Mushindu utudi tuleja Nzambi dinanga

KUNANGA Nzambi ki mbualu anu bua kulonga malu ende patupu nansha. Anu mudi basadidi ba Nzambi pa buloba bujima mua kubijadika, dinanga dilelela bua Nzambi didi dienda dikola padi muntu umanya bimpe tshidi bumuntu bua Nzambi, unanga kabidi Nzambi bikole menemene padiye ujingulula malu adiye munange, adiye ukina, adiye ujinga ne adiye ulomba.

Ne dinanga dionso Yehowa mmutupeshe Bible Dîyi diende ne munda mua dîyi edi ke mudiye mudileje yeye nkayende kutudi. Mu Bible ke mutudi tulonga mushindu uvua Yehowa muenze malu mu nsombelu mishilashilangane. Anu bu mutu mukanda wa kudi mulunda wetu kampanda utusankisha, ke mudi Bible utusankisha patudi tuenda tujingulula ngikadilu mikuabu idimu ya bumuntu bua Yehowa.

Anu mututu tubimona misangu mivule mu mudimu wetu wa buambi, kulonga malu a Nzambi kakutu anu kusaka bantu misangu yonso bua kumunanga to. Yezu wakambila bena Yuda bakuabu bavua bapange dianyisha ba mu matuku ende ne: ‘Nudi nukeba kujingulula malu adi mafunda mu Mukanda wa Nzambi, bualu nudi nuelangana meji ne: mu malu aa tudi ne muoyo wa tshiendelele; . . . kadi ndi munumanye ne: kanuena ne [dinanga dia] Nzambi munda muenu.’ (Yone 5:39, 42) Bamue batu benza bidimu ne bidimu mu dilonga ngikadilu milenga ya Yehowa, kadi kabayi nansha bafika ku dimunanga menemene to. Mbua tshinyi? Bualu kabatu belangana meji pa malu adibu balonga to. Pabi, bantu ba bungi ba muoyo muimpe batudi tulonga nabu Bible badi bamona dinanga diabu kudi Nzambi dienda anu dikola. Mbua bualu kayi? Anu mutuvua benze petu badi pabu balonda tshilejilu tshia Asafa. Mmu mushindu kayi au?

Tuelangane meji ne dianyisha dionso

Asafa wakangata dipangadika dia kunanga Yehowa mu mutshima wende. Kufundaye ne: ‘Ndi ngelangana meji mu mutshima wanyi muine.  Nentele bienzedi bia Yehowa, bualu bua nemvuluke malu ebe a kukema awakenza kale. Nengelangane meji a mudimu webe wonso, nengelangane meji munda muanyi a bienzedi biebe.’ (Musambu 77:6, 11, 12) Dinanga dia Nzambi didi dikola mu muoyo wa muntu udi welangana meji a njila ya Yehowa anu bu muvua mufundi wa misambu eu muenze.

Kabidi patudi tuvuluka masanka atukadi bapete mu dienzela Yehowa mudimu, bualu ebu budi bukolesha malanda etu nende menemene. Mupostolo Paulo wakamba ne: tudi ‘benzejanganyi ba mudimu’ ne Nzambi, kadi bulunda budi benzejanganyi ba mudimu nabu munkatshi muabu butu bulunda bua pa buabu menemene. (1 Kolinto 3:9) Patudi tuleja mutudi banange Yehowa, udi wanyisha bikole, bisankisha too ne mutshima wende. (Nsumuinu 27:11) Pashishe, patudi tulomba Yehowa diambuluisha ne tumona utukuatshisha bua kujikija lutatu kampanda, tudi tushala bashindike ne: udi netu, kabidi dinanga dietu kudiye didi dienda dikola.

Bulunda bua bantu babidi butu buenda bukola padibu bambilangana malu. Bia muomumue, patudi tuambila Yehowa tshitudi badilambuile kudiye, dinanga dietu kudiye didi dienda dikola. Netudimone tukadi tuelangana meji a mêyi a Yezu a se: ‘Sua Mukalenge Nzambi webe ne mutshima webe wonso ne muoyo anyi anyima webe wonso ne lungenyi luebe luonso ne bukole buebe buonso.’ (Mâko 12:30) Kadi ntshinyi tshitudi mua kuenza bua kumone mua kutungunuka ne kunanga Yehowa ne mutshima wetu wonso, ne muoyo wetu wonso, ne lungenyi luetu luonso, kabidi ne bukole buetu buonso?

Tunange Yehowa ne mutshima wetu wonso

Bible udi wakula bua mutshima wa mu tshimfuanyi udi umvuija muntu wa munda, tuambe ne: majinga etu, ngikadilu yetu, ne meji etu. Pa nanku, kunanga Yehowa ne mutshima wetu wonso kudi kumvuija, kusankisha Nzambi kumpala kua tshintu tshikuabu tshionso. (Musambu 86:11) Tudi tuleja mutudi ne dinanga dia mushindu eu patudi tuenza bua se: bumuntu buetu buanyishibue kudiye. Tudi mua kudienzeja bua kuidikija Nzambi pa ‘kukina malu adi mabi ne kulamata malu adi mimpe.’​—Lomo 12:9.

Dinanga ditudi nadi kudi Nzambi didi dilenga meji etu mu malu a bungi. Tshilejilu, mudimu wetu wa bianza udi pamu’apa mua kuikala muimpe anyi utulomba bivule, kadi muoyo wetu mmuteka anu ku mudimu eu anyi? Tòo. Bualu bu mutudi banange Yehowa ne muoyo wetu mujima, tudi diambedi bena mudimu ba Nzambi. Bia muomumue, tutu tujinga bua kusankisha baledi betu, muena dibaka netu, nansha mfumuetu wa mudimu, kadi netuleje ne: tudi banange Yehowa ne mutshima wetu wonso patuikala tujinga bua kumusankisha kumpala kua bionso. Yeye mene ke udi mukumbanyine muaba wa kumpala mu mutshima wetu.​—Matayo 6:24; 10:37.

Tunange Yehowa ne anyima wetu yonso

Mu Bible, muaku “anyima” udi nangananga umvuija bumuntu buetu bujima anyi nansha muoyo  utudi nawu. Pa nanku, kunanga Yehowa ne anyima wetu mujima kudi kumvuija ne: tudi tuenza mudimu ne muoyo wetu bua kumutumbisha ne kumuleja mutudi bamunange.

Bushuwa, tudi mua kuikala ne malu makuabu atudi banange mu nsombelu wetu, bu mudi kulonga mudimu kampanda, kuenza midimu kansanga ya makuta, anyi kulela bana. Kadi tudi kabidi tuleja mutudi banange Yehowa ne anyima wetu mujima pa kuenza malu adiye musue ne kuteka bintu bikuabu bionso pa muaba wabi mu nsombelu wetu, bikale ‘tukeba diambedi bukalenge ne buakana buende.’ (Matayo 6:33) Kutendelela ne anyima wetu mujima kudi kabidi kumvuija kuikala ne lukunukunu. Tudi tuleja mutudi banange Yehowa patudi tuyisha mukenji wa Bukalenge ne lukunukunu, tufila mandamuna adi akankamija bakuabu mu bisangilu anyi patudi tuambuluisha bana betu bena Kristo. Mu malu onso, tudi ne bua kuikala ‘tuenza disua dia Nzambi ne mutshima anyi [anyima wetu mujima].’​—Efeso 6:6.

Yezu wakaleja muvuaye munange Nzambi ne anyima wende mujima pavuaye mudipidie yeye nkayende. Wakateka disua dia Nzambi pa muaba wa kumpala, pashishe majinga ende yeye pa muaba muibidi. Yezu Wakatulomba bua tulonde tshilejilu tshiende. Wamba ne: ‘Biasua muntu kundonda, adipidie, ambule mutshi wende, andonde.’ (Matayo 16:24, 25) Kudipidia kudi kumvuija kudilambula. Mbuena kuamba ne: tudi banange Nzambi bikole be, bitusaka too ne kudilambula bumuntu buetu kudiye anu bu muvua muena Isalele wa mu tshikondo tshivuabu bafunda Bible uvua unanga mfumuende bikole menemene udibueja mu dibanza dia kushala mupika wende bua kashidi. (Dutelonome 15:16, 17) Dilambula muoyo wetu kudi Yehowa ntshijadiki tshia se: tudi bamunange.

Tunange Yehowa ne lungenyi luetu luonso

Kunanga Yehowa ne lungenyi luetu luonso kudi kumvuija ne: tudi tuenza muetu muonso bua kumanya bumuntu bua Yehowa, malu adiye ujinga ne adiye utulomba. (Yone 17:3; Bienzedi 17:11) Tudi tuleja dinanga dietu kudi Yehowa patudi tuenza mudimu ne lungenyi luetu luonso bua kuambuluisha bakuabu bua bafike pabu ku dinanga Yehowa ne patudi tulengeja ndongeshilu wetu. Mupostolo Petelo wakamba ne: “Tekayi meji enu ku mudimu.” (1 Petelo 1:13, MMM) Kabidi, tudi tudienzeja muetu muonso bua kuleja ne: tudi tuditatshisha bua bakuabu, nangananga aba batudi tusadila nabu Nzambi pamue. Tudi tudienzeja bua kumanya malu adibu nawu ne kutangila bua kumona dîba didibu dijinga ne kalumbandi anyi didibu dijinga ne busambi.

Tudi tuleja Yehowa mutudi bamunange ne lungenyi luetu luonso patudi tumukokela nansha mu meji etu. Patudi tukeba bua kumona malu mushindu udiye uamona, patudi tuangata mapangadika bashindike ne: njila yende ke idi mitambe yonso ku buimpe. (Nsumuinu 3:5, 6; Yeshaya 55:9; Filipoi 2:3-7) Kadi, mmunyi mutudi mua kuenza mudimu ne bukole buetu bua kuleja bushuwa ne: tudi banange Nzambi?

Tunange Yehowa ne bukole buetu buonso

Bansonga ba bungi mu tshisumbu tshia bena Kristo badi benza mudimu ne bukole buabu bua kutumbisha Yehowa. (Nsumuinu 20:29; Muambi 12:1) Umue mushindu udi bansonga bena Kristo baleja mudibu banange Yehowa ne bukole buabu buonso mpa kuangata mudimu wa bumpanda-njila, mudimu wa ku dîba ne ku dîba. Bamamu bavule badi baditua mu mudimu eu padi bana babu baya mu kalasa. Bakulu ba lulamatu badi bakumbula bana babu mu mudimu wa bulami eku bakumbaja majinga a bena mu mêku abu badi baleja ne: mbanange Yehowa ne bukole buabu buonso. (2 Kolinto 12:15) Yehowa udi upesha bantu bonso badi bamueyemena bukole bua bamone mua kuleja dinanga diabu pa kumutumbisha ne bukole buabu buonso budibu nabu.​—Yeshaya 40:29; Ebelu 6:11, 12.

Dinanga didi dikola patudi tudikolesha mu mushindu muimpe. Ke bualu kayi tutungunukayi ne kudisumbila dîba dia kuelangana meji. Tuvuluka malu akadi Yehowa mutuenzele ne malu adi aleja mudiye mukumbanyine lulamatu luetu. Bu mutudi ndelanganyi ya Adama mipange bupuangane, katuena bakanyine ‘malu onso akalongoluela Nzambi badi bamunange’ nansha musangu umue to, kadi tudi mua kuleja ne: tudi banange Yehowa ne bumuntu buetu bujima. Tutungunukayi ne kuenza anu nanku bana betu!​—1 Kolinto 2:9.

[Tshimfuanyi mu dibeji 20]

Tudi tuleja mutudi banange Nzambi mu bienzedi