Utuku ukema bua bimue bintu anyi?

UKADIKU mumone ne: bafundi ba Bible batu njila ne njila batupesha meji a kukema padibu bakula bua midimu ne ngikadilu bia Nzambi anyi? Mufundi wa Misambu wakamba ne: ‘Difukibua dianyi didi dinkemesha.’ (Musambu 139:14) Muprofete Yeshaya wakafunda ne: ‘Yehowa, wewe udi Nzambi wanyi; nenkutumbishe, nentumbishe dîna diebe; bualu bua wewe wakuenza malu a kukema.’ (Yeshaya 25:1) Anjibi kuela meji bua lungenyi lua dikema ne dikatshila bidi mupostolo Paulo mumvuije mu mêyi aa: ‘Monayi ndondo wa bubanji bua meji ne lungenyi bia Nzambi!’​—Lomo 11:33.

Nkonga-miaku mukuabu udi umvuija muaku “kukema” bu meji majula kudi bualu buvua kabuyi butekemena, kabuyi bua pa tshibidilu anyi budi kabuyi kumvuija, nangananga dipapuka disambakane ne dianyina anyi dijinga bua kumanya mudi malu.

Kabituku bienza disanka bua kumona bana batekete bakema ne mêsu matonona padibu bamona, bumvua anyi bateleja bintu bipiabipia kudibu anyi? Bia dibungama, dikema dia nunku, dikebesha kudi dijinga dia kumanya anyi kudi tshintu tshipiatshipia ditu misangu ya bungi dikepela padi muntu wenda ukola.

Kadi bua bafundi ba Bible batudi batele kulu eku, lungenyi lua dikema luvua mu ngikadilu wa bumuntu buabu. Bakashala nalu munkatshi mua bidimu ne bidimu. Bua tshinyi? Bavua badime lungenyi lua kukema bua bimue bintu pavuabu belangana meji ne dianyisha bua midimu ya Nzambi. Mufundi wa Misambu wakasambila ne: ‘Ndi mvuluka matuku a diambedi, ndi ngelangana meji a bienzedi biebe bionso; ndi ngelangana meji a mudimu [wa dikema] wa bianza biebe.’​—Musambu 143:5.

Bidi bienza disanka bua kumona ne: lelu batendeledi ba Nzambi batu pabu ne lungenyi lua kukema elu! Utuku ne lungenyi elu anyi? Utuku uludima anyi?