Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku anji tangilabi ni udi mua kuandamuna nkonko idi ilonda eyi:

• Ntshinyi tshidi muena Kristo ne bua kuenza padiye mutshioke mu lungenyi ne mu nyuma?

Tudi ne bua kukeba bua kumanya tshiledi tshia dipungi dietu. Nebiambuluishe bua kukonkonona bibidilu bietu ne bintu bitudi nabi, tulekela bijitujitu. Tudi mua kudifundila bipatshila bilelela bilondeshile nsombelu wetu. Kutabalela bukole buetu bua mu nyuma kudi ne mushinga ne kudi kabidi ne bua kutusaka bua kusambila ne kuelangana meji pa tshibidilu.​—15/8, dibeji 23-26.

• Bua tshinyi Bantemu ba Yehowa batu bangata nomba wa 144 000 anu mudiye amu?

Kunyima kua bamane kuambila Yone bua bantu 144 000, wakamona kabidi ‘musumba munene wa bantu, bungi budi muntu kayi mua kubala.’ (Buakabuluibua 7:4, 9, MMM) Bikala nomba wa 144 000 uvua wa mu tshimfuanyi, nunku nomba mulelela kavua mua kuikala ne mushinga to. Yezu wakabikila bantu bikala ne bua kukokesha nende ne: ‘Kasumbu kakese.’ (Luka 12:32, MMM)​—1/9, dibeji 30.

• Bua tshinyi muena Isalele uvua mua kupanyisha munyinyi wa nyama uvua kayi mukosa muminu kudi muenyi?

Muenyi anyi muntu uvua kayi ulonda mikenji ya bena Isalele kavua muinshi mua Mikenji to. Nunku bavua banyishile muena Isalele bua kumupesha anyi kumupanyisha nyama ya mushindu au. (Dutelonome 14:21) Kadi muntu uvua ulonda mikenji ya bena Isalele uvua ne bua kuyitumikila ne kavua mua kudia munyinyi wa nyama uvua kayi mukosa muminu to. (Lewitiki 17:10)​—15/9, dibeji 26.

• Didikija bintu bifuka ntshinyi, ne bua tshinyi didi ne mushinga kudi bena Kristo?

Ntshitupa tshia malu a siyanse tshidi tshikeba kuidikija bintu bidi mu bufuki. Tshilejilu, bana ba Wright bakenza ndeke kunyima kua bobu bamane kulonga mutu nyunyu minene ibuka. Nunku, didikija bintu bidi ne muoyo didi mua kusaka muena Kristo bua kutumbisha Mufuki.​—1/10, dibeji 9.

• Nganyi uvuabu batele mu 2 Kolinto 12:2-4 bu bavua baye nende mu mparadizu?

Mvese eu udi ulua diakamue kunyima kua mvese idi ne mêyi adi Paulo ubingisha nawu bupostolo buende. Bu mudi Bible kayi wakula bua muntu mukuabu uvua mumone bualu bua mushindu au ne bu mudi Paulo ke udi utulondela bualu ebu, bumue yeye ke uvua mupete tshikena-kumona etshi.​—15/10, dibeji 8.

• Ngimue ngikadilu kayi mikuabu ya Yezu idi imuvuija mukumbane bua kuikala Mfumu musungula kudi Nzambi?

Yezu wakashala ne lulamatu lukole, uvua kabidi ne ngikadilu muakane wa bululame. Wakadilambula ne muoyo mujima kudi Nzambi. Yezu uvua uditatshisha bikole bua bantu ne uvua musue kuenza mudimu.​—1/11, dibeji 6-7.

• Bademon nebikale penyi mukantshi mua Bidimu Tshinunu?

Bidi bikumbana bua tuetu kuamba ne: munkatshi mua Bukokeshi bua Kristo bua Bidimu Tshinunu, nebabele mu tshina tshidi katshiyi ne nshikidilu pamue ne Satana. (Buakabuluibua 20:1-3) Genese 3:15 wakadianjila kumanyisha diboza dia nyoka ku mutu, didi ditangila kabidi diedibua diende mu tshina munkatshi mua Bidimu Tshinunu. Banjelu bende babi anyi bademon badi munkatshi mua dimiinu diende. Bu mukadi banjelu aba baleje buôwa bua tshina etshi tshidi katshiyi ne nshikidilu, bidi bileja ne: mbamanye bimpe buloko ebu bukadibu pa kubuela. (Luka 8:31)​—15/11, dibeji 30-31.

• Bua tshinyi bidi bikengela kuikala mudimuke mu dinua dia maluvu, nansha bituikala tuepuka dinua dikuatshika patoke?

Bamue bantu kabatu batamba kumueneka bakuatshike nansha bobu banue maluvu a bungi. Kadi, muntu kampanda udi mua kupeta tshilele tshia kunua maluvu ku kakese ku kakese ne kulua eu udi ‘musombele anu maluvu.’ (Tito 2:3) Yezu wakadimuija bantu bua ‘mitshima [yabu] kayinemi ne mudiu ne dibuluka dia maluvu.’ (Luka 21:34, 35) Kabiena bikengela bua dinua maluvu difikishe muntu ku dikuatshika ne ku dibungila, ulua mufube ku mubidi ne mu nyuma to.​—1/12, dibeji 19-21.