Mushindu udi diledibua dia Yezu dipetesha ditalala

DIMANYISHA dia se: ‘Ditalala dikale pa buloba munkatshi mua bantu [ba muoyo muimpe]’ kadivua nkayadi bualu bumuepele buvua butangila diledibua dia Yezu to. Pa kumbusha malu avua makemeshe bikole balami ba mikoko abu avua banjelu babamanyishe, banjelu bakamba kabidi malu a kudi Nzambi avua atangila Yezu (muana wakaledibua mu dîku dia Mariya ne bayende Yosefe). Dikonkonona malu akamanyishabu nedituambuluishe bua kumvua bimpe muyuki wa diledibua dia Yezu ne bua kujingulula tshivua banjelu basua kuamba menemene mu bualu buakalayabu bua ditalala munkatshi mua bantu.

Kumpala kua Mariya kupeta difu ne kulela Yezu, muanjelu Gabaliele wakalua kuyikila nende. Muanjelu wakamuela muoyo ne: ‘Muoyo [au wewe udibu banyishe bikole], Mukalenge udi nebe.’ Anu muudi pebe mua kuela meji, muoyo eu wakanyungulula Mariya lungenyi bikole ne pamuapa wakumvua ne buôwa. Muoyo uvuabu bamuele eu uvua mua kuikala umvuija tshinyi?

Gabaliele wakamba ne: ‘Mona, wewe newimite difu, neulele muana mulume, neumuidike ne: Yezu; yeye neikale munene, nebamuidike dîna ne: Muana wa Udi Mutambe Bunene wa mu diulu; Mukalenge Nzambi neamupe nkuasa wa butumbi wa tatu wende Davidi; neikale mukalenge wa nzubu wa Yakoba tshiendelele; bukalenge buende kabuena ne tshishikidilu.’ Mariya wakakonka muanjelu bua kumanya mushindu uvuabi mua kuenzeka, bualu utshivua kamama, kavua muanji kumanya balume. Gabaliele wakamuandamuna ne: uvua ne bua kupeta difu ku bukole bua nyuma muimpe wa Nzambi. Muana eu kavua mua kuikala bu bana bakuabu bonso to.​—Luka 1:28-35.

Mukalenge ukavuabu badianjile kumanyisha

Mêyi a Gabaliele akambuluisha Mariya bua kujingulula ne: baprofete ba kale bakavua bamane kuakula bua muana uvuaye mua kulela eu. Difika ku dimanya ne: Yehowa uvua ne bua kupesha muana wa Mariya ‘nkuasa wa butumbi wa tatuende Davidi’ divua ne bua kufikisha Mariya nansha muena Yuda mukuabu yonso uvua mumanye Mifundu Minsantu ku divuluka tshivua Nzambi mulaye Davidi Mukalenge wa Isalele.

Yehowa ukavua muambile Davidi mukana mua muprofete Natana ne: ‘Nzubu webe ne bukalenge buebe nebijadikibue ku mêsu kuebe tshiendelele; nkuasa webe wa butumbi neajadikibue tshiendelele.’ (2 Samuele 7:4, 16) Yehowa wakamba bua Davidi ne: ‘Nenjadike mulongo wa tunkanunuina tuende bua wikalaku tshiendelele, nenjadike nkuasa wende wa bukalenge bua ikalaku bu mudi diulu dikalaku ne matuku adi. Milongo ya tunkanunuina tuende neyilondangane kashidi, nkuasa wende wa bukalenge neikalaku kumpala kuanyi bu mudi dîba tshiendelele.’ (Musambu 89:20, 29, 35, 36) Bushuwa, dipatuka dia Mariya ne Yosefe mu ndelanganyi ya mu nzubu wa Davidi kadivua bualu bua mu mpukampuka to.

Kuvua kabidi makuabu malu akamanyisha baprofete mu Mifundu ya tshijila ya tshiena-Ebelu bua muana wa Davidi eu uvua ne bua kulua mukalenge. Mariya uvua ne bua kuikala pende mumanye bualu buakamanyisha Yeshaya ebu: ‘Bakutulelela muana, bakutupa muana mulume; bukokeshi nebuikale pa diapa diende. Nebamuidike dîna ne: Mubakemeshi, Muena Meji, Nzambi Mukole, Tatu wa Tshiendelele, Mukalenge wa Ditalala. Kuvudija kua bukokeshi buende ne kua ditalala kakuena kuikala ne nshikidilu, bua kujadika nkuasa wa bukokeshi wa  Davidi, ne bukalenge buende, ne bua kubukolesha ku kulumbulula kuakane ne ku buakane, mpindieu too ne tshiendelele. Lukunukunu lua Yehowa wa misumba neluenze bualu ebu.’​—Yeshaya 9:6, 7.

Nunku malu avua Gabaliele muambile Mariya kaavua anu bua kumumanyisha patupu ne: uvua ne bua kulela muana wa balume mu tshishima to. Muana uvuaye ne bua kulela eu uvua ne bua kuikala mupianyi wa bukalenge bua Mukalenge Davidi, mupianyi wa kashidi wa Bukalenge bujadika kudi Nzambi. Malu akamanyisha Gabaliele bua mudimu uvua Yezu ne bua kuenza adi ne mushinga wa bungi kutudi tuetu bonso.

Pakamanya Yosefe ne: mubangila wende Mariya uvua ne difu, wakangata dipangadika dia kumubenga. Uvua mumanye ne: muana au kavua wende yeye to, bualu yeye ne Mariya kabavua banji kumanyangana kasangu nansha kamue nansha. Elabi meji muvuabi ne bua kuikala bikole bua Yosefe kuitaba pavua Mariya umuambila kuvua difu divuaye nadi difumine. Bible udi utulondela ne: ‘Muanjelu wa Mukalenge wakamueneka kudiye mu tshilota tshiende, wakamba ne: Yosefe, muana wa Davidi, kutshinyi mua kuangata mukaji webe Mariya, bualu bua udiye muimita munda muende ngua kudi nyuma muimpe. Yeye nealele muana mulume, umuidike ne: Yezu, bualu bua yeye neasungile bantu bende ku mibi yabu.’​—Matayo 1:20, 21.

Bible kêna utumvuija bikala Yosefe uvua mumvue bimpe pavuabu bamuambila ne: muana eu uvua mua ‘kusungila bantu bende ku mibi yabu.’ Tshidibi, mêyi avuabu bamuambile au avua makumbane bua kujadikila Yosefe ne: nansha muvua Mariya ne difu, kavua muenze bualu bubi nansha bumue to. Yosefe wakenza muakamuambila muanjelu ne kuangataye Mariya kuende, bualu buvua buleja dibuela diabu dia mu dibaka.

Ku diambuluisha dia malu atudi bapete miaba mikuabu mu Mukanda wa Nzambi, tudi tujingulula tshivua muanjelu musue kuamba. Ku ntuadijilu, muanjelu wakatombokela Yehowa Nzambi wakela bumfumu buende mpata. Mifundu ya tshiena-Ebelu idi ileja ne: mu malu akamba muanjelu uvua mutomboke au muvua kabidi bua se: nkokeshilu wa Nzambi kavua muakane to, ne muntu nansha umue kêna mua kushala mulamate Yehowa padiye mu diteta.  (Genese 3:2-5; Yobo 1:6-12) Tshilejilu, Adama kakashala mulamate Nzambi to. Bua bubi buende ebu, bantu bonso mbapiane bubi, ne bubi ebu ke budi bulele lufu. (Lomo 5:12; 6:23) Kadi Yezu wakaledibua kayi ne bubi bualu Mariya kavua mupete difu ne muntu mulume kampanda wa pa buloba apa to. Pakitaba Yezu bua kufila muoyo wende mupuangane wa bumuntu bu mulambu muakanangane ne tshivua Adama mujimije bua kukuula bantu, wakapeta mushindu wa kusungila bantu ku mibi yabu ne wa kubapesha ditekemena dia kupeta muoyo wa tshiendelele.​—1 Timote 2:3-6; Tito 3:6, 7; 1 Yone 2:25.

Pavua Yezu pa buloba, wakafila kadiosha ka mushindu wajika ntatu yonso idi bubi bukebeshe. Tshilejilu, wakondapa bantu masama a mishindu yonso, kubisha too ne bafue. (Matayo 4:23; Yone 11:1-44) Bishima abi bivua kadiosha ka malu enzaye matuku atshilualua. Yezu nkayende wakamba ne: ‘Dîba nedilue diumvua bonso badi mu nkita dîyi diende, nebajuke.’​—Yone 5:28, 29.

Mêyi aa adi akula bua dibika ku lufu divua ne bua kuenzeka adi umvuija bua tshinyi diledibua dia Yezu (ne nangananga lufu luende) didi ne mushinga wa bungi buetu tuetu. Bilondeshile Yone 3:17, Nzambi wakatuma Muanende pa buloba ‘bua ba pa buloba basungidibue kudiye.’ Lumu luimpe elu ludi lutuvuluija bualu buakamanyishabu balami ba mikoko bavua balame mikoko yabu butuku buakalelabu Yezu.

“Lumu luimpe lua disanka dinene”

Luvua bushuwa “lumu luimpe lua disanka dinene” bua bantu bonso pakamanyisha banjelu diledibua dia ‘Musungidi, Kristo Mukalenge.’ (Luka 2:10, 11) Muana eu uvua ne bua kuikala Masiya, Muprofete munene ne Mfumu uvua bantu ba Nzambi bindile katshia kuonso aku. (Dutelonome 18:18; Mika 5:2) Muoyo ne lufu luende pa buloba bivua ne bua kuikala ne mudimu munene mu tshilumbu etshi tshia kujadikila bantu mudi Yehowa muikale mfumu wa diulu ne buloba, ke bualu kayi banjelu bakamba ne: “Butumbi buikale kudi Nzambi mu diulu.”​—Luka 2:14.

Bible udi ubikila Yezu ne: ‘Adama wa ku nshikidilu.’ Yezu wakaleja ne: kudi mushindu wa muntu kushala mulamate Yehowa nansha yeye mu diteta dikole dia munyi. (1 Kolinto 15:45) Nunku wakaleja mudi Satana muena mashimi mubiamubiale. Bua bualu ebu kuvua disanka mu diulu munkatshi mua banjelu badi balamate Yehowa.

Mpindieu tupinganayi ku lukonko elu: “Kudiku mushindu wa kutekemena se: bualu buakamanyisha banjelu butuku buakaledibua Yezu nebukumbane anyi?” Tudi tuandamuna ne dishindika dionso ne: eyowa, nebukumbane! Ditalala didi ne mushinga wa bungi bua tshidi Nzambi mulongolole bua buloba kukumbanatshi. Nzambi mmusue kabidi nsombelu mulenga apingane pa buloba. Pakumbana malu aa pa buloba bujima, bantu bonso nebenze malu ne dinanga ne muoyo umue. Nunku dikumbana dia disua dia Yehowa didi diumvuija kabidi dijikija dibutula dia bantu bonso badi babenga bumfumu buende. Elu ki ndumu luimpe kudi muntu yonso udi ukuata ku tshia Satana ne udi wamba mudi mikenji ya Yehowa mibi. Bua bantu badi ku tshia Satana, bualu ebu budi bumvuija kabutu kabu.​—Musambu 37:11; Nsumuinu 2:21, 22.

Tangila ne: banjelu kabavua bambile balami ba mikoko ne: ditalala ne muoyo muimpe bivua ne bua kuikala munkatshi mua bantu bonso to. Kadi bakamanyisha ‘ditalala munkatshi mua bantu [ba muoyo muimpe anyi] badi basankisha Nzambi.’ Mmumue ne: munkatshi mua bantu badi Nzambi munange ne badiye uleja muoyo muimpe. Bantu badi bitabuja Yehowa ne mutshima umue badi batuadija kulonda Yezu ne kumuidikija. Balume ne bakaji ba nunku badi bitaba bua kuleja kalolo ne luse kudi bakuabu, ki nganu bua katupa kîpi tshidimu tshionso to, kadi dituku ne dituku dionso.

Ngikadilu wa buena-Kristo udi ushala yeye tshidimu tshijima anyi?

Bukole bua lumu luimpe luakayisha Yezu mbushintulule nsombelu ya bantu bungi kabuyi kubala. Ba bungi mbalonde mêyi a Bible mu nsombelu wabu mujima. Bantu bavua benza kumpala malu anu muabu muvuabu basue mbatuadije kudiebeja tshivua Yezu mua kuikala muenze bu yeye muikale pa muaba wabu. Bamue bavua badifile mu dikeba dia bintu ne masanka mbafike ku dijingulula mushinga wa malu a Nzambi ne wa kuambila bantu nabu malu aa. Bantu badi benza mudimu eu badi badienzeja  bua kuleja kalolo ne bulenga munkatshi mua tshidimu tshijima. Etshi ki ntshiudi utekemena kudi bena Kristo balelela anyi?

Bu bantu bonso ba meji mimpe bakonkonone mushinga ne diumvuija dia mukenji wa ditalala wakamanyisha banjelu ne batumikile malu aa, nsombelu wa pa buloba uvua mua kuikala munga mushindu.

Malu avuabu balaye akamanyishabu bua diledibua dia Yezu adi ajadikila bantu badi Nzambi uleja muoyo muimpe ne: badi mua kupeta bua kashidi ne tshiendelele ditalala dilelela. Kuena ujinga ditalala edi anyi? Tudi bajadike ne: mukenji mulenga wakamanyisha banjelu pakaledibua Yezu neukumbane kakuyi mpata. Pamutu pa kuikalayi miaku tshianana ya kayiyi ne mushinga mu tshikondo tshia Nowele, ditalala didi ne bua kulua muanda mulelela bua kashidi ne tshiendelele.

[Bimfuanyi mu dibeji 7]

Ngikadilu wa buena-Kristo udi ne bua kushala tshidimu tshijima