tshivua Disambila dia Tatu wetu diumvuija ne ndekelu wa bionso wakafika ku dimumvuija nadi! Bua kujikija wakatela mêyi a mu 1 Kolinto 10:21, kumulejaye patoke ne: kavua mua kutungunuka kabidi ne ‘kudia ku mêsa abidi’ to. Pakavua mpasata eu upatuka lupangu bua kuya, wakamba ne: uvua ne bua kuya kulombela yaya Gwen Nzambi ne uvua ne bua kualukila bua kuandamuna nkonko ivua yaya Gwen muele, kadi too ne lelu eu katu muanji kupingana to. Panyima pa ditambula diende, yaya Gwen wakalua mpanda-njila.

Mu tshisumbu tshietu bavua batabalela bansonga bimpe bitambe. Ndi mvuluka pamvua nteleja muyuki uvua mukulu kampanda uvua mulue kutukumbula muenze pantshivua ne bidimu muanda-mutekete. Kunyima kua muyuki wakalua kuyikila nanyi. Ngakamuambila ne: mvua mubale muyuki wa Abalahama ne mushindu uvuaye ukeba kulambula muanende Isaka. Wakangambila ne: “Ndaku ku tshiakuidi ne ungambile muvuabi bienzeke.” Ndisanka kayipu dimvua mumvue pangakimana kumpala aku bua kuenza “muyuki wanyi wa patoke” wa kumpala!

Ngakatambula ne bidimu 15 mu 1931, tshidimu tshiakafua Mamu, ne meme kulekela kalasa bua kulonga mudimu wa nzembu. Mu 1936 bavua bela miyuki ya malu a mu Bible mikuata pa matadi miaba ivua bantu ba bungi, ne muanetu kampanda wa bakaji ukavua mukulakaje wakatukankamija meme ne tutuanyi bua kuenza mudimu eu. Nunku meme ne tutu Alec tuakaya ku Liverpool bua kusumba dikalu ne kupeta ka-ditempu ka kusuikilaku bua kuikala kuambuilamu tshisanji tshia fono. Tshikolokolo tshivua tshisuikila ku nyima kua ka-ditempu ku mutu kua mulonda wa metre 2. Mulongolodi wa makalu  wakatuambila ne: kavua muanji kuenzaku tshintu tshia mushindu au katshia, kadi tshiakakumbana bimpe! Tuakatambakana tuenda tuelela bantu miyuki ayi mu teritware wetu mujima bikale ne disanka ne dianyisha bua mubelu wa muanetu wa bakaji au ne bua majitu a mudimu atuvua tupeta.

Mvita Mibidi ya Buloba bujima: tshikondo tshia diteta

Pavua nsombelu wenda unyanguka mutangile ku mvita, meme ne Stanley Rogers tuvua tuenda tumanyisha muyuki wa patoke wa ‘Itabayi Malu mudiwu,’ uvuabu ne bua kuenza ku Royal Albert Hall wa mu Londres mu dia 11 ngondo wa tshitema 1938. Pashishe ngakabanya panyi kakanda kavuabu bafundemu muyuki eu pamue ne kakanda ka “Fascisme peshi Budikadidi,” kakapatuka tshidimu tshiakalonda. Tukanda tuonso tubidi etu tuvua tuela patoke dijinga divua nadi ditunga dia Allemagne wa Hitler bua kukokesha nkayadi. Mu tshikondo atshi, ngakalua kumanyika bikole mu Runcorn bua mudimu wanyi wa patoke ne bavua bannemeka bua mudimu eu. Bulelela, dikala ntunga-mulongo mu dienza mudimu wa Nzambi diakandongolola bimpe bua midimu ivua ilua kumpala.

Kumpanyi umvua ngenza mudimu wakenza kontra wa kuelela tshiapu kampanda tshipiatshipia tshivua pa mpenga pa tshimenga. Pangakamanya ne: tshiapu atshi tshivua tshia bingoma, ngakabambila patoke ne: tshivua mua kuenzamu mudimu to. Nansha muvua bamfumu banyi ba mudimu kabayi basanke, uvua ku mutu kuanyi wakangakuila ne bakampesha mudimu mukuabu. Ngakalua kumanya pashishe ne: uvua ne muntu bu tatuende mukaji anyi mamuende mukuabu nanku uvua pende Ntemu wa Yehowa.

Muena mudimu nanyi mukuabu wakankolesha ku muoyo bikole pakangambilaye ne: “Reg, katuvua mua kutekemena tshinga tshintu kuudi to, bualu udi mu mudimu au wa Bible kukadi bidimu bivule be!” Nansha nanku, mvua ne bua kuikala ne budimu bualu bena mudimu nanyi ba bungi bavua bajinga kunkebela bilumbu.

Kabadi ka mu Liverpool kakanganyishila bua tshiyi ku busalayi bua kuondo kanyi ka muoyo mu ngondo muisambombo wa tshidimu tshia 1940 anu pamvua mua kutungunuka ne kuenza mudimu wanyi wa nzembu. Bushuwa, bualu ebu buakangambuluisha bua kutungunuka ne mudimu wanyi wa bena Kristo.

Mu mudimu wa ku dîba ne ku dîba

Pakavua mvita iya ku ndekelu, ngakapangadika bua kulekela mudimu wa nzembu ne kuya kuenza mudimu wa ku dîba ne ku dîba ne Irene. Mu 1946 ngakenza dikadika dia metre 5 diakalua nzubu wetu, ne tshidimu tshiakalonda bakatulomba bua kuya ku Alveston, musoko uvua mu Gloucestershire. Nunku tuakenza mudimu wa bumpanda-njila mu tshimenga tshia kale tshia Cirencester ne mu tshia Bath. Mu 1951, bakandomba bua kulua mutangidi muena ngendu bua kukumbula bisumbu bia ku Sud kua Pays de Galles, kadi bidimu bibidi kabiyi bianji kukumbana, tukavua mu njila batangile ku Gilada, Kalasa ka Bible ka Watchtower bua kulonga mudimu wa bu-misionere.

 Kalasa ka 21 kakenzekela ku South Lansing, ku Nord kua New York, ne tuakajikija mu 1953 ku mpungilu wa Nsangilu wa bukua-panu bupiabupia mu tshimenga tshia New York. Katuvua bamanye muaba uvuabu ne bua kututuma too ne dituku diakatupeshabu mapoloma. Ndisanka bungi kayi dituvua nadi patuakamanya ne: tuvua tuya mu Pérou! Bua tshinyi? Bualu muakunyi wa Irene, Sidney Fraser ne mukajende Margaret bavua benza mudimu ku filiale wa mu tshimenga tshia Lima (mu Pérou) kukavua tshidimu tshijima panyima pa dijikija diabu mu kalasa ka 19 ka Gilada!

Patutshivua bindile mikanda yetu ya luendu, tuakenza mudimu matuku makese ku Betele wa ku Brooklyn, kadi mutantshi mukese tuetu kumata mu njila batangile ku Lima. Muaba wa kumpala ku miaba dikumi ivuabu batutume uvua Callao, tshitudilu tshinene tshia mazuwa tshia mu Pérou, ku Ouest kua Lima. Nansha mutuvua balonge imue miaku ya mu tshiena-Espagne, mu tshikondo atshi meme ne Irene katuvua mua kuyukila ne muntu bimpe mu muakulu au to. Mmunyi mutuvua mua kuenza mudimu wetu?

Ntatu ne masanka a mudimu wa diyisha

Bakatuambila ku Gilada ne: mamu katu ulongesha muanende muakulu to. Kadi muana utu uulonga padi mamuende umuakuisha. Nunku mubelu uvuabu batupeshe uvua ne: “Ndayi diakamue mu mudimu wa buambi, ne longelayi muakulu kudi bantu. Nebanuambuluishe.” Pamvua ngenza bukole bua kumanya muakulu eu mupiamupia, elabi meji tshingakumvua pakantekabu mukulu mutangidi mu Tshisumbu tshia Callao mbingu ibidi panyima pa difika dietu! Ngakaya kumonangana ne Sidney Fraser, kadi mubelu wende uvua wa muomumue ne uvuabu batupeshe ku Gilada wa kutantshila bena tshisumbu ne kuyikila ne bantu ba mu teritware. Ngakadisuika bua kulonda mubelu eu.

Disambombo dikuabu mu dinda, ngakapetangana ne muena mabaya kampanda mu ditanda diende. Wakangambila ne: “Ndi ne tshia kutungunuka ne mudimu wanyi kadi anji kusomba ungambile buudi nabu.” Ngakamuambila ne: mvua mua kuyikila nende anu pavuaye witaba bualu bumue ebu: “Meme muenze tshilema, undongolole. Tshiakufika munda to.” Wakaseka ne kuitabaye dilomba dianyi. Mvua nya kamutangila misangu ibidi ku lumingu ne ngakamona ne: au uvua mushindu mutambe buimpe wa meme kumanya muakulu mupiamupia eu, anu muvuabu bangambile.

Mu mpukapuka, ngakapetangana ne mukuabu muena mabaya mu tshimenga tshia Ica (muaba muibidi uvuabu batutume) ne ngakamuambila mushindu umvua mumvuangane ne muena mabaya wa mu tshimenga tshia Callao. Wakitaba pende bua kungambuluisha, nunku tshiena-Espagne tshianyi tshiakatungunuka ne kulengela, nansha mungakenza bidimu bisatu bijima bua kushisha kutshishikuluja bimpe. Muntu eu uvua anu ne midimu ya bungi misangu yonso, kadi ngakalongolola bua kulombola dilonga dia Bible pa kumubadila mvese ne pashishe kumumvuija nayi. Lumingu lukuabu pangakaya bua kumutangila, mfumuende wa mudimu wakangambila ne: ukavua mumbuke muye mu Lima muvuaye mupete mudimu mukuabu. Pashishe dimue dituku patuakaya ne Irene ku Lima bua kubuela mu mpungilu kampanda, ngakamonangana ne muntu eu kabidi. Ndisanka kayipu dimvua mumvue pangakamanya ne: wakakeba Bantemu muaba uvuaye muye au bua kutungunuka ne dilonga, ne mpindieu yeye ne dîku diende dijima bakavua badilambule kudi Yehowa!

Mu tshisumbu tshikuabu, tuakasangana ne: muntu mulume mukuabu ne mukaji uvuaye musombe nende bakavua batambule kadi kabayi banji kufundisha dibaka kua mbulamatadi to. Patuakakula nabu bua tshidi Bible wamba bua bualu abu, bakapangadika bua kufundisha dibaka diabu kua mbulamatadi, muanda uvua mua kubavuija bakumbane bua kulua Bantemu batambule. Nunku ngakalongolola bua kuya nabu ku biro bia mbulamatadi bua kufundisha dibaka diabu. Kadi mpindieu tshilumbu tshikuabu kujuka bualu bavua ne bana banayi bavua kabayi ku mikanda ya mbulamatadi ne mikenji ya ditunga ivua ilomba muntu yonso bua afundishe bana ku mikanda ya mbulamatadi. Tuakadiebeja tshivua muena mbulamatadi ne bua kuenza. Muena mbulamatadi au wakamba ne: “Bu mudi bantu bimpe aba, balunda bebe Bantemu ba Yehowa balongolole bua ne: ufundishe dibaka diebe, ndi nteka mikanda ya kabadi ku luseke ituvua ne bua kupatuila muana ne muana yonso ne ndi mbela ku mikanda ya mbulamatadi tshianana.” Tuakanyisha bikole muanda eu bualu dîku edi divua dipele ne bivua mua kubakolela bua kufuta makuta a tshibawu tshivuabu mua kubakosela.

Kunyima, Albert Schroeder wa ku biro binene bidi bilombola midimu ya Bantemu ba Yehowa wakalua kututangila ne wakamba bua ne: bakebe nzubu mukuabu mupiamupia wa ba-misionere mu tshitupa tshikuabu tshia Lima. Nunku meme ne Irene pamue ne bana betu ba bakaji Frances ne Elizabeth Good ba  mu États-Unis, ne muanetu mukuabu ne mukajende (ba mu ditunga dia Canada) tuakaya mu distrike dia San Borja. Munkatshi mua bidimu bibidi anyi bisatu, tuakenza tshisumbu tshikuabu tshinene.

Bu mutuvua tuenza mudimu mu Huancayo (mu mikuna ya bule bua metre 3 000) tuvua tubuela mu tshisumbu tshivua muaba au tshivua ne Bantemu 80. Kuine aku ngakambuluisha mu mudimu wa dibaka dia Nzubu wa Bukalenge muibidi uvuabu bibake mu ditunga adi. Bakanteka muleji-mpala wa Bantemu ba Yehowa kumpala kua mbulamatadi bualu tuvua ne bua kuya ku kabadi misangu isatu bua kuya kujadika ne: lupangu kampanda lutuvua basumbe lukavua luetu. Malu aa ne mudimu munene wa divuija bantu bayidi uvua ba-misionere bavule ba lulamatu benze mu bidimu bia ku ntuadijilu abi, biakambuluisha bikole bua didiunda dia mudimu ditudi tumona mpindieu mu Pérou: kumbukila ku Bantemu 283 mu 1953 too ne ku Bantemu bapite pa 83 000 lelu.

Diumuka divua dibungamija

Tuvua tumvuangana bimpe ne ba-misionere netu mu nzubu yetu yonso ya ba-misionere, mumvua misangu ya bungi ne diakalenga dia kuikala mutangidi wa nzubu. Mu Dimue dionso mu dinda tuvua tudisangisha bua kuakula bua midimu yetu ya mu lumingu lujima alu, ne bua kupesha muntu ne muntu tshivuaye ne bua kuenza bua kulama nzubu ne makenda. Bualu bua mushinga butuvua tuetu bonso tuenza buvua nkuyisha, ne bua kukumbaja tshipatshila atshi tuetu buonso tuvua tuenza mudimu mu diumvuangana. Ndi ne disanka dia kuvuluka ne: katuvua batandanganeku bikole musangu nansha umue mu nzubu yetu to.

Muaba wa ndekelu wakatutumabu uvua mu Breña, musoko wa ku mpenga kua Lima. Tshisumbu tshia muaba au tshivua ne Bantemu 70 tshiakadiunda lukasa ne kupetatshi Bantemu bapite pa 100, ke bualu kayi bakenza tshisumbu tshikuabu mu Palominia. Ke tshikondo tshiakabanga Irene kusama. Ku ntuadijilu ngakamona ne: kuvua misangu ivuaye kayi mua kuvuluka malu avuaye muambe, ne misangu mikuabu uvua ne lutatu bua kuvuluka njila wa kumbelu. Nansha muvuabu bamupesha manga mimpe, disama diende divua dienda anu dikola.

Bia dibungama, mu 1990, ngakapangadija bua kupingana mu Angleterre muvua yaya Ivy mutuakidile kumbelu kuende bilenga. Bidimu binayi pashishe, Irene wakafua muikale ne bidimu 81. Ndi mutungunuke ne mudimu wa ku dîba ne ku dîba, muikale mukulu mu tshisumbu tshimue tshia ku bisatu bidi mu tshimenga tshindela. Ku misangu ntu kabidi nya mu tshimenga tshia Manchester bua kukolesha tshisumbu tshia muakulu wa bena Espagne.

Matuku adi mashale aa mvua mumone bualu bukuabu buvua bubangishe kukadi bidimu bia bungi pamvua ngenda ngelela bantu miyuki ya minite itanu ku tshisanji tshianyi tshia fono. Ndi muvuluke bimpe muana wa bakaji mukuabu mulongi uvua muimane ku tshibi pa nyima pa mamuende, uteleja muyuki.

Ndekelu wa bionso, nsongakaji eu wakaya mu Canada, ne uvua ufundilangana ne mulunda wende utshidi musombele mu Runcorn, ukadi Ntemu mpindieu. Nsongakaji au mmufunde matuku adi panshi aa ne: Bantemu babidi bavua balue kuende, ne malu avuabu bambe akamuvuluija diakamue malu akumvuaye mu minite itanu pa ditadi dia fono. Wakajingulula bulelela, mpindieu udi musadidi wa Yehowa muditshipe kudiye ne wakalomba bua bele nsongalume au uvua mulue kutangila mamuende kukadi bidimu bipite pa 60 au tuasakidila! Bushuwa, katuena bamanye mushindu udi nteta ya bulelela mua kuasa miji ne kukola nansha.​—Muambi 11:6.

Bushuwa, ndi mvuluka ne dianyisha dia bungi bidimu bia muoyo wanyi bindi muenze mu mudimu wa mushinga mukole wa Yehowa. Katshia ngatambula mu 1931, tshitu muanji kupumbisha mpuilu wa Bantemu ba Yehowa nansha umue. Nansha mutuvua meme ne Irene katuyi balele betu bana, ndi ne disanka dia kuikala ne bana ba mu nyuma bapite pa 150, bonso benzela Tatu wetu wa mu diulu Yehowa mudimu. Anu muvua mukajanyi munanga muleje, mudimu wetu wa pa buawu uvua bushuwa disanka didi kadiyi kuelekeja.

[Mêyi adi kuinshi]

[Tshimfuanyi mu dibeji 24]

Mamu, ku ntuadijilu kua bidimu bia 1900

[Tshimfuanyi mu mabeji 24, 25]

Ku dia bakaji: Hilda Padgett, meme, Irene ne Joyce Rowley mu Leeds, mu Angleterre mu 1940

[Tshimfuanyi mu dibeji 25]

Kuulu: Meme ne Irene kumpala kua dikadika dituvua basombele

[Tshimfuanyi mu dibeji 27]

Ndi ngenda mmanyisha muyuki wa patoke mu Cardiff, Pays de Galles mu 1952