Nkonko ya babadi

Ntshinyi tshivua Yezu usua kuamba pakambilaye Nikodemo ne: “Kakuena muntu wakubanda mu diulu anu yeye wakufuma mu diulu, Muana wa muntu mene”?​—Yone 3:13.

Dîba adi Yezu utshivua pa buloba, kavua muanji kubanda anyi kupingana mu diulu to. Kadi malu atudi bamanye bua Yezu ne bua tshivuaye wambidila mêyi aa adi mua kutuambuluisha bua kumvua tshivuaye musue kuamba.

Yezu ‘wakafuma mu diulu’ mu ngumvuilu wa ne: kumpala uvua musombele mu diulu pamue ne Tatuende, kadi pakakumbana tshikondo, Yehowa wakela muoyo wa Yezu mu difu dia Malia, ke kuledibuaye muikale muntu wa panuapa. (Luka 1:30-35; Galatia 4:4; Ebelu 2:9, 14, 17) Pavua Yezu ufua, Yehowa uvua ne bua kumujula muikale muntu wa mubidi wa nyuma bua kupinganaye kabidi kudiye mu diulu. Ke bualu kayi matuku makese kumpala kua kumushipabu, wakasambila ne: ‘Tatu, untumbishe diatshimue nebe ne butumbi butuakadi nabu nebe diambedi buloba kabuyi buanji kuikalapu.’​—Yone 17:5; Lomo 6:4, 9; Ebelu 9:24; 1 Petelo 3:18.

Yezu kavua muanji kupingana mu diulu pakakulaye ne Nikodemo uvua Mufalese ne mulongeshi mu Isalele to. Bushuwa, muntu mukuabu nansha umue kavua muanji kufua ne kubanda mu diulu nansha. Yezu muine wakamba ne: Yone Mubatiji uvua muprofete mutambe bunene wa Nzambi, kadi muntu ‘udi mutambe bonso bukese mu bukalenge bua mu diulu mmumutambe yeye.’ (Matayo 11:11) Mupostolo Petelo kabidi wakumvuija ne: Davidi mukalenge wa lulamatu uvua mufue, kadi utshivua anu mu lukita; kavua mubande mu diulu to. (Bienzedi 2:29, 34) Kudi bualu buvuabu kabayi babandile mu diulu kudi bantu bakafua kumpala kua Yezu bu mudi: Davidi, Yone Mubatiji ne bantu bakuabu bavua ne ditabuja. Bobu bakafua kumpala kua Yezu kunzuluila bantu njila anyi kubapetesha mushindu wa kubishibua ku lufu bua kupeta muoyo mu diulu. Mupostolo Paulo wakafunda ne: anu bu mudianjidi anyi ntunga-mulongo, Yezu ‘mmunzulule njila mupiamupia wa muoyo’ wa mu diulu.​—Ebelu 6:19, 20; 9:24; 10:19, 20, MMM.

Kadi bu muvua Yezu kayi muanji kufua ne kubika, ntshinyi tshivuaye musue kuamba pakambilaye Nikodemo ne: “Kakuena muntu wakubanda mu diulu anu yeye wakufuma mu diulu, Muana wa muntu mene”? (Yone 3:13) Tuanji tumone malu avua Yezu wakuila anyi bualu buvuabu bayikila ne Nikodemo.

Pakalua mfumu wa bena Yuda au butuku butuku kudi Yezu, Yezu wakamuambila ne: ‘Bulelela, bulelela ndi nkuambila ne: Bikala muntu kayi muledibue tshiakabidi, kêna mumanye mua kutangila bukalenge bua Nzambi.’ (Yone 3:3) Nikodemo wakamuebeja ne: ‘Mmunyi mudibi mua kuenzeka nanku? Muntu udi mua kuledibua tshiakabidi munyi?’ Kavua mumvue dilongesha dia Nzambi adi divua diamba bua kubuela kua mu Bukalenge bua Nzambi to. Kuvuaku mushindu mukuabu uvuaye mua kumvua dilongesha adi bimpe anyi? Tòo, kakuvua muntu uvua mua kumumvuijadi bimpe to, bualu kakuvua muntu nansha umue ukavua muye mu diulu uvua mua kumvuija kalu ne kalu konso ka mua kubuela mu Bukalenge bua Nzambi to. Yezu nkayende ke uvua mua kumumvuija bualu abu. Yezu uvua mukumbane bua kulongesha Nikodemo ne bantu bakuabu malu aa, bualu Yeye uvua mufumine mu diulu.

Lukonko ludibu bele bua mvese eu ludi lutulongesha muanda wa mushinga mukole bua dilonga dia Dîyi dia Nzambi. Katuena ne bua kuelesha malongesha onso mpata anu bualu mvese kampanda udi umueneka mukole bua kumumvua to. Tudi ne bua kumvua bualu budi Bible wamba mu mvese kampanda ku diambuluisha dia mvese mikuabu idi nende lungenyi lua muomumue. Tshiatuambuluisha kabidi bua kumvua bimpe mvese mukole udi utatshisha mmalu adibu bakuila mu tshitupa tshidiye atshi.