“Nuikale batabale”

MU BIKONDO bia kale, kuvua balami ku biibi bia bimenga ne bia ntempelo, imue miaba bavua ku biibi bia nzubu ya bantu. Balami bavua batabalela bua biibi kuikalabi bikanga butuku ne bavua benza kabidi mudimu wa bunsentedi. Kauvua mudimu wa bilele to, bualu bukubi bua tshimenga tshijima buvua mu tshianza tshiabu bobu bavua ne bua kuela lubila lua kudimuija nalu bantu ku njiwu yonso ivua ne bua kulua.

Yezu Kristo uvua mumanye bimpe mudimu wa balami ba ku biibi. Dimue dituku wakafuanyikija bayidi bende ne balami ba ku biibi ne kubakankamijaye bua kuikalabu batabale bua nshikidilu wa tshikondo tshia bena Yuda. Wakamba ne: ‘Nuikale badimuke, nutabale, bualu bua kanuena bamanye diakumbana tshikondo atshi. Nebikale bu mudi muntu uya ku luendu, ushiya nzubu wende, wambila mulami wa ku tshiibi bua ashale mutabale. Nuikale batabale, bualu kanuena bamanye dîba diafika muena nzubu.’​—Mâko 13:33-35, MMM.

Bia muomumue, mu bule bua bidimu bipite pa 125 mpindieu, tshibejibeji etshi tshia Tshibumba tshia Nsentedi ntshimanyishe bantu dikankamija dia Yezu dia se: “Nuikale batabale.” Mmushindu kayi? Anu bu mudibi bileja mu dibeji 2 dia tshibejibeji etshi, “Tshidi tshijoja malu adi enzeka pa buloba adi akumbaja milayi ya mu Bible. Tshidi tshikolesha bantu bonso ku muoyo ne lumu luimpe lua se: mu tshitupa tshîpi emu, Bukalenge bua Nzambi nebubutule aba badi bakengesha bantu nabu ne pashishe nebukudimune buloba mparadizu.” Bu mudibu bapatula Tshibumba tshia Nsentedi bungi bupite pa 26 000 000 mu miakulu 150, tshiotshi ke tshibejibeji tshia malu a Nzambi tshidibu batamba kuabanya mu buloba bujima. Ku diambuluisha diatshi, amu bu balami ba ku biibi ba kale, Bantemu ba Yehowa badi bambila bantu ba miaba yonso bua ‘kushala batabale’ mu nyuma bualu Mfumu Yezu Kristo ukadi pa kupingana bua kunyoka bena tshikondo etshi.​—Mâko 13:26, 37.