Badi bakumbaja dijinga dia bena mu Macédoine

“LUA BIEBE mu Makedonia, utukuatshishe.” (Bienzedi 16:9) Mêyi aa avua muntu mukuabu muambile mupostolo Paulo mu tshikena-kumona avua aleja dijinga divuaku dia kuamba lumu luimpe lua Bukalenge bua Nzambi mu teritware mupiamupia, mu bimenga bidi mpindieu mu ditunga dia Grèce.

Mu ditunga dia Macédoine lelu’eu, Ntemu wa Yehowa 1 udi ne bua kuyisha bantu 1 840. Nunku bantu bavule kabatu banji kumvua babambila bua Yehowa Nzambi to. Eyowa, kudi dijinga dikole bua bena mu ditunga edi kumvua mukenji wa ditalala.​—Matayo 24:14.

Kadi Nzambi wakabapengela njila wa dijinga edi kukumbanadi. Dimue edi mu ngondo wa dikumi ne umue wa 2003, bana betu ba ku biro bia dikudimuna mikanda bia Bantemu ba Yehowa ba mu Macédoine mu tshimenga tshia Skopje bakumvua bababikila ku nshinga dîba divuabu kabayi belele meji to. Bavua bababikile abu mba muaba udi Tshikongu tshia dieleshangana diboko dia bukua matunga mu Macédoine, balomba Bantemu bua kuya kuasa kabu katanda kavuabu mua kumvuijila malongesha abu mu tshibilu kampanda tshia matuku asatu tshivua ne bua kutuadija dia 20 ngondo wa dikumi ne umue. Tshivua bushuwa mpunga munene uvua mumueke bua kupetangana ne binunu bia bantu bavua kabayi banji kumvua lumu luimpe lua Bukalenge.

Bena budisuile bakenza mudimu mukole bua kulongolola mikanda mishilashilangane ya Bantemu ba Yehowa ya mu muakulu wa mu Macédoine ne muaba wa kuyadijila bantu bua kuyimonabu. Bakadija mikanda ya bungi bua bantu bavua babandila kumonabu mua kusungula ivuabu basue ivua mua kubasankisha. Biakambuluisha bantu ba bungi bua kupeta mâyi a nyuma adi afila bukole kabayi batula dikuta.​—Buakabuluibua 22:17.

Bantu bavua bakeba nangananga mikanda idi ne malu avua atangila nsombelu wabu, bu mudi Les jeunes s’interrogent​—Réponses pratiques ne Nsapi wa disanka mu dîku. * Bantu 98 bakafila adrese yabu bakeba bua Bantemu ba Yehowa kuikala baya kubatangila. Bantu bavule bakaleja mudi mudimu muimpe wa Bantemu ba Yehowa ubasankisha ne mudi mikanda yabu mimpe.

Muntu mukuabu wakalua ku katanda ka Bantemu aku ne muanende wa balume ku tshianza. Wakebeja ni kuvua mikanda  ya bana. Bantemu kumulejabu mukanda wa Miyuki ya mu Mukanda wa Nzambi. * Yeye kuubulula wenda upitshisha mabeji, kuebejaye mushinga wawu ne musangelu wonso. Pakamuambilabu ne: mudimu wa dilongeshangana wa Bantemu ba Yehowa mmukuatshisha ne mapa a budisuile, wakasanka kabidi bikole. (Matayo 10:8) Wakauleja muanende umuambila ne: “Mmukanda muimpe be! Nengikale nkubadilamu muyuki umuepele dituku dionso.”

Mulongeshi mukuabu wa nkindi wakasemena pende lua pa katanda aku. Uvua munange malu a bitendelelu a bikole, kadi nangananga malongesha a Bantemu ba Yehowa. Pakatapaye dîsu mu mukanda wa L’humanité à la recherche de Dieu, * wakamba ne: “Aa malu mafunda malondangane bimpe nunku. Anu muntu njinga bua bantu kuikalabu bafunda menemene.” Pashishe bamue ba ku balongi bende bakalua pabu ku katanda aku, yonso wa kudibu ukeba mukanda uvua mulongeshi eu mupete au. Bavua basue bua kulonga mukanda umue umue au. Bavua bela meji ne: kavua mua kupanga kubueja malu avuamu mu malongesha ende to.

Mu tshibilu atshi ke muakafika bamue bantu ku dibala ne diteleja dia malu a bulelela bua mu Bible musangu wabu wa kumpala. Tumama tutshivua bansonga tuakalua patu. Ntemu kampanda kuyikilaye nabu katupa, bakudimuna mêyi ende mu muakulu wa tumama kudi nsongakaji mukuabu. Ntemu au kubaleja bimfuanyi bia mu mukanda wa Muntu mutambe bunene wa katshia ne katshia, * e kubumvuija ne: Yezu wakondapa babedi, too ne tumama kabidi. Bakasanka pakumvuabu mulayi wa mu Bible wa se: Yezu neenzele bantu badi pa buloba lelu bia muomumue mu tshitupa tshîpi emu. Bamue ba kudibu bakangata mikanda yetu ne disanka, bana betu kulongolola bua Ntemu uvua mumanye muakulu wa tumama kuikalaye uya kubatangila.

Pa kumusha mikanda ya mu muakulu wa mu Macédoine, kuvua kabidi ya mu tshiena-Albanie, mu Anglais, ne mu tshiena-Turquie. Muntu mukuabu uvua kayi wakula tshiena Macédoine wakalomba mikanda ya mu Anglais. Pakumupabu bibejibeji bia Tshibumba tshia Nsentedi ne Réveillez-vous!, wakamba ne: uvua wakula tshiena-Turquie. Pakamulejabu mikanda ya mu muakulu wende, wakakema bikole be! Kumonaye se: Bantemu ba Yehowa mbasue kuambuluisha bantu ba mishindu yonso.

Musangu au bakayisha bimpe be, kubakankamijabi dikema pavuabu bamona bantu ba bungi basankidila bulelela bua mu Bible. Bulelela, Yehowa uvua mukangula njila wa kumuangalajila lumu luimpe lua Bukalenge mu Macédoine kudi bantu ba bungi.

[Mêyi adi kuinshi]

[Kazubu/​Bimfuanyi mu dibeji 9]

MUANDA MUNENE WAKATANTSHISHA MALU

Dia 17 ngondo muitanu 2003, kuvua kuenzeke muanda kampanda munene uvua mua kutantshisha mudimu wa dimuangalaja lumu luimpe lua Bukalenge bua Nzambi. Bakabanjija biro bipiabipia bia Bantemu ba Yehowa mu Skopje. Mudimu wa luibaku au uvua muenze bidimu bibidi, kudiundishabu nzubu ivuaku kumpala ayi kuluayi minene misangu inayi.

Mbenze nzubu minene isatu (eu pa bule eu pa bule) mudibu benzela midimu ya dilombola malu a mudimu ne dikudimuna mikanda; batekamu ne nzubu ya kuladila, tshikuku ne muaba wa disukuila bilamba. Guy Pierce wa mu Kasumbu Kaludiki ka Bantemu ba Yehowa wakalua bua kuenza muyuki wa dibanjija dia nzubu eyi. Bantu bafumine mu matunga dikumi bavua pabu mu ndongamu eu. Bantu bonso bavua ne disanka dikole pavuabu bamona nzubu mipiamipia milengele ayi.

[Karte mu mabeji 8, 9]

(Bua kumona malu bimpe, tangila mu mukanda)

BULGARIE

MACÉDOINE

Skopje

ALBANIE

GRÈCE

[Tshimfuanyi mu dibeji 8]

Skopje, Macédoine