Muoyo udi ne mushinga mukole anyi mukese?

“Bu mudi muntu mufuka ku tshimfuanyi tshia Nzambi, dimushipa ndinyanga tshintu tshia mushinga mupite bionso ne tshidi tshitambe bintu bionso bia pa buloba bujima bunsantu.”​—The Plain Man’s Guide to Ethics, mufunda kudi William Barclay.

UTUKU wangata muoyo bu “tshintu tshia mushinga mupite bionso” anyi? Patudi tutangila nsombelu wa bantu, bidi bimueneka ne: ba bungi kabatu bitaba mêyi a mufundi eu to. Badi bashipa bantu bavule kakuyi luse nansha lukese kudi bena tshikisu bua bipatshila biabu kabayi batangila disanka dia muntu nabu to.​—Muambi 8:9.

Kabayi ne mushinga ne bafundila lufu

Tuangate tshilejilu tshia Mvita ya Kumpala ya Buloba bujima. Mufundi wa malu a kale kampanda (A.J.P. Taylor) udi wamba ne: misangu ne misangu mu mvita eyi mibi menemene, “bakashipa bantu kakuyi bualu.” Bua dikeba dia lumu ne butumbi, bamfumu bavua bangata basalayi bu bantu bavua kabayi ne mushinga nansha mukese ne bavua bafundila anu bua kufua mu mvita. Mu mvita ya difuilakana tshimenga tshia Verdun mu ditunga dia France, bantu bapite pa binunu 500 bakafua. Mufundi eu udi wamba kabidi ne: “Kakuvua tshivuabu bapeta anyi bajimija bua [mayele kampanda a mvita to], anu bua kushipa bantu ne kupeta butumbi.”​—The First World War.

Dipetula mushinga udi nawu muoyo nunku ditshidi anu ditangalake mu buloba bujima. Mushikuluji mukuabu (Kevin Bales) udi wamba ne: matuku aa, “divulangana dikole dia bantu [ndienzeje] bua bantu miliyo mivule badi benza midimu mu buloba bujima bikale bapele ne kabayi ne dîyi.” Badi baluangana matuku abu onso a muoyo bua kushala ne muoyo panu padi malu a bungenda-mushinga akengesha bantu ne padi “muoyo mulue tshintu tshia tshianana.” Bales udi wamba ne: badi babenzeja midimu  mikole, badi babangata anu bu bapika, bu “biamu biabu bia mudimu bidi bibapetesha makuta.”​—Disposable People.

‘Kuipata kua lupepele’

Kudi malu makuabu a bungi adi asaka bantu miliyo mivule ku didimona kabayi ne mushinga, ku diteketa mu mikolo, bamona ne: nansha bikale ne muoyo anyi bafue kakuena muntu nansha umue udi uditatshisha bua bualu buabu. Kudi kabidi mvita ne kansungasunga, dinyanguka dia bintu bua minanga, nzala, masama ne madilu ne malu makuabu bungi kabuyi kubala adi akengesha bantu bonso, bionso ebi bisaka bantu ku didikonka bikala muoyo ne mushinga.​—Muambi 1:8, 14.

Bushuwa, ki mbantu bonso badi bakenga bikole menemene anyi badi ne tunyinganyinga tukole to. Kadi nansha aba badi kabayi bakenga bikole menemene badi bitaba misangu ya bungi mêyi a Mukalenge Solomo wa mu Isalele wa kale, wakebeja ne: ‘Muntu udi upeta tshinyi ku midimu yende yonso yakenzaye ne yakanyingalajaye nayi mutshima wende muinshi mua dîba?’ Patu bantu ba bungi bela meji, batu bafika ku dimona ne: malu a bungi avuabu benze avua ‘kuipata kua lupepele.’​—Muambi 2:22, 26.

Padi ba bungi bavuluka malu akadibu benze, badi bebeja ne: “Ke muoyo eu anyi?” Eyowa, mbantu bungi munyi batu padibu bafika ku ndekelu kua matuku abu a muoyo badiumvua bulelela ne: ‘mbalale panu baboboke ne mbapete diakalenga’ anu bu muakadiumvua Abalahama? (Genese 25:8, MMM) Ba bungi batu bamona malu onso mikale anu patupu. Kadi muoyo kawena ne bua kuikala tshintu tshia tshianana to. Nzambi udi wangata muoyo wa muntu yonso ne mushinga ne mmunange bua yonso wa kutudi ikale ne nsombelu muimpe wa disanka. Mmunyi muenzekabi nanku? Tangila tshidi tshiena-bualu tshidi tshilonda tshiamba pa bualu ebu.