Dîna dia Nzambi mu mijiki ya mu Russie

MU TSHIDIMU tshia 1877, Modest Moussorgsky, muimbi wa misambu wa mu ditunga dia Russie mumanyike bikole, wakapatula musambu uvua wakula bua bualu buakenzeka mu matunga adibu batele mu Bible. Wakafundila mulunda wende mukuabu wamba ne: “Ndi mufunde musambu wa bualu bua mu Bible bua Jesus Navine [anyi Yoshua] budi bupetangana buonso ne Bible, bulonda kabidi njila uvua Navine muendele pavuaye mutshimune mu Kanana.” Moussorgsky uvua mupatule kabidi mu Bible malu makuabu ne mêna a bantu muenze nawu misambu mikuabu, bu mudi wa “Ditshimuna dia Saneheliba.”

Tshia mushinga ntshia ne: mu musambu wa “Jesus Navine” ne mu wa “Ditshimuna dia Seneheliba” uvuaye muimbe mu 1874, Moussorgsky udi wakulamu bua Nzambi utelamu ne dîna diende mu tshiena Russie ditu mu Mifundu Minsantu ya mu tshiena Ebelu misangu mitue ku 7 000 mu maleta matshintamane anayi aa: יהוה (YHWH).

Nanku, misambu ya Moussorgsky eyi idi ileja ne: bena mu Russie bakavua bamanye dîna dia Nzambi dia mu Bible dia Yehowa kumpala kua bidimu bia 1900. Bidi nanku, bualu Yehowa yeye nkayende uvua muambile Mose ne: “Edi ndîna dianyi tshiendelele, etshi ntshivulukidi tshianyi kudi bantu bonso.”​—Ekesode 3:15.

[Tshimfuanyi mu dibeji 32]

Foto wa nzubu wa tshilongelu tshia mijiki ku Saint-Pétersbourg mu 1913 mudibu balamine mukanda wa misambu ya Moussorgsky

[Mêyi a dianyisha bua bimfuanyi mu dibeji 32]

Foto wa mijiki: The Scientific Music Library of the Saint-Petersburg State Conservatory named after N.A. Rimsky-Korsakov; street scene: National Library of Russia, St. Petersburg