Nkonko ya babadi

Bua tshinyi Paulo wakafunda bua mukaji muena Kristo ne: ‘Neasungidibue mu kulela kuende kua bana’?​—1 Timote 2:15.

Ntshinyi tshidi mvese idi kumpala kua eu isokolola pa tshivua Paulo musue kuamba? Ku bukole bua nyuma muimpe, uvua ufila mibelu bua muaba udi nawu bakaji bena Kristo mu tshisumbu. Wakafunda ne: ‘Bakaji badilengeje ne bilulu bidi bibakanyina; bikale ne kalolo ne bupuekele; kabaluki nsuki yabu bipia; kabaluatshi ngolo ne mabue ne bilulu bia mushinga mupite bungi; kadi badilengeje ne bienzedi bimpe, bu mudi buakane bua bakaji badi bamba ne: Tudi tutshina Nzambi.’ (1 Timote 2:9, 10) Paulo uvua ubela bena Kristo bakaji bua kuikala ne bupuekele ne nkatshinkatshi mu mvuadilu wabu, ne bua ‘kudilengeja’ ne bienzedi bimpe.

Paulo wakumvuija kabidi bua bulombodi mu tshisumbu ne: ‘Tshiena ngitabuja mukaji ayishe, anyi ikale ne bukokeshi ku mutu kua mulume; kadi ikale biende talala.’ (1 Timote 2:12; 1 Kolinto 11:3) Udi uleja nshindamenu wa bulombodi ebu pa kuamba ne: nansha muvua Adama kayi mushimibue kudi Satana, Eva ‘wakateyibua, wakapona mu bubi.’ Mmunyi muvua mukaji muena Kristo mua kukubibua ku mpekatu wa Eva? Paulo udi wandamuna ne: ‘Kadi yeye neasungidibue mu kulela kuende kua bana, bikala bakaji bananukila mu ditabuja ne mu dinanga ne mu malu a tshijila adi ne bupuekele.’ (1 Timote 2:14, 15) Ntshinyi tshivua Paulo musue kuamba pakakulaye mêyi au?

Bamue bakudimunyi ba Bible badi basua kuleja ne: mukaji udi upeta lupandu bilondeshile dilela diende dia bana. Tshilejilu, Mukanda wa Mvidi Mukulu wa bena Mishonyi udi wamba ne: “Nebasungidile mukaji bua buledi buende.” Kadi diumvuija dia mêyi a Paulo dia mushindu’eu ki ndijalame to. Mvese ya bungi idi ileja ne: bua kupanda, bidi bikengela kufika ku dimanya Yehowa ne kuenza midimu idi ileja ditabuja. (Yone 17:3; Bienzedi 16:30, 31; Lomo 10:10; Yakobo 2:26) Kabidi, Paulo kakasua kuamba ne: bena Kristo bakaji badi anu ne bua kulela kabayi bafua nansha. Bantu bakaji batu bashala ne muoyo patubu balela nansha bikale anyi kabayi bena Kristo. Diakabi, bamue batu bafuila ku lulelu nansha bikale anyi kabayi bena Kristo.​—Genese 35:16-18.

Mibelu mikuabu yakalua Paulo kufila amu mu mukanda au bua bakaji idi ituambuluisha bua kumvua tshivuaye musue kuamba. Udi udimuija bamue bakaji ba mu lufuila batshivua bansonga ne bavua ‘bafube, bendakana ku nzubu ne ku nzubu; ne kabayi bayila mua kuikala anu ne bufuba nkayabu, kadi bikale bena mukoso ne bena bienzenza, bakula mêyi adi kaayi mimpe bua kuakula.’ Paulo uvua usua kuamba tshinyi mu mubelu wende? Udi utungunuka ne kuamba ne: ‘Nunku ndi musue bansongakaji ba mu lufuila baye ku dibaka, balele bana, bakokeshe ba mu nzubu yabu, kabapeshi mupumbishi kaba ka kupendeye bena ekeleziya.’​—1 Timote 5:13, 14.

Paulo udi uleja mudimu muimpe udi nawu bakaji mu dîku. Mukaji uvua muditue mu midimu bu mudi ‘dilela bana ne dikokesha ba mu nzubu muende’ uvua utungunuka ne kuikala ‘mu ditabuja ne mu dinanga ne mu malu a tshijila adi ne bupuekele’ kavua mua kukokibua kudi ngikadilu udi kayi ukolesha to. Dinanga diende dia malu a mu nyuma divua mua kulamibua peshi ‘kusungidibua.’ (1 Timote 2:15) Dienza nunku divua mua kuambuluisha bansongakaji bua kuepuka mateyi a Satana.

Mêyi avua Paulo muambile Timote adi atuvuluija tuetu bonso balume ne bakaji bua kufila dîba dietu mu dienza dia malu mimpe. Dîyi dia Nzambi didi dibela bena Kristo bonso ne: ‘Nudimuke bienu bu munudi nuenda; kanuendi bu badi kabayi ne meji, kadi nuende bu bena meji.’​—Efeso 5:15.