Dîba dia kudia ki ndîba anu dia kudia patupu to!

MUNTU yonso utu musue biakudia bisheme. Wewe udia biakudia muikale wenda wela muyuki muimpe ne bantu baudi munange, tshikondo etshi tshidi tshilua tshia disanka dia bungi, katshiyi anu tshia kujikija nzala yebe to. Mêku a bungi atu ne tshilele tshia kudia biakudia pamue musangu nansha umue ku dituku. Tshikondo tshia kudia tshitu tshipetesha bena mu dîku mushindu wa kuyukila pa malu a dituku adi anyi bua bidibu basue kuenza. Baledi batu bateleja malu atu bana babu bamba batu bajingulula tshidi ngelelu wa meji ne majinga bia bana babu bakese. Mu bungi bua matuku, disomba pamue mu disanka ne badilekelele dîba dia kudia ditu dibueja ditalala, dieyemenangana ne dinanga munda mua dîku. Dinanga edi ditu diambuluisha bua dîku dikale dishindame.

Lelu eu, bu mudi bena mu dîku ba bungi bikale ne midimu ne bia kuenza misangu yonso, bitu bibakolela bua kudia pamue. Mu amue matunga mutu bilele bitu bibenga bua bena mu dîku kudia pamue anyi bua kuakula dîba dia kudia. Mu mêku makuabu batu ne tshilele tshia kukangula TV dîba dia kudia, bibapangisha mushindu wa kuyukila bimpe.

Kadi baledi bena Kristo batu bakeba misangu yonso mpunga ya kukolesha ba mu nzubu yabu. (Nsumuinu 24:27) Kale, bavua bambile baledi ne: Tshimue tshia ku bikondo bimpe bia kumanyisha bana babu dîyi dia Nzambi tshivua tshia ‘pavuabu [basomba] mu nzubu muabu.’ (Dutelonome 6:7) Kusomba pamue pa tshibidilu bua kudia kudi kupesha baledi mushindu mutambe buimpe wa kubueja dinanga dikole dia Yehowa ne dia mêyi ende makane munda mua bana babu. Wewe muikale ukeba nsombelu wa disanka ne mudilekelele, udi mua kuvuija dîba dia kudia dia disanka ne didi dikolesha dîku diebe kabidi. Eyowa, enza bua dîba dia kudia kadikadi dîba dia kudia patupu to!