‘Semenayi pabuipi ne Nzambi ne yeye neasemene pabuipi nenu’

Kumpala ne panyima: Wakapeta bukole bua kushintuluka

SANDRA, mukaji mukuabu wa mu ditunga dia Mexique, uvua udibikila ne: ngombe mupanga bisuyi mubela mupanga wa mu dîku diabu. Ku bunsonga buende, [bena dîku diabu] bakamubenga ne kushalayi kayi munangibue. Udi wamba ne: “Mu tshikondo tshia bunsonga buanyi mvua ndimona tshiyiku ne mushinga nansha mukese, ne mvua anu ndikonka tshimvua muikadile ne muoyo ne mvua ndiela nkonko bua muoyo mene mu kabujima kawu.”

Pakabuelaye mu tshilongelu tshibandile, Sandra wakatuadija kunua mu musokoko maluvu avua nawu tatuende ku nzubu. Kunyima kua matuku, wakabanga kudisumbila yende milangi ya maluvu ne kuluaye kanuayi wa ntokola nzaba. Udi wamba ne: “Tshivua kabidi musue kuikala ne muoyo to.” Bua dishikila, Sandra wakabanga kunua diamba. Udi wamba ne: “Bintu bivua bingambuluisha bua kupua ntatu yanyi muoyo bivua anu bimvua ngenda nabi mu kabuta kanyi kakese: mulangi wa maluvu, tumuma tua buanga anyi ndambu wa marijuana.”

Pakajikija Sandra tulasa tua manga tuvuaye ulonga, wakadina ne kasuki mu dinua dia maluvu. Dikuabu dituku wakakeba bua kudishipa, kadi yeye kupanduka.

Sandra wakakeba tshintu tshivua mua kumuambuluisha mu nyuma ne kumukolesha ku muoyo mu bitendelelu kabukabu, kadi kupangilaye. Bu muvuaye mushikile ne katshiyi ne ditekemena, uvua udila misangu ne misangu kudi Nzambi wamba ne: “Udi muaba kayi? Bua tshinyi kuenaku ungambuluisha?” Tshikondo tshiakalua muanetu mukuabu wa bakaji Ntemu wa Yehowa kuyikila nende, Sandra katshivua kabidi udiangata ne mushinga nansha mukese. Muyuki eu wakamufikisha ku dituadija dilonga Bible. Sandra wakasanka bikole pakumvuaye ne: ‘Yehowa udi pabuipi ne bantu badi ne mitshima itamba kunyingalala.’​—Musambu 34:18.

Mulongeshi wende wa Bible wakamuambuluisha bua kumvua ne: Yehowa Nzambi mmumanye bimpe ne: tudi bena butekete, bionso ebi anu bua mpekatu ne dipanga bupuangane bitudi bapiane kudi Adama. Sandra wakajingulula ne: Nzambi mmumanye ne: tuetu bantu katuena mua kutumikila mikenji yende miakane mu mushindu mupuangane to. (Musambu 51:5; Lomo 3:23; 5:12, 18) Uvua ne disanka dia kumanya ne: Yehowa katu ushala muimanyine anu pa bilema bitudi tuenza to, ne katu utulomba malu mapitshidile pa atudi mua kuenza nansha. Mufundi wa Misambu wakebeja ne: ‘Yehowa, bu wewe mubale dipambuka dia bantu, mmuntu kayi wakadi mua kuimana, Mukelenge?’​—Musambu 130:3.

Bulelela bua mu Bible budi butangila mulambu wa Yezu Kristo udi upikula bantu mbualu bua mushinga buakasankisha mutshima wa Sandra bikole. Ku diambuluisha dia mulambu eu, Yehowa udi ufika ku diangata bantu bena butumike bu bakane nansha mudibu bapange bupuangane. (1 Yone 2:2; 4:9, 10) Bushuwa, badi mua ‘kutubuikidila malu mabi etu’ kutuambuluishabi bua kutshimuna lungenyi luonso lua dibenga kudimona bu bantu badi kabayi ne mushinga nansha mukese.​—Efeso 1:7.

Sandra wakalongela malu a mushinga ku tshilejilu tshia mupostolo Paulo. Wakanyisha bikole bulenga buvua Nzambi mumuleje pakamubuikidilaye bilema biende bia kale ne pakamukuatshishaye mu mvita mikole ivuaye uluangana bua kutshimuna matekete avua atua apingana. (Lomo 7:15-25; 1 Kolinto 15:9, 10) Paulo wakalengeja nsombelu wende, ‘kudikumaye too ne pakavuijaye mubidi wende  mabuba, kudibuejaye mu bupika’ bua kumona mua kushala mu njila udi Nzambi muanyishe. (1 Kolinto 9:27) Kakalekela meji ende mabi amulombola bu mupika nansha.

Matekete a Sandra avua amutatshisha bikole, kadi wakatungunuka ne kualuisha. Uvua usambila ne muoyo mujima bua Yehowa amuambuluishe bua kutshimuna matekete aa ne bua amufuile luse. (Musambu 55:22; Yakobo 4:8) Pakumvuaye ne: Nzambi uvua mumunange, Sandra wakafika ku dishintulula nsombelu wende. Udi wamba ne: “Ndi ne disanka dia kulongesha bantu bakuabu Bible ku dîba ne ku dîba.” Sandra uvua ne diakalenga dia kuambuluisha yayende ne muakunyende wa bakaji bua kumanyabu pabu Yehowa. Bu mudiye ‘wenza [malu adi] mimpe,’ udi kabidi witaba bua kuondapangana mu mpungilu ya Bantemu ba Yehowa.​—Galatia 6:10.

Netuambe tshinyi bua bintu bivua Sandra unua, diamba ne maluvu makole? Udi wamba ne dishindika dionso ne: “Lungenyi luanyi ndukezuke. Tshitshiena kabidi nnua maluvu, makanya anyi diamba to. Tshiena nabi bualu to. Nkadi mupete tshimvua nkeba.”

[Lungenyi lunene lua mu dibeji 9]

“Nkadi mupete tshimvua nkeba”

[Kazubu mu dibeji 9]

Mêyi a mu Bible adi ambuluisha

Mona amue mêyi a mu Bible adi mambuluishe bantu ba bungi bua kulekela bibidilu bibi:

‘Tudilengeje ku manyanu onso a mubidi ne a nyuma, tukumbaje tshijila tshietu mu ditshina dia Nzambi.’ (2 Kolinto 7:1) Nzambi udi ubenesha aba badi badilengeje ku manyanu onso [a mubidi anyi a nyuma] ne badi bepuka bilele bibi.

“Kutshina Yehowa nkuikala ne malu mabi lukuna.” (Nsumuinu 8:13) Kutshina Yehowa ne kanemu kudi kuambuluisha muntu bua kulekela bilele bibi bu mudi dinua dia diamba anyi bintu bikuabu bidi bikuatangana. Pa kumbusha disankisha Yehowa, muntu udi mudilengeje udi ukubibua ku masama mabi.

‘Nukokele bamfumu ne bakokeshi.’ (Tito 3:1) Miaba ya bungi, muntu yeye ne amue manga anyi uanua mmushipe mukenji wa mbulamatadi. Bena Kristo balelela kabena mua kuikale ne diamba anyi manga adibu bakandike to, ne kabatu babinua nansha.