Dimukilayi ‘dîyi dia benyi’

‘Kayena ilonda muntu muenyi nansha, neyimunyeme bualu bua kayena mimanye dîyi dia muenyi.’​—YONE 10:5, Muanda Mulenga Lelu.

1, 2. (a) Ntshinyi tshidi Mariya wenza padiye umvua Yezu umubikila mu dîna diende, ne mmêyi kayi akavua Yezu muambe adi muanda eu utuvuluija? (b) Ntshinyi tshidi tshituambuluisha bua kushala pabuipi ne Yezu?

 YEZU mumane kubika ku lufu, udi umona mukaji muimane pabuipi ne lukita luende luvua lushale munda mutupu. Mmumanye mukaji eu bimpe menemene. Mukaji eu m’Mariya muena Magadala. Kukavua kupite bidimu bu bibidi katshia Yezu wamumbusha demon ivuaye nayi. Katshia anu pinapu Mariya ukavua wenda anu pamue ne Yezu ne bapostolo bende, ubambuluisha mu malu avuabu nawu dijinga ku dituku ne ku dituku. (Luka 8:1-3) Kadi lelu Mariya udi udila, muikale ne kanyinganyinga ka bungi bualu uvua mumone Yezu mufue, ne mpindieu nansha tshitalu tshiende tshine ntshijimine! Nunku Yezu kumuebeja ne: ‘Mukaji, udi udidila tshinyi? Udi ukeba nganyi?’ Bu mudi Mariya wela meji ne: udi umuakuisha au mmuenji wa mudimu wa mu budimi abu, udi umuandamuna ne: ‘Mukalenge, biwikala mumumushe kuneku, ungambile kuwakumuladika, nemmuangate.’ Pashishe Yezu udi umuambila ne: ‘Mariya’! Diakamue Mariya udi uvuluka mushindu uvua Yezu wakula nende pa tshibidilu. Ke kutuaye tshikemu ne disanka dionso ne: “Muyishi”! Ne udi wela Yezu mu tshitupa.​—Yone 20:11-18.

² Muyuki eu udi utuvuluija bimpe bualu bukavua Yezu muambe matuku ndambu kumpala. Yezu udi udifuanyikija yeye muine ne mulami ne ufuanyikija bayidi bende ne mikoko, wamba ne: mulami udi ubikila mikoko yende mu dîna diayi, ne yoyi mmimanye dîyi diende. (Yone 10:3, 4, 14, 27, 28) Bushuwa, anu mutu mukoko umanya  muntu utu uulama, ke muvua Mariya mumanye Kristo, Mulami wende. Bidi kabidi nanku bua bayidi ba Yezu lelu’eu. (Yone 10:16) Anu mutu matshi a mukoko adi ajingulula dîyi dia muntu awambuluisha bua kushala mulamate mulami wawu, nunku dijingulula dietu dia malu a mu nyuma didi dituambuluisha bua kushala tuenda anu mu makasa a Mulami wetu Mulenga Yezu Kristo.​—Yone 13:15; 1 Yone 2:6; 5:20.

3. Ng’imue nkonko kayi idi mufuanu wa Yezu wa tshikumbi tshia mikoko ujula mu mitu yetu?

³ Kadi, bilondeshile mufuanu umue umue au, bukokeshi budi nabu mukoko bua kumanya mêyi a bantu kabuena buwambuluisha anu bua kumanya muntu udi nawu bulunda to, kadi ne bua kumanya kabidi muntu udi muukine. Muanda eu udi ne mushinga wa bungi menemene bualu tudi ne baluishi badi batuelela meji mabi. Mbanganyi abu? Mmushindu kayi utubu benza malu? Mmunyi mutudi mua kudikuba? Bua kupeta mandamuna, tumonayi bualu bukuabu budi Yezu wamba mu mufuanu wende wa tshikumbi tshia mikoko.

‘Udi kayi ubuelela ku tshiibi’

4. Bilondeshile mufuanu wa mulami wa mikoko, nnganyi udi mikoko ilonda, ne nnganyi udiyi kayiyi ilonda?

⁴ Yezu udi wamba ne: ‘Udi ubuelela ku tshiibi udi mulami wa mikoko. Mulami wa ku tshiibi udi umunzuluila tshiibi ne mikoko idi iteleja dîyi diende. Udi ubikila mikoko yende, mukoko ne mukoko, mu dîna diawu ne udi uyipatula pambelu wenda uyilombola. Yeye mumane kuyipatula yonso, udi wenda kumpala kuayi ne mikoko idi imulonda, bualu bua idi mimanye dîyi diende. Kadi kayena ilonda muntu muenyi nansha, neyimunyeme bualu bua kayena mimanye dîyi dia muenyi.’ (Yone 10:2-5, MML) Tangila ne: Yezu udi utela muaku ‘dîyi’ misangu isatu. Misangu ibidi udi wakula bua dîyi dia mulami, kadi musangu muisatu udi wakula bua ‘dîyi dia benyi.’ Mmuenyi wa mushindu kayi udi Yezu wamba muaba eu?

5. Bua tshinyi katuena tuakidila muenyi wa buena udibu batele mu Yone nshapita wa 10?

⁵ Yezu kêna wakula bua muenyi ututu tuakidila bimpe kumbelu kuetu to; ne diakidilangana mmuaku wa mu muakulu wakafundabu Bible ku ntuadijilu udi umvuija “dinanga dia benyi.” (Ebelu 13:2) Mu mufuanu wa Yezu, muenyi eu kêna bu muntu udi muye kuendelangana buenyi to. Bualu kêna ‘ubuelela ku tshiibi tshia lupangu lua mikoko, kadi udi ubandila pa tshimanu ku muaba mukuabu.’ Yeye “udi muivi ne munyengi.” (Yone 10:1, MML) Mmuntu kayi udibu batele mu Dîyi dia Nzambi wakalua muivi ne munyengi wa kumpala? N’Satana Diabolo. Mukanda wa Genese ke udi utujadikila bualu ebu.

Dîba diakumvuika dîyi dia muenyi musangu wa kumpala

6, 7. Bua tshinyi tudi mua kubikidilamu Satana ne: mmuenyi ne muivi?

⁶ Genese 3:1-5 udi umvuija mushindu uvua dîyi dia muenyi diumvuike pa buloba musangu wa kumpala. Bible udi utulondela ne: Satana wakayikila ne Eva mukaji wa kumpala mukana mua nyoka bua kumupambuisha. Bulelela, mu muyuki eu ki mbabikile Satana patoke ne: “mmuenyi” to. Kadi bienzedi biende bidi bileja ne: mu malu a bungi uvua mufuanangane ne muenyi udibu batele mu mufuanu wa Yezu udi mu Yone nshapita wa 10. Tangila amue malu adi aleja difuanangana edi.

⁷ Yezu udi wamba ne: muenyi udi uya kudi mikoko idiye ukeba kukuata mu tshikumbi, ubuelela kua tshianana. Bia muomumue, Satana wakafika kudi Eva uvuaye musue kushima kabiyi buludiludi to, kadi wakakula mukana mua nyoka. Dilua musokome mu budimu bua mushindu’eu diakaleja patoke tshidi Satana: muivi muena mashimi. Kabidi, muenyi udi ulua mu tshikumbi tshia mikoko udi ne tshipatshila tshia kuiba muena mikoko. Bulelela, muenyi mmubi mupite ne muivi, bualu tshipatshila tshiende tshikuabu ntshia ‘kushipa ne kubutula.’ (Yone 10:10) Bia muomumue, Satana uvua muivi. Pakashimaye Eva, wakiba lulamatu luvuaye nalu kudi Nzambi. Kabidi, Satana wakakebela bantu lufu. Ke bualu kayi udi mushipianganyi.

8. Mmunyi muvua Satana mukonyangaje mêyi a Yehowa ne bipatshila bivuaye nabi?

⁸ Mashimi a Satana akamueneka patoke mu mushindu wakakonyangajaye mêyi a Yehowa ne bipatshila bivuaye nabi. Wakakonka Eva ne: ‘[Bulelela] Nzambi wakamba ne: kanudi mamuma a mitshi yonso idi mu budimi anyi?’ Satana wakenza bu muntu uvua ukema, muenze anu bu uvua wamba ne: ‘Mmunyi mudi Nzambi mua kupangila meji nunku?’ Wakalua kuamba kabidi ne: ‘Nzambi udi mumanye ne: Panuadia mamuma  au, mêsu enu neabululuke.’ Tangila mêyi ende a se: “Nzambi udi mumanye.” Satana uvua anu bu uvua ujinga kuamba ne: ‘Ndi mumanye tshidi Nzambi mumanye. Ndi mumanye bipatshila biende, bidi anu bibi.’ (Genese 2:16, 17; 3:1, 5) Diakabi, Eva ne Adama kabakabenga dîyi dia muenyi eu to. Kadi bakaditeleja ne kudiambuilabu mulawu bobu bine ne ndelanganyi yabu.​—Lomo 5:12, 14.

9. Bua tshinyi tudi ne bua kutekemena bua dîyi dia bantu benyi kumvuikadi lelu?

⁹ Satana udi ukuata mudimu ne mayele a muomumue bua kushima basadidi ba Nzambi lelu. (Buakabuluibua 12:9) Yeye udi “tatu wa mashimi,” ne bonso badi bakeba pabu bua kupambuisha basadidi ba Nzambi bu mudiye wenza mbana bende. (Yone 8:44) Tumonayi mishindu kampanda idi dîyi dia benyi aba diumvuika lelu.

Mushindu udi dîyi dia benyi diumvuika lelu

10. Ng’umue mushindu kayi udi dîyi dia benyi diumvuika?

¹⁰ Ngenyi ya mafi. Mupostolo Paulo udi wamba ne: ‘Kanusesuishibu ku mayisha a bungi ne a bende’ anyi a bantu benyi. (Ebelu 13:9) Mmayisha a mushindu kayi au? Bu mudiwu mua ‘kutusesuisha,’ bidi bimueneka patoke ne: Paulo udi wakula bua mayisha adi atupangisha mua kushala bashindame mu nyuma. Mbanganyi badi bayisha mayisha menyi aa? Paulo wakambila tshisumbu tshia bakulu bena Kristo ne: ‘Bantu nebabike munkatshi muenu mene, bambila bantu malu adi kaayi malelela bua kukokabu bayidi kunyima kuabu.’ (Bienzedi 20:30) Bushuwa, anu muvuabi mu matuku a Paulo, lelu’eu bamue bantu bavua kumpala mu tshisumbu tshia bena Kristo badi mpindieu bakeba bua kupambuisha mikoko ne ‘malu adi kaayi malelela’ adibu bamba, mmumue ne: malu malelela masambakane ne mashimi ne makuabu a mashimi pa mashimi. Anu mudi mupostolo Petelo uleja, badi bamba ‘mêyi a mashimi’ anyi mêyi adi mafuanangane ne bulelela kadi kaayi menemene ne mushinga anu mutu makuta a mashimi.​—2 Petelo 2:3.

11. Mmunyi mudi mêyi adi mu 2 Petelo 2:1, 3 ela mayele a batontolodi ne tshipatshila tshiabu patoke?

¹¹ Pashishe Petelo udi wela mayele atu nawu batontolodi patoke padiye wamba ne: ‘Nebalue mu musokoko ne malu [anutapulula adi afikisha] ku dibutuka.’ (2 Petelo 2:1, 3) Anu mudi muivi wa mu mufuanu wa Yezu wa tshikumbi tshia mikoko kayi ubuelela ‘ku tshiibi tshia lupangu lua mikoko, [kadi] ubandila kukuabu,’ batontolodi pabu badi balua kutudi mu mishindu misokome. (Galatia 2:4; Yuda 4) Ntshinyi tshidibu bipatshila? Petelo udi wandamuna ne: ‘Nebenduluke nenu mushinga.’ Bushuwa, nansha batontolodi bobu bakeba bua kudibingisha mu mushindu kayi, tshipatshila tshilelela tshia bivi tshitu tshia ‘kuiba ne kushipa ne kubutula.’ (Yone 10:10) Nudimukile benyi ba mushindu’eu!

12. (a) Mmunyi mudi bantu batudi tusomba nabu mua kutufikisha ku diteleja dîyi dia benyi? (b) Mmunyi mudi mayele a Satana ne a benyi mafuanangane lelu?

¹² Malunda mabi. Dîyi dia benyi didi mua kumvuika mukana mua bantu batudi tusomba  nabu. Malunda mabi atu ateka nangananga bansonga mu njiwu. (1 Kolinto 15:33) Vuluka ne: Satana wakatuishila anu Eva mêsu, bualu ku bantu babidi ba kumpala yeye ke utshivua ne bidimu bishadile ne uvua kayi ne dimanya dia bungi. Wakamufikisha ku ditaba ne: Yehowa uvua mumupangishe budikadidi tshianana, pabi kabivua nanku to. Yehowa uvua munange bantu bavuaye mufuke ne uvua ubajingila disanka. (Yeshaya 48:17) Bia muomumue lelu, benyi badi bakeba kunusaka nuenu bansonga bua kuitaba ne: baledi benu bena Kristo badi banupangisha budikadidi tshianana. Mmunyi mudi benyi aba mua kunuenzela bibi? Nsongakaji mukuabu muena Kristo udi wamba ne: “Tshikondo kampanda balongi betu bakatekesha ditabuja dianyi ndambu. Bavua anu bangambila ne: tshitendelelu tshietu tshidi tshielela bantu mikandu idi kayiyi ya meji to.” Pabi bua kuamba bulelela, baledi benu mbanunange. Nunku padi balongi benu bakeba kunufikisha ku dibenga kueyemena baledi benu, kanuitabi bua banushime muvuabu bashime Eva to.

13. Nnjila kayi wa meji wakalonda Davidi, ne mmushindu kayi umue utudi mua kumuidikija?

¹³ Davidi mufundi wa Misambu udi wamba bua balunda babi ne: “Tshiena mushikame ne bantu badi balonda malu a mashimi, tshiena mbuelakana ne badi basokoka malu mabi abo mu lubombo.” (Musambu 26:4) Udiku kabidi mumone tshimanyinu tshia bantu benyi muaba eu anyi? Badi basokoka tshidibu anu muvua Satana musokoke tshidiye pakenzaye mudimu ne nyoka. Lelu’eu bamue bantu bena tshiendenda badi basokoka tshidibu ne tshidi majinga abu malelela mu dienza mudimu ne Internet. Miaba itu bantu bayikila anyi bafundilangana ku Internet, bantu bakulumpe benzavi badi mene mua kudimanyisha bu bansonga bua kumona mua kunulobesha mu buteyi. Nuenu bansonga, ikalayi ne budimu bua bungi bua kabanuenzedi bibi mu nyuma to.​—Musambu 119:101; Nsumuinu 22:3.

14. Mmunyi mudi bena ku tudiomba ne bikandakanda batangalaja dîyi dia benyi?

¹⁴ Dibandangana ne malu a dishima. Nansha mudi imue ngumu idibu bendeshila Bantemu ba Yehowa mikale mimpe, misangu mikuabu bantu batu bangata tudiomba ne bikandakanda bua kutangalaja dîyi dia benyi didi kadiyi dilelela to. Tshilejilu, mu ditunga kampanda, kadiomba kakuabu kakendesha lumu lua dishima lua ne: Bantemu bavua bambuluishe mbulamatadi wa Hitler mu Mvita Mibidi ya Buloba bujima. Mu dikuabu ditunga, bakendesha lumu babanda Bantemu ne: bavua banyanga bitanda bia nzambi bia bitendelelu bikuabu. Mu matunga a bungi, bena ku tudiomba ne bikandakanda bakadi babande Bantemu mudibu babenga kuondapisha bana babu balela ne mudibu balengulula mpekatu mipite bubi idibu benza kudi bena kuitabuja nabu. (Matayo 10:22) Nansha nanku, bantu badi basue malu malelela badi batumanye bimpe menemene mbajadike ne: malu adibu batubanda nawu aa nga dishima.

15. Bua tshinyi ki mbia meji bua kuitaba bualu buonso budibu bamba ku tudiomba anyi mu bikandakanda?

 ¹⁵ Ntshinyi tshitudi ne bua kuenza bikalabu batubanda ne malu adibu batangalaje kudi bantu benyi ba nunku? Tudi ne bua kutumikila mubelu udi mu Nsumuinu 14:15 wa se: ‘Mutshimbakanyi udi witabuja dîyi dionso, kadi muena budimu udi utangila kudiye uya.’ Kuitaba bualu buonso budibu bamba ku tudiomba anyi mu bikandakanda bu bulelela nkubula meji. Nansha mutudi katuyi tuelesha ngumu mikuabu yonso ya tshianana mpata, tudi bajingulule ne: ‘Ba pa buloba bonso badi balala mu [bukokeshi bua mubi].’​—1 Yone 5:19.

‘Nutete mêyi onso mamba ku nyuma’

16. (a) Mmushindu kayi udi tshikadilu tshia mikoko miena dîna tshileja ne: mêyi a Yezu adi mu Yone 10:4 mmalelela? (b) Ntshinyi tshidi Bible utukankamija bua kuenza?

¹⁶ Kadi mmunyi mutudi mua kujadika bikala muntu muena dîyi ditudi tumvua muikale mulunda anyi muluishi? Bushuwa, Yezu udi wamba ne: mikoko idi ilonda mulami ‘bualu bua idi mimanye dîyi diende.’ (Yone 10:4) Ki ntshimuenekelu tshia ku mêsu tshia mulami tshidi tshisaka mikoko bua kumulonda to, kadi ndîyi diende. Mukanda mukuabu wa malu a matunga a pa kale udi ulonda ne: muntu mukuabu uvua muye dimue dîba kuendakana nseke ayi wakamba mutu mikoko imanyina mulami wayi ku bilamba bidiye muvuale, kayiyi imumanyina ku dîyi diende. Kadi mulami mukuabu wa mikoko kumuandamunaye ne: dîyi ke didiyi mimanye. Bua kujadika bualu ebu, wakashintakaja bilamba ne muenyi au. Muenyi mumane kuvuala bilamba bia mulami wa mikoko, wakabanga kubikila mikoko, kadi kayakamulonda nansha. Kayivua mimanye dîyi diende to. Kadi pakayibikila mulami, nansha muvuaye muvuale bilamba bia tshianana, mikoko yakalua diakamue. Nunku, muntu kampanda udi mua kumueneka mufuanangane ne mulami, kadi bua mikoko yoyi, abi kabiena biyijadikila ne: udi mulami tshia bushuwa nansha. Mikoko yoyi idi iteta dîyi dia muntu udi uyibikila, idifuanyikija ne dîyi dia muntu utu uyilama. Dîyi dia Nzambi didi dituambila bua kuenza bualu bua muomumue ne: ‘Nutete [mêyi mamba ku] nyuma ne: adi a [kudi] Nzambi anyi?’ (1 Yone 4:1; 2 Timote 1:13) Mmunyi mutuafika ku dienza bualu ebu?

17. (a) Mmunyi mutudi tufika ku dimanya dîyi dia Yehowa bimpe? (b) Dimanya dia Yehowa didi dituambuluisha bua kuenza tshinyi?

¹⁷ Mbiumvuike ne: tuetu bamanye dîyi dia Yehowa anyi mukenji wende bimpe menemene, tudi mua kuteta dîyi dia benyi bimpe menemene. Bible udi utuleja mushindu utudi mua kufika ku dimanya edi. Udi utuambila ne: ‘Matshi ebe neumvue dîyi difume kunyima kuebe, diamba ne: Njila nyeye eu, endelamu.’ (Yeshaya 30:21) ‘Dîyi’ didi difumina ku nyima kuetu adi ndia mu Dîyi dia Nzambi. Dîba dionso ditudi tubala Dîyi dia Nzambi tudi anu bu badi bumvua dîyi dia Mulami wetu Munene Yehowa. (Musambu 23:1) Nunku tuetu tutamba kulonga Bible, netufike ku dimanya dîyi dia Nzambi bimpe menemene. Dimanya dia dîyi edi bimpe nunku nedilue kutuambuluisha bua kuteta dîyi dia benyi dîba dionso.​—Galatia 1:8.

18. (a) Ntshinyi tshidi kumanya kua dîyi dia Yehowa kumvuija? (b) Bilondeshile Matayo 17:5, bua tshinyi tudi ne bua kutumikila dîyi dia Yezu?

¹⁸ Kumanya kua dîyi dia Yehowa kudi kumvuija kabidi tshinyi? Pa kumbusha kumvua kua dîyi edi, kudi kumvuija kabidi kuditumikila. Tangila kabidi Yeshaya 30:21. Dîyi dia Nzambi didi diamba ne: ‘Njila nyeye eu.’ Bushuwa, tudi tumvua malongesha a Yehowa patudi tulonga Bible. Pashishe udi utuambila ne: “Endelamu.” Yehowa mmusue bua tuetu kutumikila malu atudi tumvua. Ke bua tshinyi patudi tutumikila bitudi tulonga, tudi tuleja ne: katuena anu bateleje dîyi dia Yehowa patupu, kadi tudi badiumvue kabidi. (Dutelonome 28:1) Kutumikila dîyi dia Yehowa kudi kabidi kumvuija kutumikila  dîyi dia Yezu, bualu Yehowa nkayende mmutuambile bua kumutumikila. (Matayo 17:5) Ntshinyi tshidi Mulami Mulenga Yezu utuambila bua kuenza? Udi utulongesha bua kuvuija bantu bayidi ne bua kueyemena “mupika wa lulamatu ne wa budimu.” (Matayo 24:45, NW; 28:18-20) Kutumikila dîyi diende kudi kupetesha muntu muoyo wa tshiendelele.​—Bienzedi 3:23.

“Neyimunyeme”

19. Ntshinyi tshitudi ne bua kuenza patudi tumvua dîyi dia benyi?

¹⁹ Ntshinyi tshitudi ne bua kuenza patudi tumvua dîyi dia benyi? Tudi ne bua kuenza tshitu mikoko yenza. Yezu udi wamba ne: “Kayena ilonda muntu muenyi nansha [kakese], neyimunyeme.” (Yone 10:5, MML) Bualu butudi tuenza budi ne bitupa bibidi. Tshia kumpala: ‘katuena tulonda’ muenyi nansha kakese. Bushuwa, tudi tubenga muenyi tuosha ne munu muiku. Mu tshiena-Gelika tshiakafundabu mu Bible, miaku eyi “nansha kakese” idi yumvuija mushindu mutambe bukole wa kubenga bualu mu muakulu au. (Matayo 24:35; Ebelu 13:5) Tshibidi: ‘netumunyeme’ anyi kumukoma nyima. Abu ke bualu bumuepele buakane butudi ne bua kuenza ne bantu badi ne malongesha adi kaayi apetangana ne dîyi dia Mulami Mulenga.

20. Ntshinyi tshituikala mua kuenza patudi tutuilangana ne (a) batontolodi bena mashimi, (b) balunda babi, (c) ngumu ya dishima ya ku tudiomba anyi mu bikandakanda?

²⁰ Nunku patudi tupetangana ne bantu badi batangalaja ngenyi ya batontolodi, mbimpe tuenze tshidi Dîyi dia Nzambi dituambila ne: ‘Dimukayi bua badi bavuija matapuluka ne malenduisha munkatshi muenu, adi kaayi bu diyisha dinuakayila; nubakome nyima. (Lomo 16:17; Tito 3:10) Bia muomumue, bansonga bena Kristo badi mu njiwu ya malunda mabi badi ne bua kutumikila mubelu wa Paulo uvuaye mupeshe Timote ne: “Unyeme nkuka ya bansongalume.” Ne padibu batubanda ne malu a dishima ku tudiomba anyi mu bikandakanda, tuvuluke mubelu mukuabu uvua Paulo mupeshe Timote ne: ‘[Bantu badi bateleja dîyi dia benyi] nebasesuke ku nsumuinu [ya dishima]. Kadi wikale ne meji mapole mu malu onso.’ (2 Timote 2:22; 4:3-5) Nansha dîyi dia benyi diodi diumvuika dilenga mushindu kayi, tuetu tudi tunyema tshintu tshionso tshidi mua kunyanga ditabuja dietu.​—Musambu 26:5; Nsumuinu 7:5, 21; Buakabuluibua 18:2, 4.

21. Ndifutu kayi didi dindile aba badi babenga dîyi dia benyi?

²¹ Padi bena Kristo bela manyi a nyuma bapidia dîyi dia benyi, badi batumikila mêyi a Mulami Mulenga adi mu Luka 12:32. Mu mvese eu Yezu udi ubambila ne: ‘Nuenu tshisumbu tshikese tshia mikoko, kanutshinyi; bua Tatu wenu udi musue kunupa bukalenge.’ Bia muomumue, “mikoko mikuabo” mmitekemene ne muoyo mujima bua kumvua mêyi a Yezu a se: ‘Luayi, [nuenu badi basankishibue] kudi Tatu wanyi, nupiane bukalenge buakunulongoluelabu ku tshibangidilu tshia buloba.’ (Yone 10:16; Matayo 25:34) Edi ndifutu bulenga nunku didi dituindile tuetu babenge ‘dîyi dia benyi’!

Udi muvuluke anyi?

• Mmunyi mudi Satana mukumbanyine diumvuija didi Yezu mufile bua muenyi wa mu mufuanu wende wa lupangu lua mikoko?

• Mmunyi mudi dîyi dia benyi diumvuika lelu?

• Mmunyi mutudi mua kumanya dîyi dia benyi?

• Ntshinyi tshitudi ne bua kuenza patudi tumvua dîyi dia benyi?

[Nkonko ya dilonga]

[Tshimfuanyi mu dibeji 15]

Mariya wakamanya Yezu

[Tshimfuanyi mu dibeji 16]

Muenyi kêna ulua buludiludi kudi mikoko

[Tshimfuanyi mu dibeji 18]

Ntshinyi tshitudi tuenza ne dîyi dia benyi?