Nutuku nuyukila bimpe anyi?

KUKADI bidimu ndambu, banke mukuabu wa mu ditunga dia Japon wakenzeja dinaya divua dilomba muntu yonso wa bidimu 50 too ne ku 60 bua afundile mukajende anyi bayende mukanda wa mananga. Muntu mulume mukuabu wakafundila mukajende ne: “Imue misangu nebikuenze tuseku, kadi tshiakumvua bimpe to meme tshiyi mukuambilabi; ke bualu kayi ndi nkuambila ne dîyi dikole ne: Ndi nkuela tuasakidila wa bungi bua muuvua muitabe bua meme kukusela.”

Bilondeshile bilele bia miaba ya bungi nansha bia mu amue matunga a ku Asia, kabatu basue bua bantu kuamba patoke tshidibu badiumvua munda to. Nansha nanku bantu bapite pa 15 000 bakanaya dinaya dia kufundilangana mikanda ya mananga adi. Bantu ba bungi bakananga dinaya adi bikole, ke kuluabu kuenzulula kabidi dinaya dikuabu, ne pashishe kupatula mikanda ivua yakula bua mikanda ivua banayi batuminangane ayi. Bualu ebu buakaleja ne: bantu ba bungi batu bumvua bimpe bua kuambila bena dibaka nabu ne: mbabanange bikole. Kadi banga bantu kabatu basue mua kuamba nanku to. Kabatu basue bua tshinyi? Bidi mua kuikala nanku, bualu bitu bikengela kuanji kumbusha bundu ne kabidi bikengela kudienzeja bikole bua kufika ku diambila muntu bakuabu, tshilejilu bayebe anyi mukajebe ne: mmumunange.

Hitoshi Kato muntu mukuabu wakafunda mukanda udi wakula bua bantu badi bangata pansio, wakamba ne: mu Japon padi bena dibaka bakadi bakulakaje bafika ku dishipa dibaka, bakaji ke batu baashipa, bionso ebi anu bualu batu bashala balamine ba bayabu munda matuku a bungi bua malu mabi avuabu babenzele. Hitoshi udi wamba ne: “Mabaka atu afua nunku kabidi anu bualu padi ntatu ijuka, mulume ne mukaji kabatu bayukidilangana bimpe to.”

Padi mulume upeta pansio, udi mua kupapuka bikole bua kumona mukajende umuambila ne: udi ukeba bua kushipa dibaka diabu. Bidi mua  kuenzeka nanku anu bualu mbapitshishe bidimu bia bungi kabayi balejengana malu to. Pamuapa bavua mua kuikala batete kadi kabiyi bikumbana. Nanku pamutu pa kuikala wa tatu wa mamu, dîba dionso badi anu batandangana.

Kudiku mushindu wa mulume ne mukaji kujikija makokangana abu mu ditalala, muntu ne muntu uleja mukuabu mudiye udiumvua kabiyi bia matandu anyi? Numanye ne: kudi mibelu milenga ya dikema bua lutatu elu. Kadi kayena mu mukanda kampanda wa matuku aa udi ne mibelu ya bena dibaka to. Mibelu eyi idi mu Bible, mukanda wa kale eu udi bantu ba bungi banange bikole.