Nkonko ya babadi

Bua tshinyi Davidi (musadidi wa lulamatu wa Yehowa) wakalekela mukajende Mikala ne lupingu lua terafime anu bu mudi 1 Samuele 19:12, 13 uleja?

Tuanji kumonayi mu tshikoso malu kampanda avua menzeke. Pakumvua mukaji wa Davidi muvua Mukalenge Shaula muelele bayende Davidi tshifufu bua kumushipa, wakangata dipangadika diakamue. Bible udi wamba ne: ‘Mikala wakapuekeshila Davidi ku disoso dia nzubu; wakanyema, wakapanduka. Mikala wakangata lupingu [luvua mua kuikala bunene bua muntu], wakaluladika pa bulalu, wakateka musamu wa miosa ya mbuji ku mutu kualu, wakalubuikila bilulu.’ Pakafika bantu bavua Shaula mutume bua kukuata Davidi, Mikala wakamba ne: “Udi usama.” Biakapesha Davidi dîba dia kunyema.​—1 Samuele 19:11-16.

Bintu bia kale bidibu bangule bidi bileja ne: bavua benza mudimu ne mpingu ya terafime ki ng’amu bua ditendelela to, kadi kabidi bua bilumbu bia ku tubadi. Mpingu ya terafime ivua anu bu mikanda ya lupangu anyi ya testama. Bidi bimueneka ne: imue misangu terafime uvua upesha muku bukenji bua kupiana bintu bia tatuende muenu uvua mufue. Ke tshidi tshiumvuija pamu’apa bua tshinyi Lakele wakangata mpingu ya terafime ya tatuende, ne bua tshinyi tatuende uvua uyikeba ne muoyo mujima. Yakobo (bayende wa Lakele) kavua mumanye tshivua muena kuende muenze to.​—Genese 31:14-34.

Pakalua bena Isalele tshisamba, Nzambi wakabapesha Mêyi Dikumi, dîyi dibidi divua dikandika bua kuenza mpingu. (Ekesode 20:4, 5) Panyima pa bidimu, muprofete Samuele wakavuluija Mukalenge Shaula mukenji au. Wakamuambila ne: ‘Kutomboka kudi bualu bubi bu butempi bua mbuku ne tshitshu tshidi bu kutendelela kua mpingu [ya terafime] ne manga a patupu.’ (1 Samuele 15:23) Mêyi a Samuele aa adi aleja ne: imue misangu, mu Isalele kabavua bangata terafime bua kupiana bintu nansha. Kadi bidi bimueneka ne: bamue bantu bavua amu ne tshilele tshia kale etshi. (Balumbuluishi 17:5, 6; 2 Bakelenge 23:24) Nanku bidi bimueneka ne: Mikala uvua ne lupingu lua terafime mu bintu biende bualu uvua dikasa mu mâyi dikasa ku mukuna mu ditendelela diende dia Yehowa. Davidi kavua mua kuikala mumanye bualu ebu to; anyi uvua mubumanye kadi kulekelaye bualu Mikala uvua muana wa Mukalenge Shaula.

Davidi udi uleja mmuenenu wende pa lulamatu lukole luvuaye nalu kudi Yehowa mu mêyi aa: ‘Bualu bua Yehowa udi munene, budiye nabu mbua kutumbishibua bikole; budiye nabu mbua kunemeshibua pa mutu pa nzambi yonso ya patupu. Bualu bua nzambi yonso ya bantu ba bende idi ya mpingu; kadi Yehowa wakafuka bia mu diulu.’​—1 Kulondolola 16:25, 26.

[Tshimfuanyi mu dibeji 29]

Dîyi dibidi dia mu Mêyi Dikumi divua dikandika bua kuenza mpingu bu mudi lua terafime ludi muaba eu

[Mêyi a dianyisha]

Biangatshila mu mukanda wa The Holy Land, Vol. II, 1859