Mbapangadike bua kubuelamu

MISANGU isatu ku tshidimu tshionso, bena Isalele bavua baya ku Yelushalema bua kuenza bibilu bia ku tshidimu ku tshidimu. (Dutelonome 16:16) Lelu, Bantemu ba Yehowa badi badienzeja bua kubuela mu bisangilu biabu binene bia ku tshidimu anu mudibi bileja mu muyuki udi ulonda eu wa malu adi Bantemu ba Yehowa benze muetu munemu mu République démocratique du Congo.

Bua bubi bua njila mu 1970, misangu mivule bivua bikole bua batangidi ba distrike ne bakuabu bana betu kuya mu bisangilu ebi. Bua kujadika, tulondeshayi mutangidi wa distrike William Smith mu luendu luende mutangile ku mpuilu wa tshijengu.

Udi wamba ne: “Mvula uvua muloke mupite bungi mu misoko ya mu njila ne muuje misulu tente. Tuvua tuya ku Kamina kutuvua ne mpuilu wa tshijengu. Tuvua ne bua kuenza kilometre mipite pa 320 bua kufikaku. Mvula ya katende kanue mayi ivua mishiye imue njila ne bitotshi bia bungi, ne miaba mikuabu njila kayivua imueneka. Umue muaba uvua tshibandabanda wakalua dijiba dinene. Vuatire, tuminyo ne mashinyi a bena mbulamatadi bivua bimane miaba yonso bualu bendeshi bavua bindile bua mâyi akepele. Ba bungi bavua bela meji ne: bavua ne bua kushala muaba au mbingu ibidi.

“Mvua mumanye ne: bana betu bavua bindile mpuilu eu ne muoyo mujima. Bamue bavua bende matuku a bungi ku makasa bua kubuelamu. Ngakakonka ni kuvua mukuabu njila wa kuyila. Ngakakema pakangambila bantu ne: Bantemu ba Yehowa bavua benze njila mukuabu mukese, kadi bu muvua buloba buikale butekete bikole, bakamba ne: anu mutangidi wa distrike yeye mupite bua kuya ku Kamina ke muntu mukuabu kushisha kupitshilamu.

“Bana betu ba mu misoko ibidi bavua benze mudimu munya ne butuku ne dituku diakalonda bua kuenza njila mukuabu uvua utshinguluka njila wa kumpala eu uvua munyanguke bikole. Diakamue meme kusangana bana betu ne meme kudilongolola bua kupitshila ne mashinyi mu njila au uvuabu benze. Bantu ba bungi bavua balue kumona bikala mashinyi a Landrover amvua nawu ni avua mua kupita. Tuakumvua bibi be patuakamona mashinyi ajama kunyima kua mamane kuenda katantshi kakese!

“Nansha muakapusa bana betu, mashinyi kaakanyunga to. Bakabungama bikole pa kumona bungi bua mudimu uvuabu benze. Nansha nanku, bavua anu bapangadike bua kufikisha mutangidi wa distrike ku mpuilu. Pakamona bantu bavua batubandila ne: njila mupiamupia au kavua muimpe, bakapingana ku mashinyi abu. Bana betu bakateta tshiakabidi. Musangu eu bakanji kutulula bintu bionso bivua binemeshe mashinyi bujitu bu mudi mikanda, biamu bia mêyi, motere wa nzembu ne bintu bikuabu bivuamu. Bobu kuanji kumbula bua kumbusha bitotshi, ne pashishe kuapusabu, mpindieu mashinyi kuasawu luendu bitekete bitekete.

“Kunyima kua dîba dimue, tuakela mbila ya disanka ne tuetu kuimba misambu ya Bukalenge, tusanka bua mutuakapita nansha muvuaku bitotshi. Bana betu bavua benze bualu buvua bena mashinyi makuabu bamona bu buvua kabuyi mua kuenzeka. Mpuilu wakenzeka bimpe bua mudimu mukole uvua bana betu benze. Yehowa uvua ne bantu bende ne wakabambuluisha bua kuenza disua diende.”

Lelu, bantu bonso batu babuela mu mpuilu idi yenzeka mu ditunga dinene edi badi ne dipangadika dia muomumue. Nunku, Bantemu ba Yehowa ne balunda babu ne bana babu balela, bonso batue ku 520 000, bakabuela mu mpungilu ya distrike ivua ne tshiena-bualu tshia ne: “Tutumikilayi Nzambi” ivua mienzeke kubangila mu ngondo wa Tshimungu too ne mu Kabitende 2005.

[Tshimfuanyi mu dibeji 31]

Bivua bikole bua kuenza ngendu bua bubi bua njila