Muakuidi Munene wakakosela Yezu tshibawu tshia lufu

MU NGONDO wa dikumi ne umue mu 1990, bantu bavua benza mudimu mu dîtu ne mu njila kampanda mutantshi wa kilometre bu umue ne Tshimenga tshia kale tshia Yelushalema bakapeta tshintu tshia dikema. Katumba kakabuyisha lukita lukuabu lua kale mu mpukapuka. Tshitupa atshi tshivua nkita minene ya kale ya kubangila mu bidimu 100 bia kumpala kua bikondo bietu ebi too ne mu bidimu 100 bia tshikondo tshietu etshi. Kadi tshivua bakebuludi ba bintu bia muinshi mua buloba bapete ke tshivua tshikemeshe bikole.

Lukita alu luvua ne tushete 12 tuvuabu bateke mifuba ya bafue panyima pa bamane kuenza tshidimu bu tshimue mu lukita ne minyinyi ya pambidi pabu mimane kubola yonso. Pa kashete kamue (ka ku tushete tuimpe menemene tukadibu bapete) pavua dîna dia Yehosef bar Caiapha (Yosefe muana wa Kayafa).

Kashete aka kavua kaleja ne: tshivua mua kuikala lukita lua muakuidi munene uvua mulombole kabadi kavua kalumbuluishe Yezu Kristo. Josèphe, muena Yuda ne mufundi wa malu a kale, wakabikila muakuidi munene eu ne: “Yosefe uvuabu babikila ne: Kayafa.” Badi bamubikila mu Bible ne: Kayafa. Bua tshinyi malu ende adi ne mushinga? Ntshinyi tshivua tshimusake bua kukosela Yezu tshibawu tshia lufu?

Dîku diende ne malu makuabu

Kayafa uvua musele muana wa muakuidi munene mukuabu Ana. (Yone 18:13) Mbimueneke ne: bakavua balongolole dibaka adi bidimu ndambu kumpala bu muvua mêku onso abidi masue bua dikale dibaka dimpe. Bivua bilomba kulondolola malu a mêku bimpe bua kujadika menemene ni bavua mu mêku a bakuidi. Mbimueneke ne: mêku abidi aa avua a bantu banene ne mikale ne biuma, pamuapa bavua ne mpangu minene mu Yelushalema. Kakuyi mpata, Ana uvua musue bua muku wende ikale muntu uvuaye mua kueyemena mu malu a tshididi. Bidi bimueneka ne: Ana ne Kayafa bavua bonso mu kasumbu ka Basadoke.​—Bienzedi 5:17.

Bu muvua Kayafa ufumina mu dîku dia bakuidi ne dia bantu banene, uvua mua kuikala mulonge Mifundu Minsantu ya tshiena-Ebelu  ne diumvuija diayi. Uvua mua kuikala mutuadije mudimu ku ntempelo pavuaye ne bidimu 20, kadi katuena bamanye bidimu biakaluaye muakuidi munene to.

Bakuidi banene ne bamfumu ba bakuidi

Kumpala, bavua bapiana mudimu wa buakuidi bunene uvua unenga matuku onso a muoyo wa muntu. Kadi mu bidimu bia lukama ne pa mutu kumpala kua bikondo bietu ebi, bena Asmona bakadiangatshila mudimu eu. * Helode Munene uvua uteka bakuidi banene ne ubumbusha, uleja patoke ne: yeye ke uvua ne dîyi dia kuteka bakuidi. Bangovena ba bena Lomo bakalonda dikasa diende.

Nsombelu eu wakafikisha ku dienza kasumbu kadi Bible ubikila ne: “Bamfumu ba bakuidi.” (Matayo 26:3, 4, Muanda Mulenga Lelu [MML]) Pa kumbusha Kayafa, kasumbu aka kavua ne bakuidi banene ba kale, bu mudi Ana ukavuabu bumbushe kadi uvuabu batungunuke ne kubikila nanku. Mu kasumbu aku muvua kabidi mêku a bakuidi banene ba tshikondo atshi ne ba kale.

Bena Lomo bakalekela banene ba bena Yuda pamue ne bakuidi banene mudimu wa kutangila malu a buatshia-buila. Bivua biambuluisha bena Lomo bua kutangila provense ne malu a bitadi bivua bifuminamu kakuyi bualu bua kutumamu basalayi ba bungi to. Bena Lomo bavua basue bua bamfumu ba bena Yuda kulama ditalala ne kutangila malu abu. Bangovena bena Lomo kabavua batamba kunanga bamfumu ba bena Yuda bavua kabayi bitaba bukokeshi bua bena Lomo to. Kadi bonso bavua ne bua kuenza mudimu pamue bua mbulamatadi kushindamaye.

Mu tshikondo tshia Kayafa, muakuidi munene uvua mulombodi wa tshididi wa bena Yuda. Quirinius uvua ngovena muena Lomo wa mu Sulia ke wakateka Ana mu nkuasa mu tshidimu 6 anyi tshia 7 bikondo bietu ebi. Malu a kale a Barabi adi aleja ne: mêku a bantu banene avua ne lukuka ne kansungasunga ne avua ne tshikisu ne akengeshangana. Tshilejilu, mufundi kampanda udi wela meji ne: bu muvua Ana muakuidi munene, uvua ne bua kuenza muende muonso bua muku wende “kubanda mianzu ya ku ntempelo lukasa; pavua Kayafa ubanda mianzu bikole ke pavuaye mua kuambuluisha Ana bimpe.”

Valerius Gratus, ngovena wa Yudeya, wakumbusha Ana bu mu tshidimu tshia 15 bikondo bietu ebi. Bantu basatu bakuabu (pamue ne muana wa Ana umue) bakalondangana ne lukasa mu buakuidi bunene. Kayafa wakalua muakudi munene bu mu tshidimu tshia 18. Ponto Pilato (wakalua ngovena wa Yudeya mu 26) wakamulama munkatshi mua bidimu bionso dikumi bivuaye ngovena. Kayafa ke uvua muakuidi munene dîba divua Yezu uyisha ne mu bidimu bia ku ntuadijilu bia mudimu wa bayidi bende. Kadi Kayafa kavua musue mukenji wa bena Kristo nansha.

Uvua utshina Yezu, utshina ne bena Lomo

Kayafa uvua umona Yezu bu muntu uvua ukebesha ndululu. Tshilejilu, Yezu wakabenga diumvuija dia mikenji ya Nsabatu divua bamfumu bafila ne wakipata bangenda-mushinga ne bashintudi ba makuta ku ntempelo, wamba muvuabu bavuije ntempelo “muaba wa banyengi.” (Luka 19:45, 46) Bamue bafundi badi bela meji ne: bisalu bia ku ntempelo abi bivua bia bena mu nzubu wa Ana, pamuapa ke bua tshinyi Kayafa uvua musue kabidi kushipa Yezu. Pavua bamfumu ba bakuidi batume bantu bua kukuata Yezu, mêyi ende akabakemesha bikole ne kupinganabu bianza bitupu.​—Yone 2:13-17; 5:1-16; 7:14-49.

Tangila tshiakenzeka pavua bamfumu ba bena Yuda bumvue ne: Yezu uvua mubishe Lazalo. Tudi tubala mu Yone ne: ‘Bakuidi banene ne Bafalese bakadisangisha mu tshifufu, bakakonkangana ne: Muntu eu udi wenza bimanyinu bia bungi, netuenze tshinyi? Bituamulekela patupu, bantu bonso nebamuitabuje; bena Lomo nebalue, nebanyenge muaba wetu ne tshisamba tshietu.’ (Yone 11:47, 48) Bena ku Kabadi kakulu ka bena Yuda bavua bangata Yezu bu muntu uvua mua kunyanga ntendelelu  wabu ne ditalala divua Pilato mubambile bua kuteka mu ditunga. Tshintu tshionso tshivua bena Lomo mua kumona bu tshia buntomboji tshivua tshibasaka bua kubuelakana mu malu a bena Yuda, kadi bena Kabadi aba kabavua basue bua bualu ebu kuenzeka to.

Nansha muvua Kayafa kayi mua kuvila bishima bivua Yezu wenza, kakamuitabuja to, bualu uvua ukeba anu bua kulama mudimu ne bukokeshi buende. Mmunyi muvuaye mua kubenga kuvila dibika dia Lazalo? Bu muvua Kayafa muena Sadoke, kavua witaba dibishibua dia bantu ku lufu to.​—Bienzedi 23:8.

Muoyo mubi wa Kayafa wakamueneka pakambilaye bakokeshi nende ne: ‘Nuenu kanuena bamanye bualu, kanuena nuela meji ne: Mbualu buakane kunudi bua muntu umue afuile bantu, ne tshisamba tshionso katshifu’ to. Bible udi wamba kabidi ne: ‘Yeye kakadiambila dîyi edi; kadi bualu bua yeye wakadi pa mutu pa bakuidi tshidimu atshi, wakamba bualu buakadi kabuyi buanji kulua ne: Yezu neafuile tshisamba tshietu; yeye kakafuila anu tshisamba tshimue, kadi wakafuila bua kusangisha mu tshisumbu tshimue bana ba Nzambi bakadi batangalake. Ku dituku adi too bakadi basangisha dîyi diabu bua kushipa Yezu.’​—Yone 11:49-53.

Kayafa kavua mumvue bimpe tshivuaye muambe to. Bu muvuaye muakuidi munene, wakamba malu a tshiprofete. * Lufu lua Yezu luvua ne mushinga, kadi ki mbua bena Yuda nkayabu to. Mulambu wende wa tshia-bupikudi uvua ne bua kupikula bantu bonso ku bupika bua bubi ne lufu.

Tshitungu tshia kushipangana

Bamfumu ba bakuidi ne bakulu bakadisangisha ku nzubu kua Kayafa bua kumona mushindu wa kukuata Yezu ne kumushipa. Imue misangu muakuidi munene uvua pende muyukile ne Yudasa Isakaliote bua mushinga wa kutungila nawu Yezu. (Matayo 26:3, 4, 14, 15) Kadi kushipa muntu umue kakuvua kukumbaja tshipatshila tshia Kayafa to. ‘Bakuidi banene bakasangisha dîyi diabu bua kushipa Lazalo kabidi, bualu Bena Yuda ba bungi bakadi bitabujila Yezu bua bualu buende.’​—Yone 12:10, 11.

Malako, mupika wa Kayafa, uvua munkatshi mua bantu bavuabu batume bua kukuata Yezu. Bakanji kuya ne Yezu kua Ana bua bamuele nkonko ne pashishe kua Kayafa ukavua mumvuangane ne bakulu ba bena Yuda bua kulumbuluisha Yezu butuku (tshintu tshivua mikenji ibenga).​—Matayo 26:57; Yone 18:10, 13, 19-24.

Kayafa kakapingana tshianyima pavua bantemu ba dishima kabayi bapetangane pa malu avuabu bafunda nawu Yezu to. Kayafa uvua mumanye lungenyi lua bantu bavua nende bua muntu yonso uvua mua kudiamba Masiya. Ke yeye kujinga kumanya bikala Yezu uvua udiamba Masiya. Yezu wakandamuna ne: bantu bavua bamutungile abu bavua ne bua kulua kumumona ‘musombe ku tshianza tshia balume tshia bukole, ulua pa matutu mu diulu.’ Bua kuleja ditshina dia Nzambi dia mafi, ‘muakuidi munene wakadipandila bilamba biende, wakamba ne: Yeye wakuamba dîyi dia kupenda Nzambi; tudi ne bualu bua bamanyi kabidi kudi kunyi?’ Bena ku Kabadi bakitaba ne: Yezu uvua muakanyine lufu.​—Matayo 26:64-66.

Bena Lomo bavua ne bua kuanji kufila dianyisha bua dishipa dionso dia muntu. Bu muvua Kayafa mutuangaji wa bena Lomo ne bena Yuda, yeye ke uvua imue misangu mukuatshile Pilato tshilumbu tshia Yezu. Pavua Pilato mukebe kulekela Yezu, Kayafa uvua pende pamuapa munkatshi mua bamfumu ba bakuidi bakela mbila ne: ‘Umushipe ku mutshi, umushipe ku mutshi.’ (Yone 19:4-6) Pamuapa Kayafa ke uvua musake bantu bua kuela mbila bua kulomba bua balekele mushipianganyi kampanda pamutu pa Yezu, ne uvua mua kuikala munkatshi mua bamfumu ba bakuidi bakamba ne lubombo luonso ne: ‘Katuena ne mukalenge mukuabu, anu Kaisa.’​—Yone 19:15; Mâko 15:7-11.

Kayafa wakabenga bijadiki bia dibishibua dia Yezu. Wakakengesha Petelo ne Yone ne pashishe Stefano. Kayafa wakanyishila kabidi Shaula bua kukuata muena Kristo yonso uvuaye mua kupeta ku Damaseke. (Matayo 28:11-13; Bienzedi 4:1-17; 6:8–7:60; 9:1, 2) Kadi mu tshidimu bu  tshia 36, Vitellius (ngovena wa mu Sulia) wakumbusha Kayafa mu buakuidi bunene.

Bafundi bena Yuda badi bakula bibi bua dîku dia Kayafa. Tshilejilu, mukanda wa Talmud wa bena Babulona udi wamba ne: “Diakabi dianyi bua nzubu wa Hanin [Ana], diakabi dianyi bua midiabakenu yabu,” anyi “mashimi abu.” Batu bamba ne: lubila elu ludi luakula bua “masangisha a mu musokoko bua kukeba mishindu ya kukengeshangana.”

Dilongesha ditudi tupetela kudi Kayafa

Mumanyi kampanda wakaleja muvua bakuidi banene bikale “bena malu makole, badimuke ne bamanye malu a bungi, ne pamuapa bena lutambishi.” Lutambishi luakapangisha Kayafa bua kuitaba Masiya. Nunku katuena mua kukema padi bantu babenga mukenji wa mu Bible lelu to. Malongesha a mu Bible kaena akoka bakuabu bua balekele malongesha adibu banange to. Bakuabu pabu badi mua kumona ne: kulua mumanyishi wa lumu luimpe nkudipuekesha milongo ne ki nkubakumbanyine nansha. Mikenji ya bena Kristo idi kabidi inyemesha bantu badi bapange bululame anyi bena lukuka.

Bu muvua Kayafa muakuidi munene, uvua mua kuambuluisha bena Yuda nende bua kuitaba Masiya, kadi dijinga dia kukokesha diakamusaka bua kukosela Yezu tshibawu tshia lufu. Buluishi ebu buakatungunuka imue misangu too ne ku lufu lua Kayafa. Muyuki wende udi uleja ne: patudi tufua, katuena tushiya anu mifuba to. Kadi bienzedi bietu bidi bitushiya ne lumu kampanda kudi Nzambi bua malu mabi anyi bua malu mimpe.

[Mêyi adi kuinshi]

[Tshimfuanyi mu dibeji 10]

Yosefe muana wa Kayafa

[Tshimfuanyi mu dibeji 10]

Kashete ka mifuba kadibu bapete

[Mêyi a dianyisha bua bimfuanyi mu dibeji 10]

Kashete ka mifuba, miaku mifunda, ne nyongolo lua panyima: Ne dianyisha dia Israel Antiquities Authority