Kudi muntu udi mua kushintulula bushuwa buloba anyi?

“Bapele ba bungi batu batuambila ne: tshidibu basue ku bionso nditalala ne bupole, ne pashishe mishindu ya kulengeja nsombelu wabu. Mbasue mbulamatadi mimpe bua matunga mabanji adi akokesha ne bua kumpanyi minene kayilu kunyanga malu adibu benza.”

MÊYI aa ngavua mulombodi wa tshisumbu kampanda tshia diambuluisha bantu muambe bua malu adi bapele batekemena ne bajinga. Bua kuamba bimpe, mêyi ende aa adi mua kuleja dijinga didi nadi bantu bonso badi ntatu ikuata. Bonso badi bajinga ne muoyo umue ditalala ne bupole bia bushuwa pa buloba. Kadi bidi mua kuenzeka anyi? Kudi muntu udi bushuwa ne bukole ne bukokeshi bua kushintulula malu adi manyanguke pa buloba ebu anyi?

 Bantu badi bakeba kushintulula malu

Bantu ba bungi mbatete mua kushintulula malu pa buloba. Tshilejilu, Florence Nightingale, muntu mukaji kampanda wa mu Grande-Bretagne wa mu bidimu bia 1800, wakadifila bua kuondopa babedi. Mu matuku ende, kumpala kua manga a kushipa tuishi kaayi manji kuikalaku, kabavua buondopangana bu lelu to. Mukanda kampanda udi wamba ne: “Baminganga kabavua bamanye mukanda to, kabavua ne mankenda ne bavua bamanyike bua dikuatshika maluvu ne buendenda.” Florence Nightingale wakafika ku dishintulula malu a diondopangana anyi? Eyowa. Bia muomumue, bantu ba muoyo muimpe bungi kabuyi kubala mbashintulule malu a bungi, bu mudi: malu a dibala ne difunda, a tulasa, a diondopangana, a ngibakilu ne a ndilu. Ke bualu kayi nsombelu wa bapele ba bungi mmulengele koku ndambu.

Tshidibi, katuena mua kupua muoyo bualu ebu to: bantu ba bungi menemene batshidi bakenga bua mvita, dishipangana, masama, nzala ne ntatu mikuabu. Tshisumbu kampanda tshia diambuluishangana tshia mu Irlande tshidi tshiamba ne: “Bupele budi bushipa bantu 30 000 dituku dionso edi.” Nansha bupika budi bantu ba bungi baluishe bikole munkatshi mua nkama ya bidimu, butshidi anu kuoku. Mukanda mukuabu udi wamba ne: “Lelu’eu kudi bapika bungi bupite bua bavuabu bakuate mu Afrike tshikondo tshivuabu bapanyisha bapika mu Amerike.”​—Disposable People—​New Slavery in the Global Economy.

Ntshinyi tshidi tshipangishe bantu bua kushintulula buloba musangu umue bua kashidi? Mbua matunga mabanji adi akokesha anyi mbua tshintu tshikuabu?

Malu adi apangisha dishintuluka

Bilondeshile tshidi Bible uleja, Satana Diabolo ke muntu munene udi upangisha bantu mua kushintulula malu pa buloba. Mupostolo Yone wakamba ne: “Buloba bujima budi mu bukokeshi bua Mubi.” (1 Yone 5:19, Muanda Mulenga Lelu) Too ne mpindieu, Satana utshidi anu ‘udinga ba pa buloba bonso.’ (Buakabuluibua 12:9) Malu mabi neikale pa buloba too ne paluabu kumbusha Satana. Mmunyi muakabanga malu kunyanguka pa buloba?

Adama ne Eva bakapeta buloba buvua ne bua kulua mparadizu mulenga bua dîku dijima dia bantu. Buvua buloba ‘buimpe be’! (Genese 1:31) Kadi mmunyi muakalua malu kushintuluka? Satana ke wakaashintulula. Wakamba ne: Nzambi kêna ne bukokeshi bua kuelela bantu mikenji to. Wakasua kuamba kabidi ne: Nzambi udi ukokesha bibi. Wakasaka Adama ne Eva bua kutombokela Nzambi ne bua kuikala kudisunguila tshidi tshimpe ne tshidi tshibi. (Genese 3:1-6) Ditomboka edi diakafikisha ku bualu buibidi budi bupangisha bantu bua kushintulula malu pa buloba: ke mpekatu ne dipanga bupuangane.​—Lomo 5:12.

Bua tshinyi Nzambi mmulekele mpekatu?

Bamue bantu badi mua kuebeja ne: ‘Bua tshinyi Nzambi mmulekele mpekatu ne dipanga bupuangane bitungunuka? Bu mudiye ne bukole bua bungi, kavuaku mua kushipa Adama ne Eva ne Satana bua kutuadijilula malu anyi?’ Bidi mua kumueneka bipepele bua  kuenza nanku. Kadi kuenza malu ne bukole kutu kujula nkonko ya bungi. Tshilejilu, kuenza mudimu bibi ne bukole ki nkudi kukebele bamue bapele ne bakengi ntatu anyi? Bantu ba muoyo muimpe kabatu badiela nkonko padi mfumu mubi ushipa bantu bonso badi babenga tshidiye wamba anyi?

Nzambi wakalekela Satana ne bantu bua babenge kutumikila mikenji yende ne badienzele malu mudibu basue bua kuleja bantu ba muoyo muimpe ne: yeye ki mmuntu utu ukuata mudimu bibi ne bukole buende to. Kadi mmubalekele anu bua tshikondo kampanda tshisunguluke. Bidimu bivua bienda bipita bivua mua kuleja ne: mushindu udi Nzambi ukokesha ke udi mutambe buimpe. Bivua mua kuleja kabidi ne: malu onso adiye utukandika, udi uakandika bua diakalenga dietu. Bulelela, malu mabi adi mafumine ku ditombokela bukokeshi bua Nzambi mmaleje ne: udi utukandika amue malu bua diakalenga dietu. Malu aa mmaleje kabidi ne: Nzambi kêna wenza bibi padiye ukuata mudimu ne bukole buende bua kujikija bubi buonso tshikondo tshidiye musungule. Tshikondo atshi tshikadi pabuipi.​—Genese 18:23-32; Dutelonome 32:4; Musambu 37:9, 10, 38.

Kumpala kua Nzambi kumbusha bubi pa buloba, tudi ‘tutua mikemu popamue ne tudinyenga popamue’ bualu buloba mbunyanguke. (Lomo 8:22) Nansha tuetu mua kuenza tshinyi bua kushintulula malu, katuena mua kubutula Satana anyi kujikija dipanga bupuangane didi dikebesha ntatu yonso itudi nayi eyi to. Katuena ne bukokeshi bua kumbusha mpekatu utudi bapiane kudi Adama to.​—Musambu 49:7-9.

Yezu Kristo neashintulule malu musangu umue bua kashidi

Tudi tusua kuamba ne: nsombelu eu neashale amu nunku kashidi anyi? Tòo. Kudi muntu wa bukole bua bungi udibu bapeshe mudimu wa kushintulula malu pa buloba. Nnganyi au? N’Yezu Kristo. Bible udi uleja ne: Nzambi mmumuteke mukalenge bua kusungila bantu.​—Bienzedi 5:31.

Mpindieu, mmuindile “tshikondo” tshidi Nzambi musungule bua kupandisha bantu. (Buakabuluibua 11:18) Ntshinyi tshienzaye menemene? ‘Neajadike tshiakabidi malu onso akamba Nzambi mukana mua baprofete bende ba tshijila kale kale.’ (Bienzedi 3:21) Tshilejilu, Yezu ‘neapandishe mukengedi wa bintu padilaye kudiye, neapandishe muntu mupele udi kayi ne mukuatshishi. Neapikule mioyo yabu ku tshinyangu ne malu makole.’ (Musambu 72:12-16) Nzambi mmulaye bua ‘kulekesha mvita bua ijike too ne kumfudilu kua buloba’ ku butuangaji bua Yezu Kristo. (Musambu 46:9) Udi ulaya ne: ‘Muena [mu buloba budiye mukezule abu] kakuamba ne: Ndi ne disama.’ Bafofo, bampata-matshi, balema ne bantu bonso badi ne masama a mishindu yonso nebumvue bimpe. (Yeshaya 33:24; 35:5, 6; Buakabuluibua 21:3, 4) Nansha bantu bavua bafue ku kale nebasanke pabu. Nzambi mmulaye bua kujula bantu bavua bafue bua malu mabi a pa buloba.​—Yone 5:28, 29.

Yezu Kristo kakushintulula anu malu makese bua tshitupa tshîpi to. Neumbushe malu onso adi apangisha buloba bua kuikalabu buimpe. Neumbushe mpekatu ne dipanga bupuangane, ne neabutule Satana Diabolo ne bantu bonso badi munyima muende. (Buakabuluibua 19:19, 20; 20:1-3, 10) Ntatu ne makenga bidi Nzambi mulekele bua musangu muipi kabiakulua ‘musangu muibidi’ to. (Nahuma 1:9) Ke bualu buvua Yezu nabu mu lungenyi pakatulongeshaye bua kusambila bua Bukalenge bua Nzambi bulue ne bua disua dia Nzambi ‘dienzeke pa buloba bu mudidi dienzeka mu diulu.’​—Matayo 6:10, MMM.

Udi mua kuamba ne: ‘Kadi ki n’Yezu nkayende uvua muambe ne: netuikale “ne bapele matuku onso munkatshi muetu” anyi? Kabiena bisua kumvuija ne: malu mabi ne bupele nebitungunuke amu ne kuikalaku anyi?’ (Matayo 26:11) Bushuwa, Yezu wakamba ne: bapele nebikale anuku. Kadi nsombelu uvuaye muambidile mêyi aa ne malu adi Bible ulaya, bidi bileja ne: uvua musue kuamba ne: nekuikale bapele too ne ku ndekelu kua ndongoluelu wa malu eu. Uvua mumanye ne: kakuena  muntu uvua mua kujikija bupele ne malu mabi pa buloba to. Uvua kabidi mumanye ne: yeye neashintulule malu onso aa. Neenze ndongoluelu wa malu mupiamupia: ‘diulu dipiadipia ne buloba bupiabupia’ muikala kamuyi ntatu, masama, bupele ne lufu.​—2 Petelo 3:13; Buakabuluibua 21:1.

‘Kanupu muoyo bua kuenzelangana bimpe’

Bidiku biumvuija ne: katuena mua kuenza tshintu bua kuambuluisha bantu bakuabu anyi? Tòo, ki mmuomu to. Bible udi utuambila bua kuambuluisha bakuabu padibu mu ntatu anyi ne nsombelu mikole. Mukalenge Solomo wakafunda ne: ‘Kupadi bantu tshintu tshimpe, badi bakumbane bua kuikala natshi, pawikala ne bukole bua kubapatshi.’ (Nsumuinu 3:27) Mupostolo Paulo wakamba ne: ‘Kanupu muoyo bua kuenzelangana bimpe ne bua kukuatshishangana.’​—Ebelu 13:16.

Yezu Kristo muine wakatulomba bua kuenza bionso bitudi mua kuenza bua kuambuluisha bakuabu. Wakafila mufuanu wa muena Samalea uvua muambuluishe muntu uvuabu batute ne bibe bivuaye nabi. Yezu wakamba ne: ‘luse luakakuata’ muena Samalea, ke yeye kuangata bintu bivuaye nabi bua kusuika mputa ya muntu uvuabu batute au ne kumuambuluisha bua kupetulula bukole. (Luka 10:29-37) Bushuwa, muena Samalea wa luse kavua mushintulule buloba to, kadi wakashintulula nsombelu wa muntu mukuabu. Ke tshitudi petu mua kuenza.

Kadi Yezu Kristo kakuambuluisha anu bantu bakese to. Yeye neashintulule buloba mu matuku makese emu. Pashintululaye malu, nsombelu wa bantu badi bakenga lelu bua malu mabi nealengele ne nebapete ditalala ne bupole bilelela.​—Musambu 4:8; 37:10, 11.

Patudi bindile malu aa, tuikalayi tuambuluisha bakuabu mu nyuma ne ku mubidi ne ‘tuenzela’ bantu badi bakenga bua malu mabi adi pa buloba ‘bimpe.’​—Galatia 6:10.

[Bimfuanyi mu dibeji 5]

Florence Nightingale wakashintulula malu a diondopangana bikole

[Mêyi a dianyisha]

Ne dianyisha dia National Library of Medicine

[Bimfuanyi mu dibeji 7]

Bayidi ba Yezu badi benzela bakuabu bimpe

[Mêyi a dianyisha bua tshimfuanyi mu dibeji 4]

The Star, Johannesburg, S.A.