Dîyi dia Yehowa didi ne muoyo

Malu manene a mu mukanda wa kumudilu wa Bakelenge

‘PIKALA bantu bakane ne bukokeshi bantu badi basanka; kadi pakokesha muntu mubi, bantu badi batua mikemu.’ (Nsumuinu 29:2) Mukanda wa kumudilu wa Bakelenge udi mu Bible udi uleja bimpe mudi lusumuinu elu lulelela. Udi ulonda muyuki wa nsombelu wa Solomo ne wa muvua Isalele wa kale mupete ditalala ne bubanji bua bungi tshikondo tshivuaye ukokesha. Mu mukanda eu mbalondemu kabidi bua mushindu wakabuluka tshisamba etshi kunyima kua lufu lua Solomo ne bua bakalenge 14 bakamulonda kunyima, bamue mu Isalele ne bakuabu mu Yuda. Anu babidi ba ku bakalenge aba ke bakashala balamate Yehowa. Mukanda eu udi kabidi wakula bua midimu ya baprofete basambombo, kusangisha ne Eliya.

Muyuki eu mufunda kudi muprofete Yelemiya mu Yelushalema ne mu Yuda udi ulonda malu avua menzeke munkatshi mua bidimu bitue ku 129, kutuadijila mu 1040 too ne mu 911 kumpala kua bikondo bietu ebi (K.B.B.). Bidi bimueneka ne: pavua Yelemiya ufunda mukanda eu, wakatangila mu mikanda ya kale bu mudi “mukanda wa bienzedi bia Solomo.” Kadi mikanda ayi ya kale kayitshienaku to.​—1 Bakelenge 11:41; 14:19; 15:7.

MUKALENGE WA MEJI UDI UPETESHA BANTU DITALALA NE BUBANJI

(1 Bakelenge 1:1–11:43)

Bakelenge wa kumudilu udi utuadija ne muyuki muimpe wa mudi Adoniya muana wa balume wa Mukalenge Davidi ukeba kunyenga bukalenge bua tatuende. Bualu bua lukasa budi muprofete Natana wenza budi bupangisha mayele a Adoniya bua kukumbana, ne Solomo muana wa Davidi ke udibu bateka mukalenge. Yehowa udi wanyisha dilomba dia mukalenge eu udibu bafuma ku diteka ne udi umupesha “mutshima muakane wa lungenyi” ne “bubanji ne butumbi.” (1 Bakelenge 3:12, 13) Meji a mukalenge eu kaena kuelekeja, ne udi ne bubanji kabuyi kufuanyikija. Isalele udi mu tshikondo tshia ditalala ne bubanji.

Munkatshi mua nzubu idi Solomo ujikija kuibakisha mudi ntempelo wa Yehowa ne nzubu mishilashilangane ya mbulamatadi. Yehowa udi ujadikila Solomo ne: ‘Nenjadike nkuasa wa bukalenge buebe ku mutu kua bena Isalele tshiendelele,’ bu mukalenge eu mua kushala ne butumike. (1 Bakelenge 9:4, 5) Nzambi mulelela udi kabidi umumanyisha bipeta bia bupidia. Kadi Solomo udi ufika ku disela bakaji ba bungi ba bisamba bikuabu. Padiye ukulakaja, bakaji aba badi bamusaka ku ntendelelu wa dishima. Yehowa udi umanyisha ne: bukalenge buende nebuabuluke. Mu 997 K.B.B., Solomo udi ufua, bukokeshi buende bua bidimu 40 budi butua ku tshibungubungu. Muanende Lehabama udi usomba mu nkuasa.

Mandamuna a nkonko ya mu Bible:

1:5​—Bua tshinyi Adoniya wakakeba kuangata bukalenge patshivua Davidi ne muoyo? Bible kêna wandamuna lukonko elu to. Kadi bu mukavua batutuende ba Adoniya aba: Amenona ne Abashaloma bamane kufua ne muvua Kileaba muana mukuabu wa Davidi mua kuikala pende mufue, Adoniya wakela meji ne: uvua ne bukenji bua kuangata nkuasa wa bumfumu bualu yeye ke uvua mukulumpe ku bana ba balume ba Davidi bavua bashale ne muoyo. (2 Samuele 3:2-4; 13:28, 29; 18:14-17) Adoniya uvua pamuapa mutuishibue ne: mayele ende avua ne bua kukumbana bualu mfumu munene wa basalayi Yoaba ne muakuidi munene Ebeyatâ uvua bantu batshina bavua bamuambuluisha. Bible kêna wamba ni uvua mumanye dijinga dia Davidi dia kupesha Solomo nkuasa. Tshidibi, Adoniya kakabikila Solomo ne bantu bakuabu bavua balamate Davidi bua kulua ku mulambu uvuaye mulongolole bua ‘kushipela Nzambi.’ (1 Bakelenge 1:9, 10)  Ebi bidi bileja ne: uvua umona Solomo bu muntu uvuabu bafuila nende bukalenge ebu.

1:49-53; 2:13-25​—Bua tshinyi Solomo wakashipa Adoniya yeye mumane kumufuila luse? Nansha muvua Beta-sheba kayi mufike ku dimanya bualu ebu, Solomo wakajingulula meji malelela avua Adoniya ulombela nawu Beta-sheba bua ambile mukalenge amupeshe Abishaga bua ashale mukajende. Nansha muvua Davidi kayi mumanyangane ne Abishaga eu uvua ne mpala mulenga, bavua bamuangata bu mukaji mukuabu wa Davidi. Bilondeshile tshilele tshia tshikondo atshi, uvua ne bua kulua anu mukaji wa muntu uvua ne bukenji bua kupiana bintu bia Davidi. Adoniya uvua mua kuikala muele meji ne: pavuaye wangata Abishaga bu mukajende, uvua kabidi mua kuangata nkuasa wa bumfumu. Bu muvua Solomo mumone ne: dilomba dia Adoniya divua dileja dijinga diende dia kuangata bukalenge, wakabenga kumufuila kabidi luse.

6:37–8:2​—Ndîba kayi diakabanjijabu ntempelo? Bakajikija kuasa ntempelo mu ngondo wa muanda mukulu wa mu 1027 K.B.B., mu tshidimu 11 tshia bukokeshi bua Solomo. Bidi bimueneka ne: biakalomba ngondo 11 bua kubuejamu bintu ne kulongolola bikuabu bivua bikengedibua. Dibanjija dia ntempelo divua ne bua kuikala dienzeke mu ngondo wa muanda mutekete mu 1026 K.B.B. Muyuki udi wakula bua nzubu mikuabu yakibakabu pakajika ntempelo, kumpala kua kuakula bua dimubanjija, bua kumvuija bimpe menemene muvua midimu ya dibaka nzubu yenzeka tshikondo atshi.​—2 Kulondolola 5:1-3.

9:10-13​—Pavua Solomo mupeshe Hilama Mukalenge wa Tulo bimenga 20 bia mu buloba bua Galela, bualu ebu buvuaku bumvuangana ne Mikenji ya Mose anyi? Bavua mua kuikala bamone mukenji udi mu Lewitiki 25:23, 24 bu uvua utangila amu muaba uvua bena Isalele base. Pamuapa bimenga bivua Solomo mupeshe Hilama bavua basombelamu kudi bantu bavua kabayi bena Isalele, nansha muvuabi munda mua mikalu ya Buloba Bulaya. (Ekesode 23:31) Bualu ebu buvua Solomo muenze buvua mua kuikala kabidi buleja muvuaye kayi mutumikile menemene Mikenji bu pavuaye ‘mudikumbajile tubalu tua bungi’ ne musele bakaji bavule. (Dutelonome 17:16, 17) Nansha bikalabi bivua mushindu kayi, Hilama kakanyisha bivuabu bamupeshe ebi. Pamuapa bantu ba bisamba bikuabu abu kabavua balame bimenga abi bimpe to, anyi kabivua mua kuikala muaba muimpe to.

11:4​—Bukulakaje ke buvua bufikishe Solomo ku dijimija lulamatu anyi? Kabiena bimueneka nanku to. Solomo utshivua nsonga pakatuadijaye kukokesha, ne nansha muakakokeshaye bidimu 40, kavua mufike ku bununu to. Kabidi, kakalekela kulonda Yehowa kashidi to. Bidi bimueneka ne: wakakeba kusambakaja ntendelelu wa Yehowa ne wa nzambi mikuabu.

Malongesha adi atutangila:

2:26, 27, 35. Bualu butu Yehowa udianjila kumanyisha butu misangu yonso buenzeka. Diumbusha Ebeyatâ wa mu ndelanganyi ya Eli  diakakumbaja ‘dîyi diakamba Yehowa bua nzubu wa Eli.’ Dipingaja Sadoka wa mu ndelanganyi ya Pinehasa pa muaba wa Ebeyatâ diakakumbaja Nomba 25:10-13.​—Ekesode 6:25; 1 Samuele 2:31; 3:12; 1 Kulondolola 24:3.

2:37, 41-46. Mbia njiwu bua kuela meji ne: muntu udi mua kushipa mukenji wa Nzambi kayi upeta dinyoka. Aba badi basesuka ku bukole mu ‘njila wa ku muoyo udi mubumbakane’ nebapete bipeta bia dipangadika diabu dibi.​—Matayo 7:14.

3:9, 12-14. Yehowa utu wandamuna masambila a muoyo umue a basadidi bende badi bamulomba meji, bujinguludi ne bulombodi bua kuenzabu mudimu wende.​—Yakobo 1:5.

8:22-53. Solomo wakaleja dianyisha ne muoyo mujima kudi Yehowa, Nzambi wa luse lujalame, Mukumbaji wa bidiye ulaya ne Muteleji wa masambila. Dielangana meji bua mêyi a disambila divua Solomo mubanjije nadi ntempelo nedikoleshe dianyisha dietu bua ngikadilu eyi ya Nzambi ne malu makuabu adi atangila bumuntu buende.

11:9-14, 23, 26. Pakalua Solomo muena bupidia ku bukulakaje, Yehowa wakamujudila baluishi. Mupostolo Petelo udi wamba ne: ‘Nzambi udi upidia badi badisua, kadi udi upa badi badipuekesha ngasa.’​—1 Petelo 5:5.

11:30-40. Mukalenge Solomo wakakeba kushipa Yalobama bua tshivua Ahiya mumanyishe bua Yalobama. Bualu ebu mbushilangane bikole ne tshivuaye muenze bidimu 40 kumpala, pakabengaye bua kudisombuela kudi Adoniya ne bena tshitungu bakuabu! (1 Bakelenge 1:50-53) Meji ende akashintuluka bualu uvua wenda ulekela Yehowa.

BUKALENGE BUDI BUABULUKA

(1 Bakelenge 12:1–22:53)

Yalobama ne bena Isalele badi balua kudi Mukalenge Lehabama ne bamulomba bua apepeje bujitu buvua tatuende Solomo mubambuishe. Pamutu pa kuenza tshidibu bamulomba, Lehabama udi ukana bua kubavudijila mene bujitu ebu. Bisa dikumi bidi bitomboka ne bisungula Yalobama bua ikale mukalenge wabi. Bukalenge budi buabuluka. Lehabama udi ukokesha bukalenge bua ku sud, buenza ne tshisa tshia Yuda ne tshia Benyamina, ne Yalobama udi ukokesha bukalenge bua Isalele bua bisa dikumi bua ku nord.

Bua kusaka bantu bua kabayi ku Yelushalema bua kutendelela, Yalobama udi wenzeja tuana tua ngombe tubidi tua ngolo, kamue ku Dana, kakuabu ku Betele. Munkatshi mua bakalenge badi bakokesha mu Isalele kunyima kua Yalobama mudi Nadaba, Bâsha, Ela, Zimeli, Tibeni, Omeli, Ahaba ne Ahazaya. Abiyama, Asa, Yehoshafata ne Yeholama ke badi balondangana mu nkuasa wa mu Yuda kunyima kua Lehabama. Ku baprofete badi bakuata mudimu mu matuku a bakalenge aba kudi Ahiya, Shemaya ne muntu wa Nzambi udibu kabayi batele dîna diende, ne Yehu ne Eliya ne Mikaya.

Mandamuna a nkonko ya mu Bible:

18:21​—Bua tshinyi bantu bakashala bapuwe pakabambila Eliya bua kulonda Yehowa anyi Bâla? Bavua mua kuikala bafike ku dijingulule muvuabu kabayi balamate anu Yehowa nkayende mutuye ulomba, kudimonabu bapile. Peshi tuondo tuabu tua mioyo tukavua tupape bikole kabatshiyi bamona kabidi bibi  bua kutendelela Bâla eku bamba muvuabu batendelela Yehowa. Amu pakaleja Yehowa bukole buende ke pakambabu ne: “Yehowa, yeye udi Nzambi [mulelela]; Yehowa, yeye udi Nzambi [mulelela].”​—1 Bakelenge 18:39.

20:34​—Yehowa mumane kuambuluisha Ahaba bua kutshimuna bena Sulia, bua tshinyi Ahaba wakashiya mukalenge wabu Bene-hadada ne muoyo? Pamutu pa kushipa Bene-hadada, Ahaba wakenza nende tshipungidi bua kuangataye misesu ya mu Damaseke, tshimenga tshikulu tshia Sulia, pamuapa bua kuasaye miaba ya disumbishila bintu. Kumpala, tatuende wa Bene-hadada uvua muangate pende misesu mu Samalea bua kuendelamu mushinga. Ke bualu kayi Ahaba wakalekela Bene-hadada bua kumonaye mua kuenza miaba ya dipanyina bintu mu Damaseke.

Malongesha adi atutangila:

12:13, 14. Patudi tuangata mapangadika manene mu nsombelu wetu, tudi ne bua kulomba mibelu kudi bantu bashindame ne badi ne meji, badi ne dimanya dia mu Bible ne banemeka mêyi a Nzambi bikole.

13:11-24. Mibelu anyi lungenyi ludi lumueneka lubi, nansha luolu lufuma kudi muena kuitabuja netu udi kayi ne meji mabi, tudi ne bua kulukonkonona ku diambuluisha dia Dîyi dia Nzambi.​—1 Yone 4:1.

14:13. Yehowa udi utukenketa bua kukeba buimpe budi munda muetu. Nansha buimpe abu buobu bukese mushindu kayi, udi mua kubudiundisha patudi tuenza muetu muonso bua kumusadila.

15:10-13. Tudi ne bua kuikala ne dikima dia kubenga kuela Nzambi nyima ne kutungunuja ntendelelu mulelela kumpala.

17:10-16. Mukaji mukamba wa ku Salefata wakitaba ne: Eliya uvua muprofete ne wakamuakidila, ne Yehowa wakabenesha bienzedi biende bia ditabuja. Lelu eu, Yehowa udi kabidi umona bienzedi bietu bia ditabuja, ne udi ubenesha bantu badi batungunuja mudimu wa Bukalenge kumpala mu mishindu kabukabu.​—Matayo 6:33; 10:41, 42; Ebelu 6:10.

19:1-8. Padibu batuluisha bikole, tudi ne bua kuikala bajadike ne: Yehowa neatuambuluishe.​—2 Kolinto 4:7-9.

19:10, 14, 18. Batendeledi balelela kabatu nkayabu nansha. Batu ne Yehowa ne bana babu ba pa buloba bujima.

19:11-13. Yehowa ki mbukole budi mu bintu bifuka nansha.

20:11. Pavua Bene-hadada uditambisha muvuaye mubutule Samalea, mukalenge wa Isalele wakandamuna ne: ‘Muntu udi uluata bintu bia mvita [bua kuya ku mvita] kadifunyishi bu muntu udi ubivula’ kunyima kua mumane kutshimuna mvita. Patudi tuenza mudimu mupiamupia udibu batupeshe, tudi ne bua kuepuka didieyemena dinekesha ditu nadi muditambishi.​—Nsumuinu 27:1; Yakobo 4:13-16.

Mukanda wa mushinga mukole buetu tuetu

Pavua Mose ulonda muyuki wa muvuabu bamupeshe Mikenji ku Mukuna wa Sinai, wakambila bana ba Isalele ne: ‘Tangilayi, ngakuteka disanka ne mulawu kumpala kuenu lelu. Binumvua mikenji ya Yehowa, Nzambi wenu, ingakunuambila lelu, nenupete disanka; binuapidia kumvua mikenji ya Yehowa, Nzambi wenu, binuasesuka mu njila ungakunuleja lelu, nenupete mulawu.’​—Dutelonome 11:26-28.

Mbatuleje patoke bulelela ebu bua mushinga mu mukanda wa kumudilu wa Bakelenge! Anu mutudi babimone, mukanda eu udi ulongesha malongesha makuabu a mushinga mukole. Mukenji udimu udi bushuwa ne muoyo ne bukole.​—Ebelu 4:12.

[Tshimfuanyi mu dibeji 29]

Ntempelo ne nzubu mikuabu mibaka kudi Solomo

[Tshimfuanyi mu mabeji 30, 31]

Pakaleja Yehowa bukole buende, bantu bakakema ne: ‘Yehowa yeye udi Nzambi mulelela!’