‘Muntu ne muntu neadiambuile bujitu buende’

‘Muntu ne muntu neabadile malu ende kudi Nzambi.’​—LOMO 14:12.

1. Mbujitu kayi buakadiambuila bena Ebelu basatu?

BANSONGA basatu bena Ebelu badi basombele mu Babulona badi kumpala kua bualu budi bubalomba bua kusungula muoyo anyi lufu. Badiku ne bua kukukuila lupingu lunene mudi mikenji ya ditunga edi ilomba anyi? Peshi badi ne bua kubenga kulutendelela, kadi kuedibua mu tshikutu tshia kapia kakole? Shadalaka ne Meshaka ne Abedenego kabena ne dîba dia kuebeja muntu mukuabu tshidibu ne bua kuenza to; ne kabena bebeja muntu bualu. Badi bandamuna mukalenge kabayi belakana ne: ‘Umanye biebe, mukalenge, ne: katuena tukuatshila nzambi yebe mudimu, katuena tutendelela lupingu lua or luwakuimanyika.’ (Danyele 3:1-18) Bena Ebelu basatu aba bakadiambuila bujitu buabu.

2. Mu bulelela, mbanganyi bakangatshila Pilato dipangadika mu tshilumbu tshia Yezu Kristo, ne abi biakapangisha ngovena eu wa bena Lomo bua kupila anyi?

² Bidimu bitue ku nkama isambombo kunyima, ngovena Pontio Pilato udi uteleja malu adibu bafunde nawu Yezu. Yeye mumane kukonkonona tshilumbu etshi, udi umona ne: Yezu ki mmuenze bualu bubi nansha bumue to. Kadi bantu badi balomba bua bamushipe. Ngovena eu udi wanji kubenga bualu ebu, pashishe udi utuadija kuelakana bua kuambula bujitu buende ne witaba tshidi bantu bamuambila. Udi wowa mâyi ku bianza wamba ne: “Tshiena ne mashi a muntu muakane eu bualu.” Pashishe udi ufila Yezu bua bamushipe. Bushuwa, pamutu pa kudiambuila bujitu buende bua kuangata dipangadika pa tshilumbu tshia Yezu, Pontio Pilato udi ulekela bantu bakuabu bamuangatshiladi. Mâyi nansha baamba bungi kayi kaena mua kumbusha dipila dia mushindu mubi udiye mulumbuluishe Yezu.​—Matayo 27:11-26; Luka 23:13-25.

3. Bua tshinyi katuena ne bua kulekela bakuabu batuangatshila mapangadika?

³ Bidi munyi buebe wewe? Pautu usua kuangata mapangadika, utu wenza anu bu bena  Ebelu basatu anyi utu ulekela bakuabu bakuangatshila mapangadika anu bu Pilato? Kuangata mapangadika ki nkutekete to. Bidi bikengela kuikala muntu mukole mu nyuma bua kuangata mapangadika mimpe. Tshilejilu, baledi badi ne bua kuangata mapangadika mimpe bua bana babu batekete. Bushuwa, kuangata dipangadika kudi kutamba kukola nangananga patudi kumpala kua tshilumbu tshikole ne padiku malu a bungi a kuangata ne mushinga mu tshilumbu atshi. Kadi bujitu bua kuangata mapangadika ki mbujitu bunene budibu ne bua kutuambuila kudi aba bakadi bakumbaje “[ngikadilu ya mu] nyuma” nansha. (Galatia 6:1, 2) Kadi ebu mbujitu budi ‘muntu ne muntu ne bua kubadila malu ende kudi Nzambi’ bua bualu buabu. (Lomo 14:12) Bible udi wamba ne: ‘Muntu ne muntu neadiambuile bujitu buende.’ (Galatia 6:5) Kadi mmushindu kayi utudi mua kuikala tuangata mapangadika mimpe? Tshia kumpala, tudi ne bua kumanya muaba utudi ne bua kushikidila ne malu atudi tuenza ne kumanya tshitudi mua kuenza pamutu pawu.

Bualu bua mushinga butudi ne bua kuenza

4. Bupidia bua Adama ne Eva budi butulongesha bualu kayi bua mushinga mu diangata dia mapangadika?

⁴ Ku ntuadijilu, Adama ne Eva bakangata dipangadika didi dikebeshe ntatu minene. Bakasungula bua kudia tshimuma tshia mutshi wa lungenyi lua kumanya malu mimpe ne malu mabi. (Genese 2:16, 17) Tshivua tshibangatshishe dipangadika edi ntshinyi? Bible udi wamba ne: ‘Pakamona mukaji ne: mutshi au udi muimpe wa kudia ne muimpe ku mêsu ne udi mua kupa muntu lungenyi, yeye wakangata dimuma, wakadia, wakapesha mulume wende kabidi, ne yeye wakadia.’ (Genese 3:6) Dijinga dia kudisankisha ke divua diangatshishe Eva dipangadika edi. Bualu buakenzaye ebu buakafikisha Adama ku dimuidikija. Ke bua tshinyi bubi ne lufu ‘biakafika kudi bantu bonso.’ (Lomo 5:12) Bupidia bua Adama ne Eva budi butulongesha muanda wa mushinga udi utangila muaba udi bantu ne bua kushikidila ne malu adibu benza: Padi bantu kabayi balonda mibelu ya Nzambi, badi bangata mapangadika mabi.

5. Ntshinyi tshidi Yehowa mutupeshe bua kutulombola, ne tudi ne bua kuenza tshinyi bua tshituambuluishe?

⁵ Tudi ne disanka dia bungi bua mudi Yehowa Nzambi mutupeshe mibelu idi itulombola. Mukanda wa Nzambi udi utuambila ne: ‘Pawakeba kusesuka ku tshianza tshia balume, anyi ku tshianza tshia bakaji, matshi ebe neumvue dîyi difume kunyima kuebe, diamba ne: Njila ke yeye eu, endelamu.’ (Yeshaya 30:21) Yehowa udi uyikila netu mu Bible udiye mufundishe ku nyuma wende. Tudi ne bua kulonga Bible ne kupeta dimanya dijalame didi difuminamu. Bua kuangata mapangadika mimpe, tudi ne bua kuikala tudia ‘biakudia bikole bidi bua bantu bakole.’ Tudi kabidi tulonga mua ‘kujingulula tshidi tshimpe ne tshidi tshibi’ patudi kabidi ‘tuibidija meji etu.’ (Ebelu 5:14) Tudi tuibidija meji etu patudi tutumikila malu atudi tulonga mu Dîyi dia Nzambi.

6. Ntshinyi tshitudi ne bua kuenza bua kondo ka muoyo kutulombolaku bimpe?

⁶ Kondo ka muoyo kadi ne mushinga wa bungi patudi tuangata mapangadika. Kadi ne bukole bua kutulumbuluisha, kadi mua ‘kutupisha [anyi] kutubingisha.’ (Lomo 2:14, 15) Kadi bua kuoku kutulombola bimpe, tudi ne bua kukalongesha bulelela bua mu Dîyi dia Nzambi ne kuenza bua kikale katusaka bua kuditumikila. Mbipepele bua bibidilu ne bilele bia muaba utudi basombele kunyangabi kondo ketu ka muoyo  bituikala katuyi tukalongesha. Bantu badi batunyunguluke ne ngenyi ya bakuabu bidi kabidi mua kutupambuisha. Ntshinyi tshidi tshienzekela kondo ketu ka muoyo patudi misangu yonso tubenga kukateleja ne tushipa mikenji ya Nzambi? Mu bungi bua matuku kadi mua kulua bu ‘kuoshibue ne tshiamu tshipie ne kadilu,’ kashala kakatshiyi kumvua anu bu tshibangu tshishidisha kudi tshikudi. (1 Timote 4:2) Kadi, patudi tulongesha kondo ketu ka muoyo ne Dîyi dia Nzambi kadi katulombola bimpe.

7. Mbualu kayi bua mushinga butudi ne bua kuenza bua kuangata mapangadika mimpe?

⁷ Nunku bualu bua mushinga butudi ne bua kuenza bua kuangata mapangadika mimpe nkupeta dimanya dijalame dia mu Bible ne kuditumikila. Pamutu pa kuangata mapangadika mu tshiputuku, tudi ne bua kuanji kukebulula mibelu ya mu Bible ne kuibidija meji etu bua kuyitumikila. Nansha padibi bikengela kuangata dipangadika dia lukasa lukasa anu muvua Shadalaka ne Meshaka ne Abedenego ne bua kudiangata, tudi tudipaya bimpe patudi ne dimanya dijalame dia Dîyi dia Nzambi ne kondo ketu ka muoyo kalongesha kudi Dîyi edi. Bua kumvua mudi dikola mu nyuma dituambuluisha kabidi bua kuangata mapangadika mimpe, tumonayi malu abidi a mu nsombelu.

Mbanganyi batudi ne bua kusomba nabu?

8, 9. (a) Mmêyi kayi adi aleja mushinga wa kuepuka malunda mabi? (b) Kuikala ne malunda mabi kudi kumvuija anu kusomba ne bantu ba bikadilu bibi anyi? Umvuija.

⁸ Mupostolo Paulo wakafunda ne: “Kanudingibu; malunda mabi adi anyanga malu makane a bantu.” (1 Kolinto 15:33) Yezu Kristo wakambila bayidi bende ne: ‘Nuenu kanuena ba pa buloba.’ (Yone 15:19) Patudi tumanya mêyi aa, tudi tujingulula ne lukasa mushinga wa kuepuka disomba ne bena masandi, bena tshiendenda, bivi, bakuatshiki ba maluvu ne bantu ba buena aba. (1 Kolinto 6:9, 10) Kadi padi dimanya dietu dia bulelela bua mu Bible divula, tudi tujingulula ne: kusomba ne bantu aba patudi tubatangila mu filme, ku televizion anyi ku ordinatere peshi patudi tubala malu abu mu mikanda kudi paku mua kutuenzela bibi. Tudi mua kuamba bualu bua muomumue bua diyikila ne bantu ‘badi basokoka malu mabi abu mu lubombo’ ku Internet.’​—Musambu 26:4.

⁹ Tudiku ne bua kulamata bikole bantu badi mua kuikala ne bikadilu bimpe kadi kabayi bitabuja Nzambi mulelela anyi? Mukanda wa Nzambi udi utuambila ne: “Buloba bujima budi mu bukokeshi bua Mubi.” (1 Yone 5:19, MML) Nanku tudi tumvua ne: balunda babi kabena anu bantu badi balengulula malu mabi anyi ba bikadilu bibi to. Mbimpe kudia bulunda anu ne bantu badi banange Yehowa.

10. Ntshinyi tshidi tshituambuluisha bua kuangata mapangadika a meji adi atangila dipetangana ne bena panu?

¹⁰ Kakuena mushindu wa tuetu kuepuka dipetangana dionso ne bena panu to, ne ki mbatulombe mene bua kuenza bualu ebu nansha. (Yone 17:15) Kuyisha, kuya mu kalasa, kuya ku mudimu, bionso ebi bidi bitulomba bua kupetangana ne bantu badi kabayi batendelela Yehowa. Muena Kristo udi musele anyi musedibue kudi muntu udi kayi Ntemu wa Yehowa udi pamuapa ne bua kupetangana bikole ne bena panu kupita bantu bakuabu. Kadi meji etu mibidija neatuambuluishe bua kujingulula ne: kupetangana imue misangu ne bena panu bua malu a mushinga nkushilangane ne kudia nabu bulunda. (Yakobo 4:4) Nanku tudi mua kuangata mapangadika a meji adi atangila didisangisha nabu patudi katuyi mu kalasa bua kunaya anyi kuja maja, bua kuenza bibilu kampanda anyi kuenza fete wa bena mudimu.

Mudimu wa kuenza

11. Mbualu kayi bua kumpala butudi ne bua kutangila patudi tuangata mapangadika a mudimu wa kuenza?

¹¹ Kutumikila bimpe mibelu ya mu Bible kudi kutuambuluisha bua kuangata mapangadika a mushindu utudi tukumbaja bujitu buetu bua ‘kulama ba mu nzubu muetu.’ (1 Timote 5:8, MML) Bualu bua kumpala bua kutangila mmudimu muine, tshidiwu utulomba bua kuenza. Kusungula mudimu udi ukankamija malu adi Bible ubenga nkubi menemene. Nunku bena Kristo balelela kabena bitaba midimu idi  mua kuikala ipetangana ne ditendelela dia mpingu, diba, dielangana dia mashi anyi bilele bikuabu bidi Bible ubenga. Katuena kabidi ne bua kushima anyi kuibila, nansha bikala mfumuetu wa mudimu utulomba bua kuenza malu aa.​—Bienzedi 15:29; Buakabuluibua 21:8.

12, 13. Pa kumbusha mudimu muine, ngamue malu kayi a mushinga atudi ne bua kutangila bua kusungula mudimu wa kuenza?

¹² Kadi tshia kuenza ntshinyi bikala mudimu kawuyi ushipa dîyi disunguluke dia mu Bible? Padi dimanya dietu dia bulelela divula ne meji etu akola, tudi tufika ku dijingulula malu makuabu atudi ne bua kutangila. Netuenze tshinyi bikala mudimu utubueja mu malu adi Bible ubenga, bu mudi kuandamuna ku nshinga mu biro bia manaya a mfranga? Bidi bikengela kutangila kabidi malu bu mudi: tshidi tshipetesha mfranga idibu batufuta ne muaba utudi tuenzela mudimu eu. Tshilejilu, bituikala tudienzela mudimu wetu nkayetu, tudiku mua kuitaba bua kulaba mpentshi ku tshitanda tshia nzambi, ne patudi tuenza bualu ebu tukankamija ntendelelu wa dishima anyi?​—2 Kolinto 6:14-16.

¹³ Netuambe bishi bikala umue musangu mfumuetu wa mudimu muitabe bua kuya kulaba mpentshi ku tshitanda tshia nzambi tshia tshitendelelu tshia dishima? Dîba adi, tudi ne bua kutangila malu bu mudi bukokeshi butudi nabu pa mudimu eu udi wenzeka ne bunene bua tshitudi tuetu tuenza. Netuambe kabidi munyi bua dienza mudimu udi kauyi mubi, bu mudi wa kuabanya mikanda miaba yonso mu tshimenga tshitudi, kadi utulomba bua kuya too ne miaba idibu bakankamija bilele bibi? Dîyi didi mu Matayo 5:45 didi ne bua kutulombola bua kumanya tshia kuenza. Katuena kabidi ne bua kupepeja tshidi dienza mudimu eu butuku ne munya mua kuenzela kondo ketu ka muoyo. (Ebelu 13:18) Bushuwa, kuambula bujitu bua kuangata mapangadika mimpe adi atangila mudimu kudi kutulomba bua kuikala ne meji matue ne kulongesha kondo ketu ka muoyo.

“Umumanye yeye bimpe mu bienzedi biebe bionso”

14. Ntshinyi tshitudi ne bua kutangila misangu yonso patudi tukeba kuangata mapangadika?

¹⁴ Netuambe tshinyi bua mapangadika atudi tuangata bua malu makuabu bu mudi kutungunuka ne tulasa anyi kuitaba ta kubenga luondapu kampanda? Patudi tukeba kuangata dipangadika dionso, tudi ne bua kumanya mibelu ya mu Bible idi itangila bualu abu ne pashishe kuibidija meji bua kuyitumikila. Solomo Mukalenge wa meji wa mu Isalele wa kale wakamba ne: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’​—Nsumuinu 3:5, 6.

15. Tshilejilu tshia bena Kristo ba kumpala tshidi tshitulongesha tshinyi bua diangata mapangadika?

¹⁵ Malu atudi tusungula bua kuenza atu misangu yonso alenga bantu bakuabu, nunku katuena ne bua kupua bualu ebu muoyo nansha. Tshilejilu, bena Kristo ba kumpala kabatshivua ku mikandu mivule ya biakudia ya mu Mikenji ya Mose to. Bavua mua kudia biakudia bivua bijidika mu Mikenji ya Mose ne bivua kabiyi bibi mu malu makuabu. Nansha nanku, mupostolo Paulo wakafunda bua munyinyi wa nyama uvuabu mua kuikala bashipele ku ntempelo wa lupingu, wamba ne: ‘Bialenduisha biakudia muanetu wa mu Kristo, tshiena ndia munyinyi  too ne tshiendelele, bua tshilenduishi muanetu.’ (1 Kolinto 8:11-13) Paulo wakakankamija bena Kristo ba kumpala aba bua kunemeka kondo ka muoyo ka bakuabu bua kubenga kubalenduisha. Mapangadika etu kaena ne bua kutuvuija “balenduishi” ba bakuabu to.​—1 Kolinto 10:29, 32.

Keba meji a kudi Nzambi

16. Mmunyi mudi kusambila kutuambuluisha patudi tusua kuangata mapangadika?

¹⁶ Kusambila kudi kabidi kuambuluisha bikole patudi tusua kuangata mapangadika. Muyidi Yakobo udi wamba ne: ‘Biapanga mukuabu wenu meji, aalombe kudi Nzambi udi upa bonso ne mutshima mutoke kayi ubatobolola; neamupebue.’ (Yakobo 1:5) Tudi mua kulomba Yehowa bua atupeshe meji atudi nawu dijinga bua kuangata mapangadika mimpe. Patudi tuambila Nzambi mulelela malu adi matutonde ne tukeba mibelu kudiye, nyuma muimpe udi mua kutuambuluisha bua kumvua bimpe mvese ya mu Bible itudi tuelela meji ne udi mua kutuvuluija itudi mua kuikala bapue muoyo.

17. Mmunyi mudi bantu bakuabu mua kutuambuluisha bua kuangata mapangadika?

¹⁷ Bantu bakuabu badiku mua kutuambuluisha bua kuangata mapangadika anyi? Eyowa, Yehowa mmutupeshe bantu bakole mu nyuma mu tshisumbu. (Efeso 4:11, 12) Tudi mua kuyukila nabu nangananga padi dipangadika ditudi tusua kuangata dikale dinene. Bantu badi bajingulule malu a mu nyuma bikole ne badi ne dimanya divule dia malu a mu nsombelu badi mua kutuleja mêyi makuabu a mu Bible adi mua kuikala ne mushinga mu bualu butudi tusua kuenza ne adi mua kutuambuluisha bua ‘kujadika malu adi makane.’ (Filipoi 1:9, 10) Kadi tuamanya: Katuena ne bua kulekela bakuabu batuangatshila mapangadika to. Ebu mbujitu butudi ne bua kudiambuila.

Mapangadika mimpe atu anu apetesha masanka anyi?

18. Tudi mua kuamba tshinyi bua malu adi dipangadika dimpe mua kupetesha?

¹⁸ Mapangadika mangata ne muoyo mujima bilondeshile mibelu ya mu Bible atu misangu yonso apetesha masanka anyi? Eyowa, ndekelu wa bionso atu apetesha masanka. Kadi imue misangu adi mua kupetesha dikenga mpindieu. Shadalaka ne Meshaka ne Abedenego bavua bamanye ne: dipangadika diabu dia kubenga kutendelela lupingu lunene divua mua kubashipesha. (Danyele 3:16-19) Bia muomumue, kunyima kua bapostolo bamane kuambila bena ku tshilumbuluidi tshia bena Yuda ne: bavua ne bua kutumikila mêyi a Nzambi kumpala kua mêyi a bantu, bakabela mfimbu kumpala kua kubalekelabu. (Bienzedi 5:27-29, 40) Kabidi, ‘bikondo bidi malu atulukila’ bantu bidi mua kunyanga bualu buimpe buonso buvua dipangadika mua kupetesha. (Muambi 9:11) Bituikala ne lutatu nansha mutuvua bangate dipangadika dimpe, tuikale bajadike ne: Yehowa neatuambuluishe bua kulutantamena ne neatubeneshe ku ndekelu.​—2 Kolinto 4:7.

19. Mmunyi mutudi mua kuambula ne dikima bujitu buetu bua kuangata mapangadika?

¹⁹ Nunku patudi tuangata mapangadika, tudi ne bua kukeba mibelu ya mu Bible ne kuibidija meji bua kuyitumikila. Tudi ne dianyisha dia bungi mudi Yehowa mutupeshe nyuma muimpe ne bantu bakole mu nyuma badi mu tshisumbu bua kutuambuluisha. Bu mutudi ne bionso ebi, tuambulayi ne dikima bujitu buetu bua kuangata mapangadika mimpe.

Mmalu kayi audi mulonge?

• Mbualu kayi bua mushinga butudi ne bua kuenza bua kuangata mapangadika mimpe?

• Mmunyi mudi dikola mu nyuma dituambuluisha bua kusungula balunda?

• Ngamue malu kayi a mushinga atudi ne bua kutangila patudi tusungula mudimu wa kuenza?

• Ntshinyi tshidi Yehowa mutupeshe bua kutuambuluisha bua kuangata mapangadika?

[Nkonko ya dilonga]

[Tshimfuanyi mu dibeji 22]

Bupidia bua Adama ne Eva budi butupesha dilongesha dia mushinga

[Tshimfuanyi mu dibeji 24]

Kumpala kua kuangata dipangadika dinene, keba mibelu ya mu Bible