Ditabuja dia mamu didi ditamba dibungama bukole

“Panudi nubala mukanda eu mmumue ne: tshiena mushale ne muoyo kunyima kua dimpanda, ne tshitshiena kabidi nenu to.”

MÊYI aa ngua ntuadijilu a mu mukanda uvua mamu mukuabu muena Kristo diende Carmen, mufundile bana bende ba bakaji basatu (wa kumpala uvua ne bidimu 25, muibidi 19 ne wa mukala 16). Dimupanda kadiakapita bimpe to, ne bia dibungama, Carmen wakafua.

Kushiya bana ba bakaji basatu mu tunyinganyinga tua mushindu eu mbualu bua dibungama dia bungi. Nansha nanku, ditabuja dikole divua nadi mamu eu kudi Yehowa ne mu milayi yende diakatamba dibungama edi bukole, bualu diakamupesha ditalala dia mu mutshima divua dimueneka patoke mu mukanda wende uvua ne mêyi alenga ku muoyo. Tangila mêyi akafundilaye bana bende ba bakaji aba.

“Tshia kumpala, ndi musue kunuambila ne: ndi mununange ne muoyo wanyi mujima. . . . Nudi bana bimpe menemene bandi mulele, ndi ne disanka dia bungi be bua bualu buenu.

“Mvua mua kuikala musanke bua kushala ne muoyo pamue nenu too ne mu buloba bupiabupia budi Nzambi mulaye . . . , kadi bu mudibi kabiyi mua kuenzeka nanku, ndi mulombe Nzambi bua anuambuluishe bua nushale ne lulamatu anu munutu nalu pa tshibidilu. Tudi batantamene ntatu ya bungi pamue, ne Yehowa katu muanji kutulekela to. . . . Nenku nutungunuke ne kulonda mibelu idiye ufila mu bulongolodi buende, ne nutungunuke ne kukuatshisha tshisumbu ne bakulu. Nuikale nuyisha pa tshibidilu, ne nunange bana betu bonso.

“Dishiyangana dianyi nenu nedikale anu dia tshitupa tshîpi. . . . Ndi ndulomba luse bua bilema bionso bindi munuenzele ne bua misangu yonso imvua tshiyi munumvue bimpe anyi imvua tshiyi munuambile mundi mununange bikole. . . . Ndi mumanye ne: yonso wa kunudi udi ne ende majinga. Yehowa mmumanye bualu abu bimpe kunupita nuenu, ne neanupeshe tshintu tshionso tshinudi natshi dijinga ne neanufute bua bionso binudi batantamene.

“Kanupu muoyo tshipatshila tshienu tshia kupeta muoyo mu buloba bupiabupia, ne nutungunuke ne kuluangana bua kutshikumbaja. Yehowa anubeneshe ne anukoleshe bua nushale ne lulamatu too ne ku ndekelu. . . . Kanubungami to, bana banyi basuibue. Ndi mununange bikole!”

Dibungama didi mua kukuata muntu yonso dîba kayi dionso. Mukalenge Solomo wakafunda ne: kudi ‘bikondo bidi malu [adi kayi malongolola] atulukila’ bantu bonso. (Muambi 9:11) Kadi bantu badi ne ditabuja dikole badi mua kuikala ne dishindika dia buena dia mupostolo Paulo, wakamba ne: ‘Ndi ngitabujijibua ne: kakuena lufu, kakuena muoyo, kakuena tshintu tshionso tshikuabu tshifukibua tshidi ne bukole bua kutupandulula ku dinanga dia Nzambi didi mu Kristo Yezu Mukalenge wetu.’​—Lomo 8:38, 39; Ebelu 6:10.