Nkonko ya babadi

Bu muvua Solomo Mukalenge wa mu Isalele wa kale mupange lulamatu kudi Nzambi ku bukulakaje buende, tudiku mua kuamba ne: kakubishibua anyi?​—1 Bakelenge 11:3-9.

Nansha mudi Bible utela mêna a bamue balume ne bakaji ba lulamatu bikala mua kubishibua, kêna wakula bua ditekemena dia se: muntu kampanda anyi kansanga udibu batele neabishibue to. (Ebelu 11:1-40) Kadi bua Solomo tudi mua kupeta lungenyi lua tshidi Nzambi mumufundile patudi tufuanyikija tshiakamufikila pakafuaye ne tshiakafikila bamue bantu ba lulamatu pakafuabu.

Bible udi wakula anu bua malu abidi adi mua kufikila bafue: dibenga kuikalaku dia mutantshi muîpi anyi lufu lua kashidi. Bantu badi kabayi bakanyine bua kubishibua badi babela mu “Ngena,” peshi mu ‘dijiba dia kapia.’ (Matayo 5:22; Mâko 9:47, 48; Buakabuluibua 20:14) Mu bantu aba tudi mua kubalamu Adama ne Eva, mutungidianganyi Yudasa Isakaliote ne bakuabu bantu bakafua babutula kudi Nzambi, bu mudi bantu ba mu tshikondo tshia Noa ne bena mu Sodoma ne Amola. * Padi aba bikala mua kubishibua bafua, badi baya mu Muaba wa Bafue udi Bible ubikila mu miakulu ya ku ntuadijilu ne: “Sheol” peshi “Hades.” Mukanda wa Nzambi udi wamba tshikala mua kubafikila mu matuku atshilualua ne: ‘Mâyi manene kabidi, akapatula bafue bakadimu, ne lufu ne Muaba wa Bafue biakapatula bafue bakadimu, ne bakalumbuluisha muntu yonso bu muakadi bienzedi biende.’​—Buakabuluibua 20:13.

Nunku bena lulamatu badibu batele mu Ebelu nshapita wa 11 badi mu Muaba wa Bafue bindile dibishibua. Munkatshi muabu mudi basadidi ba Nzambi ba lulamatu bu mudi Abalahama, Mose ne Davidi. Mona mpindieu tshidi Bible wamba pakafuabu. Yehowa wakambila Abalahama ne: ‘Kadi wewe neuye kudi bankambua bebe polaa, neujikibue muntu mununu.’ (Genese 15:15) Yehowa wakambila Mose ne: “Tangila, wewe neulale tulu ne bankambua bebe.” (Dutelonome 31:16) Bible udi wamba bua Davidi tatuende wa Solomo ne: ‘Davidi wakalala tulu ne bankambua bende, bakamujika mu musoko wa Davidi.’ (1 Bakelenge 2:10) Nunku kuamba ne: ‘muntu wakalala tulu ne bankambua bende’ kudi anu mushindu mukuabu wa kuamba ne: muntu au wakaya mu Muaba wa Bafue.

Ntshinyi tshiakafikila Solomo pakafuaye? Bible udi wandamuna ne: ‘Solomo wakakokesha bena Isalele bonso mu Yelushalema bidimu makumi anayi. Solomo wakalala tulu ne bankambua bende, wakajikibua mu musoko wa Davidi, tatu wende.’ (1 Bakelenge 11:42, 43) Nanku mbia meji bua kuamba ne: Solomo udi mu Muaba wa Bafue, muikalaye mua kubishibua.

Bidi biumvuija ne: bantu bakuabu badibu bambe mu Bible ne: ‘bakalala tulu ne bankambua babu,’ badi mua kubishibua. Bushuwa, badi bamba bia muomumue bua bakalenge ba bungi bakalua panyima pa Solomo, nansha muvuabu bapange lulamatu. Kabiena mua kutukemesha to, bualu ‘dibika dia bafue nedikaleku, ne dia bakane ne dia [badi kabayi bakane].’ (Bienzedi 24:15) Kadi anu pikala aba ‘bonso badi mu nkita [ya tshivulukilu]’ ne bua kubika ke tuetu kumanya bantu bikala babishibue. (Yone 5:28, 29) Nunku, pamutu pa kuamba kushindika bikala muntu kampanda wa kale mua kubishibua anyi kayi mua kubishibua, tudi bindile dipangadika dipuangane dia Yehowa.

[Mêyi adi kuinshi]