Bible wa ku Berleburg

TSHITENDELELU tshia piétisme tshiakapatukila ku Ekeleziya wa bena Luther ba mu ditunga dia Allemagne mu bidimu bia 1600 ne bia 1700. Bavua baseka ne bakengesha bamue bena mu tshitendelelu etshi bua ditabuja diabu. Bamanyi ba mukanda ba bungi ba mu tshitendelelu etshi bakanyemena ku musoko wa Berleburg uvua mutantshi wa kilometre mitue ku 150 ku Nord kua tshimenga tshia Frankfurt am Main. Casimir von Wittgenstein Berleburg, Munene wa mu musoko amu uvua wanyisha malu a ntendelelu bikole wakabakidila. Disombela dia bambi aba ne bamanyi ba mukanda mu Berleburg diakenzeja bua bakudimune Bible mupiamupia udibu babikila lelu ne: Bible wa ku Berleburg. Mmunyi muakafikabu ku dimupatula?

Umue wa ku bantu bavua bamuangale abu uvua Johann Haug. Wakumbuka mu tshimenga tshia Strasbourg bualu bashikuluji ba malu a Nzambi ba mu musoko au kabavua bamupeshe budikadidi bua kulejaye ngenyi yende to. Muntu eu uvua mulonge bikole ne mupiluke mu malu a miakulu. Wakambila bena mukanda nende ba mu Berleburg dijinga dikole divuaye nadi “dia kupatula Bible mujima muimpe tshishiki, kulongolola bilema bivua mu Bible wa Luther ne kukudimuna miaku mu mushindu mujalame bilondeshile diumvuija menemene dia Dîyi dia Nzambi ne lungenyi ludimu.” (Die Geschichte der Berlenburger Bibel [Muakapatuka Bible wa ku Berleburg]). Tshipatshila tshivua tshia kupatula Bible muikale ne mumvuija ne mêyi avua afila butoke, ne uvua muntu yonso mua kumvua. Bashikuluji ba mu matunga makuabu a ku Mputu bakakuatshisha Haug ne wakenza mudimu eu bidimu 20. Bakatuadija kupatula Bible wa ku Berleburg mu 1726. Bua mumvuija avuamu bungi tshianana, bakamupatula mu bibungu muanda mukulu.

Kakuyi mpata, mu Bible wa ku Berleburg mudi amue malu mimpe. Tshilejilu, mu Ekesode 6:2, 3 mbafunde ne: “Kabidi Nzambi wakayikila ne Mose kumuambila ne: Ndi MUKALENGE! Ngakamuenekela Abalahama/​Isaka ne Yakoba/​bu Nzambi mukumbane mu bionso: kadi kabavua bammanye mu dîna dianyi dia YEHOWA to.” Diumvuija didipu didi diamba ne: “Dîna YEHOWA . . . , dîna dia pa buadi/​anyi/​dîna dimanyisha.” Dîna dia Nzambi dia Yehowa didiye nadi anu yeye nkayende didi disanganyibua mu mumvuija mafila pa Ekesode 3:15 ne Ekesode 34:6.

Nunku Bible wa ku Berleburg wakalua umue wa ku Bible mivule ya mu tshiena-Allemagne idi ne dîna dia Yehowa mu mvese, mu mumvuija adi kuinshi kua mabeji anyi mu mêyi makuabu adimu adi afila butoke. Umue wa ku Bible mikuabu ya lelu idi yambika dîna dia Nzambi buneme m’Bible wa Les Saintes Écritures​—Traduction du monde nouveau, mupatula kudi Bantemu ba Yehowa.