Muyuki wa mu Bible mmulelela anyi?

MU MUKANDA wa Mvita ya mu Bible (Angl.) wa Chaim Herzog (uvua kale mfumu wa Ditunga dia Israël) ne Mordechai Gichon (uvua mulongeshi wa malu a bishadile bia ku bintu bia kale mu Iniversite wa mu Tel Aviv), badi bamba nunku:

“Diumvuija mayele avuabu baluangana nawu mvita idibu batele mu Bible . . . ki mbualu bufuikakaja to. Tshilejilu, wewe muangate mvita idibu balonde bualu buayi mu Balumbuluishi 6-8 ivua Gideona muluangane ne bena Midiyana ne bena mâyi babu, muyifuanyikije ne mvita yakenzeka mu tshimenga tshia Troie idibu bumvuije kudi Homère mu mukanda wende wa Iliade, neumone ne: bidi nanku. Bua mvita ya ku Troie eyi, bivua bilomba bena mvita bua kuikalabu anu pabuipi patupu ne muelelu wa musulu kampanda ne tshimenga tshia lumbu lukole tshivua katshiyi mutantshi mule . . . Kadi kabiena nanku bua muyuki wa mvita ya Gideona udibu balonde mu Bible to. Mayele a bena mvita ne dituilangana diabu bidibu bumvuijamu mu bule ne mu butshiama bilondeshile miaba misunguluke ivua biluilu biabu biluishilangana ne malu avuabi bienze, tuambe ne: muaba uvua mvita eyi mienzekele wa ntanta wa kilometre mitue ku 60, kabena mua kubifunda kabidi muaba mukuabu nansha umue . . . Nunku tudi ne bua kuitaba bulelela bua muyuki wa mayele a mvita udibu balonde mu Bible.”

Udi mua kumanya muvua mvita ya Gideona wewe mutangile pa karte kadi mu dibeji dia 18 ne dia 19 dia broshire wa ‘Voyez le bon pays’ * udi ne tuarte tua miaba idibu batele mu Bible. Mvita ayi yakabanga pavua ‘bena Midiyana bonso ne bena Amaleka ne bantu bonso ba ku esete badisangishe pamue, basabuke, ne base tshitudilu mu tshibanda tshia Yizelele.’ Ke Gideona kubikila bisa bivua pabuipi apu bua kulua kumuambuluisha. Mvita eyi yakabangila ku tshina tshia mâyi tshia Haloda too ne ku kakunakuna ka Mole, pashishe kupuekayi too ne ku tshibanda tshia Yadene. Pakalondakaja Gideona baluishi dia muamua dia musulu wa Yadene, wakabatshimuna.​—Balumbuluishi 6:33–8:12.

Karte ka mu broshire wa ‘Voyez le bon pays’ kadi kaleja miaba minene ivua malu aa menzekele ne mushindu wa maloba a miaba ayi. Karte kakuabu (mu dibeji dia 15) kadi kaleja maloba a bisamba bia Isalele. Tuarte tubidi etu tudi mua kukuambuluisha bua kujingulula mudi malu adibu bambe mu Bible malelela.

Muanda eu udi ushindika bualu buakamba Mulongeshi Yohanan Aharoni (mufue matuku mashale aa) ne: “Bua maloba adibu batele mu Bible, dilonga dia miaba ne miyuki ya kale mbibuelakanangane bikole kakuyi mushindu wa kumvua tshimue bimpe padi tshikuabu katshiyiku.”

[Mêyi adi kuinshi]

[Mêyi a dianyisha bua tshimfuanyi mu dibeji 32]

Karte kadi panyima: Kangata mu tuarte tua Pictorial Archive (Near Eastern History) Est. and Survey of Israel