Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku anji tangilabi ni udi mua kuandamuna nkonko idi ilonda eyi:

• Mu mukanda wa Mika mudi nshapita bungi munyi, ne mukanda eu bakaufunda dîba kayi, ne nnsombelu kayi uvuaku tshikondo atshi?

Mukanda wa Mika udi ne nshapita muanda-mutekete. Muprofete Mika uvua mufunde mukanda eu mu lukama lua bidimu lua muanda-mukulu Kumpala kua Bikondo Bietu ebi, tshikondo tshivua tshisamba tshivua Nzambi mudie natshi tshipungidi tshiabulukangane mu bisamba bibidi: tshia Isalele ne tshia Yuda.​—15/8, dibeji dia 9.

• Bilondeshile Mika 6:8, ntshinyi tshidi Nzambi utekemena kutudi?

Tudi ne bua “kuenza malu makane.” Mushindu udi Nzambi wenza malu ke udi tshipiminu tshia buakane, nunku tudi ne bua kutumikila mêyi ende adi atulomba bua kuamba bulelela ne kuikala ne lulamatu. Udi utuambila bua “kunanga kuleja bakuabu luse.” Bena Kristo mbalejangane luse lujalame padibu bambuluishe bakuabu bavua mu ntatu, bu mudi ya patu bipupu bidituta. Bua tuetu ‘kuenda ne [Yehowa] ne mutshima mupuekele,’ tudi ne bua kuikala bamanye mikalu yetu ne kumueyemena.​—15/8, dibeji dia 20-22.

• Muena Kristo yeye mujimije mudimu, ntshinyi tshidiye pamu’apa mua kuenza?

Bidi mua kuikala bia meji bua muntu kuanji kutangilulula nsombelu wende. Bidi mua kumueneka biakanyine bua kukepesha malu makuabu a mu nsombelu, pamu’apa kufutshila nzubu udi mukese anyi kulekelaku bintu bikuabu bidi kabiyi menemene ne mushinga. Bushuwa, mbitambe buimpe bua kulekela kuditatshisha bua majinga etu a ku dituku ne ku dituku, kadi kushala batuishibue ne: Nzambi udi mua kuenza bua tuetu kupeta bitudi nabi dijinga. (Matayo 6:33, 34)​—1/9, dibeji 14-15.

• Mmalu kayi atudi ne bua kuvuluka patudi tufila anyi tuangata tudo tua dituku dia difesto dia dibaka?

Katujingi bua kutupabu tudo tua mushinga mukole bobobo, anyi kuikala batutekemene nansha. Meji adi mu mutshima wa muntu udi ufila kado ke adi ne mushinga wa bungi menemene. (Luka 21:1-4) Ki mbimpe bua kumanyisha bantu dîna dia udi mufile tshintu kampanda to. Kuenza nanku kudi mua kutonda muntu mukuabu bumue kumufuisha too ne bundu. (Matayo 6:3)​—1/9, dibeji 29.

• Bua tshinyi tudi ne bua kuikala tusambila katuyi tulekela?

Kuikala ne tshibidilu tshia kusambila kudi mua kutuambuluisha bua kukolesha bulunda buetu ne Nzambi ne bua kutantamena mateta makole. Masambila etu adi mua kuikala mîpi anyi male, bilondeshile majinga ne malu atudi nawu. Disambila didi dikolesha ditabuja ne dituambuluisha bua kumona mua kupita ne ntatu yetu.​—15/9, dibeji 15-18.

• Mmushindu kayi utudi ne bua kumvua mêyi a mu 1 Kolinto 15:29 adibu bakudimune mu nkudimuinu mikuabu ya Bible ne: “bantu babatijibua bua bafue”?

Mupostolo Paulo uvua uleja ne: bena Kristo bela manyi badi batambula anyi binyibua mu nsombelu wabafikisha ku lufu lua bikale anu ne lulamatu bu muakafua Kristo. Pashishe, badi babishibua bua kuikalabu ne muoyo wa mu nyuma bu Kristo.​—1/10, dibeji 29.

• Ntshinyi tshidi tshileja ne: kulua muena Kristo kudi kulomba muntu malu a bungi kupita diepuka patupu dia malu mabi adibu batele mu 1 Kolinto 6:9-11?

Mupostolo Paulo kavua muambe ne: malu mabi a kuepuka adi anu tshiendenda tshia masandi, ditendelela dia mpingu, ne bukuatshiki bua maluvu nansha. Bua kuleja muvuabi bikengela kushintuluka mu malu makuabu, wakatungunuka ne kuamba mu mvese wa 12 ne: ‘Meme ndi ne bukole bua kuenza malu onso, kadi malu onso kaena ankuatshisha.’​—15/10, dibeji 18-19.

• Mbamue bakaji kayi ba mu bikondo bia kale bakasankisha mutshima wa Nzambi?

Munkatshi mua bakaji aba mudi Shifela ne Pua, bakaji baleleshi bavua kabayi batumikile dîyi dia Palô dia kushipa bana bonso ba balume bavuabu bafuma ku dilela kudi bena Isalele. (Ekesode 1:15-20) Lahaba uvua mukaji wa ndumba muena Kanâna wakakuba mioyo ya batentekedi babidi bena Isalele. (Yoshua 2:1-13; 6:22, 23) Anu bua lungenyi luvua nalu Abigayila, wakapandishisha bantu ku lufu ne kuepula Davidi bua kubengaye kupia tshibawu tshia mashi. (1 Samuele 25:2-35) Bakaji aba badi tshilejilu kudi bakaji ba lelu.​—1/11, dibeji 8-11.

• Bu mudibu bamba mu Balumbuluishi 5:20, “mitoto ya mu diulu yakaluangana” ne Sisela mushindu kayi?

Bamue badi bela meji ne: bualu ebu budi buleja muvua Nzambi mufile diambuluisha diende. Bakuabu badi bamba muvuabi diambuluisha dia banjelu, dikuluka dia bintu kampanda bia mu diulu anyi malu a mbuku ya mitoto ivua Sisela mueyemene. Bu mudi Bible kayi uleja malu aa mu bualabale buawu buonso, tudi mua kuangata mêyi aa bu adi aleja mushindu kampanda wa diambuluisha dia kudi Nzambi bua kusungila tshiluilu tshia bena Isalele.​—15/11, dibeji 30.

• Nansha mudi buloba buule tente ne bantu badi balengulula malu a Nzambi ne kabayi baanange, bua tshinyi bantu bapite bungi kabidi batshidi anu bamba mudibu bitabuja Nzambi?

Bamue bantu batu baya mu ekeleziya benda bakeba ditalala dia mu mutshima. Bakuabu batu bayamu bua kutekemena muoyo wa kashidi kunyima kua lufu luabu anyi bua masama abu ajike peshi bua kupeta bubanji ne diakalengele. Miaba mikuabu payi, bantu badi bakeba tshia kupingaja pa muaba wa mu nyuma udi mushale mutupu katshia malu a ba-kapitaliste (bakebi ba bubanji bua muntu nkaya) apingana muaba wa malu a ba-koministe (bakebi ba bubanji bua tshinsanga). Dimanya dia majinga a bantu ba nunku didi mua kuambuluisha muena Kristo bua kutuadija nabu miyuki mimpe idi mua kubakuatshisha.​—1/12, dibeji 3.