Bidi bikengela tuetu kushala batabale bikole mpindieu

“Nuikale batabale, bualu kanuena bamanye dituku diafika Mfumu wenu.”​—MATAYO 24:42, MMM.

1, 2. Ntshinyi tshidi tshileja ne: tudi ku nshikidilu kua tshikondo etshi?

 MUFUNDI Bille Emmott udi wamba ne: “Tshia kumpalampala, lukama lua bidimu lua makumi abidi luvua anu lua mvita.” Nansha mudiye witaba ne: makenga mafumine ku mvita ne ku tshikisu mmenzeke mu bikondo bionso bia malu a bantu, udi wamba ne: “Lukama lua bidimu lua makumi abidi kaluvua lushilangane nabi to, luvua lushilangane nabi ku bukole bua malu aa. Luolu ke luvua lukama lua bidimu lua kumpala luvua mvita mienzeke buloba bujima . . . Ne, bienze bu bua kushindika bualu ebu, nkuenzeke ki ng’anu mvita imuepele ya buloba bujima mu lukama lua bidimu elu, kadi ibidi.”

² Mvita idi ‘tshisamba tshikuabu tshiluangana ne tshinga, bukalenge bukuabu buluangana ne bunga’ ikavua mimanyisha kudi Yezu Kristo. Kadi, idi anu tshitupa tshimue tshia ‘tshimanyinu tshia [dikalaku] dia Kristo ne tshia nshikidilu wa tshikondo etshi.’ Mu mulayi munene eu, Yezu wakatela kabidi biyole bia nzala, bipupu bia masama ne bikumina. (Matayo 24:3, 7, 8; Luka 21:6, 7, 10, 11) Mu mishindu ya bungi, makenga aa mmalue kuvula ne kukola be. Bubi bua muntu budi bua bungi be, anu mudibi bimuenekela ku mushindu udiye wangata Nzambi ne muntu nende. Dinyanguka dia bikadilu ne divula dia dibunda dia bilumbu ne tshikisu bidi bimueneka patoke. Bantu mbalue banangi ba mfranga pamutu pa kuikala banangi ba Nzambi, anu bua masanka ke budi bubatonde. Bionso ebi bidi bijadika ne: tudi mu tshikondo tshia “malu makole.”​—2 Timote 3:1-5.

3. “Bimanyinu bia bikondo” bidi ne bua kutusaka ku tshinyi?

³ Mmunyi muudi umona bikadilu bia bantu bidi bienda binyanguka? Bantu ba bungi mbapapishe mitshima yabu pa bidi bitangila malu adi abungamija adi enzeka tshikondo tshietu etshi ne kabena mene baatshiuka to. Bantu banene ne bena meji ba panu kabena bajingulula diumvuija dia “bimanyinu bia bikondo” to; nansha balombodi ba bitendelelu ki mbambuluishe bantu bua kupeta diumvuija edi to. (Matayo 16:1-3) Kadi Yezu wakabela bayidi bende ne: “Nuikale batabale, bualu kanuena bamanye dituku diafika Mfumu wenu.” (Matayo 24:42, MMM) Muaba eu Yezu udi utukankamija ki ng’anu bua kutabala patupu, kadi bua ‘kuikala batabale.’ Bua kuikala batabale, tudi ne bua kushala badimuke. Ebi kabiena bilomba anu kumanya patupu se: tudi mu matuku a ku nshikidilu ne mu tshikondo tshikole. Tudi ne bua kuikala batuishibue bikole bua se: ‘nshikidilu wa malu onso udi pabuipi.’ (1 Petelo 4:7) Tuetu batuishibue nunku, netuikale batabale ne lungenyi lua kuenza malu ne mitalu. Nanku, lukonko lutudi ne bua kuelela meji ludi se: ‘Ntshinyi tshiatuambuluisha bua tuetu kuikala batambe kutuishibua bua se: nshikidilu ukadi pabuipi?’

4, 5. (a) Ntshinyi tshiakolesha dituishibua dietu dia se: nshikidilu wa ndongoluelu eu mubi ukadi pabuipi, ne mbua tshinyi? (b) Mbualu kayi bumue budi bufuanangane pankatshi pa tshikondo tshia Noa ne dikalaku dia Muana wa muntu?

⁴ Tuangate tshilejilu tshia nsombelu uvuaku mu tshikondo tshia kumpala kua muanda wa pa buawu wakenzeka mu bukua-bantu: Mvula wa kabutu wa mu matuku a Noa. Bantu bavua benza malu mabi mapite bungi, ke Yehowa kufika too ne ku diumvua ‘kanyinganyinga mu mutshima wende.’ Wakamba ne: ‘Nenjimije bantu bangakafuka pa buloba.’ (Genese 6:6, 7) Ke tshiakenzaye. Yezu wakaleja mudi tshikondo atshi tshifuanangane ne tshietu etshi, wamba ne: “Bu muvuabio bienzeke mu matuku a Nowa, ke muenzekabio [“mu dikalaku dia,” NW] Muana wa muntu.”​—Matayo 24:37, MMM.

 ⁵ Mbia meji bua kuamba ne: Yehowa udi umvua kanyinganyinga bua malu mabi a bena panu anu muvuaye mukumvue bua bantu ba kumpala kua Mvula wa kabutu. Bu muvuaye mubutule bantu babi ba mu tshikondo tshia Noa, kakuyi mpata neabutule kabidi bantu babi ba mu tshikondo tshietu etshi. Kujingulula bimpe difuanangana didi pankatshi pa tshikondo atshi ne matuku etu aa kudi ne bua kukolesha dituishibua dietu bua se: nshikidilu wa bukua-panu budiku lelu ukadi pabuipi. Kadi mmalu kayi adi mafuanangane? Kudi malu matue ku atanu. Bua kumpala budi se: badi badimuija bantu patoke bua kabutu katshilualua.

Mudimuija bua ‘malu akadi kaayi manji kumuenebua’

6. Yehowa uvua muangate dipangadika dia kuenza tshinyi mu matuku a Noa?

⁶ Mu tshikondo tshia Noa, Yehowa wakamba ne: ‘Nyuma wanyi kêna utendekena bantu tshiendelele, bualu bua badi anu ba pa buloba, ne matuku abu neikale bidimu lukama ne makumi abidi.’ (Genese 6:3) Dimanyisha dia dipangadika edi dia Nzambi mu tshidimu tshia 2490 kumpala kua bikondo bietu ebi diakaleja ntuadijilu wa nshikidilu wa bantu abu babi. Anjibi kuela meji bua tshivua muanda au umvuija bua bantu bavua ne muoyo mu tshikondo atshi! Kuvua kushadile anu bidimu 120 patupu bua Yehowa kulokesha ‘mâyi mangi pa buloba bua kujimija bintu bionso bidi ne mupuya wa muoyo munda muabi muinshi mua diulu.’​—Genese 6:17.

7. (a) Ntshinyi tshiakenza Noa pakamudimuijabu bua Mvula wa kabutu? (b) Ntshinyi tshitudi ne bua kuenza bua didimuija bua nshikidilu wa ndongoluelu eu wa malu?

⁷ Bidimu bia bungi kumpala, Noa wakapeta didimuija bua kabutu kavua ne bua kulua, ne wakenza malu ne meji mu matuku avuaye nawu bua kulongolola mushindu wa kupanduka. Mupostolo Paulo udi wamba ne: ‘Pakadiye mudimujibue bua malu akadi kaayi manji kumuenebua, muenzejibue ku ditshina dia Nzambi, [Noa] wakalongolola buatu bua kusungila nabu ba mu nzubu muende.’ (Ebelu 11:7) Bidi munyi buetu tuetu? Kukadi bidimu bitue ku 90 katshia matuku a nshikidilu wa ndongoluelu eu wa malu atuadija mu tshidimu tshia 1914. Kakuyi mpata tudi mu ‘tshikondo tshia ku nshikidilu.’ (Danyele 12:4) Ntshinyi tshitudi ne bua kuenza bua didimuija ditudi bumvue? Bible udi wamba ne: “Yeye udi wenza mudi disua dia Nzambi udi ushalaku tshiendelele.” (1 Yone 2:17) Mpindieu ke tshikondo tshia tuetu kuenza disua dia Yehowa ne mitalu ya bungi.

8, 9. Ndidimuija kayi didibu bamanyishe mu bikondo bietu ebi, ne mmushindu kayi udibu badimanyisha?

⁸ Mu bikondo bietu ebi, balongi ba Bible ba muoyo umue mbalonge mu Mifundu mifundisha ku nyuma wa Nzambi ne: ndongoluelu eu mmufundila kabutu. Tudiku tuitaba bualu ebu anyi? Tangila tshivua Yezu muambe patoke: “Mu matuku awu nemuikale dikenga dinene didi kadiyi dianji kufika katshia ku ntuadijilu wa buloba too ne mpindiewu. Kashidi, dikenga dia mushindu ewu kadiakufika kabidi.” (Matayo 24:21, MMM) Yezu wakamba kabidi ne: uvua ne bua kulua bu Nzuji muteka kudi Nzambi ne kutapulula bantu mudi mulami utapulula mikoko ne mbuji. Bantu bavuaye usangana kabayi bakumbane bavua ne bua ‘kuya mu dikenga dia tshiendelele, kadi bantu bakane [bavua ne bua] kuya mu muoyo wa tshiendelele.’​—Matayo 25:31-33, 46.

⁹ Yehowa mmutangije ntema ya basadidi bende ku didimuija edi ku diambuluisha dia malu adiye ubavuluija mu tshikondo tshiakanyine. Badi  bapetela malu aa mu biakudia bia mu nyuma bidi “mupika wa lulamatu ne wa budimu” ubapesha. (Matayo 24:45-47, NW) Kabidi, mbambile tshisamba tshionso, tshisa, muakulu ne bantu bonso bua ‘kutshina Nzambi ne kumutumbisha, bualu bua dîba dia dilumbuluisha diende diakulua.’ (Buakabuluibua 14:6, 7) Tshitupa tshinene tshia mukenji wa Bukalenge udi Bantemu ba Yehowa bayisha buloba bujima ndidimuija dia se: mu katupa kîpi emu Bukalenge bua Nzambi nebumushe mamfumu a bantu. (Danyele 2:44) Eu ki mmukenji wa kupepeja to. Nzambi Wa-Bukole-Buonso utu ukumbaja dîyi diende misangu yonso. (Yeshaya 55:10, 11) Wakakumbaja dîyi diende mu matuku a Noa, ne neadikumbaje kabidi mu matuku etu aa.​—2 Petelo 3:3-7.

Malu mabi a tshiendenda tshia masandi mmatangalake

10. Ntshinyi tshitudi mua kuamba bua bilele bia masandi bivua kabiyi bia ku tshifukilu bivuaku mu tshikondo tshia Noa?

¹⁰ Tshikondo tshietu etshi ntshifuanangane ne matuku a Noa mu bualu bukuabu kabidi. Yehowa uvua muambile mulume ne mukaji ba kumpala bua ‘bûje buloba tente’ ne ndelanganyi yabu mu dikuata mudimu bimpe mu dibaka ne bipedi bia lulelu bivuaye mubapeshe. (Genese 1:28) Mu tshikondo tshia Noa, banjelu ba bupidia bakanyanga bantu ne bilele bia masandi kabiyi bia ku tshifukilu. Bakalua pa buloba, kuvualabu mibidi ya bantu ne kusombabu ne bakaji balenga kumona, kulelabu nabu bana bavua tshitupa bantu, tshitupa ba-demon, bantu ba mfiondo anyi ba-Nefilime. (Genese 6:2, 4) Bible udi ufuanyikija mpekatu wa banjelu aba ba nkuka mikole ne bilele bibi bia masandi bivua mu Sodoma ne mu Amola. (Yuda 6, 7) Ke bualu kayi bilele bia masandi bivua kabiyi bia ku tshifukilu biakatangalaka mu matuku au.

11. Mbikadilu kayi bidi nabi bantu bidi bienze bua tshikondo tshietu etshi tshifuanangane ne matuku a Noa?

¹¹ Netuambe tshinyi bua bikadilu bidiku lelu’eu? Mu matuku aa a ku nshikidilu, meji a bantu mmatuma anu ku malu a masandi. Paulo udi wakula bimpe bua bantu aba wamba ne: “kabena bamanye mua kufua bundu kabidi”; ba bungi mbadifile ku “masandi bua kuenzabo malu a bundu onso ne lukuka lukole.” (Efeso 4:19) Dibandila bindidimbi bia bantu butaka, dimanya balume anyi bakaji kumpala kua kubuela mu dibaka, dilala ne bana ku bukole ne dilala dia balume ne balume ne bakaji ne bakaji nabu mbitangalake miaba yonso. Bamue bakadi ‘badiangatshila difutu [diabu]’ mu masama a mu bilamba, dikosoloka dia mêku ne ntatu mikuabu.​—Lomo 1:26, 27.

12. Bua tshinyi tudi ne bua kudima lukuna lua malu mabi?

¹² Mu tshikondo tshia Noa, Yehowa wakatuma Mvula wa kabutu ne kubutulaye bantu babi abu bavua ne bilele bibi menemene bia masandi. Katuena ne bua kupua muoyo bua se: matuku atudi aa adi anu muvua matuku a Noa. “Dikenga dinene” ditshidi dilua nediumbushe ‘[bena masandi], bena tshiendenda, badileji bu bakaji ne balume badi benzelangana malu a bundu’ pa buloba bujima. (Matayo 24:21; 1 Kolinto 6:9, 10; Buakabuluibua 21:8) Nunku bidi bikengela bua tuetu kudima lukuna lua malu mabi ne kuepukila anu pa bule nsombelu idi mua kutufikisha ku tshiendenda!​—Musambu 97:10; 1 Kolinto 6:18.

Buloba budi ‘buula tente ne tshinyangu’

13. Mu tshikondo tshia Noa, bua tshinyi buloba buvua “buule ne tshinyangu”?

¹³ Bible udi wakula bua tshimanyinu tshikuabu tshia tshikondo tshia Noa, wamba ne: “Buloba buvua bunyanguke, buule ne tshinyangu.” (Genese 6:11, MMM) Tshinyangu etshi katshivua  tshienyi to. Kana muana wa Adama wakashipa muanabu uvua muntu muakane. (Genese 4:8) Bua kuleja muvuaye ne lungenyi lua tshinyangu luvuaku mu tshikondo tshiende, Lameke wakenza kasala, uditua makumbu bua muvuaye mushipe nsongalume mukuabu, wamba muvuaye mumushipe bua kudipandisha. (Genese 4:23, 24) Bualu buvua bupiabupia mu tshikondo tshia Noa buvua bukole bua tshinyangu atshi. Bu muvua banjelu ba bupidia basele bakaji pa buloba ne balele nabu bana: ba-Nefilime, tshinyangu tshiakavula bikole bia menemene. Bible wa Traduction du monde nouveau udi uleja ne: muaku wa mu tshiena-Ebelu tshia ku ntuadijilu udi ufunkuna bantu ba mfiondo bena tshinyangu aba udi umvuija ne: “Baponeshanganyi,” mmumue ne: “aba badi bashindisha bakuabu.” (Genese 6:4) Ke bualu kayi buloba buvua ‘buule ne binyangu.’ (Genese 6:13, MMM) Elabi meji bua ntatu ivua Noa ne bua kuikala mupete bua kukolesha bana bende muaba wa mushindu’eu! Kadi Noa wakaleja ne: uvua muntu ‘muimpe ku mêsu kua Yehowa munkatshi mua tshikondo atshi.’​—Genese 7:1.

14. Mmunyi mudi buloba bulue ‘kuula ne tshinyangu’ lelu?

¹⁴ Mu bikondo bionso bia bantu kutu anu tshinyangu. Kadi anu muvuabi mu matuku a Noa, mu tshikondo tshietu etshi nkuenzeke kabidi malu a tshinyangu a katshia ne katshia. Tutu tumvua pa tshibidilu bakula bua malu a tshinyangu adi enzeka mu mêku, malu a tshikisu a ba-teroriste, dishipa bena tshisa tshikuabu, ne dishipa bantu bapite bungi musangu umue kudi bantu bikale ne bingoma kabiyi bua bualu nansha bumue. Ku bionso ebi sakidila kabidi mashi a bantu adibu bele panshi mu mvita. Buloba mbulue kuula kabidi ne tshinyangu. Bua tshinyi? Ntshinyi tshidi tshienze bua tshinyangu tshivulangane nunku? Diandamuna didi dileja bualu bukuabu budi bufuanangane ne bua mu matuku a Noa.

15. (a) Ntshinyi tshidi tshivudijije tshinyangu mu matuku a ku nshikidilu? (b) Mbualu kayi butudi bajadike ne: nebuenzeke?

¹⁵ Pakajadikabu Bukalenge bua Masiya mu diulu mu 1914, Yezu Kristo Mukalenge uvuabu bateke wakenza bualu bua tshikuma. Wakipata Satana ne ba-demon bende mu diulu ne kubelaye pa buloba. (Buakabuluibua 12:9-12) Kumpala kua Mvula wa kabutu, banjelu ba bupidia bavua balekele ku budisuile muaba uvuabu nawu mu diulu; kadi mu bikondo bietu ebi, bavua babipate mu diulu ku bukole. Bualu bukuabu, mpindieu kabena ne bukole bua kuvuala mibidi ya bantu pa buloba bua kumona mua kukumbaja nkuka mibi ya masandi to. Nunku bua bundu budibu nabu ne tshiji ne buôwa bua kabutu kadi kasemena pabuipi, badi basaka bantu ne malongolodi bua kuenza malu a tshikisu ne a tshinyangu tshikole tshipite tshia mu tshikondo tshia Noa. Yehowa wakabutula bantu ba kumpala kua Mvula wa kabutu kunyima kua banjelu ba bupidia ne bana bavuabu balele bamane kuuja buloba ne malu mabi. Ikala mujadike ne: neenze kabidi bia muomumue mu tshikondo tshietu etshi!  (Musambu 37:10) Kadi aba badi bashala batabale lelu mbamanye ne: lupandu luabu lukadi pabuipi.

Badi bamanyisha mukenji

16, 17. Mbualu kayi buinayi budi bufuanangane mu matuku a Noa ne mu tshikondo tshietu etshi?

¹⁶ Bualu buinayi budi bufuanangane pankatshi pa tshikondo tshietu etshi ne tshia kumpala kua Mvula wa kabutu budi bumuenekela mu mudimu uvuabu bapeshe Noa bua kuenza. Noa wakenza buatu bunene. Uvua kabidi “mulongeshi.” (2 Petelo 2:5, Mukenji Mulenga) Mbualu kayi buvuaye ulongesha? Bidi bimueneka ne: mu dilongesha diende, Noa uvua wambila bantu bua badilengeje ne uvua ubadimuija bua kabutu kavua kalua kumpala. Yezu wakamba ne: bantu ba mu tshikondo tshia Noa “kabakadi bajingulule bualu too ne pakalua tshipupu tshinene tshia mvula kubabutula buonso buabo.”​—Matayo 24:38, 39, Muanda Mulenga Lelu.

¹⁷ Bia muomumue, Bantemu ba Yehowa badi bakumbaja mudimu wabu wa diyisha ne tshisumi, badi bamanyisha mukenji wa Bukalenge bua Nzambi pa buloba bujima. Mu tshitupa tshia pa buloba pabuipi ne tshionso, bantu batu bateleja ne babala mukenji wa Bukalenge mu muakulu wabu. Tshibumba tshia Nsentedi, tshidi tshimanyisha Bukalenge bua Yehowa, tshitu tshipatuka bibejibeji bipite pa 25 000 000 mu miakulu mipite pa 140. Bushuwa, badi bayisha lumu luimpe lua Bukalenge bua Nzambi kudi ‘bantu bonso ba pa buloba bu tshimanyishilu.’ Pakumbajabu mudimu eu mushindu udi Nzambi musue, nshikidilu nealue kakuyi mpata.​—Matayo 24:14.

18. Mmunyi mudi bantu ba bungi lelu bafuanangane ne bavule ba mu tshikondo tshia Noa ku mushindu udibu bangata mudimu wetu wa diyisha?

¹⁸ Patudi tutangila mudi bantu kabayi basankidila malu a Nzambi ne mudibu kabayi ne bikadilu bilenga, tudi tumvua bua tshinyi dîku dia Noa divua dilue tshintu tshia kusekabu ne tshia kupepeja kudi bena mutumba nabu ba mitshima mipape. Nansha nanku nshikidilu wakalua anu kulua. Bia muomumue, ‘baseki ne tuseku tuabu’ mbavule mu matuku a ku nshikidilu aa. Bible udi wamba ne: ‘Kadi dituku dia [Yehowa nedilue] bu mudi muibi.’ (2 Petelo 3:3, 4, 10) Nedilue mu tshikondo tshilongolola. Kadiakujanguluka nansha. (Habakuka 2:3) Mbia meji bua tuetu kushala batabale!

Anu bantu bakese ke bapanduka

19, 20. Ndifuanangana kayi ditudi mua kupeta pankatshi pa Mvula wa kabutu ne kabutu ka ndongoluelu eu wa malu?

¹⁹ Difuanangana pankatshi pa tshikondo tshia Noa ne tshietu etshi kadiena dimanyina anu pa malu mabi a bantu ne pa kabutu kakabakuata to. Anu muvuaku bantu bakapanduka ku Mvula wa kabutu au, ke muikalaku kabidi bantu bapanduka ku nshikidilu wa ndongoluelu eu wa malu. Bantu bakapanduka ku mvula wa kabutu bavua bena bupuekele bavua kabayi ne nsombelu wa buena wa bantu bonso. Bakateleja didimuija dia kudi Nzambi ne bakaditapulula ne bantu babi ba mu tshikondo atshi. Bible udi wamba ne: ‘Noa wakasangana luse ku mêsu kua Yehowa. [Noa] wakadi muakane tshishiki mu tshikondo tshiende.’ (Genese 6:8, 9) Munkatshi mua bukua-bantu buonso, anu dîku dimuepele, ‘bantu banya-banya, bantu muanda-mukulu mene [ke bakasungidibua] mu mâyi.’ (1 Petelo 3:20) Ne buobu ke bakalua Yehowa Nzambi kuambila ne: ‘Nulelangane, nukumbane ba bungi, nuikale pa buloba buonso.’​—Genese 9:1.

²⁰ Dîyi dia Nzambi didi ditujadikila ne: ‘[musumba munene neupatuke] mu dikenga dinene.’ (Buakabuluibua 7:9, 14) Mbantu bungi munyi bikala mu musumba munene? Yezu nkayende wakamba ne: ‘Mushiku wa mbelu udi mubumbakane ne njila wa ku muoyo udi mubumbakane, ne bantu banya-banya badi bamumona.’ (Matayo 7:13, 14) Patudi tubafuanyikija ne bantu miliyare mitue ku isambombo badi ne muoyo pa buloba lelu, bantu bapanduka ku dikenga dinene didi dilua kumpala nebikale bakese. Kadi badi mua kuikala ne diakalenga dia buena divua nadi bantu bakapanduka ku Mvula wa kabutu. Pamu’apa bantu  bapanduka nebikale mua kulela bana munkatshi mua tshikondo kampanda bua kuikalabu mu nsangilu mupiamupia wa bantu bikala pa buloba.​—Yeshaya 65:23.

“Nuikale batabale”

21, 22. (a) Mmunyi mudi dikonkonona muyuki eu wa Mvula wa kabutu dikuambuluishe? (b) Mvese wa tshidimu tshia 2004 mmvese kayi, ne bua tshinyi tudi ne bua kuteleja mubelu udi mvese eu ufila?

²¹ Nansha mudi Mvula wa kabutu muloke kukadi bidimu bia bungi menemene, udi utupesha didimuija ditudi katuyi ne bua kulengulula to. (Lomo 15:4) Malu adi mafuanangane pankatshi pa tshikondo tshia Noa ne tshietu etshi adi ne bua kutusaka bua kuikala anu batambe kuvuluka diumvuija dia mianda idi yenzeka ne adi ne bua kutudimuija bua dilua dia Yezu mu tshintuluntulu bua kubutula bantu babi.

²² Lelu’eu, Yezu Kristo udi ulombola mudimu munenanenayi wa luibaku lua mu nyuma. Bua bukubi ne lupandu bia batendeledi balelela, kudi mparadizu wa mu nyuma udi mufuane buatu. (2 Kolinto 12:3, 4) Bua tuetu kupanduka ku dikenga dinene, tudi ne bua kushala mu mparadizu eu. Pambelu pa mparadizu eu wa mu nyuma padi bukua-panu bua Satana budi budilongolole bua kudia muntu yonso udi mubange kubungila mu nyuma. Mbia mushinga menemene bua tuetu ‘kuikala batabale’ ne badilongolole bua dituku dia Yehowa.​—Matayo 24:42, 44, MMM.

Udi muvuluke anyi?

• Mmubelu kayi uvua Yezu mufile pa bidi bitangila dilua diende?

• Ntshinyi tshidi Yezu ufuanyikija natshi dikalaku diende?

• Mmu malu kayi mudi tshikondo tshietu etshi tshifuanangane ne matuku a Noa?

• Mmunyi mudi dielangana meji bua malu a mu tshikondo tshia Noa adi mafuanangane ne a mu tshikondo tshietu etshi ne bua kutusaka bua kuikala ne mitalu?

[Nkonko ya dilonga]

[Lungenyi lunene lua mu dibeji 18]

Mvese wa tshidimu tshia 2004 neikale: “Nuikale batabale . . . Nuikale badilongolole.”​—Matayo 24:42, 44, MMM.

[Tshimfuanyi mu dibeji 15]

Noa wakateleja didimuija dia kudi Nzambi. Ke tshitudi tuenza petu anyi?

[Bimfuanyi mu mabeji 16, 17]

“Bu muvuabio bienzeke mu matuku a Nowa, ke muenzekabio pafika Muana wa muntu”