‘Nebakuame mamuma too ne mu bununu buabu’

BANTU ba bungi ba mu matunga a kumpenga kua mbuwa wa Mediterane batu bakuna mabue a tunkinda mu mpangu yabu. Mabue aa mmamanyike mutuwu mimpe kumona ne bua ngaji yawu mimpe mitambe. Kabidi, atu atungunuka ne kutumpuka nansha bidimu bipite pa lukama.

Solomo mukalenge wa Isalele wakela kasala uleja bulengele bua nsongakaji muena Shulama umufuanyikija ne dibue. (Musambu wa Solomo 7:7) Mukanda wa Plantes de la Bible udi wamba ne: “Muaku wa mu tshiena Ebelu udibu bibikila nawu dibue dia kankinda udi ‘tàmâr.’ . . . Wakalua tshifuanyikijilu tshia bulengele bua mubidi ne bua mpala kudi bena Yuda ne bavua binyika bansongakaji dîna diawu bikole.” Tshilejilu, bavua babikila muakunyi wa Solomo wa bakaji uvua muimpe kumona ne: Tamâ. (2 Samuele 13:1) Bamue baledi batshidi bapesha bana babu ba bakaji dîna edi too ne lelu.

Bansongakaji bimpe kumona ki mbatubu bafuanyikija ne mabue nkayabu to. Muimbi wa misambu wakamba ne: ‘Bantu bakane badi bakola bu dibue dia ngaji, badi balepa bu mutshi wa cèdre wa mu Lebanona. Badi bakunyibua mu nzubu wa Yehowa, badi bakola mu biendedi bia tshitendelelu tshia Nzambi wetu. Nebakuame mamuma too ne mu bununu buabu, nebikale mitshi miule tente ne mâyi ne idi mibishi tshiendelele.’​—Musambu 92:12-14.

Pa kufuanyikija, bantu badi benzela Nzambi mudimu ne lulamatu ku bukulakaja buabu mbafuanangane bikole ne mabue adi malengele. Mukanda wa Nzambi udi wamba ne: ‘Nsuki mitoke tô idi tshifulu tshia butumbi, nebatshipete mu njila wa buakane.’ (Nsumuinu 16:31) Nansha mudi bukole buabu mua kukepela padibu benda bakulakaja, bakulakaje badi mua kushala ne bukole mu nyuma padibu balonga Dîyi dia Nzambi pa tshibidilu. (Musambu 1:1-3; Yelemiya 17:7, 8) Bua mibelu mimpe itu nayi bakulakaje ba lulamatu ne tshilejilu tshiabu tshimpe, badi bakolesha bakuabu bikole ne batungunuka ne kukuama mamuma ku tshidimu ne ku tshidimu. (Tito 2:2-5; Ebelu 13:15, 16) Anu bu dibue dia kankinda, bakulakaje badi mua kukuama mamuma ku bununu buabu.