Tshia-bupikudi tshidi tshileja buakane bua Nzambi

PAKATOMBOKA Adama ne Eva, Yehowa wakalaya Dimiinu divuabu ne bua kusuma ku tshikankanyi. (Genese 3:15) Bualu ebu buakenzeka dîba divua baluishi ba Nzambi bashipe Yezu Kristo pa mutshi wa makenga. (Galatia 3:13, 16) Yezu kavua ne bubi to, bualu nsongakaji utshivua kamama ke wakimita difu diende mu tshishima ku bukole bua nyuma muimpe. Ke bualu kayi bavua mua kufila mashi ende bu mushinga wa kupikula nawu bantu bavua bapiane bubi ne lufu kudi Adama.​—Lomo 5:12, 19.

Kakuena tshintu tshidi mua kupangisha Yehowa Nzambi wa bukole buonso bua kukumbaja tshidiye mulongolole to. Nunku, pakenza bantu mpekatu, Yehowa uvua mumone anu bu se: bakavua bafute tshia-bupikudi nansha muvuabu kabayi banji kutshifuta ne uvua mua kudia malanda ne bantu bavua bitabuja malu avuaye mulaye. Bualu ebu buakambuluisha ndelanganyi ya Adama ivua mipiane bubi bu mudi Hanoka, Noa ne Abalahama bua kuenda ne Nzambi ne kudia nende bulunda, kabiyi binyanga bunsantu bua Nzambi.​—Genese 5:24; 6:9; Yakobo 2:23.

Kadi bamue bantu bavua bitabuje Yehowa bakenza bilema binene. Tuangate tshilejilu tshia Mukalenge Davidi. Udi mua kudiebeja ne: ‘Mmunyi muvua Yehowa mua kutungunuka ne kubenesha Mukalenge Davidi nansha muvuaye muende ne Beta-sheba ne mushipeshe bayende Uliya?’ Bivua nanku bualu Davidi uvua ne ditabuja ne uvua munyingalale ne muoyo wende mujima bua mibi yende ne muyilekele. (2 Samuele 11:1-17; 12:1-14) Nzambi wakashindamena pa mulambu uvua Yezu Kristo ne bua kulua kufila bua kufuila Davidi luse ne kulama buakane Buende. (Musambu 32:1, 2) Bua kujadika muanda eu, Bible udi uleja tshintu tshitambe bunene tshidi mulambu wa Yezu mukumbaje wamba ne: ‘mbua kuleja buakane bua Nzambi mu dipita diende dia malu mabi akenzabu diambedi’ ne ‘mu tshikondo etshi.’​—Lomo 3:25, 26.

Eyowa, bantu badi bapeta masanka a bungi bua mushinga wa mashi a Yezu. Ku diambuluisha dia tshia-bupikudi, bantu badi benze malu mabi kadi banyingalale ne baalekele, badi mua kudia bulunda ne Nzambi. Tshia-bupikudi tshidi kabidi tshipesha bantu  njila wa kujuka ku lufu mu bulongolodi bupiabupia bua Nzambi. Nunku, bena lulamatu bakavua bafue kumpala kua Yezu kufuaye nebajuke; nansha bantu ba bungi bavua bafue mu dipanga ne kabayi batendelele Nzambi nebajuke pabu. Bible udi wamba ne: ‘Dibika dia bafue nedikaleku, ne dia bakane ne dia babi.’ (Bienzedi 24:15) Mu tshikondo atshi, Yehowa neapeshe bantu badi bamutumikila muoyo wa tshiendelele anu bua tshia-bupikudi. (Yone 3:36) Yezu muine wakamba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Bantu nebapete masanka onso aa bualu Nzambi uvua mulongolole bua bafute mulambu wa tshia-bupikudi.

Kadi bualu bua mushinga mukole bua tshia-bupikudi ki mmasanka atudi tupeta to. Bualu bua mushinga mukole mbudi mulambu wa Kristo wenzela dîna dia Yehowa. Mulambu eu udi uleja ne: Yehowa n’Nzambi wa buakane buonso ne udi mua kudia malanda ne bantu babi kadi kushala anu mukezuke ne munsantu. Bu Nzambi kayi mulongolole bua kufuta tshia-bupikudi, kakuvua muana wa Adama nansha umue uvua mua kuenda nende anyi kulua mulunda wende to, nansha Hanoka, Noa anyi Abalahama. Mufundi wa Misambu wakajingulula bualu ebu e kufundaye ne: ‘Yehowa, bu wewe mubale dipambuka dia bantu, mmuntu kayi uvua mua kuimana, Mukalenge?’ (Musambu 130:3) Tudi ne bua kuela Yehowa tuasakidila wa bungi bua muvuaye mutume Muanende munanga pa buloba ne kuela kabidi Yezu tuasakidila bua muvuaye muitabe bua kulambula muoyo wende bua bualu buetu.​—Mâko 10:45.