Mapa adi asankisha mutshima wa Nzambi

MUYUKI eu kawena usankisha bantu to. Mukalenge mukaji Atalaya mmushime bantu, kushipa too ne bakuabu bua kunyenga bukalenge mu Yuda. Uvua wela meji pabi kabiyi nanku ne: uvua mushipe bonso bavua mua kupiana bukalenge, ke kuditeka nkayende mukalenge mukaji. Muntu mukaji mukuabu diende Yehosheba (muana wa Mukalenge Yolama udi yeye munange Yehowa bikole ne mikenji yende) udi usokoka muana mutekete umue, diende Yoasha. Yehosheba ne bayende Yehoyada, Muakuidi Munene, bakasokoka muana eu uvua ne bua kupiana bukalenge munkatshi mua bidimu bisambombo bijima ku ntempelo.​—2 Bakelenge 11:1-3.

Dîba diakakumbaja Yoasha bidimu muanda mutekete, Muakuidi Munene Yehoyada wakakumbaja tshikavuaye mulongolole, uvua musue kumbusha Atalaya mu nkuasa. Wakapatula muana e kumusombesha mu nkuasa wa bukalenge. Balami ba mukalenge bakapatula mukalenge mukaji mubi Atalaya pambelu pa ntempelo ne kumushipabu; ke bantu bonso kusanka. Malu avua Yehoyada ne Yehosheba benze akambuluisha bikole bua kupingaja ntendelelu mulelela mu Yuda ne nangananga bua ndelanganyi ya Davidi ivua ne bua kufikisha too ne ku Masiya itungunuke ne bukalenge.​—2 Bakelenge 11:4-21.

Mukalenge mupiamupia eu wakenza bualu bukuabu buakasankisha mutshima wa Nzambi. Nzubu wa Yehowa ukavua munyanguke bikole. Bu muvua Atalaya ne dijinga dia kukokesha anu nkayende, wakalengulula ntempelo ne kulekela biba bintu bivuamu. Nunku Yoasha wakadisuika bua kuibakulula ne kulongolola ntempelo. Wakambila bantu bua kusangisha makuta bua kulongolola nzubu wa Yehowa. Wakamba ne: ‘Argent yonso ya bintu bidibu balua nabi mu nzubu wa Yehowa bua kumujidilabi, ne argent yonso idibu bangata kudi muntu yonso pamubalabu, ne argent yonso idi bantu basue kufila mu nzubu wa Yehowa bua mitshima yabu, bakuidi bitabuje bintu ebi kudi bana babu, balongolole miaba ya mu nzubu wa Yehowa yakashimbuka panshi.’​—2 Bakelenge 12:4, 5.

Bantu bakafila bintu ne muoyo mujima. Kadi bakuidi kabakenza mudimu eu wa kulongolola ntempelo ne muoyo umue to. Ke mukalenge kudiangatshila malu mu bianza ne kuambaye ne: makuta onso abuele mu tushete kampanda bua mudimu eu. Wakateka Yehoyada ku mutu kua midimu eyi; Bible udi wamba ne: ‘Yehoyada muakuidi wakangata mushete munene, wakela tubulu mu tshibuikilu tshiawu, wakauteka pabuipi ne tshioshelu ku tshianza tshia balume tshia ku tshibi tshia mu nzubu wa Yehowa. Bakuidi bakadi balama tshibi bakateka argent yonso yakaluabu nayi mu nzubu wa Yehowa. Pakamanyabu ne argent ya bungi idi mu mushete, secrétaire wa mukalenge ne muakuidi munene bakalua ne bibombi, bakabala argent yakadi mu nzubu  wa Yehowa. Bakafila argent yakabalabu mu bianza bia bena mudimu ne mu bianza bia bantu bakadi balama nzubu wa Yehowa; bakafuta nayi bena mabaya ne bibaki ba nzubu bakadi benza mudimu wa nzubu wa Yehowa, ne bena tushola ne basongi ba mabue; bakasumba nayi mabaya ne mabue masonga ne bintu bionso bia kusonga nabi miaba mishimbuke mu nzubu wa Yehowa.’​—2 Bakelenge 12:9-12.

Bantu bakenza tshivuabu babalombe ne muoyo wabu mujima. Bakalongolola nzubu wa Yehowa bua ntendelelu wende atungunuke mu mushindu muimpe. Nunku, kabakatula butulavi makuta onso avua bantu bafile to. Mukalenge Yoasha wakaditangidila nkayende bualu ebu!

Lelu’eu, bulongolodi bua Yehowa budi buenza bua ne: makuta onso adi bena Kristo balelela bafila ne muoyo wabu mujima anu bu bena Isalele enze mudimu wawu wa kukuatshisha ntendelelu mulelela. Imue misangu udi mua kuikala munkatshi mua bantu bavua bafile makuta abu bua kukuatshisha malu a Bukalenge bua Nzambi mu tshidimu tshia mudimu tshishale etshi. Tuanji tumone amue malu avuabu batudile makuta anuvua bafile.

DIPATULA MIKANDA

Mbapatule mikanda ne bande eyi bua kuyilonga ne kuyabanya pa buloba bujima:

• Mikanda: 47 490 247

• Tukanda tukese: 6 834 740

• Broshire: 167 854 462

• Tulandriye: 5 405 955

• Bibejibeji: 1 179 266 348

• Trakte: 440 995 740

• Bande ya video: 3 168 611

Badi bapatula mikanda mu Afrike, mu Amerike wa ku Nord, wa pankatshi ne wa ku Sud, mu Asia, ku Mputu ne mu bidiila bia mu Pasifike: mu matunga 19.

“Dîna dianyi n’Katelyn May. Ndi ne bidimu muanda mukulu. Ndi nnutumina dolare yanyi 28 eyi bua kupatula mikanda. Meme Katelyn, muanenu mutekete wa bakaji.”

“Tuvua bayukile mu dîku dietu bua tshilumbu tshia biamu bipiabipia bia dipatula nabi mikanda. Bana betu (umue wa bidimu 11, mukuabu wa bidimu 9) bakangata dipangadika dia kunutumina makuta abu avuabu balame. Tudi ne disanka dia kunutumina makuta abu aa pamue ne etu.”

 DIBAKA NZUBU

Kuinshi eku nenumone imue midimu ya dibaka nzubu idi mienzeke bua kukuatshisha midimu ya Bantemu ba Yehowa:

• Nzubu ya Bukalenge mu matunga mapele: 2 180

• Nzubu ya mpuilu: 15

• Biro bia filiale: 10

• Bena budisuile ba mu matunga mashilangane badi mu mudimu wa ku dîba ne ku dîba: 2 342

“Lumingu elu tudi benzele bisangilu bua musangu wa kumpala mu Nzubu wetu wa Bukalenge mupiamupia. Tudi ne disanka dia bungi bua kuikala ne muaba muimpe wa kutumbishila Tatu wetu, Yehowa Nzambi. Tudi tuela Yehowa tuasakidila ne nuenu kabidi bua munudi batabalele majinga etu ne batuibakile Nzubu ya Bukalenge. Bulelela, Nzubu wetu wa Bukalenge mmulengeje muaba utudi basombele.”​—Chili.

“Bana betu badi basanka bikole bua mudi bulongolodi bua Yehowa butuambuluishe. Too ne mpindieu, tutshidi anu tuakula bua tshikondo tshimpe tshituvua ne kasumbu ka bibaki.”​—Moldavie.

“Meme ne mukajanyi tudi bakumbaje bidimu 35 bia dibaka. Tuvua tukeba tshituvua mua kupeshangana bua bidimu 35 bia dibaka dietu, ke tuetu kuangata dipangadika dia kupesha Yehowa ne bulongolodi buende tshintu, bualu bu kabiyi buabu bobu, imue misangu dibaka dietu kadivua mua kufika kutudi eku to. Tudi basue ne: makuta atudi tutuma aa ambuluishe bua kuibaka Nzubu wa Bukalenge mu dimue ditunga dipele.”

“Matuku adi panshi aa ndi mupete makuta amvua ne bua kupiana, kadi bu mundi tshiyi ‘dijinga’ ne bintu bia bungi, ndi musue nuangate makuta aa bua kuibaka Nzubu ya Bukalenge, idi bena mu matunga mapele nayi dijinga bikole.”

 DIAMBULUISHA BADI NTATU IKUATA

Mu matuku a ku nshikidilu aa, ntatu itu itulukila bantu. Bantemu ba Yehowa ba bungi batu bafila mapa makuabu bua kuambuluisha bana babu ba imue miaba badi ntatu mikuate. Tumanyayi ne: mapa aa adi pawu mu mapa a mudimu wa pa buloba bujima. Mbambuluishe bantu mu:

• Afrike

• Asia

• Bidiila bia Caraïbes

• Bidiila bia mu Mbuu wa Pasifike

“Meme ne bayanyi tudi basue kunuela tuasakidila wa bungi bua munuvua batutumine bintu bua kutuambuluisha bua bipepele bikole bivua bitukengeshe. Bintu abi biakatuambuluisha bua kuela musaka mupiamupia ku nzubu. Tudi tunuela tuasakidila wa bungi bua munuvua batuambuluishe ne lukasa luonso.”

“Dîna dianyi n’Connor, ndi ne bidimu 11. Pamvua mumone muvua tshikumina tshia mu mâyi tshinyange bintu bia bantu, ngakumvua muoyo wa kubambuluisha panyi. Ndi ngela meji ne: makuta aa neambuluishe bana betu ba balume ne ba bakaji.”

 BASADIDI BA KU DÎBA NE KU DÎBA BA PA BUABU

Kudi bena Kristo badi benza mudimu wa ku dîba ne ku dîba mu buambi anyi ku nzubu ya Betele. Batu bambuluisha bamue bena budisuile ba ku dîba ne ku dîba aba ne mapa a ku budisuile. Munkatshi muabu mudi:

• Bamisionere: 2 635

• Batangidi bena ngendu: 5 325

• Bena ku Betele: 20 092

“Bu mundi tshiyi mua kuya ku Betele mpindieu [muana wa balume wa bidimu bitanu], ndi ntuma makuta aa ne disanka dionso. Pangakola, nengenze panyi mudimu ku Betele.”

Mudimu wa kulongesha bantu Bible

Yezu Kristo wakambila bayidi bende bua ‘kuvuija ba bisamba bionso bayidi.’ (Matayo 28:19) Bua kutumikila mêyi aa, Bantemu ba Yehowa badi bayisha ne balongesha Dîyi dia Nzambi mu matunga 235. Badi bapatula ne babanya mikanda ya malu a Nzambi mu miakulu 413.

Bulelela, tshintu tshitambe buimpe tshidi muena Kristo mua kufila bua kuambuluisha bantu bavule bua kulonga malu a Nzambi ndîba diende. Bantemu ba Yehowa mbafile dîba diabu dia bungi ne bukole buabu bua kuambuluisha bantu bakuabu. Mbafile kabidi makuta a bungi adi mambuluishe mu mishindu mishilangane bua kumanyisha dîna dia Yehowa ne malu ende pa buloba bujima. Yehowa atungunuke ne kubenesha bionso bidibu benza bua kuambuluisha bakuabu bua kumumanya. (Nsumuinu 19:17) Yehowa udi usanka bikole padiye umona mudibu badifila bua kuambuluisha bakuabu.​—Ebelu 13:15, 16.

[Kazubu mu mabeji 28-30]

Mishindu idi bamue bafila mapa

MAPA BUA MUDIMU WA PA BULOBA BUJIMA

Bantu bavule batu balama ndambu wa mfranga bua kuela mu tushete tua “Mapa bua mudimu wa pa buloba bujima​—Matayo 24:14.”

Ku ngondo yonso bisumbu bitu bituma mfranga eyi ku biro bia Bantemu ba Yehowa bidi bitangila mudimu wa ditunga diabi. Bantu badi mua kutuma kabidi sheke anyi mfranga eyi buludiludi ku Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, anyi ku biro bia Bantemu ba Yehowa bidi bitangila mudimu wa ditunga diabu. Sheke idibu batuma mu adrese eu idi ne bua kuikala mu dîna dia “Watch Tower.” Nudi mua kufila nansha bilengejilu bu mudi mpeta ne bikanu bia or peshi bintu bikuabu bia mushinga mukole. Mapa enu aa nuatume ne mukanda muipi udi uleja ne: nudi baatume bua kashidi.

DILAMISHA MAKUTA

Muntu udi mua kusombesha Watch Tower mfranga bua enza nayi mudimu miaba yonso idiye musue. Wewe musue kumanya malu makuabu, udi mua kufundila biro bia Treasurer’s Office mu adrese udi kulu eku.

MAPA MALONGOLOLA

Pa kumusha mapa a mfranga mifila bua kashidi, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Tudi mua kutela:

Mfranga ya tshieya: Muntu udi mua kushila Watch Tower bukenji bua kuangata mfranga yende ya tshieya anyi ya pansio.

Konte ya ku banke: Muntu udi mua kufundisha konte yende ya ku banke, mikanda ya mfranga mitekesha ku banke anyi konte yende ya mfranga ya pansio mu dîna dia Watch Tower anyi kufunda bua kuyifutabu Watch Tower dîba dia lufu luende, bilondeshile mikenji ya banke ya muaba udiye.

Bukenji bua kupeta bintu ne mfranga misombesha: Badi mua kupesha Watch Tower bukenji bua kupeta bintu ne mfranga misombesha bu dipa dia kashidi.

Mpangu ne Nzubu: Muntu udi mua kufila lupangu anyi nzubu wende bua kashidi, kadi utungunuka ne kusombamu patshidiye ne muoyo. Bidi bikengela kumanyisha biro bia filiale bidi mu ditunga dienu kumpala kua kumupesha lupangu anyi nzubu.

Dipa dia kufuta ku tshidimu: Etshi ndipa dia muntu wangata makuta anyi mikanda ubifila kudi biro bia Bantemu ba Yehowa. Pashishe muntu eu (anyi mukuabu udiye musungule) udi utuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila Watch Tower bintu anyi mfranga yende, peshi kumupa bukenji bua kuangata bintu bidiye mulamisha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena-Espagne kadi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde kakanda aka bua kuleja mishindu mishilangane idibu mua kufila mapa ne bintu bia bumpianyi. Kunyima kua bantu ba bungi bamane kubala kakanda aka ne bayukile ne aba batu babapesha mibelu mu malu a mikenji anyi a bitadi, mbafike ku dikuatshisha mudimu wa Nzambi ne wa diambuluisha bantu udi Bantemu ba Yehowa benza pa buloba bujima, ne bungi bua makuta a bitadi biabu mbukepele. Udi mua kulomba kakanda aka ku Charitable Planning Office (Biro bia Mapa Malongolola).

Udi mua kufundila Charitable Planning Office anyi kuela nshinga mu adrese udi kuinshi eku, peshi ku biro bia Bantemu ba Yehowa bidi bitangila mudimu mu ditunga dienu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefone: (845) 306-0707

[Mêyi a dianyisha bua tshimfuanyi mu dibeji 27]

Faithful video: Stalin: U.S. Army photo