Nowele udi uya mutangile kuepi?

KUDI mpindieu bidimu dikumi mu ngondo wa dikumi ne muibidi eu, bakapatula mu tshikandakanda kampanda tshiena-bualu etshi: “Mu dikeba Nowele.” (U.S.News & World Report) Bafundi ba tshiena-bualu etshi bavua basue kumanya bikala Nowele mulue “muakane mmumue ne: katshiyi kabidi bua kupetesha bangenda-mushinga makuta.” Malu atshidi anu mushindu au anyi peshi mmashintuluke?

Tshiena-bualu atshi tshivua tshiumvuija bimpe muvua malu mashale anu muvuau amu. Tshidi tshiamba ne: “Kumpala kua Constantin . . . kuluaye mukalenge wa bena Lomo mu bidimu bia nkama isatu bikondo bietu ebi, kakuena muaba nansha umue udibu bafunde bua disekelela dia diledibua dia Kristo to.” Ebi bidi bileja ne: “Kakuvua muntu uvua mumanye bushuwa dituku divuabu balele Yezu to.” Tshiena-bualu etshi tshidi tshileja ne: “Evanjeliyo kayena yakula ni mbua tshidimu, ni mbua ngondo muine nansha bua dituku to.” Bilondeshile mumanyi wa malu a kale mukuabu wa mu iniversite wa mu Texas, “kusekelela diledibua dia Yezu kakuvua ne mushinga bua bena Kristo ba kumpala.”

Muinshi mua katshiena-bualu ka ne: “Muvua nsombelu mua kuikala,” tshikandakanda atshi tshivua tshileja “mushindu uvua ekeleziya mufike ku disungula dituku dia 25 dia ngondo wa dikumi ne muibidi.” Tshidi tshijadika ne: “Lungenyi ludi bantu ba bungi bitaba bikole ludi ne: musekelelu au uvua ne tshipatshila tshia kuvuija Saturnale ne mafesto makuabu a bampangano ne tshimuenekelu tshia buena Kristo.” “Pavua bamfumu ba ekeleziya bateke Nowele ku ndekelu kua ngondo wa dikumi ne muibidi, tshikondo tshivua bantu ne tshibidilu tshia kuenza mafesto, bavua bakeba bua disekelela dia diledibua dia Musungidi dikale dimanyike bikole pa buloba.” Patuakafika munkatshi mua bidimu bia 1800, ke pavua tshilele tshia kusumba ne kupeshangana bintu tshituadije. “Tshilele tshipiatshipia tshia kupeshangana bintu etshi bua Nowele tshivua tshipatuishe kamusandu kavua kapatula makuta a bungi; nunku bangenda-mushinga ne bantu batu basaka bakuabu bua kusumba bintu kutuadijabu kuakula bikole bua tshikondo atshi.”

Nanku kakuena bualu bua nsongo budi mua kutuambuluisha bua kutekemena bua Nowele kuyaye mutangile ku buena-Kristo bulelela to, kadi udi uya mutangile kua tshianana. Nansha mudi Nowele wa lelu muikale ne “malu a bungenda-mushinga bukole,” bena Kristo balelela kabatu banji kutekemena bua kusekelelabu diledibua dia Yezu to. Kadi, Bible udi wakula bikole bua mulambu uvua Yezu mufile pavuaye mufue ne mubishibue bua kubanda mu diulu. (Matayo 20:28) Mulambu eu neushale ne mushinga bua kashidi ne tshiendelele.