Disangisha dia bintu bia mu diulu ne bia pa buloba

‘Dijinga diende dilelela ndia kusangisha tshiakabidi bintu bionso mu Kristo, bintu bidi mu diulu ne bintu bidi pa buloba.’​—EFESO 1:9, 10, NW.

1. ‘Dijinga dilelela’ dia Yehowa bua diulu ne buloba ndia kuenza tshinyi?

YEHOWA “Nzambi wa ditalala” mmusue ne: kuikale DITALALA MU DIULU NE PA BULOBA. (Ebelu 13:20) Wakasaka mupostolo Paulo bua kufunda ne: ‘Dijinga dilelela’ didiye nadi ndia ‘kusangisha tshiakabidi bintu bionso mu Kristo, bintu bidi mu diulu ne bintu bidi pa buloba.’ (Efeso 1:9, 10, NW) Muaku wa pa muanda udibu bakudimune ne: ‘kusangisha tshiakabidi’ mu mvese eu udi umvuija tshinyi? Mumanyi wa malu a Bible John Lightfoot udi wamba ne: “Muaku eu udi umvuija diumvuangana dia bintu bidi mu diulu ne pa buloba; kabiakuikala bishilangane ne bitapuluke kabidi to, kadi bitupa biabi bionso nebipetangane mu Kristo. Bubi ne lufu, tunyinganyinga ne diteketa ku muoyo ne makenga nebijike.”

‘Bintu bidi mu diulu’

2. ‘Bintu bidi mu diulu’ bidibu ne bua kusangisha mbanganyi?

² Mupostolo Petelo wakakula mu tshikoso bua ditekemena dilenga didi nadi bena Kristo balelela mu mêyi aa: ‘Bu mudi mulayi wende tudi tutekemena diulu dipiadipia ne buloba bupiabupia mudi buakane buikalemu.’ (2 Petelo 3:13) ‘Diulu dipiadipia’ edi mbulamatadi mupiamupia anyi Bukalenge bua Masiya. Badi ne bua kusangisha ‘mu Kristo bintu bidi mu diulu’ bivua Paulo mutele mu mukanda uvuaye mutumine bena Efeso. Bintu ebi mbantu bungi kampanda badibu basungule bua kukokesha ne Kristo mu diulu. (1 Petelo 1:3, 4) Bena Kristo bela manyi aba 144 000 ‘bakasumbibua mu ba pa buloba,’ ‘bakasumbibua munkatshi mua bantu,’ bua kupiana Bukalenge bua mu diulu ne Kristo.​—Buakabuluibua 5:9, 10; 14:3, 4; 2 Kolinto 1:21; Efeso 1:11; 3:6.

3. Bua tshinyi tudi mua kuamba ne: bela manyi ‘mbasombe mu miaba ya mu diulu’ nansha patshidibu pa buloba?

³ Bena Kristo bela manyi badi baledibua tshiakabidi mu nyuma muimpe bua kulua bana ba mu nyuma ba Yehowa. (Yone 1:12, 13; 3:5-7) Bu mudi Yehowa ubangata bu ‘bana bende,’ badi balua bana babu ne Yezu. (Lomo 8:15; Efeso 1:5) Bu mudibi nunku, nansha patshidibu pa buloba, badi babamba mudibu ‘babishibue ne basombe nende pamue mu miaba ya mu diulu mu Kristo Yezu.’ (Efeso 1:3; 2:6) Badi muaba mubandile wa mu nyuma eu bualu mbamane ‘kuangata tshimanyishilu tshia nyuma muimpe mulayibue, udi tshieya tshia bumpianyi buabu’ budi bubindile mu diulu. (Efeso 1:13, 14; Kolosai 1:5) Nunku, badi ‘bintu bidi mu diulu’ bidibu basangisha ne Yehowa ukavua mumane kufunda bungi buabu.

Disangisha didi dibangisha

4. Disangisha dia ‘bintu bidi mu diulu’ diakatuadija dîba kayi ne mushindu kayi?

⁴ Mu diumvuangana ne mushindu udi Yehowa uludika malu, disangisha dia ‘bintu bidi mu diulu’ divua ne bua kubangisha “ku ndekelu kua bikondo bijadika.” (Efeso 1:10, NW) Bikondo abi biakakumbana mu dituku dia Pentekoste wa mu tshidimu tshia 33 bikondo bietu ebi. Dituku adi, Nzambi wakela bapostolo ne bayidi bakuabu (balume ne bakaji) nyuma muimpe wende. (Bienzedi 1:13-15; 2:1-4) Bualu ebu buakaleja ne:  tshipungidi tshipiatshipia tshiakatuadija. Buvua kabidi ntuadijilu wa tshisumbu tshia bena Kristo ne wa tshisamba tshipiatshipia tshia Isalele wa mu nyuma anyi ‘bena Isalele wa Nzambi.’​—Galatia 6:16; Ebelu 9:15; 12:23, 24.

5. Bua tshinyi Yehowa wakenza “tshisamba” tshipiatshipia bua kupinga pa muaba wa Isalele wa ku mubidi?

⁵ Mu tshipungidi tshivua Nzambi mudie ne bena Isalele ba ku mubidi kamuakapatuka ‘bukalenge bua buakuidi ne tshisamba tshia tshijila’ tshivua mua kuenza mudimu mu diulu bua kashidi to. (Ekesode 19:5, 6) Yezu wakambila bamfumu ba bitendelelu bia bena Yuda ne: ‘Nebanunyenge bukalenge bua Nzambi, nebabupe tshisamba tshidi tshikuama mamuma abu.’ (Matayo 21:43) Tshisamba atshi (anyi Isalele wa mu nyuma) ntshienza ne bena Kristo bela manyi badi babuele mu tshipungidi tshipiatshipia. Petelo wakabafundila ne: ‘Nuenu nudi tshisamba tshisungula, ne bakuidi ba bukalenge, ne tshisamba tshia tshijila, bantu badi bikale ba Nzambi muine, bua nuenu nuambe bua buimpe bua Nzambi wakanubikila bua kunupatula mu mîdima bua kunubueja mu munya wende wa dikema. Mu tshikondo tshia diambedi kanuakadi bantu, kadi mpindieu nudi bantu ba Nzambi.’ (1 Petelo 2:9, 10) Bena Isalele wa ku mubidi kabavua kabidi tshisamba tshia Nzambi to. (Ebelu 8:7-13) Anu mukavua Yezu mumanyishe, bakabanyenga diakalenga dia kuikala mu Bukalenge bua Masiya ne bakadipesha bantu 144 000 ba mu Isalele wa mu nyuma.​—Buakabuluibua 7:4-8.

Badi babuela mu tshipungidi tshia Bukalenge

6, 7. Ntshipungidi kayi tshia pa buatshi tshivua Yezu mudie ne bana babu balela ku nyuma? Tshidi ne mushinga kayi buabu bobu?

⁶ Butuku buvua Yezu mubanjije Tshivulukilu tshia lufu luende, wakambila bapostolo bavua bashale bamulamate ne: ‘Nuenu mbakunanukila nanyi mu makenga anyi; ndi nnupa bukalenge bu muakumpa Tatu wanyi bukalenge, bua nuenu kudia ne kunua ku mêsa anyi mu bukalenge buanyi; nenushikame mu nkuasa ya butumbi nulumbuluisha bisamba dikumi ne bibidi bia Isalele.’ (Luka 22:28-30) Yezu udi wakula bua tshipungidi tshia pa buatshi tshivuaye mudie ne bana babu 144 000 bavua balela ku nyuma; bana babu aba bavua ne bua kushala ne ‘lulamatu too ne ku lufu’ ne kuikala ‘batshimunyi.’​—Buakabuluibua 2:10; 3:21.

⁷ Bantu badi mu kasumbu kakese aka badi balekela dijinga dia kusomba kashidi pa buloba bu bantu ba munyinyi ne mashi. Nebakokeshe ne Kristo mu diulu, basomba mu nkuasa ya butumbi bua kulumbuluisha bantu. (Buakabuluibua 20:4, 6) Tumonayi mpindieu mvese mikuabu idi itangila anu bela manyi ne idi ileja bua tshinyi bantu badi benza tshisumbu tshibikila ne: ‘mikoko mikuabu’ kabena badia diampa ne banua mvinyo mu Tshivulukilu.​—Yone 10:16.

8. Padi bela manyi badia diampa badi baleja tshinyi? (Tangila kazubu kadi mu dibeji dia 23)

⁸ Bela manyi nebapete makenga bu a Kristo ne mbitabe bua kufua lufu lua buena luende. Paulo uvua pende muela manyi wakamba ne: uvua mudilongolole bua kujimija bintu bionso anu bua ‘kupeta Kristo, bua kumumanya yeye ne bukole bua dibika diende ku lufu, ne buobumue nende mu makenga ende.’ Eyowa, Paulo uvua mudilongolole bua ‘kufuanangana nende mu lufu luende.’ (Filipoi 3:8, 10) Bena Kristo bela manyi ba bungi mbapete ‘ntatu ya dishipibua dia Yezu’ mu mibidi yabu.​—2 Kolinto 4:10.

9. Diampa dia mu Tshivulukilu didi dileja mubidi wa nganyi?

⁹ Pavua Yezu mubanjije Didia dia Mukalenge wakamba ne: ‘Etshi tshidi tshileja mubidi wanyi.’ (Mâko 14:22, NW) Uvua wakula bua mubidi wende uvuabu ne bua kututa ne kutapa mu mutantshi mukese amu. Diampa kadiyi diela buanga divua tshimfuanyi tshikumbanyine tshia mubidi au. Bua tshinyi? Bualu mu Bible, buanga bua mampa butu buleja bubi. (Matayo 16:4, 11, 12; 1 Kolinto 5:6-8) Yezu kavua ne kalema to, mubidi wende pavuaye pa buloba kauvua ne bubi to. Uvua mua kulambula  mubidi wende bua Nzambi afuile bantu luse. (Ebelu 7:26; 1 Yone 2:2) Difila mubidi wende divua ne bua kuambuluisha bena Kristo bimpe bonso, nansha badi baya mu diulu anyi badi bapeta muoyo wa tshiendelele mu mparadizu pa buloba.​—Yone 6:51.

10. Bantu badi banua mvinyo mu Tshivulukilu badi ‘mu buobumue mu mashi a Kristo’ mu mushindu kayi?

¹⁰ Paulo wakafunda bua mvinyo utu bela manyi banua mu Tshivulukilu wamba ne: ‘Lupanza lua disanka lutudi tuvudijila disanka kaluena buobumue buetu mu mashi a Kristo anyi?’ (1 Kolinto 10:16) Mmunyi mudi aba badi banua mvinyo bikale ‘mu buobumue mu mashi a Kristo’? Kabena balambula mioyo yabu bua kusungila bantu bakuabu to, bualu bobu pabu badi dijinga ne: babasungile. Padibu bitabuja bukole budi nabu mashi a Kristo bua kusungila bantu, Nzambi udi ujimija mibi yabu ne ubangata bu bantu bakanyine bua kuya mu diulu. (Lomo 5:8, 9; Tito 3:4-7) Ku diambuluisha dia mashi a Yezu, ‘mbajidile’ bantu 144 000 bakokesha ne Yezu, mbabateke ku luseke, mbabasukule ku mibi yabu bua kuluabu ‘bansantu.’ (Ebelu 10:29; Danyele 7:18, 27; Efeso 2:19) Kristo ‘wakasumbila Nzambi bantu ba mu tshisamba tshionso, ne ba mu muaku wonso, ne ba munkatshi mua bantu bonso, ne ba munkatshi mua ditunga dionso ku diambuluisha dia mashi ende nkayende. Ne wakabavuija bukalenge ne bakuidi kudi Nzambi wetu; ne bobu badi bakokesha pa buloba.’​—Buakabuluibua 5:9, 10.

11. Padi bela manyi banua mvinyo wa mu Tshivulukilu bidi bileja tshinyi?

¹¹ Pavua Yezu mubanjije Tshivulukilu tshia lufu luende, wakapesha bapostolo bende bavua ne lulamatu dikopo anyi lupanza lua mvinyo e kuamba ne: ‘Nuayi buonso buenu; bualu bua ludi luleja mashi anyi a dipungila akamatshila bantu ba bungi bualu bua kubajimijila mibi yabu.’ (Matayo 26:27, 28) Anu muvua mashi a ngombe ne mbuji majadike tshipungidi tshia mikenji pankatshi pa Nzambi ne bena Isalele, mashi a Yezu akajadika tshipungidi tshipiatshipia tshivua Yehowa ne bua kudia ne bena Isalele wa mu nyuma, kubangisha ku dituku dia Pentekoste wa mu tshidimu tshia 33. (Ekesode 24:5-8; Luka 22:20; Ebelu 9:14, 15)  Padi bela manyi banua mvinyo udi uleja ‘mashi a dipungila,’ badi baleja ne: mbabuele mu tshipungidi tshipiatshipia etshi ne badi bapetelaku masanka.

12. Mmunyi mudi bela manyi batambula mu lufu lua Kristo?

¹² Bela manyi badi bavuluka kabidi bualu bukuabu. Yezu wakambila bayidi bende bavua ne lulamatu ne: ‘Lupanza lundi nnua, nenulunue kabidi; nebanubatize ne dibatiza didibu bambatiza nadi.’ (Mâko 10:38, 39) Mupostolo Paulo wakalua kuakula bua bena Kristo badi ‘batambula mu lufu lua Kristo.’ (Lomo 6:3) Muoyo wa bela manyi mmuoyo wa mulambu. Lufu luabu ndua mulambu bualu badi balekela ditekemena dionso dia kuikala ne muoyo wa tshiendelele pa buloba. Ditambula dia bena Kristo bela manyi mu lufu lua Kristo didi dikumbana padibu bafua ne lulamatu ne bababisha bikale ne mubidi wa nyuma bua ‘kukokesha’ ne Kristo mu diulu.​—2 Timote 2:10-12; Lomo 6:5; 1 Kolinto 15:42-44, 50.

Kudia diampa ne kunua mvinyo

13. Bantu bashala pa buloba kabatu badia diampa ne banua mvinyo bua tshinyi? Kadi bua tshinyi batu babuela mu Tshivulukilu?

¹³ Bu mudi kudia diampa ne kunua mvinyo mu Tshivulukilu kumvuija malu onso aa, bidi bimueneka patoke ne: ki mbimpe bua bantu badi ne ditekemena dia kusomba pa buloba badie anyi banue bintu ebi to. Bantu bapeta muoyo pa buloba mbamanye ne: bobu kabena bitupa bia mubidi wa Kristo to, ne kabena mu tshipungidi tshidi Yehowa mudie ne aba bakokesha ne Kristo Yezu to. Bu mudi ‘lupanza’ lumvuija tshipungidi tshipiatshipia, anu bantu badi mu tshipungidi tshipiatshipia ke badi badia diampa ne banua mvinyo. Aba badi bindile muoyo wa tshiendelele pa buloba mu Bukalenge bua Nzambi kabena batambula mu lufu lua Yezu ne kabakukokesha nende mu diulu to. Bobu badia diampa anyi banua mvinyo, nebenze tshintu tshidi katshiyi tshibakumbanyine to. Nunku, kabena badia anyi banua, nansha mudibu babuela mu Tshivulukilu ne kanemu konso. Badi ne dianyisha dia bungi bua bionso bidi Yehowa mubenzele ku butuangaji bua Muanende, ne mudiye mubafuile luse bua mashi a Kristo.

14. Mmunyi mudi kudia mampa ne kunua mvinyo kukolesha bela manyi mu nyuma?

¹⁴ Ditua bena Kristo badi ne bua kukokesha ne Kristo mu diulu tshimanyinu dikadi pa kujika. Too ne ku ndekelu kua muoyo wa bela manyi pa buloba (wikalabu ne bua kulambula), kudia mampa ne kunua mvinyo mu Tshivulukilu kudi kubakolesha mu nyuma. Badi badiumvua mu buobumue ne bana babu bualu badi bitupa bia mubidi wa Kristo. Padibu badia mampa ne banua mvinyo badi bavuluka bujitu budibu nabu bua kushala balamate Nzambi too ne ku lufu.​—2 Petelo 1:10, 11.

Kusangisha ‘bintu bidi pa buloba’

15. Mbanganyi badi badisange kudi bena Kristo bela manyi?

¹⁵ Katshia mu tshidimu tshia 1935, ‘mikoko mikuabu’ ya bungi ikala mua kupeta muoyo wa tshiendelele pa buloba, mmilue kudisanga ne bela manyi. (Yone 10:16; Luka 12:32; Zekâya 8:23) Bantu aba mbalue balunda ba bana babu ne Kristo ne badi babambuluisha mu diyisha ‘lumu luimpe lua Bukalenge’ bu tshimanyishilu kudi bisamba bionso. (Matayo 24:14; 25:40) Padibu benza nunku, Yezu udi ubangata bu “mikoko” yende ne udi ubanyisha anyi ubateka ku ‘diboko diende dia balume’ paluaye kubutula bantu babi. (Matayo 25:33-36, 46) Padibu bitabuja mashi a Kristo, nebenze ‘musumba munene’ wapanduka ku “dikenga dinene.”​—Buakabuluibua 7:9-14.

16. Badi mu ‘bintu bidi pa buloba’ mbanganyi? Mmunyi muapetabu diakalenga dia kuikala “bana ba Nzambi”?

 ¹⁶ Ditua bantu 144 000 tshimanyinu tshia ndekelu nedifile njila bua kulekela ‘mpepele’ bua kubutula ndongoluelu mubi wa Satana pa buloba. (Buakabuluibua 7:1-4) Munkatshi mua Bidimu Tshinunu bia Bukokeshi bua Kristo ne bakuidi ne bakokeshi nende, bantu babishibua bungi kabuyi kubala nebadisange kudi musumba munene. (Buakabuluibua 20:12, 13) Bantu aba nebapete diakalenga dia kusomba pa buloba kashidi mu Bukalenge bua Yezu Kristo. Ku ndekelu kua Bidimu Tshinunu, nebatete bua musangu wa ndekelu ‘bintu bionso bidi pa buloba’ ebi. Bantu bashala balamate Nzambi nebalue “bana ba Nzambi” ba pa buloba.​—Efeso 1:10; Lomo 8:21; Buakabuluibua 20:7, 8.

17. Disua dia Yehowa nedikumbane munyi?

¹⁷ Nunku, ku diambuluisha dia mushindu udi Yehowa ulongolola malu, neakumbaje disua diende dia ‘kusangisha bintu bionso mu Kristo, ne bidi mu diulu ne bidi panshi pa buloba.’ Nzambi neasangishe bifukibua bionso bia meji bidi mu diulu ne bidi pa buloba bua bikale mu ditalala. Bifukibua ebi nebikale ne disanka dia bungi dia kutumikila Yehowa Nzambi Munene udi ukumbaja malu adiye mulongolole.

18. Mmunyi muikala dibuela mu Tshivulukilu mua kuambuluisha bela manyi ne mikoko mikuabu?

¹⁸ Ditabuja dia bela manyi bakese ne miliyo ya mikoko mikuabu nedikole pikalabu mua kudisangisha mu dituku dia 12 ngondo muinayi mu 2006. Nebenze Tshivulukilu tshia lufu lua Yezu anu muvuaye muambe ne: ‘Enzayi nunku bua kumvuluka.’ (Luka 22:19) Bantu bonso babuelamu badi ne bua kuvuluka malu onso adi Yehowa mubenzele ku butuangaji bua Muanende Yezu Kristo.

Diambulula

• Yehowa udi ne dijinga kayi bua bintu bidi mu diulu ne bidi pa buloba?

• Mbanganyi badi ‘bintu bidi mu diulu’? Mmunyi mudibu babisangishe?

• Mbanganyi badi ‘bintu bidi pa buloba’? Mbatekemene tshinyi?

[Nkonko ya dilonga]

[Kazubu mu dibeji 23]

“Mubidi wa Kristo”

Mu 1 Kolinto 10:16, 17 pavua Paulo wakula bua diumvuija dia diampa kudi bana babu ne Kristo balela ku nyuma, wakakula bua “mubidi” mu mushindu wa pa buawu. Wakamba ne: ‘Diampa ditudi tutshibula kadiena buobumue buetu mu mubidi wa Kristo anyi? Bualu bua diampa didi dimue, tuetu ba bungi tudi mubidi umue; bualu bua buonso buetu tudi tudisanga ku diampa dimue.’ Padi bena Kristo bela manyi badia diampa mu Tshivulukilu, badi baleja buobumue budi mu tshisumbu tshia bela manyi. Tshisumbu etshi tshidi bu mubidi, Kristo ke mutu watshi.​—Matayo 23:10; 1 Kolinto 12:12, 13, 18.

[Bimfuanyi mu dibeji 23]

Bua tshinyi anu bela manyi ke batu badia diampa ne banua mvinyo?

[Tshimfuanyi mu dibeji 25]

Ku diambuluisha dia mushindu udi Yehowa ulongolola malu, bifukibua bionso bidi mu diulu ne bidi pa buloba nebikale mu buobumue