Malu malonda kudi bamanyishi ba Bukalenge

Badi bakeba bantu badi bakumbane mu miaba ya kule ya mu Australie

IMUE miaba ya kule ya mu tshitupa tshialabale tshia munda mua ditunga dia Australie ivua mishale kabayi bayishamu kudi Bantemu ba Yehowa bidimu 12. Ke bualu kayi Bantemu ba Yehowa ba mu tshimenga tshikulu tshia teritware wa ku nord tshia Darwin bakalongolola mudimu munene wa diyisha wa matuku tshitema bua kukeba bantu bavua bakumbane bua kuteleja lumu luimpe.​—Matayo 10:11.

Bakatuadija kudilongolola bimpe ngondo 12 kumpala, kuenzabu ne tuarte tua miaba idi mu tshipapu tshia kilometre mipite pa 800 000 mu bule ne mu butshiama, tshitupa tshinene kupita ditunga dia Nouvelle-Zélande misangu isatu. Bua kujingulula bualabale bua tshipapu etshi tshia kule, elabi meji ne: njila wa bule buakanyine mu tshilaminu tshia ngombe udi umbuka ku nzubu bua kufika ku njila munene udi bule bua kilometre mipite pa 30! Kabidi, bimue bilaminu bia ngombe bidi ntanta wa kilometre 300 anyi mipite apu kumbuka ku tshimue too ne ku tshikuabu.

Bantemu bena budisuile bungi busanga bua bantu 145 bakenza mudimu eu. Bamue bakafumina mutantshi mule bu mudi mu tshidila tshia Tasmanie. Banga bakalua mu mashinyi muule tente ne bintu bia luendu, biamu bia mashinyi ne kasolonyi. Bakuabu bavua bele bintu biabu mu matempu makoka kudi mashinyi. Kabidi, bavua bafutshile bise ibidi ya nkuasa 22 bua kuambula aba bavua kabayi ne mashinyi makumbanyine njila au. Aba bakenza luendu elu mu bise bakatamba kuyisha bobu anu bantu ba mu bimenga bikese bia mu tshitupa atshi.

Kumpala kua kuasa luendu, bana betu bakalongolola miyuki ne manaya a bilejilu bua kuleja mushindu wa kumanyisha lumu luimpe mu tshipapu etshi tshivua katshiyi tshia tshibidilu. Tshilejilu, bua kuyisha bena Kalaba bimpe bitu pa tshibidilu bikengela kulonda ngenzelu kampanda ne kuikala bamanye bilele biabu. Bakakula kabidi bua bintu bia muaba au bu mudi nyama, nyunyi ne mâyi bua kumona mua kubikuba.

Bamanyishi bakamona malu mimpe a dikema a bungi. Tshilejilu, mu tshimue tshitupa tshia bena Kalaba, bana betu bakalongolola bua kuenza muyuki wa patoke wa malu a mu Bible. Munga mamu  uvuabu banemeka bikole tshitupa atshi wakaya yeye nkayende bua kumanyisha bantu bua muyuki eu. Kunyima, bakashila bantu bavua bateleje muyuki au mikanda 5 ne broshire 41. Mu tshitupa tshikuabu bakayikila ne munga muena Kalaba. Uvua mene ne wende Bible (Roi Jacques), kadi ukavua wa kale ne musunsuke. Pakamuebejabu ni uvua mumanye dîna dia Nzambi, wakitaba ne: eyowa, ne pashishe kupatulaye Tshibumba tshia Nsentedi tshia kale mu nkotshi uvuaye muvuale. Wakabala mu tshibejibeji atshi muvuabu batele mêyi a mu Mâko 12:30, adi amba ne: “Sua [Yehowa] Nzambi webe ne mutshima webe wonso.” Kuambaye ne: “Ntu musue mvese eu bikole.” Kunyima kua bamane kuyikila nende malu a bungi a mu Bible, wakitaba bua kuangata Bible mupiamupia ne mikanda mikuabu ya dimulonga nayi.

Pabuipi ne diboko dia mâyi dia Carpentarie, mfumu wa tshilaminu tshia ngombe tshia tshipapu tshia hektare 400 000 ya tshilaminu tshia ngombe wakaleja dijinga ndambu dia kuteleja mukenji wa Bukalenge. Pakamulejabu mukanda wa Miyuki ya mu Mukanda wa Nzambi ne wa Dimanya didi difikisha ku muoyo wa kashidi, * wakabebeja ni bavua ne mukanda nansha umue wa mu muakulu wa créole. Dilomba edi kadivua dia tshibidilu to, bualu nansha mutu bena Kalaba ba bungi bakula muakulu wa créole, anu bakese ke batu mua kuubala. Bambi ba lumu luimpe aba bakalua kumanya pashishe ne: bena mudimu bonso 50 ba ku tshilaminu tshia ngombe atshi bavua bamanye kubala créole. Mfumu au wakasanka pakamupeshabu mikanda ya mu muakulu wa créole, ne wakabapesha nomba wa telefone wende bua bobu kuyikila nende pashishe.

Mu matuku tshitema a mudimu munene eu wa diyisha, bana betu bakashila bantu Bible 120, mikanda 770, bibejibeji 705 ne broshire 1 965. Bakapingulukila kabidi bantu misangu 720, ne bakatuadija malonga a Bible 215.

Bushuwa, ndekelu wa bionso nzala ya mu nyuma ya bantu ba bungi badi bakumbane bua kuteleja lumu luimpe badi batangalake mu tshitupa etshi tshialabale yakajika.​—Matayo 5:6.

[Mêyi adi kuinshi]

[Karte mu dibeji 30]

(Bua kumona malu bimpe, tangila mu mukanda)

AUSTRALIE

TERITWARE WA KU NORD

Darwin

Diboko dia mâyi dia Carpentarie

Sydney

TASMANIE