Mushinga wabi mmupite wa tshimuenekelu tshia diulu

BISAMBA pa kuamba bionso bitu ne nsumuinu idi yakula bua tshimuenekelu tshia diulu anyi mudi kulu kumueneka. Tshilejilu, bamue bantu batu bamba ne: Diulu dikunze dilolo, bendeshi ba matu mu masanka; diulu dikunze mu dinda, bendeshi ba matu mu madilu. Bantu batu balonga malu a tshimuenekelu tshia diulu badi bamba ne: kudi bintu bidi bienza bua diulu dikale mushindu kampanda ku dilolo ne bienzeke mu dinda anu mudi kasumuinu aka kamba.

Nansha pavua Yezu pa buloba, bantu bavua balonga malu a mushindu udi kulu. Ke bualu kayi Yezu wakambila bamue bena Yuda ne: ‘Mu dilolo nutu nuamba ne: Mvula kêna ulua, bualu bua diulu didi dikunze; mu dinda nutu nuamba ne: Lelu mvula nealue, bualu bua diulu didi dikunze kunzuu, mvula udi mufinde. Nudi bamanye mua kujingulula mpala wa diulu, kadi . . .’ Kadi tshinyi kabidi bakuetu? Yezu udi utungunuka, wamba ne: “Kadi kanuena bamanye mua kujingulula bimanyinu bia bikondo.”​—Matayo 16:2, 3.

“Bimanyinu bia bikondo” ebi ntshinyi? Mbimanyinu bivua bileja patoke ne: Yezu ke Masiya mene uvua Nzambi mutume. Malu avua Yezu wenza avua amueneka patoke anu bu mudi bukunze bua diulu. Kadi pabi, bena Yuda ba bungi bavua babenga kumona bimanyinu bivua bileja ne: Masiya ukavua mulue. Bimanyinu ebi mbipite bimanyinu bia tshimuenekelu tshia diulu.

Lelu eu kabidi kudi bimanyinu bidi bipite bimanyinu bia tshimuenekelu tshia diulu ku mushinga. Yezu wakamba ne: bavua ne bua kubutula bulongolodi bubi ebu, bua kuenza bulongolodi buimpe. Wakafila bimanyinu kampanda bivua mua kuleja bionso bisanga pamue dîba divua dibutuka dia bulongolodi ebu ne bua kusemena pabuipi. Mvita idi yenzeka pa buloba bujima ne biyole bia nzala ke bimue bia kudibi. Yezu wakamba ne: patudi tumona bimanyinu ebi, tumanye ne: Nzambi ukadi pa kulua kubutula bulongolodi ebu.​—Matayo 24:3-21.

Udi umona “bimanyinu bia bikondo” anyi?