Nkonko ya babadi

Muena Kristo udi mua kushala ne kondo ka muoyo kimpe padiye witaba mudimu udi umulomba bua kuikala ne tshingoma anyi?

Bantemu ba Yehowa pa buloba bujima kabatu balengulula bujitu budi Nzambi mubapeshe bua kukebela bena dîku diabu bintu bidibu nabi dijinga. (1 Timote 5:8) Tshidibi, kudi midimu mikuabu idi ishipa mikenji ya Nzambi itudi katuyi mua kuenza to, bu mudi: midimu ya manaya a mfranga, kukuata mudimu bibi ne mashi ne eyi idi isaka bantu bua kunua makanya. (Yeshaya 65:11; Bienzedi 15:29; 2 Kolinto 7:1; Kolosai 3:5) Kadi midimu mikuabu, nansha mudi Bible kayi uyikandika buludiludi, idi mua kunyanga kondo ka muoyo ka muntu anyi ka bakuabu.

Tshilejilu, muntu nkayende ke udi ne bua kudiangatshila dipangadika dia kuitaba anyi kubenga mudimu udi umulomba bua kuikala ne tshingoma. Kadi mudimu eu udi mua kumufikisha ku dipia dibanza dia mashi yeye mutshiasa muntu. Nunku, muena Kristo udi ne bua kuela meji bimpe ne kusambila bua kumona ni udi mua kuitaba bua kuasa anyi kubenga kuasa muntu tshingoma. Kuikala ne tshingoma kudi kabidi mua kufikisha muntu ku lufu anyi ku ditapika bikala bantu bakeba kumuluisha anyi kumuenzela bibi.

Dipangadika didi muntu wangata didi kabidi mua kutangila bakuabu. Tshilejilu, mudimu munene wa muena Kristo nkuyisha lumu luimpe lua Bukalenge bua Nzambi. (Matayo 24:14) Mbimpe kulongesha bakuabu bua ‘kuikala ne bantu bonso ditalala,’ patudi tuetu tuenza mudimu udi utulomba bua kuikala ne tshingoma anyi? (Lomo 12:18) Netuambe tshinyi bua bana ne bena mu dîku bakuabu? Kuikala ne tshingoma mu nzubu kudi mua kubenzela bibi anyi? Tudiebeje ne: bantu bakuabu kabena mua kulenduka bua dipangadika didi muntu muangate anyi?​—Filipoi 1:10.

Mu matuku ‘a ku nshikidilu’ aa, bantu ba bungi badi ne ‘luonji ne ki mbasue malu mimpe’ to. (2 Timote 3:1, 3) Bua bualu ebu, muntu udiku mua kushala ‘kayi mua kubandibua’ yeye muitabe mudimu udi umulomba bua kuikala ne tshingoma ne udi mua kumubuejakaja ne bantu ba nunku anyi? (1 Timote 3:10) Tòo. Ke bualu kayi, tshisumbu katshiena mua kumona muntu eu bu udi ‘kayi ne bilumbu’ yeye utungunuka ne kuikala ne tshingoma nansha kunyima kua bamane kumubela ne Dîyi dia Nzambi. (1 Timote 3:2; Tito 1:5, 6) Nunku, muntu eu (mulume anyi mukaji) kabena mua kumuitabila bua kuenza midimu ya pa buayi mu tshisumbu to.

Yezu wakambila bayidi bende ne: bobu bateke malu a Bukalenge pa muaba wa kumpala, kabakuditatshisha bikole bua bintu bikuabu ebi to. (Matayo 6:25, 33) Bushuwa, tuetu beyemene Yehowa ne muoyo wetu mujima, ‘yeye neatukoleshe; kêna witabuja tshiendelele bua bantu bakane banyungishibue.’​—Musambu 55:22.