Malu a mu nsombelu

Wa diakalenga ngudi Yehowa muikale Nzambi wende

MALONDA KUDI TOM DIDUR

Bakavua bafute mfranga bua tshibambalu tshia Mbulamatadi. Bavua bindile bantu bu 300 bua kubuela mu mpuilu wa mu tshimenga tshia Porcupine mu provense wa Saskatchewan mu ditunga dia Canada. Neje yakabanga kuloka mu Disatu, ne mu Ditanu kakuvua kabidi mushindu wa kumona tshintu nansha tshimue. Kuvua mashika makole a degré 40 muinshi mua tshijengu. Bantu buonso basanga bakulumpe ne bana bavua makumi abidi ne muanda-mukulu mu tshibambalu amu. Eu uvua mpuilu wanyi wa kumpala katshia ngalua mutangidi mupiamupia wa tshijengu ne ntshivua nsongalume wa bidimu 25 ne mvua ne buôwa. Kumpala kua meme kunuambila tshivua tshienzeke mu mpuilu au, lekelayi nnulondele mushindu umvua mufike ku dipeta diakalenga dia kuikala mutangidi wa tshijengu.

NDI muana wa muanda-mutekete mu bana muanda-mukulu, bonso ba balume. Wa kumpala uvua Bill, mulonda kudi Metro, John, Fred, Mike ne Alex. Ngakaledibua mu tshidimu tshia 1925 ne Wally wetu ke uvua muana wa mukala. Tuvua basombele pabuipi ne tshimenga tshia Ukraine mu provense wa Manitoba muvua baledi banyi Michael ne Anna Didur bikale ne kabudimi kabu. Tatu uvua wenza mudimu wa kulama tshitupa kampanda tshia njila wa njanja. Bu muvua nzubu ya bena mudimu wa njanja ba miaba mikuabu ya kule kayiyi mikumbanyine bua kukoleshilamu bana, tuvua tusombela ku ferme anyi ku madimi. Tatu kavua utamba kusomba kumbelu to, nunku Mamu ke uvua ukuata mudimu wa kutukolesha. Ku musangu, uvua utushiya bua kuya kutangila Tatu bua lumingu lumue anyi lumue ne matuku, kadi bangabanga uvua wanji utuleja mua kulamba, kuosha  mampa ne kuenza midimu mikuabu ya ku nzubu. Bu mutuvua mu Ekeleziya Katolike wa bena-Gelika, Mamu uvua utulolengesha mua kukuata masambila ku muoyo ne kuenza mikiya mikuabu.

Tudi tupeta bulelela bua mu Bible

Dijinga dianyi dia kumvua Bible diakavula pantshivua nsongalume. Muena mutumba netu mukuabu uvua Ntemu wa Yehowa uvua ulua kutangila dîku dietu misangu ya bungi bua kubala netu bitupa bia mu Bible bivua biakula bua Bukalenge bua Nzambi, bua Armagedone ne mabenesha a mu bukua-panu bupiabupia. Mukenji eu kauvua usankisha Mamu to, kadi wakasankisha tutu Mike ne tutu Alex. Bushuwa, malu akalongabu akabasaka bua kubenga mudimu wa busalayi mu mvita mibidi ya buloba bujima. Bakafundila tutu Mike buloko bua matuku makese, kadi bakatuma tutu Alex yeye mu kamponya ka midimu mu provense wa Ontario. Pashishe, tutu Fred ne Wally bakalua pabu kuitaba bulelela. Kadi, ba-tutu basatu ba kumpala buobu kabakitaba to. Munkatshi mua bidimu bia bungi Mamu uvua ubenga bulelela kadi kunyima wakatukemesha tuetu buonso pakasungulaye luseke lua Yehowa. Wakalua kutambula ne bidimu 83. Wakafua ne bidimu 96. Tatu ukavua pende wanyisha bulelela kumpala kua kufuaye.

Pangakakumbaja bidimu 17, ngakaya mu tshimenga tshia Winnipeg bua kukeba mudimu ne kudisangisha ne bantu bavua mua kungambuluisha bua meme kulonga Bible. Mu tshikondo atshi bavua bakandike Bantemu ba Yehowa, kadi bisangilu bivua bienzeka pa tshibidilu. Tshisangilu tshia kumpala tshingakabuela tshivua mu nzubu wa muntu. Bu muvuabu bankoleshe bilondeshile ditabuja dia Ekeleziya Katolike wa bena-Gelika, malu amvua ngumvua kumpala avua a wawu mushindu. Kadi ku kakese ku kakese, ngakumvua bua tshinyi dilongolola dia tusumbu tua ba-nsaserdose kadivua mu diumvuangana ne Bible ne bua tshinyi Nzambi kavua wanyisha pavua balombodi ba bitendelelu babenesha mvita. (Yeshaya 2:4; Matayo 23:8-10; Lomo 12:17, 18) Ngakamona kusomba mu Mparadizu pa buloba bu tshintu tshimpe ne tshia meji pamutu pa kuya muaba wa kule bua kashidi.

Bu mumvua mutuishibue ne: ebu buvua bulelela, ngakadilambula kudi Yehowa ne pashishe ngakatambula mu tshidimu tshia 1942 ku Winnipeg. Dikandika dia mudimu wa Bantemu ba Yehowa mu Canada diakajika mu tshidimu tshia 1943 ne mudimu wa diyisha wakaya kumpala. Bulelela bua mu Bible buvua kabidi bulenge mutshima wanyi bikole menemene. Ngakapeta diakalenga dia kusadila bu musadidi (mukulu lelu’eu) mu tshisumbu, dia kuenza tumpanye tua bisangilu bia patoke ne kuyisha miaba ivua kayiyi ne bamanyishi. Dibuela mu mpungilu minene mu États-Unis diakangambuluisha bikole bua kukola mu nyuma.

Ndi mvudija mudimu wanyi wa Yehowa

Ngakabangisha mudimu wa bumpanda-njila mu tshidimu tshia 1950 ne mu ngondo wa 12 wa tshidimu atshi, bakangambila bua kuenza mudimu wa kutangila tshijengu. Bakandongesha mudimu eu lua pabuipi ne tshimenga tshia Toronto mu provense wa Ontario kudi Charlie Hepworth, muanetu wa lulamatu ukavua muwenzenze yeye bikole. Bualu bua disanka, ngakapitshisha lumingu luanyi lua ndekelu mu dilonga mudimu eu ne tutu Alex, ukavua yeye mu mudimu wa tshijengu eu ku Winnipeg.

Tshiena mua kupua muoyo mpuilu wanyi wa tshijengu wa kumpala anu mudibi bileja ku ntuadijilu. Bulelela, mvua ne buôwa bua mushindu uvua malu ne bua kupita. Nansha nanku, mutangidi wetu wa distrike, Muanetu Jack Nathan wakatupesha tuetu buonso midimu ne bonso buetu tuvua ne disanka. Tuakenza programe wa mpuilu mu tshikoso ne bantu bavua babuelamu. Tuakapita kumpala ku muntu ku muntu, tulonda malu atuvua bapete mu buambi, tuleja mushindu wa kuyisha ku nzubu ne ku nzubu, wa kupinganyina bantu ne wa kulombola malonga a Bible. Tuakimba misambu ya Bukalenge. Kuvua biakudia bia bungi. Misangu yonso kunyima kua mêba bu abidi tuvua tunua kafe ne kato. Bamue bakalala pa bibasa ne ku tshiakuidi, bakuabu e kulala panshi. Mu Dia lumingu diloka dia neje diakakepela kakese nunku bantu 96 bakumvua muyuki wa patoke. Bualu ebu buakandongesha mua kutantamena ntatu mikole.

 Bakantuma pashishe ku Nord kua provense wa Alberta, mu provense wa British Columbia ne mu provense wa Yukon (muaba utu dîba dimueneka too ne munda-nkulu). Kuenza luendu mu njila wa mabue kumbukila ku Dawson Creek mu provense wa British Columbia batangile ku Whitehorse mu provense wa Yukon (mutantshi wa kilometre 1 477) ne kuyisha mu njila au kuvua kulomba dinanukila ne budimu. Diloka dia neje ya bungi, mikuna ivua iselemuka, mabue a mashika ne dimona bibuitshibuitshi bua neje ivua iloka bivua lutatu luvule.

Ngakakema bikole pa kumona muvua bulelela bua mu Bible buye kule bufike too ne ku Nord menemene. Dimue dituku, meme ne Walter Lewkowicz tuakaya ku nzubu mukuabu pabuipi ne musoko wa Lower Post mu provense wa British Columbia mu njila munene wa Alaska pabuipi ne provense wa Yukon. Tuvua bamanye ne: muntu uvua ku nzubu au bualu tuvua tumuenena ku dididishi dikese kapia kavua katema. Tukavua dîba tshitema wa butuku ne tuakakokola ku tshibi. Tuetu kumvua dîyi dia muntu mulume utuambila bua tuetu kubuela ne tuakabuela. Tuakakema patuakamona mukuabu tatu mukulakaje mudiolole pa bulalu buende ubala tshibejibeji tshia Tshibumba tshia Nsentedi! Tshibejibeji tshivuaye natshi tshivua tshipiatshipia ne tshituvua tuetu tufila tshivua tshiotshi tshia kale pa kutshifuanyikija ne tshiende atshi. Wakatuambila ne: bavua bamutumine mikanda yende ku ndeke. Bu mutuvua bashiya tshisumbu kukavua matuku muanda-mukulu, katuvua banji kupeta bibejibeji bipiabipia to. Muntu au wakamba ne: dîna diende uvua Fred Berg ne nansha mukavuaye upeta bibejibeji kukavua bidimu bia bungi, eu uvua musangu wende wa kumpala wa kumona Bantemu ba Yehowa balue kumutangila kumbelu kuende. Fred wakatulomba bua kulala kuende butuku abu. Tuakayukila nende pa malu malelela a bungi a mu Bible ne kulongolola bua Bantemu bakuabu bavua ne tshibidilu tshia kupita tshitupa atshi bikale balua kumutangila pa tshibidilu.

Munkatshi mua bidimu bia bungi ngakenza mudimu mu bijengu bikese bisatu. Bivua biumbukila ku tshimenga tshia Grande Prairie mu Alberta lua ku Est kua Kodiak biya too ne mu Alaska ku Ouest, mutantshi wa kilometre mipete pa 3 500.

Biakasankisha bua kumanya bimpe ne: mu miaba ya kulekule, nansha muaba kayi wonso, bantu bonso badi bamona bulenga bukena butuakanyine bua Yehowa ne nyuma wa Nzambi udi usaka ngenyi ne mitshima ya aba badi badiakaje bua muoyo wa tshiendelele bua kuteleja bulelela. Umue wa ku  bantu ba mushindu eu diende uvua Henry Lepine wa mu tshimenga tshia Dawson mu Yukon. Henry uvua musombele muaba uvua kule ne bantu. Bushuwa, kukavua bidimu 60 bijima, Henry kavua muanjiku kupatuka muaba uvuabu bumbuila or to. Kadi nyuma wa Yehowa wakasaka muntu eu wa bidimu 84 bua kuenza luendu lua kilometre mipite pa 1 600 mutangile ku tshimenga tshia Anchorage bua mpuilu wa tshijengu, nansha muvuaye kumpala kayi muanji kubuela mu tshisangilu nansha tshimue tshia mu tshisumbu. Programe wa mpuilu au wakamusankisha bikole ne wakasanka bua buena-muntu buakamonaye. Pakapinganaye mu tshimenga tshia Dawson, Henry wakashala ne lulamatu too ne ku lufu luende. Bantu ba bungi bavua bamanye Henry bavua badiebeje tshivua tshisake muntu mukulakaje eu bua kuenza luendu lule nunku. Bualu ebu buakasaka bamue bantu bakole bua kuitaba bulelela. Nanku, mu mushindu kauyi wa buludiludi Henry wakayisha bantu.

Ngakapeta bulenga bua Yehowa buvua kabuyi bungakanyine

Mu tshidimu tshia 1955, mvua ne disanka pangakapeta mukanda wa dimbikila bua kuya kubuela mu kalasa ka 26 ka Gilada. Kalasa aka kakakolesha ditabuja dianyi ne kungambuluisha bua kusemena pabuipi ne Yehowa. Pakajika kalasa, bakantuma bua kutungunuka ne mudimu wa tshijengu mu ditunga dia Canada.

Munkatshi mua tshidimu bu tshijima ngakenza mudimu mu provense wa Ontario. Pashishe bakantuma kabidi ku Alaska, ku Nord menemene. Ntshidi mmona kabidi njila ivua ipitshila ku mpenga kua majiba avua abalakana ne mikuna ivua ne nsongo mibuikila kudi neje. Mu tshikondo tshia muvua wa été, bilongo bia mekala a bungi bitu bitoloka mu bibandabanda ne mu mpata. Kapepe nkimpe ne mâyi mmakezuke kezukezu. Nyama ya ours, mibuabua, mbowa, caribou ne nyama mikuabu ya muitu idi yendakana kakuyi bualu muaba wayi wa tshibidilu.

Kadi, mu Alaska mudi ntatu ya bungi, ki ntatu anu ya neje kadi kabidi ya mitantshi mile. Tshijengu tshianyi tshimvua ntangila tshivua ne kilometre 3 200 ku Est ne ku Ouest. Mu tshikondo atshi kabavua balongolole bua mutangidi wa tshijengu kuikalaye ne mashinyi to. Bana betu ba mu tshisumbu etshi bavua baya kumfila mu tshisumbu tshikuabu. Kadi misangu mikuabu, mvua mbuela mu mashinyi manene anyi mu mashinyi a bantu batu baya kabandila miaba.

Musangu mukuabu umvua muenze nanku uvua pamvua mu tshitupa tshia njila wa Alaska pankatshi pa musoko wa Tok, mu Alaska ne Mile 1202, anyi tshitupa tshia buloba tshia Scotty Creek. Biro bia douane bia mu tshitupa etshi bivua mutantshi wa kilometre 160. Ngakapita biro bia douane bia mu États-Unis mu musoko wa Tok ne meme kuangata mashinyi kuya mutantshi wa kilometre mipite pa 50. Kumbukila muaba au kakuvua mashinyi avua apita kabidi ne ngakenda mêba dikumi bua kuenza kilometre 40. Ngakalua kumanya anu pashishe ne: mutantshi mukese pangakapita biro bia douane, bakimanyika mashinyi onso mu tshitupa atshi tshia njila bualu neje ya bungi ivua iloka pabuipi ne muaba au. Munkatshi mua butuku mashika akafika mu degré 23 muinshi mua tshijengu ne ntshivua mutantshi wa kilometre 80 bua kufika muaba umvua mua kupeta nzubu. Mvua nkeba bikole bua kupeta muaba wa meme kuikishila.

Pamvua ngenda ntetuka, ngakamona tshi-mashinyi tshivuabu balekele, tshibuikidija tshitupa kudi neje. Ngakela meji ne: bu meme mua kubuela munda ne kulala pa nkuasa, mvua mua kupanduka ku mashika avuaku butuku abu. Ngakenza muanyi muonso bua kumusha neje bua kupeta mushindu wa kukangula tshibi, kadi meme kusangana bintu bionso bia munda kabiyimu. Diakalenga, ngakasangana kazubu kikale munda mutupu lua pabuipi apu. Panyima pa meme mumane kutata bua kubuela  ne kutemesha kapia, ngakapeta mushindu wa kuikishaku ndambu munkatshi mua mêba makese. Mu dinda, ngakenza muanyi muonso bua kufika ku kazubu kavua kalonda, kungakapeta biakudia bimvua nabi dijinga ne kupeta mushindu wa kuondopa minu yanyi ivua mitapike.

Yehowa udi udiundisha mudimu wetu ku Nord

Dikumbula dianyi dia kumpala mu tshimenga tshia Fairbanks diakankankamija bikole. Tuakapatula bipeta bimpe mu buambi ne bantu batue ku 50 bakateleja muyuki wa patoke mu Dia lumingu. Tuakadisangisha mu nzubu mukese wa ba-misionere muvua Vernor ne Lorraine Davis basombele. Bantu bavua bapatuila mitu pa madidishi mu tshikuku, mu nzubu wa bulalu ne ku tshibuelelu bua kuteleja muyuki. Bua mushindu uvua bantu ba bungi balua bua kuteleja muyuki, tuakela meji ne: kuoku kuikale Nzubu wa Bukalenge muaba au, nanku au mudimu wa diyisha uvua mua kushindama mu tshimenga atshi tshia Fairbanks. Nunku ne diambuluisha dia Yehowa, tuakasumba nzubu munene (uvuabu bajila maja ku kale) ne tuakamutentemuna ne kumutekela muaba muimpe. Bakumbula tshina tshia mâyi ne bakela biowedi ne biamu bia kufila luya. Mu tshidimu tshijima, tuakapeta Nzubu wa Bukalenge muimpe mu Fairbanks. Pakasakidilabu tshikuku, bakabangisha kuenzela mpungilu wa distrike mu nzubu amu mu tshidimu tshia 1958 ne bantu 330 bakabuelamu.

Mu muvu wa été mu tshidimu tshia 1960, ngakenza luendu lule ku mashinyi mutangile ku biro bitubu balombuela midimu ya Bantemu ba Yehowa ya buloba bujima mu New York bua kubuela mu kalasa kalongoluela bantangidi bena-ngendu bonso ba mu États-Unis ne ba mu Canada. Pamvua kuine aku, Muanetu Nathan Knorr ne bakuabu bana betu bavua ne majitu bakangela nkonko bakeba bua kumanya ne kuvua mua kuikala mushindu wa kunzulula filiale mu Alaska. Ngondo mikese pashishe, tuakasanka patuakumvua ne: kubangila mu dia 1 Kabitende 1961, Alaska uvua ne bua kupeta biende biro bia filiale. Muanetu Andrew Wagner ke uvuabu buomekele bujitu bua kutangila midimu ya ku filiale. Yeye ne mukajende Vera bavua benze mudimu ku Brooklyn munkatshi mua bidimu 20 ne bavua bamanye kabidi bimpe mudimu wa ngendu. Diunzulula biro bia filiale mu Alaska divua bualu buvua buanyishibue bikole, bualu diakakepesha bungi bua ngendu ya mutangidi wa tshijengu ne diakamuambuluisha bua kutamba kutabalela majinga masunguluke a bisumbu ne teritware ya kule.

Muvu wa été wa tshidimu tshia 1962 tshivua tshikondo tshia disanka ku Nord. Bakabanjija filiale wa mu Alaska ne bakenza mpungilu wa distrike mu tshimenga tshia Juneau mu Alaska. Bakibaka Nzubu ya Bukalenge mu bimenga bia Juneau ne Whitehorse mu provense wa Yukon ne bakenza kabidi tusumbu tukese miaba ya kule.

Tudi tupingana mu Canada

Munkatshi mua bidimu bia bungi, tuvua tufundilangana mikanda ne Margareta Petras wa mu Canada. Reta (muvuabu bamubikila pa tshibidilu) wakabanga mudimu wa bumpanda-njila mu tshidimu tshia 1947, wakajikija kalasa ka Gilada mu tshidimu tshia 1955 ne uvua mpanda-njila ku Est kua Canada. Ngakamuela dîyi bua kumusela ne wakitaba. Tuakaselangana mu tshimenga tshia Whitehorse mu ngondo muibidi tshidimu tshia 1963. Mu muvu wa automne wa tshidimu atshi, bakantuma mu mudimu wa tshijengu ku Ouest kua Canada ne tuvua ne disanka dia kuenzelaku mudimu bidimu 25 biakalonda.

Mu tshidimu tshia 1988 bakatutuma bu bampanda-njila ba pa buabu mu tshimenga tshia Winnipeg mu provense wa Manitoba bua masama avua atutatshisha. Mu mudimu wetu eu tuvua kabidi ne bua kutangila Nzubu wa Mpuilu mukuabu munkatshi mua bidimu bu bitanu. Tutshidi tuenza mudimu wa kuvuija bantu bayidi bilondeshile makanda etu atudi nau mpindieu. Mu mudimu wa tshijengu tuvua tutuadija malonga a Bible a bungi bua bakuabu batungunuke ne kualombola. Mpindieu, bua bulenga bua Yehowa budi kabuyi butuakanyine, tudi tutuadija malonga ne tupeta kabidi disanka dia kumona balongi betu ba Bible aba baya kumpala, badilambula kudi Nzambi ne pashishe batambula.

Ndi mutuishibue ne: kuenzela Yehowa mudimu ke tshintu tshitambe buimpe tshidi muntu ne bua kuenza mu nsombelu wende. Kuenza nunku kudi ne mushinga wa bungi, kusankisha ne kabidi kukolesha dinanga ditudi bananga Yehowa dituku dionso. Eu ke nsombelu udi utuadila muntu disanka dilelela. Nansha tuetu bikale ne mudimu kayi mu bulongolodi bua Nzambi, anyi bikale muaba kayi onso, tudi tuitaba tshivua mufundi wa misambu muambe ne: ‘[Bantu] ba diakalenga mbadi [Yehowa] muikale Nzambi wabu!’​—Musambu 144:15, MMM.

[Tshimfuanyi mu mabeji 24, 25]

Tudi mu mudimu wa tshijengu

[Tshimfuanyi mu dibeji 25]

Tudi tuya kutangila Henry Lepine mu Dawson. Ndi ku dia bakaji

[Tshimfuanyi mu dibeji 26]

Nzubu wa Bukalenge wa kumpala mu Anchorage

[Tshimfuanyi mu dibeji 26]

Meme ne Reta mu 1998