Nkonko ya babadi

Ntshinyi tshidi tshileja ne: meji adibu bamba mu Nsumuinu 8:22-31 adi aleja Yezu Kristo kumpala kua kuluaye pa buloba?

Bible udi wamba bua meji mu mukanda wa Nsumuinu ne: ‘Yehowa wakamfuka ku tshibangidilu tshia bufuki buende, kumpala kua bintu biende bionso, ku tshibangidilu mene. Diambedi mikuna mile kayiyi mianji kujadikibua, kumpala kua mikuna mipuekele, ngakaledibua. Pakashimikaye bia mu diulu, ngakadiku, pa dîba adi ngakadi pepi nende bu muena mudimu wende. Ngakadi ne disanka ku dituku ku dituku, ngakadi nnaya kumpala kuende matuku onso. Ngakadi nsanka mu buloba buende budi ne bantu bashikamamu, ne disanka dianyi divule diakadi bua kusomba ne bukua bantu.’

Kabena mua kuakula mushindu eu mu mvese eyi bua meji adi nawu Nzambi anyi bua meji atu mu mutu wa muntu to. Bua tshinyi? Bualu badi bamba bua meji aa ne: ‘bakaafuka’ ku ntuadijilu kua mudimu wa difuka wa Yehowa. Pabi, Yehowa Nzambi utu yeye anuku, ne katshia kuonso eku utu anu ne meji. (Musambu 90:1, 2) Meji ende kaatu ne ntuadijilu to, kabatu nansha baafuke to. Meji aa ‘kabavua baalele’ to. Kabidi, badi baleja mudi meji aa akula ne enza malu. Bidi bituleja ne: meji aa mmuntu.​—Nsumuinu 8:1.

Mukanda wa Nsumuinu udi wamba ne: kubangila ku kale menemene meji aa avua pamue ne Mufuki wetu Yehowa bu “muena mudimu” wende. Diumvuija edi didi dikumbanyina Yezu menemene. Bible udi wakula bua bidimu bia bungi bivua Yezu muenze mudimu ne Yehowa kumpala kua kuluaye pa buloba wamba ne: ‘Yeye udi kumpala kua bintu bionso ne bintu bionso bidi bikuatakaja munda muende.’​—Kolosai 1:17; Buakabuluibua 3:14.

Kubikila Muana wa Nzambi bu meji nkukumbane menemene bualu yeye ke Muntu umuepele uvua mutuleje malu a meji adi Yehowa mulongolole ne mikenji yende kabidi. Mu bidimu bionso bivua Yezu mu diulu kumpala kua kulua pa buloba, uvua Dîyi dia Nzambi anyi Mutumibue. (Yone 1:1) Bible udi umumvuija kabidi bu ‘bukole bua Nzambi ne meji a Nzambi.’ (1 Kolinto 1:24, 30) Diumvuija edi ndikumbanyine Muana wa Nzambi uvua dinanga divuaye munange bantu dimusake bua kulambula muoyo wende bua kubapandisha!​—Yone 3:16.

[Tshimfuanyi mu dibeji 31]

‘Diambedi mikuna mile kayiyi mianji kujadikibua, ngakaledibua’