Utuku ‘windila’ anyi?

“Bunudi nabu mbua kuikala bantu ba mushindu kayi mu bienzedi bia tshijila ne bia Nzambi, panudi nutekemena ne panudi nuendesha lukasa dilua dia dituku dia Nzambi?”​—2 PETELO 3:11, 12.

1, 2. Mmushindu kayi utudi mua kumvuija muaku “kuindila” pa bidi bitangila dituku dia Yehowa?

 FUANYIKIJABI mu lungenyi dîku dia bantu badi bindila benyi kampanda bua kudia nabu biakudia pamue. Dîba dia kufikabu didi dienda disemena lukasa. Mamu wa nzubu mmumonangane ne tudimudimu bua dijikija mudimu wa dilongolola biakudia bivua bishale. Bayende ne bana badi bamuambuluisha bua kulongolola bintu bionso bua bikale pabuipi. Bantu bonso badi ne mioyo kulukulu. Eyowa, dîku dijima ndindile ne muoyo mujima difika dia benyi abu ne bantu bonso badi bamona muikalabu mua kudia biakudia bia muenya ne kuela mayuki mimpe.

² Tuetu bena Kristo, tudi bindile tshintu tshia mushinga wa bungi menemene. Tudi bindile tshinyi? Tuetu bonso tudi bindile “dituku dia Yehowa”! Too ne palua dituku adi, tudi ne bua kuikala bu muprofete Mika wakamba ne: ‘Nentangije mêsu anyi kudi Yehowa; nengindile Nzambi wa lupandu luanyi.’ (Mika 7:7) Bidi bisua kumvuija ne: muntu udi ushala muvunge maboko kayi ne tshidiye wenza anyi? Tòo. Kudi mudimu wa bungi udi ukengela kuenza.

3. Bilondeshile 2 Petelo 3:11, 12, bena Kristo badi ne bua kuikala ne ngikadilu kayi?

³ Mêyi a mupostolo Petelo adi alonda aa adi atuleja mua tuetu kuikala ne ngikadilu muakanyine patudi tuindila. Udi wamba ne: ‘Bunudi nabu mbua kuikala bantu ba mushindu kayi mu bienzedi bia tshijila ne bia [dilamata] Nzambi, panudi nutekemena ne panudi nuendesha lukasa dilua dia dituku dia Nzambi?’ (2 Petelo 3:11, 12) Tumanye ne: tshiambilu etshi ntshikemenu. Muaba eu Petelo kavua wela lukonko to. Mu mikanda yende ibidi mifundisha ku nyuma wa Nzambi, Petelo uvua umvuije mushindu udi bena Kristo ne bua kuikala. Uvua kabidi mubabele bua batungunuke ne kuikala ne “bienzedi bia tshijila ne bia [dilamata] Nzambi.” Nansha mukavuaku kupite bidimu bu 30 katshia Yezu Kristo wafila bimanyinu bia “matuku a nshikidilu wa ndongoluelu eu wa malu,” bena Kristo kabavua ne bua kutekesha tshisumi tshiabu to. (Matayo 24:3, NW) Bavua ne bua ‘kutekemena ne kuendesha lukasa’ dilua dia dituku dia Yehowa.

4. “Kuendesha lukasa dilua dia dituku dia [Yehowa]” kudi kumvuija tshinyi?

⁴ Muaku wa tshiena Gelika udibu bakudimune muaba eu ne: ‘kuendesha lukasa’ udi umvuija “kunyemesha.” Bua kuamba bulelela, katuena mua ‘kunyemesha’ dituku dia Yehowa to. Bua bualu ebu mene, katuena ‘bamanye dituku ne dîba’ dialua Yezu Kristo kukumbaja dilumbuluisha diende kudi baluishi ba Tatuende to. (Matayo 24:36; 25:13, MMM) Mukanda mukuabu udi umvuija ne: muaku wa pa muanda wa nshindamenu wa tshiambilu etshi: ‘kuendesha lukasa’ udi umvuija muaba eu ne: “‘kuenza lukasa’ ne udi upetangana bikole ne ‘kuikala ne lukunukunu, kuikala muenji, kuditatshisha bua bualu kampanda.’”  Nunku Petelo uvua ubela bena kuitabuja nende bua kuikala bajinga bikole dilua dia dituku dia Yehowa. Bavua mua kuenza nanku pa kuvuluka bualu ebu misangu yonso. (2 Petelo 3:12) Bu mudi mpindieu ‘dituku adi dinene dia Yehowa didi dikuatshisha bantu buôwa’ disemene pabuipi, tudi petu ne bua kuikala ne ngikadilu wa muomumue eu.​—Yoele 2:31.

Kuindila ne “bienzedi bia tshijila”

5. Mmunyi mutudi mua kuleja ne: tudi tujinga bikole bua kumona “dituku dia Yehowa”?

⁵ Bituikala tujinga bikole bua kupanduka mu dituku dia Yehowa, netuleje dijinga edi ku ‘bienzedi bietu bia tshijila ne bia [dilamata] Nzambi.’ Tshiambilu etshi: “bienzedi bia tshijila” tshidi mua kutuvuluija mubelu wa Petelo eu: ‘Nuikale bana batumikidi, kanudifuanyikiji bu munuakadi mu nkuka yenu ya diambedi, mu bupote buenu; bu mudi yeye wakanubikila udi wa tshijila, nunku nuenu kabidi nulue ba tshijila mu malu onso a muoyo wenu; bualu bua dîyi didi difundibua ne: nuenu nenuikale ba tshijila, bualu bua meme ndi wa tshijila.’​—1 Petelo 1:14-16.

6. Ntshinyi tshitudi ne bua kuenza bua kuikala ba tshijila?

⁶ Bua kuikala ba tshijila, tudi ne bua kulama bukezuke ku mubidi, mu lungenyi, mu nsombelu ne mu nyuma. Tudiku tudilongolola bua “dituku dia Yehowa” pa kudilama bu bantu ba tshijila bualu tudi ne dîna dia Yehowa anyi? Lelu’eu ki mbipepele bua kulama bukezuke bua nunku bualu mêyi a mu nsombelu a bena panu adi enda anyanguka anu kunyanguka. (1 Kolinto 7:31; 2 Timote 3:13) Tudiku tumona dishilangana dinene pankatshi pa mêyi etu atudi tulonda a mu nsombelu ne a bena panu anyi? Bituikala katuyi tumona dishilangane edi, tudi ne bua kudikonkonona bikole. Bidi mua kuikala ne: nansha mudi mêyi atudi tulonda a mu nsombelu wetu mikale mabandile mapite a bena panu, kadi adi mikale eku enda abutuka anyi? Bikalabi nanku, bidi bikengela tuetu kuenza muetu muonso bua kuakaja malu bua kumona mua kusankisha Nzambi.

7, 8. (a) Mmushindu kayi udi mua kutufikisha ku dipanga bua kumona mushinga wa kuikala ne “bienzedi bia tshijila”? (b) Bidi mua kutulomba bua kuenza tshinyi bua tuetu kufika ku diakaja malu?

⁷ Munganga mukuabu udi wamba ne: dipatuka dia malu a bindidimbi bia bantu kabayi bilamba ku Internet ne mushindu mene udi muntu yonso mua kubibandila pa nkayende dîba dionso didiye musue, ndienze bua se: bamue bavua kumpala kabayi ne mushindu wa kumona malu mabi aa bapete mpindieu “mishindu ya bungi ya kumona malu a tshiendenda tshia masandi.” Tuetu baditue mu dikeba malu a bukoya a nanku ku Internet, mmuomue ne: tudi tulengulula dîyi dia mu Bible didi diamba ne: ‘kanulengi tshintu tshidi tshibipa.’ (Yeshaya 52:11) Tuetu tuenza nanku, tudiku bushuwa ‘tuendesha lukasa dilua dia dituku dia Yehowa’ anyi? Peshi tudi mua kuikala mu lungenyi luetu tusemeja dituku adi kule, tuela meji ne: nansha tuetu bikale tunyanga lungenyi luetu ne malu a bukoya, tutshidi anu ne dîba dia kulua kudikezula anyi? Bituikala ne lutatu pa bualu ebu bua bindidimbi bia ku Internet, tudi ne bua kuenza lukasa bua kusambila Yehowa bua ‘akudimune mêsu etu bua kaatangidi malu a patupu ne asangaje muoyo wetu mu njila yende’.​—Musambu 119:37.

⁸ Bantemu ba Yehowa ba bungi, bansonga ne bakulumpe, mbalamate mêyi manene a Nzambi ne badi bepuka buteyi bua malu mabi a panu. Bu mudibu bamanye ne: tudi tshikondo tshia kuenza malu ne mitalu ne bamanye kabidi didimuija dia Petelo dia ne: ‘Dituku dia [Yehowa] dilualua bu muivi,’ badi batungunuka ne kuikala ne “bienzedi bia tshijila.” (2 Petelo 3:10) Bienzedi biabu bidi bileja ne: badi ‘batekemena ne bendesha lukasa dilua dia dituku dia [Yehowa].’ *

 Tuindilayi bikale ne “bienzedi bia [dilamata] Nzambi”

9. Dilamata Nzambi didi ne bua kutusaka ku dienza tshinyi?

⁹ “Bienzedi bia [dilamata] Nzambi” bidi pabi ne mushinga bituikala basue kuvuluka misangu yonso dituku dia Yehowa. “[Dilamata] Nzambi” didi diumvuija ditshina dia Nzambi didi ditusaka ku dienza malu adi amusankisha. Dilamata Yehowa ke bukole budi butufikisha ku dikale ne bienzedi bidi bimusankisha. Disua dia Yehowa didi ne: “Bantu bonso basungidibue, bafike ku dimanya dia malu malelela.” (1 Timote 2:4) Nzambi ‘kêna musue umue [wa ku bantu] ajimine, kadi udi musue bonso balue kukudimuna mitshima yabu.’ (2 Petelo 3:9) Nunku, dilamata dietu dia Nzambi kadienaku mua kutusaka bua kuvudija bionso bitudi tuenza bua kuambuluisha bantu bua bamanye malu adi atangila Yehowa ne bamuidikije anyi?​—Efeso 5:1.

10. Bua tshinyi tudi ne bua kudikuba ku “lukuka lua biuma”?

¹⁰ Tuetu tukeba diambedi Bukalenge bua Nzambi, bienzedi bia dilamata Nzambi nebivule mu nsombelu wetu bikole. (Matayo 6:33) Bidi bisua kumvuija ne: tudi ne bua kuikala ne nkatshinkatshi mu dikeba dia bintu. Yezu wakadimuija ne: “Nuamanya! Nuepuke lukuka luonso lua biuma, bualu muntu, nansha yeye muikale ne biuma bia bungi, muoyo wende kabena baulama kudi bintu biende to.” (Luka 12:15) Nansha mudibi mua kuikala bikole bua kufuanyikija mu lungenyi mudi dinanga dia biuma ditufofomija mêsu, mbimpe tumanye ne: “Ntatu ya pa buloba ne lukuka lua biuma” bidi mua ‘kukutakaja [dîyi]’ dia Nzambi. (Matayo 13:22, MMM) Kupeta bia kudikuatshisha nabi mu nsombelu kakutu anu kutekete to. Mu imue miaba, bantu ba bungi batu bela meji ne: bua kupeta nsombelu muimpe, bidi bikengela kumuangala kuya kusombela mu ditunga didi makuta ne bintu bia bungi bimueneka, bashiya pamu’apa mêku abu bidimu ndambu. Too ne bamue basadidi ba Nzambi mbapete meji aa. Padibu baya mu ditunga dikuabu, badi bapeta mushindu wa kusumbila bena mu mêku abu bintu bimpe bia buena-lelu. Kadi ntshinyi tshidi mua kufikila bena mu mêku abu badi bashale aba mu nyuma? Bu mudi mfumu wa dîku udi mua kubaludika kayiku, nebapeteku makanda a mu nyuma adi akengedibua bua kumona mua kupanduka mu dituku dia Yehowa anyi?

11. Mmushindu kayi uvua muntu mukuabu uvua mumuangale mu ditunga diabu muleje ne: bienzedi bia dilamata Nzambi bidi ne mushinga wa bungi kupita biuma?

¹¹ Muntu mukuabu uvua mumuangale mu ditunga dia Philippines muya kusombela mu dia Japon uvua mulonge bulelela bua mu Bible ne Bantemu ba Yehowa kuvuaye muye aku. Pakamanyaye malu adi atangila bujitu budi nabu mfumu wa dîku bu mudibi bileja mu Bible, wakapangadija bua kuambuluisha bena mu dîku diende bua balue batendeledi ba Yehowa. (1 Kolinto 11:3) Mukajende uvua yeye mushale mu Philippines e kubengaye ne muoyo umue malongesha ende mapiamapia aa kadi kusuaye anu bua se: bayende ikale ubatumina makuta pamutu pa kupinganaye mu ditunga diabu bua kubalongesha malu a mu Bible. Kadi bu muvua muoyo wa kuenza malu ne mitalu ne diditatshisha bua dîku diende bimusaka anu kumusaka, wakapingana mu ditunga diabu. Dinanga diende ne lutulu luende biakapatula bipeta bimpe. Kunyima kua matuku, dîku diende diakadisangisha mu ntendelelu mulelela, pashishe mukajende wakangata mudimu wa ku dîba ne ku dîba.

12. Bua tshinyi tudi ne bua kuteka malu a mu nyuma pa muaba wa kumpala mu nsombelu?

¹² Tudi mua kufuanyikija nsombelu wetu ne wa  bantu badi mu nzubu munene udi mukuate kapia. Nebikale bualu bua meji bua kunyemakana bua kupatula bintu mu nzubu udi mukuate kapia kushala anu bua kubumbukaye anyi? Pamutu pa nanku, kabiakuikalaku ne mushinga menemene bua kupandisha bantu; kudisungila ne tuetu mene ne bena mu dîku dietu ne bakuabu bantu ba mu nzubu anyi? Ndongoluelu mubi wa malu eu mmutangile ku dibutuka diende, ne nsombelu wa bantu udi mu njiwu. Tuetu bikale bamanye malu aa menemene, nanku awu tudi ne bua kuteka malu a mu nyuma pa muaba wa kumpala ne kushindamena ne lukunukunu luonso mu mudimu udi upanisha bantu wa diyisha Bukalenge.​—1 Timote 4:16.

Bidi bikengela kuikala ‘katuyi ne katobe’

13. Nsombelu kayi utudi tujinga bua kuikala nende padi dituku dia Yehowa difika?

¹³ Padi Petelo uleja mushinga wa kumanya kuindila, udi wamba ne: ‘Bananga, bualu bua nudi nutekemena malu aa, nanukilayi bua banusangane mu ditalala [kudi Nzambi] kanuyi ne katobe, kanuyi ne kadiwu kudiye.’ (2 Petelo 3:14) Pa kumusha mubelu wende wa kuikala ne bienzedi bia tshijila ne bia dilamata Nzambi, Petelo udi uleja mudibi ne mushinga bua Yehowa atusangane bantu bakezula kudi mashi a mushinga mukole a Yezu. (Buakabuluibua 7:9, 14) Nunku abi bidi bilomba bua muntu kuikalaye ne ditabuja mu mulambu wa Yezu ne kulua musadidi wa Yehowa mudilambule ne mutambule.

14. Kuikala bantu badi ‘kabayi ne katobe’ kudi kumvuija tshinyi?

¹⁴ Petelo udi utubela bua tuenze muetu muonso bua batusangane ‘katuyi ne katobe.’ Tudiku balame bilamba bietu bidi bikale ngikadilu wetu wa buena-Kristo ne bumuntu buetu bua bena Kristo budi kabuyi ne katobe, katuyi banyanga kudi bena panu anyi? Patudi tumona manyanu ku bilamba bitudi bavuale, tudi tukeba mushindu wa kuumusha ne lukasa luonso, ne ke tshitudi mua kuenza kupitshisha padiwu akuata ku tshilamba tshitutu basue bikole. Tutuku ne meji a muomumue padi bilamba bietu bia mu tshimfuanyi bia buena-Kristo bikuate manyanu bua tshilema kampanda mu bumuntu buetu anyi ngikadilu wetu anyi?

15. (a) Bua tshinyi bena Isalele bavua ne bua kuela malenda ku nzembe ya bilamba biabu? (b) Bua tshinyi basadidi ba Yehowa ba tshikondo tshietu etshi mbatapuluke ne bena panu?

¹⁵ Bena Isalele bavua ne bua ‘kuela malenda ku nzembe ya bilamba biabu’ ne ‘kuoya malenda ku luzembe lua tshilamba ne buanda bufikuluke.’ Bua tshinyi? Bua bikale bavuluka mêyi a Yehowa, baatumikila ne ‘bikale bantu ba tshijila’ ba Nzambi. (Nomba 15:38-40, MMM) Tuetu basadidi ba Yehowa ba tshikondo etshi tudi batapuluke ne bena panu bualu tudi tutumikila mikenji ya Nzambi ne mêyi ende. Tshilejilu, tudi tulama bukezuke mu nsombelu wetu, tudi tunemeka mashi bualu ntshintu tshia tshijila, tudi tuepuka ditendelela mpingu dia mishindu yonso. (Bienzedi 15:28, 29) Bantu ba bungi badi batunemeka bua dipangadika dietu dikole ditudi bangate dia kudilama katuyi kadiwu.​—Yakobo 1:27.

Tudi ne bua kuikala ‘katuyi ne kadiwu’

16. Ntshinyi tshidi tshikengela bua tuetu kudilama ‘katuyi ne kadiwu’?

¹⁶ Petelo udi wamba kabidi ne: batusangane ‘katuyi ne kadiwu.’ Mmunyi mudibi mua kuenzeka nanku? Pa tshibidilu kutu mushindu wa kumusha manyanu, kadi malu kaena moumue bua bidi bitangila kadiwunansha. Kuikala ne kadiwu kudi kumvuija ne: kudi tshintu kampanda tshibi, anyi tshimpangike munda. Mupostolo Paulo wakadimuija bena Kristo nende ba ku Filipoi ne: ‘Nuenze malu onso kanuyi ne ditontolola ne dielangana dia mpata; bua nuenu nulue bantu badi  kabayi ne bualu ne badi ne mitshima mitoke, bu bana ba Nzambi badi kabayi ne tshilema munkatshi mua bena tshikondo tshikonyangale ne tshia tshishiku; banudi numueneka munkatshi muabu bu minda ya pa buloba.’ (Filipoi 2:14, 15) Tuetu balonde mubelu eu, netuepuke manunganyi a patupu ne dielangana mpata ne netusadile Nzambi ne meji mimpe. Dinanga ditudi banange Yehowa ne bantu netu neditusake bua kuyisha “lumu luimpe elu lua bukelenge.” (Matayo 22:35-40; 24:14) Kabidi netutungunuke ne kumanyisha lumu luimpe nansha bantu ba bungi kabayi bumvua bua tshinyi tudi tufila ku budisuile dîba dietu ne bukole buetu bua kuambuluisha bakuabu bamanye malu adi atangila Nzambi ne Bible, Dîyi diende.

17. Tudi ne bua kuikala ne meji kayi patudi tukeba majitu munda mua tshisumbu?

¹⁷ Bu mutudi tujinga bua batusangane ‘katuyi ne kadiwu,’ tudi ne bua kukonkonona meji atudi nawu mu malu etu onso. Tudi balekele ngenzelu wa malu wa bena panu wa budisui, bu mudi diditatshisha bua kupeta biuma ne bukokeshi. Bituikala ne tshipatshila tshia kupeta majitu munda mua tshisumbu, meji etu ikale anu makezuke ne tuikale banange Yehowa ne bantu netu. Bidi bikolesha ku muoyo patudi tumona bantu badi bakole mu nyuma ‘bipatshila mudimu wa mutangidi’ ne disanka ne budipuekeshi bua kusadila bu bapika Yehowa ne bena kuitabuja nabu. (1 Timote 3:1, NW; 2 Kolinto 1:24) Bushuwa, aba badi bakumbaje malu malu malomba bua kulua bakulu badi ‘balama tshisumbu tshia mikoko ya Nzambi kabayi benzejibue ku bukole, kadi ne mitshima ya disanka bu mu disua dia Nzambi; ki mbualu bua kukeba biuma, kadi bikale ne mutshima mulongolola bimpe; kabayi bu bakokeshi ba badi ku nyima kuabu, kadi badivuija [bilejilu] bimpe kudi mikoko.’​—1 Petelo 5:1-4.

Tudi ne bua kuikala “mu ditalala”

18. Bua ngikadilu kayi idibu bamanyine Bantemu ba Yehowa?

¹⁸ Ndekelu wa bionso, Petelo udi utuambila bua batusangane “mu ditalala.” Bua kunemeka mukenji eu, tudi ne bua kuikala mu ditalala ne Yehowa kabidi ne muntu netu. Petelo udi ushindamena bikole pa bualu budi ne mushinga wa bungi bua kuikala ne ‘dinanga dikole munkatshi muetu’ ne kulama ditalala ne bena Kristo netu. (1 Petelo 2:17; 3:10, 11; 4:8; 2 Petelo 1:5-7) Bua kulama ditalala munkatshi muetu, tudi ne bua kuikala ne dinanga munkatshi muetu. (Yone 13:34, 35; Efeso 4:1, 2) Dinanga dietu ne ditalala bitu bimueneka mu mushindu wa pa buawu mu bikondo bitu mpungilu ya bantu bafumine mu matunga a bungi yenzeka. Mu mpungilu uvua muenzeke mu ditunga dia Costa Rica mu tshidimu tshia 1999, mupanyishi wa bintu mukuabu wa ku tshipalu tshia ndeke uvua unyingalala bualu Bantemu bavua balue kuakidila bana babu baleji-mpala ba mu matunga makuabu bavua bajika pabu kabayi benza ku bukole muaba wende uvuaye upanyishila bintu. Kadi dituku dibidi, wakamona ne: dinanga ne ditalala bivua munkatshi mua Bantemu abu pavuabu bakidila bana babu baleji-mpala ne musangelu nansha muvuabu kabayi bamanyangane.  Dituku dia ndekelu, mupanyishi wa bintu au wakaditua pende mu diakidilangana baleji-mpala abu ne kulombaye bua kutuadija kulonga Bible.

19. Bua tshinyi bidi ne mushinga bua kukeba ditalala ne bena Kristo netu?

¹⁹ Patudi tukeba ditalala ne muoyo umue munkatshi mua bana betu, bidi mua kutuambuluisha mu dijinga dikole ditudi nadi dia kuindila dituku dia Yehowa ne bulongolodi buende bupiabupia budiye mulaye. (Musambu 37:11; 2 Petelo 3:13) Elabi meji ne: mbitukolele bua kusomba mu ditalala ne muena Kristo netu kampanda. Tudiku mua kufuanyikija mu lungenyi tuetu bikale nende mu Mparadizu basombe mu ditalala anyi? Bikala muanetu kampanda muikale netu bualu, tudi ne bua ‘kulengejangana nende’ pa lukasa. (Matayo 5:23, 24) Kuenza nanku kudi ne mushinga bituikala basue kuikala mu ditalala ne Yehowa.​—Musambu 35:27; 1 Yone 4:20.

20. ‘Kuindila’ kudi ne bua kumuenekela ku malu kayi?

²⁰ Tudiku ‘tutekemena ne tuendesha lukasa dilua dia dituku dia [Yehowa]’ anyi? Dijinga dietu dikole dia kumona nshikidilu wa malu mabi didi dimueneka patudi tushala bantu ba tshijila mu bukua-panu bubi ebu. Kabidi dijinga dietu dikole dia kumona dilua dia dituku dia Yehowa ne kumona bantu mubukokeshi bua Bukalenge didi dimuenekela mu bienzedi bietu bia dilamata Nzambi. Ditekemena dietu dia kusomba mu bukua-panu bupiabupia bua ditalala didi dimueneka kabidi mu dikeba dietu dia ditalala ne bena Kristo netu mpindieu. Patudi tuenza nanku tudi tuleja ne: tudi ‘tuindila’ ne ‘tuendesha lukasa dilua dia dituku dia [Yehowa].’

[Mêyi adi kuinshi]

Udi muvuluke anyi?

• ‘Kuendesha lukasa dilua dia dituku dia [Yehowa]’ kudi kumvuija tshinyi?

• Mmushindu kayi utudi tuleja mu ngikadilu wetu ne: tudi ‘bindila’?

• Bua tshinyi “bienzedi bia [dilamata] Nzambi” bidi ne mushinga?

• Ntshinyi tshitudi ne bua kuenza bua Yehowa kutusanganaye “katuyi ne katobe ne kadiwu ne bikale mu ditalala”?

[Nkonko ya dilonga]

[Tshimfuanyi mu dibeji 11]

‘Kuindila’ kudi kumuenekela ku bienzedi bietu bia tshijila

[Bimfuanyi mu dibeji 12]

Mudimu wa diyisha Bukalenge udi upandisha mioyo ya bantu

[Tshimfuanyi mu dibeji 14]

Bu mutudi bindile dituku dia Yehowa, tukebayi mua kusomba mu ditalala ne bakuabu