Busambi bua bantu badi bakeba diambuluisha

BIBLE ki mmukanda wa malu a luondapu lua masama a mpala to. Kadi udi utusamba ne utuambuluisha bua kuanyisha muoyo nansha mutudi tupeta ntatu. Mukanda wa Nzambi udi wambilamu ne: ‘Muntu udi muledibue kudi mukaji udi ne matuku makese a muoyo wende ne udi muule tente ne ntatu.’ (Yobo 14:1) Dipanga bupuangane dietu ditu ditukebela imue ntatu. Kadi nnganyi udi mukebeshi munene wa makenga a bantu?

Bible udi utumanyisha muntu au, wamba ne: nnyuma mubi diende Satana Diabolo. Udi ‘udinga ba pa buloba bonso’ ne ukebesha ntatu ya bungi idi ikengesha bantu. Kadi Bible udi kabidi utuambila ne: tshikondo tshiende tshikadi tshitangile ku ndekelu. (Buakabuluibua 12:9, 12) Mu katupa kîpi emu, Nzambi neajikije makenga onso adi Satana mukebeshe pa buloba. Bilondeshile Bible, Nzambi mmulaye ne: makenga ne dishikila nebijike mu bukua-panu bupiabupia bua buakane.​—2 Petelo 3:13.

Bidi bitukolesha ku muoyo be bua kumanya ne: makenga a bantu nga tshitupa tshîpi! Mu Bukalenge bua Nzambi bua mu diulu bulombola kudi Yezu Kristo, malu mabi ne makenga nebijike. Mukanda wa Nzambi udi wamba bua Mukalenge eu udi Nzambi musungule ne: ‘Neapandishe mukengedi wa bintu padileye kudiye, neapandishe muntu mupele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi. Neapikule mioyo yabu ku tshinyangu ne malu makole, ne mashi abu neikale tshintu tshia mushinga mukole ku mêsu kuende.’​—Musambu 72:12-14.

Tshikondo tshikala mêyi a mulayi eu mua kukumbana tshikadi tshisemene pabuipi bikole. Dîba adi netupete muoyo wa kashidi pa buloba bukudimuna mparadizu mu nsombelu mulenga tshishiki. (Luka 23:43, NW; Yone 17:3) Dimanya dia milayi ya mu Bible eyi idi ikolesha ku muoyo didi difila ditekemena ne busambi kudi bantu badi bakeba diambuluisha.

[Mêyi a dianyisha bua tshimfuanyi mu dibeji 32]

Muana wa bakaji mubungame: Foto ILO/​J. Maillard